Boka Wɔ Bible Asuafoɛ Nemɔ Ma Bɛhora Besi Gyinayɛɛ Bɛsõ Yehowa

1-2. (a) Nzu yeɛ ɔmaa ɔyɛ se ma Bible asuafoɛ biemɔ kyɛ bɛkɔsõ Yehowa ɔ? (b) Nzu yeɛ yekosusu yenwo wɔ adesua he anu ɔ?

NNINGYEIN benimɔ yeɛ né ɔmaa ɔyɛ se ma wɔ kyɛ ɛkɔɔyɛ Yehowa Danzeniɛ ɔ? Ebiaa né esuro kyɛ bɛbɔ ɛne bɛ yɛ adwuma, wɔ damvomɔ, anaa w’abusuafoɛ kɔtane wɔnye. Anaakyɛ né enwu ye kyɛ ɛngɔhora Nyameɛ mmraa ne mukoraati so di. Sɛ sɔ a, yede bɔ yeti yeɛ ɔyɛ se ma bɛbɔ yɛne bɛ sua nikyee ne kyɛ bɛkɔɔsõ Yehowa ne, ɛkɔte yebo.

² Né Yesu se kyɛ sɔ nningyein nemɔ kɔhora kosi ebie atee kyɛ ɔkɔsõ Yehowa ɔ. (Mat. 13:​20-22) Yeti bɛbɔ né ɔyɛ se ma bɛ kyɛ bekoli ye si ne, onyane bɛnwo aboterɛ. Afei ɔmaa ye asuafoɛ nemɔ nwuni kyɛbɔ bɛkɔboka sɔ mmenia nemɔ maa bekonwu (1) bɔ ɔmaa bɛngora bɛnzo Yehowa ɔ, (2) kyɛbɔ bekonya ɔdɔ pirikua bɛkɔma Yehowa, (3) kyɛbɔ bɛkɔfa Yehowa soen bekoli moa, ɔne (4) bɔ bɛkɔyɛ mmerɛ bɔ mmenia tane bɛnye ne. Bɔ Yesu hyirele ye asuafoɛ nemɔ ne, sɛ yɛne ebie sua Nya Asetena Nu Anigye Daa! nwomaa ne a, yɛkɔyɛ sɛɛ né yafa yaboka ye maa wasi gyinayɛɛ waasõ Yehowa?

BOKA WƆ SUANIƐ NE MA ONWU BƆ ƆMAA ƆNGORA NZO YEHOWA NE

3. Nzu yeɛ ebiaa né ɔmaa ɔyɛ se ma Nikodemo kyɛ ɔkɔɔyɛ Yesu suaniɛ ɔ?

³ Né Nikodemo le dibea wɔ Yudafoɛ nemɔ anu, yeti né ɔyɛ se ma ye paa kyɛ okooli Yesu si ɔ. Yesu hyɛle ye asɛnga adwuma nabo kɔyɛ bosome nzia pɛ si ne, Nikodemo nwuni kyɛ Nyameɛ yeɛ wasoma ye ɔ. (Yoh. 3:​1, 2) Nakoso né Nikodemo ‘suro Yudafoɛ nemɔ,’ yeti kɔngɔen yeɛ ɔhɔle Yesu berɛ ɔ. (Yoh. 7:13; 12:42) Bɔ yeti yeɛ ɔyɛle sɔ yeɛ ole kyɛ, ebiaa né osuro kyɛ sɛ ɔbadi Yesu si a, annea a ye dibea kofi ye sa.a

4. Sɛɛ yeɛ Yesu bokale Nikodemo maa onwuni bɔ Nyameɛ pena kyɛ ɔyɛ ɔ?

⁴ Né Nikodemo se Mose Mmraa ne paa, nakoso né odikyɛ ebie boka ye kora né wahora wanwu bɔ Nyameɛ pena kyɛ ɔyɛ ɔ. Yede, sɛɛ yeɛ Yesu bokale ye ɔ? Onyane yenwo alagye, yeti mmerɛ bɔ Nikodemo wale ye berɛ kɔngɔen po ne, ɔne ye bɔle ngɔmmɔ. Afei koso, Yesu maa Nikodemo nwuni bɔ ɔyɛ a, ɔkɔmaa ɔkɔhora kɔɔyɛ ye suaniɛ ɔ. Yeɛ ole kyɛ, ɔkɔsakyera kofi ye bɔne nwo, ɔkɔmaa bɛkɔbɔ ye asu wɔ nzue nu, na wanya Nyameɛ Awa nanu gyidie.—Yoh. 3:​5, 14-21.

