Bɛbɔ Bekuro Kyɛ Betie Nzɛmba Ne, Boka Bɛ Ndɛ

1. Sɛ yɛkã nzɛmba ne yekyire mmenia a, sɛɛ yeɛ benu biemɔ yɛ bɛ nikyee ɔ? (Asomafoɛ 13:​47, 48; 16:​14, 15)

WƆ TETE Kristofoɛ nemɔ aberɛ so ne, mmerɛ bɔ mmeni pee tele nzɛmba ne, bele bɛtole nu ndɛ. (Kenga Asomafoɛ 13:​47, 48; 16:​14, 15.) Ɛnnɛ koso sɔ yeɛ ɔte ɔ. Ebiemɔ wɔ berɛ a mmerɛ bɔ olimoa bɔ bɛkɔte nzɛmba ne, bɛnye gye paa. Ebiemɔ po bɔ ahyɛaseɛ ne, né bɛnye ngye nzɛmba nanwo ne, siɛ ye bɛnye kora bagye yenwo. Yede, sɛ yɛkɔto ebie bɔ yenye gye nzɛmba nanwo wɔ asɛnga nu a, yɛkɔyɛ sɛɛ ne yaboka ye?

2. Sɛɛ yeɛ asɛnga adwuma ne tekyɛ kuadwuma ɔ?

² Yɛkɔhora yɛkɔfa asɛnga adwuma ne yɛkɔtoto kuadwuma nwo. Sɛ kuaniɛ dua ye nningyein a, nna ɛlɛhomapɛ yeɛ yemukoraati koti ɔ. Yeti bɔ okolimoa koti ne, ɔpɛ ye ndɛ nala. Nakoso bɔ waha bɔ ottini ne, ɔkɔso yɛ yenwo adwuma kodwu kyɛ ɛhene koso koti ɔ. Sɔ ala yeɛ yɛkoso sɛ yenya ebie bɔ yenye gye nzɛmba nanwo a, ɛyɛ a ne yɛpena kyɛ yɛboka ye ndɛ maa ɔbayɛ Yesu suaniɛ ɔ. Nakoso bɛbɔ bɛnye ngye nzɛmba nanwo ne, yɛkɔso yɛboka bɛ maa benwu mvasoɛ bɔ ɔwɔ so kyɛ bekosua Bible ne ɔ. (Yoh. 4:​35, 36) Yeti sɛ yɛfa yɛnye yɛto ase a, yekonwu atee pá bɔ yɛkɔfa so yɛkɔhã nzɛmba ne yekohyire mmenia ɔ. Yede sɛ yɛkɔto ebie mmerɛ bɔ olimoa, na yenwu ye kyɛ yenye gye nzɛmba nanwo a, yɛkɔnea bɔ yɛkɔhora yɛkɔyɛ ɔ. Yekosa yɛkɔnea kyɛbɔ yɛkɔhɔso yɛkɔboka sɔ sona ne maa ɔkɔɔsõ Yehowa ɔ.

MMERƐ BƆ YANYA EBIE BƆ YENYE GYE NZƐMBA NANWO NE

3. Sɛ yenya bɛbɔ bɛnye gye nzɛmba nanwo wɔ asɛnga nu a, nzu yeɛ odikyɛ yɛyɛ ɔ? (1 Korintofoɛ 9:26)

³ Sɛ yenya bɛbɔ bɛnye gye nzɛmba nanwo wɔ asɛnga nu a, yɛpena kyɛ ndɛen nala yɛboka bɛ maa bɛfa ngoa atee naso. Yeti mmerɛ bɔ olimoa bɔ yɛne bɛ kɔbɔ ngɔmmɔ nala, odikyɛ yɛkã Bible adesua nwo dwirɛ yekyire bɛ. Afei koso odikyɛ yɛto yɛsa yɛfrɛ bɛ maa bɛba adesua.—Kenga 1 Korintofoɛ 9:26.

