EDWIRƐ BƆ ƆBOKA SO 3

**Kyɛbɔ Ɛkɔfa Nya Asetena Nu Anigye Daa! Nwomaa Ne Kɔyɛ Bible Adesũa Ɔ**

Koraka bɛyɛ Nya Asetena Nu Anigye Daa! nwomaa ne, bɛtole bɛ boase bɛyɛle nhwehwɛmuɛ, na bɛbɔle yenwo mbaeɛ. Yeti sɛ ɛpena kyɛ ɛfa nwomaa ne yɛ adwuma yé wɔ asɛnga nu, na ɛne mmenia sũa maa bɛte yebo a, nea bɔ odikyɛ ɛyɛ ɔ:

Kora bɔ ɛkɔɔyɛ adesũa ne

1. Ɛyɛ a siesie wɔnwo yé. Sɛ ésiesie wɔnwo a, to wɔ boase susu bɔ wɔ sũaniɛ ne dé di nanwo. Afei nea bɔ ɔkɔso wɔ y’asetena nu, ɔne kyɛbɔ ɛkɔboka ye maa ɔkɔfa bɔ osũa ne kɔyɛ adwuma ɔ. Nekaa bɔ ebia ɔkɔyɛ se kɔma ye kyɛ ɔkɔte yebo, anaa ɔkɔfa kɔyɛ adwuma ne, bɔ mmɔden kyɛ ekonwu ye. Edwirɛ ne vidio ahoroɛ bɔ ɔwɔ “Nea Ɛhe Koso” bue berɛ ne, bɔ mmɔden kyɛ ekonwu bɔ ɔkɔhora kɔboka wɔ sũaniɛ ne, na ɛne ye besusu yenwo mmerɛ bɔ ɛmɔ sũa nikyee ne.

Mmerɛ bɔ ɛmɔyɛ adesũa ne

2. Sɛ wɔ sũaniɛ ne kuro a, ɛmɔbɔ mbaeɛ bɛhyɛ yebo, na ɛmɔbɔ mbaeɛ beyie. Sɛ ɔnguro de a, yakyi mbaeɛ ne, na ɛmɔtoa adesũa naso.
3. Ɛyɛ a nnédwudwo pẽe. Nnɛkɔfa edwirɛ biemɔ bawurawura adesũa nanu, na ɛyɛ a ma wɔ sũaniɛ ne atẽe má odwudwo.
4. Bue biala bɔ ɛmɔ kodwu so ne, dimoa kenga bɔ sɔ bue ne kã yenwo dwirɛ ne. Afei adesũa ahoroɛ bɔ ɔwɔ sɔ bue nanu ne, ɛkɔhora kɔbobɔ ye dwirɛti ne biemɔ so.
5. Sɛ ɛmɔ sũa bue biala beyie a, nzɛmmisa bɔ ɔwɔ sɔ bue ne ndimu nanu ne, ɛmɔsusu yenwo. Afei boka wɔ sũaniɛ ne ma ɔkae nikyee titire bɔ osũane ye wɔ sɔ bue nanu ne.
6. Adesũa biala bɔ ɛmɔ kodwu so ne:
1. Ɛmɔ kenga ngyekyɛmuɛ ne.
2. Ɛmɔ kenga tworɔnzɛm biala bɔ bahworɔ yenwo kyɛ “Kenga” ne.
3. Tworɔnzɛm bie wɔ berɛ a, bɛhworɔlle yenwo kyɛ kenga. Nakoso ɛnea na ɔkɔboka wɔ sũaniɛ ne a, yede ɛmɔkenga.
4. Sɛ ɔkɔyɛ yé a, vidio biala bɔ bahworɔ yenwo kyɛ “Bɔ” ne, ɛmɔ ye.
5. Nzɛmmisa biala bɔ ɔwɔ adesũa nanu ne, maa ɔye yenoa.
6. Foto bɔ ɔwɔ “Sua Pẽe Bokaso” bue berɛ ne, ma wɔ sũaniɛ ne nea, na ɛmɔ susu yenwo.
7. Alaka bɔ bato ye dumaa “Botayɛɛ” ne, fa boka wɔ sũaniɛ ne má onwu kyɛbɔ okonya ngɔsoɛ wɔ Yehowa sõen nu ɔ. Afei hyɛ ye ngunaen kyɛ ɔfa botayɛɛ bɔ ɔwɔ berɛ ne osie yenye so. Sɛ ole botayɛɛ foforɛ bie koso a, ɔkɔhora kɔfa kosie yenye so.
8. Bisa wɔ sũaniɛ ne kyɛ, mmerɛ bɔ ósiesie yenwo ne, aso onwuni vidio, anaa edwirɛ bie wɔ “Nea Ɛhe Koso” bue berɛ bɔ yenye gyele yenwo anaa?
9. Sɛ ɛmɔ tena ase kyɛ ɛmɔ sũa nikyee a, ɛmɔ bɔ mmɔden kyɛ sɛ ɔkɔyɛ yé a, ɛmɔ koyie adesũa kõ.

Mmerɛ bɔ ɛmɔ asũa nikyee bayie ne

7. Ɛyɛ a kɔso dwenedwene wɔ sũaniɛ nanwo. Srɛ Yehowa kyɛ ɔboka ye má onya ngɔsoɛ. Afei koso, srɛ Yehowa kyɛ ɔboka wɔ má enwu atẽe bɔ ɛkɔfa so kɔboka wɔ sũaniɛ ne ɔ.