5. Bɔ wamaa wɔ Bible suaniɛ ne ngora nzo Yehowa ne, ɛkɔyɛ sɛɛ na aboka ye maa wanwu ye?

⁵ Sɛ wɔ Bible suaniɛ se tworɔnzɛm nanu sɛɛ po a, nningyein bɔ ɔmaa ɔyɛ se ma ye kyɛ ɔkɔsõ Yehowa ne, ebiaa sana ɛboka ye maa onwu ye. Ebiaa né ye adwuma ale ye abɔ so, anaa ye abusuafoɛ tane yenye, yeti yeɛ ɔmaa ɔngora nzi sɔ gyinayɛɛ ne. Yeti ɛyɛ a nya yenwo alagye na boka ye. Ɛkɔhora kɔto wɔsa kɔfrɛ ye kɔwa w’awuro maa ɛmɔkodidi, anaa ɛne ye kofite kɔɔtena nekaa bie kɔbɔ ngɔmmɔ. Sɛ ɛyɛ sɔ a, ebiaa ɔngɔyɛ se kyɛ ɔkɔhã bɔ ɔha ye nanwo dwirɛ kohyire wɔ ɔ. Bɔ odikyɛ ɔyɛ fa ɔhaw nanwo ne, boka ye maa onwu ye. Ma onwu ye kyɛ nna wɔ ti yeɛ odikyɛ ɔyɛ sɔ ɔ, na mmom ɔdɔ bɔ ole ma Yehowa nati ɔ.

6. Ɛkɔyɛ sɛɛ né aboka wɔ Bible suaniɛ maa wanya anwoserɛ wafa bɔ osua ne wabɔ ye bra? (1 Korintofoɛ 16:13)

⁶ Sɛ Bible suaniɛ bie le gyidie kyɛ Yehowa kɔboka ye maa ɔkɔfa ye mmraa kɔyɛ adwuma a, ɔkɔmaa okonya anwoserɛ kɔfa bɔ osua ne kɔbɔ ye bra. (Kenga 1 Korintofoɛ 16:13.) Wɔ bɔ ɛne ye sua nikyee ne, ɛte kyɛ ebie bɔ okyire nikyee ɔ. Mmerɛ bɔ né ɛkɔ sukuu ne, tikyaniɛ beni yeɛ né ekuro ye dwirɛ paa ɔ? Yeɛ ole tikyaniɛ bɔ onyane wɔnwo aboterɛ, na ɔmaa enwuni kyɛ sɛ ɛyere wɔnwo a, ɛkɔbɔ mmɔden kyẽabie ne. Sɔ ala yeɛ wɔ koso, sɛ ɛne ebie sua nikyee a ɔte ɔ. Nna bɔ Nyameɛ pena kyɛ yɛyɛ ne ngome yeɛ odikyɛ ɛmaa onwu ye ɔ, na mmom odikyɛ ɛmaa osa nwu ye kyɛ Yehowa kɔboka ye maa ɔkɔyɛ nzakrayɛɛ biala bɔ odikyɛ ɔyɛ ɔ. Yede ɛkɔyɛ ye sɛ?