4. Suahu beni yeɛ ɔmaa yenwu ye kyɛ ebie kɔhora kole kɔtonu kyɛ yɛne ye sua Bible ne ndɛ nala ɔ?

⁴ Kã Bible adesua nwo dwirɛ kyire ye. Bɛbɔ yɛkã nzɛmba ne yekyire bɛ ne, ɛyɛ a benu biemɔ kuro kyɛ yɛne bɛ sua Bible ne ndɛ nala. Ɛmɔma yɛnea suahu he. Ɛlɛho Wuhue bie, ne aliemaa brasua bie gyi trɔg nwo wɔ Canada, na taluwa bie wale berɛ ɔɔyele Nya Asetena Nu Anigye Daa! nwomaa kaamba ne bie. Aliemaa brasua ne maa onwuni kyɛ yɛne mmenia sua sɔ nwomaa ne bɔ bendua hwee ɔ. Taluwa ne nye gyele yenwo yeti ɔfale ye nɔmba mane ye. Sɔ ɛlɛho ne nɔsoa ne, taluwa ne sɛndele ye mɛsegye, na obisale ye mmerɛ bɔ bɛkɔhyɛ adesua nabo ɔ. Yeɛ aliemaa brasua ne hane kyɛ ɔkɔwa Fue, nakoso taluwa ne bisale ye kyɛ: “Ɛhema koso ɛ? Mengɔyɛ hwee oo.” Yeti bɛyɛle adesua ne Yáa ne. Taluwa ne hɔle adesua sɔ Kwasiada ne. Ɛhene yeɛ ɔte adesua bɔ olimoa hɔle ɔ, na onyane ngɔsoɛ ndɛndɛ.

5. Nzu yeɛ ɔkɔboka yɛ maa yekonwu kyɛbɔ yɛne ebie kɔhyɛ Bible adesua bo ɔ? (Nea foto ne koso.)

⁵ Bɔ ɔte yeɛ ole kyɛ, nna ebiala yeɛ yenye kɔgye yenwo kyɛ ndɛ nala ɔne yɛ kosua Bible ne kyɛbɔ sɔ taluwa ne yɛle ne. Ebiemɔ wɔ berɛ a, ebiaa ɔkɔhyɛ kãa kora. Yeti ahyɛaseɛ ne, edwirɛ bɔ bɛnye kɔgye yenwo ne, ɛhene yeɛ odikyɛ yɛne bɛ bɔ yenwo ngɔmmɔ ɔ. Sɛ yenya adwene kyɛ bɛkɔhora bɛkɔɔsõ Yehowa kyẽabie, na yɛmaa benwu ye kyɛ yɛdwene bɛnwo a, ebiaa ɔkɔmaa bɛnye kɔgye yenwo kyɛ bɛne yɛ kosua nikye. Sɛ yɛpena kyɛ yɛne bɛ sua nikyee a, edwirɛ beni yeɛ yɛkɔhora yɛkɔhã ɔ? Aliemaa biemɔ bɔ bɛse kyɛbɔ bɛhyɛ Bible adesua bo ne, bebisale bɛ sɔ dwirɛ ne. Ɛmɔma yetie bɔ bɛhane ɔ.

6. Sɛ yɛkɔto ebie bɔ yenye gye nzɛmba nanwo, na yekuro kyɛ yɛne ye toa so a, nzu yeɛ odikyɛ yɛyɛ ɔ?

⁶ Adawurubɔfoɛ ne ateepakyelɛfoɛ bɔ bebisale bɛ sɔ dwirɛ ne, bɛhane kyɛ nekaa biemɔ wɔ berɛ a, sɛ ɛ́kã Bible adesua nwo dwirɛ kyire ebie a ɔkɔyɛ pá kyɛ ɛngɔhã edwirɛ biemɔ. Ebie yeɛ ole kyɛ, “mepena kyɛ mene wɔ sua nikye,” “mepena kyɛ mene wɔ sua Bible ne,” anaa “mepena kyɛ mekyire wɔ Bible nanu.” Banwu ye kyɛ bɔ ɔboka paa yeɛ ole kyɛ ɛkɔhã kyɛ, “mepena kyɛ mene wɔ bɔ ngɔmmɔ,” “mepena kyɛ mene wɔ susu edwirɛ bie anwo,” anaa “mepena kyɛ meboka wɔ maa ɛte Bible nu dwirɛ biemɔ bo.” Sɛ ɛpena kyɛ ɛne sona ne kora toa ngɔmmɔ naso a, ɛkɔhora kɔhã kyɛ, “Edwirɛ biemɔ bɔ yenwo hia paa wɔ y’asetena nu ne, sɛ enwu kyɛbɔ Bible ne ma yenwo mmuayɛɛ a, ɔkɔyɛ wɔ nwanwa.” Anaa “Bible ne, ɔtte asɔre bie nwomaa mbaen, na mmom afutue pee wɔ nu bɔ ɔkɔhora kɔboka yɛ ɔ.” Ɛkɔhora kɔtoa so kyɛ: “Sɔ ngɔmmɔ ne ɔngyɛ oo, okoli kɔyɛ minit 10 kodwu 15 pɛ. Nakoso nningyein bɔ ekonwu ye ne, ɔkɔboka wɔ paa.” Yenwo nhia kyɛ ɛkɔhã kyɛ, “mene wɔ kɔyɛ nhyehyɛɛ maa yekosua nikyee dapɛen biala.” Wanyɛ sɔ a, okonya adwene kyɛ ɛhyehyɛ mmraa ma ye.