BOKA WƆ BIBLE SUANIƐ NE MA ƆDƆ BƆ OLE MA YEHOWA NE, ƆYƐ PIRI

7. Sɛɛ yeɛ Yesu bokale bɛbɔ né betie ye ne maa benyane ɔdɔ pirikua bɛmane Yehowa ɔ?

⁷ Né Yesu se kyɛ sɛ ye asuafoɛ nemɔ nya ɔdɔ ma Nyameɛ a, ɛhene yeɛ ɔkɔmaa bɛkɔfa bɔ besua ne bɛkɔbɔ bɛ bra ɔ. Yesɔ nati, nningyein bɔ né ɔkɔmaa ɔdɔ bɔ bele bɛma bɛ Baba bɔ ɔwɔ anwuro ne kɔyɛ piri ne, né ɔtaa kã yenwo dwirɛ kyire bɛ. Ebie yeɛ ole kyɛ, ɔmaa benwuni kyɛ Yehowa tekyɛ baba bie bɔ ɔfa nningyein pá ma ye mmaamɔ. (Mat. 7:​9-11) Bɛbɔ né betie Yesu ne, benu biemɔ wɔ berɛ a, né bɛ babamɔ nguro bɛ dwirɛ sɔ. Yeti mmerɛ bɔ Yesu yɛle mvandoho bie bɔ ɔfa baba bie bɔ onwuni ɔwa anwumvoin, na osa lɛle ye, ɔmva yenwo kyɛ ɔɔbɔle ahohwibra ne, ɔkɔyɛ kyɛ ɔhane b’ahone paa. Ɛhene maa benwuni kyɛbɔ Yehowa le anwumvoin ma ye mmaamɔ bɔ bɛwɔ aseɛ so ne ɔ.—Luka 15:​20-24.

8. Ɛkɔyɛ sɛɛ né aboka wɔ Bible suaniɛ maa wanya ɔdɔ pirikua wama Yehowa?

⁸ Wɔ koso, sɛ ɛtwe wɔ Bible suaniɛ ne adwene kɔ Yehowa subaen ahoroɛ bɔ ɔyɛ nyemene naso a, ɔkɔmaa ɔdɔ bɔ ole ma Nyameɛ ne kɔyɛ piri. Mmerɛ biala bɔ ɛne ye sua Yehowa subaen bie nwo nikyee ne, fa ɛhene aso boka ye ma onwu kyɛbɔ Yehowa si kuro yɛ dwirɛ ɔ. Sɛ ɛmɔsua Yesu wue nanwo nikyee a, boka ye ma onwu kyɛ, sɔ nikyee bɔ Yehowa yɛle ne kyire kyɛ okuro ye dwirɛ paa. (Rom. 5:8; 1 Yoh. 4:10) Sɛ Bible suaniɛ bie nwu ye kyɛ Yehowa kuro ye dwirɛ a, ɔngɔyɛ se kyɛ ye koso okonya ɔdɔ kɔma ye ɔ.—Gal. 2:20.

9. Nzu yeɛ ɔbokale Michael maa ɔsesane ye subaen ɔ?

⁹ Ɛmɔma yɛnea Michael bɔ ofi Indonesia ne. Bɛtetele ye wɔ asafo nanu, nakoso wammɔ asu. Olili afoɛ 18 ne, ɔhɔle aburokyi, na odwuli dɔ ne, ɔɔyɛle dravaniɛ. Siɛ ye ofili aburokyi oogyale braa wɔ Indonesia na ɔwole baa brasua. Nakoso, ɔyakyili ɔye ne ɔwa ne berɛ sa hɔle aburokyi ɔɔtoale ye adwuma so. Ɔhɔle ne, ɔye ne ɔwa ne hyɛle yebo besuane Bible ne, na bɛfale bɔ besua ne bɛbɔle bɛ bra. Siɛ ye, ye maame wuli, yeti osa wale ye kuro ɔɔneane ye baba. Oodwuli ne, ɔpenene so kyɛ okosua Bible ne. Mmerɛ bɔ né bɛne ye susu “Sua Pẽe Bokaso” bue berɛ nanwo wɔ Nya Asetena Nu Anigye Daa! nwomaa ne adesua 27 nanu ne, ɔhane ye ahone paa. Ɛyɛalɛ bɔ ɔkɔyɛ kyɛ Yehowa fale nu mmerɛ bɔ né Ɔwa ne nwu amaneɛ ne, ɔmaa osuni. Ɛhene maa yenye sɔle Yesu wue ne paa, yeti ɔsesane ye subaen, na ɔbɔle asu.

BOKA WƆ BIBLE SUANIƐ NE MA ONWU KYƐBƆ ƆKƆFA YEHOWA SOEN KOLIMOA Ɔ

10. Sɛɛ yeɛ Yesu bokale ye asuafoɛ nemɔ maa benwuni kyɛ, odikyɛ bɛfa bɛ mmerɛ pee bɛyɛ asɛnga adwuma ne ɔ? (Luka 5:​5-11) (Nea foto ne koso.)

¹⁰ Bɛbɔ belimoa bɛɛyɛle Yesu asuafoɛ ne, benwuni ye ndɛ kyɛ ye yeɛ ole Mesaya ne. Nakoso, né odikyɛ ɔboka bɛ na wamaa bafa bɛ mmerɛ mukoraati bayɛ asɛnga adwuma ne. Koraka Yesu kã kyire Petro ne Andrea kyɛ bɛfa bɛ mmerɛ mukoraa beli ye si ne, né bɛte ye asuafoɛ dada. (Mat. 4:​18, 19) Né bɛne Yakobo ne Yohane ye egyein, na né benya esikaa wɔ sɔ adwuma nanu paa. (Mak. 1:​16-20) Mmerɛ bɔ Petro ne Andrea ‘yakyili b’asawu nemɔ berɛ’ beelili Yesu si ne, bɛyɛle nhyehyɛɛ bɔ ɔkɔmaa bɛkɔnea b’abusua ɔ. Yede, nzu yeɛ ɔmaa besili gyinayɛɛ kyɛ bɛkɔyakyi b’adwuma ne ɔ? Luka nwomaa ne maa yenwu kyɛ Yesu yɛle anwanwadeɛ bie, na ɛhene maa benyane gyidie kyɛ Yehowa kɔnea bɛ.—Kenga Luka 5:​5-11.

11. Sɛɛ yeɛ yɛkɔhora yɛkɔfa yɛ bɔbɔ yɛ suahu yɛkɔboka yɛ Bible suaniɛ ne maa ye gyidie kɔyɛ se ɔ?

¹¹ Yɛngɔhora yɛngɔyɛ anwanwadeɛ tekyɛ Yesu. Nakoso kyɛbɔ Yehowa boka bɛbɔ bɛfa ye soen bedimoa ne, yɛkɔhora yɛkɔhã yenwo dwirɛ yekohyire yɛ Bible asuafoɛ nemɔ. Aso ɛkae kyɛbɔ Yehowa bokale wɔ mmerɛ bɔ ɛhyɛle yebo kyɛ ɛkɔ adesua ne? Ebiaa ne odikyɛ ɛkã kyire w’adwumawura kyɛ sɛ odikyɛ ɛyɛ overtime na ɔngɔma ekonya atee ngɔhɔ adesua a, yede ɛngɔyɛ. Kyɛbɔ Yehowa bokale wɔ mmerɛ bɔ ɛfale ye soen lili moa, ɔne kyɛbɔ ɛhene maa wɔ gyidie yɛle se ne, ɛyɛ a kã yenwo dwirɛ kyire bɔ ɛne sua nikyee ne.

12. (a) Nzuati yeɛ ɔnzɛkyɛ sonahorɛ nala yeɛ daa ɔboka yɛ so maa yɛkɔyɛ Bible adesua ɔ? (b) Sɛɛ yeɛ ɛkɔhora kɔfa vidio ahoroɛ ne kɔboka wɔ Bible suaniɛ ne ɔ? Ma yenwo nhwɛsoɛ.

¹² Sɛ wɔ Bible suaniɛ ne te kyɛbɔ aliemaa biemɔ fale Yehowa soen lili moa nanwo dwirɛ a, ɛhene koso kɔboka ye. Yeti ɛyɛ a, ma mmeni foforɛ boka wɔ so maa ɛɛyɛ adesua ne, na ɔnzɛkyɛ sonahorɛ nala yeɛ daa ɛne ye kɔ berɛ ɔ. Bɔ ɔyɛle a bɛwale asafo nanu, ɔne bɔ ɔmaa bɛhora bɛfale Yehowa soen belili moa ne, ɛyɛ a ma bɛhã yenwo dwirɛ behyire ye. Asa koso, vidio ahoroɛ bɔ ɔwɔ “Sua Pẽe Bokaso,” ɔne “Nea Ɛhe Koso” bue berɛ wɔ Nya Asetena Nu Anigye Daa! nwomaa nanu ne, ɛne ye bɛnea. Adesua 37 ne sɔa, sɛ ɛmɔdwu so a, edwirɛ titire bɔ ɔwɔ vidio bɔ yeɛ ole, Yehowa Kɔma Yɛsa Kɔhã Bɔ Yehia Ɔ nanu ne, ɛne ye besusu yenwo.