7. Ebiemɔ wɔ berɛ a, mmerɛ beni yeɛ benwuni kyɛ sãa banwu nahorɛ ne ɔ? (1 Korintofoɛ 14:​23-25)

⁷ To wɔsa frɛ bɛ ma bɛbra adesua. Wɔ somafoɛ Pɔɔlo aberɛ so ne, ebiemɔ wɔ berɛ a, mmerɛ bɔ olimoa bɔ bɛhɔle Kristofoɛ nhyiamu ne, yeɛ benwuni kyɛ sãa banwu nahorɛ ne ɔ. (Kenga 1 Korintofoɛ 14:​23-25.) Ɛnnɛ koso sɔ yeɛ ɔte ɔ. Ebiemɔ wɔ berɛ a, sɛ bɛhyɛ yebo bɛkɔ adesua a, ɔboka bɛ maa benya ngɔsoɛ ndɛndɛ paa. Yede mmerɛ beni yeɛ odikyɛ ɛto wɔsa frɛ ebie kyɛ ɔbra adesua ɔ? Ɔwɔ nu, Nya Asetena Nu Anigye Daa! nwomaa ne, adesua 10 ne yeɛ ɔkã ɛhe anwo dwirɛ ɔ. Nakoso ɔnzɛkyɛ ɛnwondɛ maa ɛmɔdwu berɛ kora ne ato wɔsa afrɛ sona ne kyɛ ɔbra adesua. Mmerɛ bɔ olimoa bɔ ɛne ye kɔbɔ ngɔmmɔ nala, ɛkɔhora kɔto wɔsa kɔfrɛ ye maa ɔkɔwa dapɛen ayieleɛ adesua ne bie. Tɔɔk bɔ bɛkɔma ne, ɛkɔhora kɔhã ye dwirɛti ne kohyire ye, anaa ɛkɔhã Ɛwɛnelɛ Waen Adesua nanu dwirɛ kãa kohyire ye.

8. Sɛ yɛ́to yɛsa yɛfrɛ ebie maa ɔba adesua a, nzu mɔ yeɛ yɛkɔhora yɛkɔhã yenwo dwirɛ yekohyire ye ɔ? (Yesaya 54:13)

⁸ Sɛ ɛ́to wɔsa frɛ sona ne a, ma onwu ye kyɛ bɔ ɔkɔso wɔ y’adesua nabo ne, ɔtte kyɛ bɔ ɔkɔso wɔ asɔre ahoroɛ nu ne. Mmerɛ bɔ Bible suaniɛ bie wale adesua bɔ ne Ɛwɛnelɛ Waen Adesua ne kɔso ne, obisale bɔ ɔne ye sua nikyee ne kyɛ, “Yeti bɔ ɔnea adesua naso ne, ɔse ebiala dumaa?” Aliemaa brasua ne maa onwuni kyɛ, kyɛbɔ yɛse y’abusuafoɛ dumaa ne, sɔ ala yeɛ bɛbɔ yɛne bɛ wɔ asafo nanu ne koso, yɛbɔ mmɔden kyɛ yekonwu bɛ dumaa ɔ. Bible suaniɛ ne hane kyɛ ye asɔre nu dɔ de, ɔtte sɔ. Mmeni pee wɔ berɛ a, atee bɔ yɛfa so yɛyɛ y’adesua ne, ɛyɛ a ne ɔte foforɛ wɔ bɛnye so. (Kenga Yesaya 54:13.) Yɛde yeyianu yɛsõ Yehowa, yesua yenwo nikye, na yɛhyehyɛ yɛnwo ngunaen. (Heb. 2:12; 10:​24, 25) Yeti nna soen nu amammerɛ bie yeɛ yekodi ye si ɔ, na mmom nikyeebiala kɔso pɛpɛɛpɛ wɔ y’adesua nabo, na ɛhene maa yenya so mvasoɛ. (1 Kor. 14:40) Y’ahennie Asa naso berɛ te kama, na ɛhene boka yɛ maa yɛkora yesua nikyee yé. Yɛnyɛ pɔletis wɔ berɛ, ofikyɛ yeggyi amanyɔkue biala si. Sɔ ala koso yeɛ bɛmva edwirɛ bie bɛndo dwaa ma yenzu yenwo aporowaa ɔ. Sɛ edimoa ye vidio bɔ yeɛ ole, Nzu Yeɛ Ɔkɔ So Wɔ Yɛ Ahennie Asa So Ɔ? ne kyire ye a, ɔkɔboka ye paa, ofikyɛ ɔkɔmaa okolimoa okonwu bɔ ɔkɔhɔso wɔ berɛ ɔ.