BOKA WƆ BIBLE SUANIƐ NE MA ONWU BƆ ƆKƆYƐ MMERƐ BƆ MMENIA TANE YENYE NE

13. Sɛɛ yeɛ Yesu bokale ye asuafoɛ nemɔ maa bɛboale bɛnwo bɛmane ɛpɔen bɔ né mmenia kɔfa kɔwa bɛso ne ɔ?

¹³ Yesu hahyirele ye asuafoɛ nemɔ mmerɛ pee kyɛ, mmenia kɔtane bɛnye, na b’abusuafoɛ po boka so. (Mat. 5:11; 10:​22, 36) Ɔka kãa maa Yesu fa ye asɛnga adwuma ne ba ayieleɛ ne, ɔbɔle ye asuafoɛ nemɔ kɔkɔ kyɛ, mmenia kɔhora kohũ bɛ. (Mat. 24:9; Yoh. 15:20; 16:2) Ɔhane kyɛ sɛ bɛyɛ asɛnga adwuma ne a, bɛma bɛnye la berɛ. Osa tuli bɛ foɛ kyɛ, mmenia bɔ benguro bɛ dwirɛ ne, nnɛmaa bɛne bɛ su aporowaa. Afei koso, bɛnea bɛnoa dwudwolɛ yé, na wamaa bahora bahɔso bayɛ asɛnga adwuma ne.

14. Yɛkɔyɛ sɛɛ né yaboka yɛ Bible asuafoɛ nemɔ maa baboa bɛnwo bama ɛpɔen? (2 Timoteo 3:12)

¹⁴ Mmenia bɔ wɔ Bible suaniɛ ne bɛ yɛ adwuma, ye damvomɔ, ɔne ye abusuafoɛ ne, edwirɛ bɔ ebiaa bɛkɔhã anaa bɔ bɛkɔyɛ ne, ɛyɛ a ma onwu ye. Ɛyɛ sɔ a, né ɛboka ye maa ɔboa yenwo ma ɛpɔen. (Kenga 2 Timoteo 3:12.) Ɔnate kyɛ ɔfa Bible nanu dwirɛ bɔ ye bra nati, bɛbɔ ɔne bɛ yɛ adwuma ne kɔhora kɔgoro yenwo. Yeɛ ye abusuafoɛ ne mmenia biemɔ koso, ebiaa bekodwudwo bekotia Bible nanu dwirɛ bɔ ode di ne. Sɛ yɛmaa yɛ Bible asuafoɛ nemɔ nwu ɛhemɔ ndɛ a, ɔkɔmaa sɛ bɛtane bɛnye a, ɔngɔyɛ bɛ nwanwa.

15. Sɛ Bible suaniɛ bie abusuafoɛ tane yenye a, nzu yeɛ ɔkɔboka ye maa okogyina yenoa ɔ?

¹⁵ Sɛ wɔ Bible suaniɛ ne abusuafoɛ tane yenye a, boka ye ma onwu bɔ ebiaa ɔmaa bɛyɛ sɔ ne. Ebiaa né b’adwene yɛ bɛ kyɛ Yehowa Adanzefoɛ tte mmeni pá, na bɛlakalaka mmenia. Yesu po, ye abusuafoɛ nanu biemɔ dwudwo tiale ye. (Mak. 3:21; Yoh. 7:5) Yeti boka wɔ Bible suaniɛ ne ma onwu ye kyɛ, sɛ ye abusuafoɛ anaa ebiemɔ dwudwo tia ye po a, onya bɛnwo aboterɛ ɔne bɛ dwudwo.

16. Yɛkɔyɛ sɛɛ na yaboka yɛ Bible suaniɛ bie maa wanwu kyɛbɔ ɔkɔhã bɔ wasua nanwo dwirɛ kohyire mmenia ɔ?

¹⁶ Sɛ wɔ Bible suaniɛ ne abusuafoɛ da y’ali kyɛ bɛnye gye bɔ osua nanwo po a, ɔnzɛkyɛ ɔfa ɛlɛhomapɛ kyirekyire nikyeebiala nu kyire bɛ. Sɛ ɔyɛ sɔ a, ebiaa bekonya adwene kyɛ ɔfa Bible nanu dwirɛ ne dwane bɛnwo soma, na ebiaa bɛne ye ngɔbɔ ngɔmmɔ kõ. Yeti hyɛ ye ngunaen kyɛ ɛyɛ a ɔma ye dwirɛ yɛ ndika, kyɛbɔ ɔkɔyɛ a mmerɛ foforɛ ne, bɛnye kɔgye yenwo kyɛ bɛne ye kɔtoa so ɔ. (Kol. 4:6) Ɔkɔhora kɔhã kohyire bɛ kyɛ bɛhɔ jw.org wɛbsait naso. Ɛhene kɔmaa bɛkɔhora bekosua Yehowa Adanzefoɛ nwo nikye mmerɛ biala bɔ bekuro ɔ.

17. Edwirɛ bɔ ɔtte nahorɛ bɔ mmenia kekã fa Yehowa Adanzefoɛ nwo ne, ɛkɔyɛ sɛɛ né aboka wɔ suaniɛ ne maa wanwu kyɛbɔ ɔkɔye yenoa ɔ? (Nea foto ne koso.)

¹⁷ “Edwirɛ Bɔ Ebiemɔ Taa Bisa Fa Yehowa Adanzefoɛ Nwo Ɔ” bɔ ɔba toatoa so wɔ jw.org so ne, ɛyɛ a fa boka wɔ suaniɛ ne, na sɛ ye abusuafoɛ anaa bɛbɔ ɔne bɛ yɛ adwuma ne bisa ye dwirɛ bie a, wanwu kyɛbɔ ɔkɔma bɛ mmuayɛɛ tikaape ɔ. (2 Tim. 2:​24, 25) “Ebiemɔ Kã Kyɛ” bue berɛ bɔ ɔwɔ Nya Asetena Nu Anigye Daa! nwomaa nanu ne, sɛ ɛmɔyie adesua kõ biala a, ɛne ye besusu yenwo. Hyɛ ye ngunaen kyɛ, kyɛbɔ osi te edwirɛ bɔ osua nabo ne, ɛhene yeɛ ogyina so hyirehyire bɛ nu ɔ. Sɛ enwu ye kyɛ ye ngyirekyiremuɛ ne nhyɛda ndɔ asoɛ nu a, boka ye. Sɛ ɛne ye bɛtaa bɛyɛ sɔ a, ɔkɔmaa okonya akokoduro kɔfa kohyirehyire bɔ ode di nanu.

18. Ɛkɔyɛ sɛɛ né aboka wɔ suaniɛ ne maa wahyɛ asɛnga bo? (Mateo 10:27)

¹⁸ Yesu hahyirele ye asuafoɛ nemɔ kyɛ bɛbɔ nzɛmba ne dawure. (Kenga Mateo 10:27.) Sɛ wɔ suaniɛ ne hyɛ asɛnga bo ndɛ a, ɔngɔyɛ se kyɛ ɔkɔfa yenwo kɔto Yehowa so ɔ. Ɛkɔyɛ sɛɛ né aboka ye maa wayɛ sɔ? Sɛ bɛkã kyɛ ɛmɔ asafo ne baayɛ asɛnga titire bie a, hyɛ wɔ suaniɛ ne ngunaen maa onwu bɔ ɔyɛ a ɔkɔmaa ɔkɔɔyɛ dawurubɔniɛ ɔ. Ma onwu ye kyɛ sɛ yɛyɛ asɛnga titire sɔ a, ɛyɛ a ɔnyɛ se kyɛ ebie kɔhyɛ asɛnga bo ɔ. Afei koso, dwumadie bɔ yɛyɛ ye wɔ dapɛen afia adesua nabo bɔ ɔmaa yenwu kyɛbɔ yekodwudwo mmenia nu ne, sɛ ɔfa yenwo wura nu bie a, ɔkɔboka ye. Sɛ ɔkora yɛ sɔ a, ɔkɔmaa sɛ ɔkã bɔ wasua nanwo dwirɛ kyire mmenia a, ongosuro.

NYA WƆ BIBLE SUANIƐ NANU GYIDIE

19. Nzu yeɛ Yesu yɛle bɔ né okyire kyɛ ole ye asuafoɛ nemɔ anu gyidie ɔ, na yɛkɔyɛ sɛɛ né yasuesua ye?

¹⁹ Koraka Yesu kɔ anwuro ne, ɔhahyirele ye asuafoɛ nemɔ kyɛ, kyẽabie ɔne bɛ kosa koyia nu bieku. Bɛde bande yebo kyɛ sãa anwuro dɔ bɔ bɛkɔhɔ nanwo dwirɛ yeɛ né ɔkã ɔ. Nakoso Yesu de, nahorɛ bɔ né bedi ne yeɛ ɔfale ye adwene siele so ɔ, na ɔtte b’adwene nu bɔ né wayɛ bɛ naa ne. (Yoh. 14:​1-5, 8) Né ɔse kyɛ nningyein biemɔ wɔ berɛ a, ɔkɔhyɛ kãa kora né bate yebo. Ebie yeɛ ole anwuro dɔ bɔ bɛkɔhɔ ne. (Yoh. 16:12) Yɛ koso yɛkɔhora yekonya bɛbɔ yɛne bɛ sua nikyee nanu gyidie kyɛ bɛkɔyɛ bɔ Yehowa kuro ɔ.

20. Sɛɛ yeɛ aliemaa brasua bie bɔ ɔwɔ Malawi hyirele kyɛ, ole ye Bible suaniɛ bie nu gyidie ɔ?

²⁰ Yele yɛ Bible asuafoɛ nemɔ nu gyidie kyɛ bɛpena kyɛ bɛyɛ bɔ ɔte pá ɔ. Ɛmɔma yɛnea aliemaa brasua bie bɔ ɔwɔ Malawi bɔ bɛfrɛ ye Chifundo. Ɔne taluwa bie bɔ ɔkɔ Roman, bɔ bɛfrɛ ye Alinafe hyɛle yebo suane Nya Asetena Nu Anigye Daa! nwomaa ne. Besuane adesua 14 ne beyiele ne, Chifundo bisale taluwa ne kyɛ, ‘Sɛ mmenia nate ahoni so sõ Nyameɛ a, enwu ye sɛ?’ Alinafe nye angye sɔ dwirɛ bɔ obisale ye nanwo. Yeti ɔhane kyɛ: “Ɛhe de, ɔte me bɔbɔ me dwirɛ!” Ɛhene maa Chifundo adwene yɛle ye kyɛ Alinafe ne ye ngosua nikyee kõ. Nakoso onyane yenwo aboterɛ, ofikyɛ né ode di kyɛ siɛ ye, Alinafe kɔɔte edwirɛ nabo. Ɛhene si bosome kãa bie ne, né besua adesua 34 ne, na Chifundo bisale ye kyɛ: “Ofi mmerɛ bɔ ɛhyɛle yebo kyɛ esua Yehowa bɔ ɔte nahorɛ Nyameɛ ne, ɔne Bible nanwo nikyee ne, sɛɛ yeɛ waboka wɔ ɔ?” Chifundo hane kyɛ: “Nningyein pá pee bɔ Alinafe asua ne, ɔhane yenwo dwirɛ. Ebie yeɛ ole kyɛ, yenwa wanwu ye kyɛ nikyeebiala bɔ Bible ne dwudwo tia ne, Yehowa Adanzefoɛ twe bɛnwo fi yenwo.” Wangyɛ biala Alinafe yakyili ahoni bɔ né ɔfa di dwumaa ne, na ɔbɔle asu.

21. Yɛkɔyɛ sɛɛ né yaboka yɛ Bible suaniɛ ne maa wasi gyinayɛɛ kyɛ ɔkɔsõ Yehowa?

²¹ Sɛ yɛkã nzɛmba ne yekyire mmenia a, ɔwɔ nu kyɛ Yehowa yeɛ ‘ɔmaa onyi’ ɔ, nakoso odikyɛ yɛyɛ y’afa nu deɛ yɛboka yɛ Bible suaniɛ ne, na wamaa wahora wasõ Yehowa. (1 Kor. 3:7) Nna bɔ Nyameɛ pena kyɛ ɔyɛ ne ngome yeɛ odikyɛ yɛmaa onwu ye ɔ, na mmom odikyɛ yɛboka ye maa ɔdɔ bɔ ole ma Yehowa ne koso yɛ piri. Odikyɛ yesa yɛhyɛ ye ngunaen kyɛ ɔfa Yehowa soen limoa ɔfahyire kyɛ ɔdɔ ye. Afei koso, odikyɛ yɛboka ye maa onwu ye kyɛ sɛ mmenia tane yenye a, ɔfa yenwo to Yehowa so. Yeɛ sɛ yɛmaa yɛ Bible suaniɛ ne nwu ye kyɛ yele yenu gyidie a, ɔkɔhyɛ ye ngunaen maa ɔkɔfa Yehowa mmraa kɔbɔ ye bra, na wasi gyinayɛɛ kyɛ ɔkɔsõ ye.