9-10. Sɛ yɛ́to yɛsa yɛfrɛ ebie maa ɔba adesua a, nzu yeɛ yɛkɔhã na wamma yekunu andete ye ɔ? (Nea foto ne koso.)

⁹ Bɔ yeti yeɛ ebiemɔ nguro kyɛ bɛkɔwa adesua yeɛ ole kyɛ, besuro kyɛ kyẽa bɔ bɛkɔwa nala bɛkɔmaa bɛkɔɔyɛ Yehowa Adanzefoɛ. Nakoso, ma onwu ye kyɛ ɔtte sɔ. Afei ma onwu ye kyɛ ebiala kora ba y’adesua ne bie na sɛ ɔba koso a, bɛngɔfɔso ye kyɛ ɔfa yenwo wura bɔ ɔkɔso nanu. Ma osa nwu ye kyɛ ɔkɔhora ne ye abusua bɔ ngwalaa mmaammaa po wɔ nu kɔwa bie. Afei bɛmma ngwalaa nemɔ ngome nde bɛnwo nyɛ b’adesua deɛ, na mmom bɛne b’awofoɛ bɔnu tena nekahorɛ tie adesua ne. Ɛhene maa awofoɛ nemɔ nye kɔ bɛmmaa nemɔ nwo, na bemu benya adesua naso mvasoɛ. (Deut. 31:12) Asa koso, yɛnnidé kɔlɛhyɛn wɔ y’adesua nabo, na mmom yɛfa Yesu afutue he yɛyɛ adwuma: “Ɛmɔnyane ye mbaen, yiti ɛ́mɔfa bɛ́ma mbaen.” (Mat. 10:8) Ma onwu ye kyɛ yenwo nhia kyɛ okonya ataadeɛ bie bɔ ye nyɔboɛ yɛ se kora ne wahora wawa bie. Ofikyɛ Nyameɛ de, ɔnea sona ahone nu, na mmom nna ye ataadeɛ bɔ owura ye ɔ.—1 Sam. 16:7.

¹⁰ Sɛ sona ne ba a, yɛ bɔ ɛkɔhora biala ma yenye hã. Ɛyɛ fa ye kyea asafo nu mbanyi nemɔ ne aliemaamɔ. Sɛ yenye kã a, ebiaa ɔngɔyɛ se kyɛ okosa kɔwa ɔ. Sɛ enwu ye kyɛ olle Bible a, ma ɔnea wɔ deɛ nanu bie. Afei kyɛbɔ adesua ne si kɔ ne, boka ye ma ɔte yebo.

MMERƐ BƆ YAHYƐ YEBO YƐNE YE SUA BIBLE NE

11. Ɛkɔyɛ sɛɛ ne ahyire kyɛ ɛdwene bɔ ɛne ye sua nikyee nanwo?

¹¹ Sɛ yɛne ebie yɛ Bible adesua a, nzu yeɛ odikyɛ yɛkae ye ɔ? Adesua nanwo nhyehyɛɛ biala bɔ ɛmɔkɔyɛ, ɔne mmerɛ bɔ ɛmɔkɔfa bekowura ne, bɔ mmɔden kyɛ ekoli so. Ɛhene kohyire kyɛ ɛdwene sona nanwo. Sɛ nekaa bɔ ɛwɔ ne mmenia nni bɛ mmerɛ so po a, wɔ de nnɛyɛ sɔ. Afei koso, kyẽa bɔ olimoa bɔ ɛne ye kosua nikyee ne, ɛyɛ a nnɛkyɛ pee. Aliemaa biemɔ bɔ bɛse Bible adesua yɛ paa ne, bɛhane kyɛ sɛ adesua ne sɔ sona ne fɛ nu na ɔkã kyɛ ɛmɔsua bie bɛboka so po a, nnɛyɛ ye sɔ. Sɛ adesua ne kɔso a, ɛyɛ a nnedwudwo pee, sona ne mmom yeɛ odikyɛ ɛmaa odwudwo ɔ.—Any. 10:19.

12. Sɛ ɛne ebie hyɛ yebo sua nikyee a, nzu yeɛ odikyɛ ɛfa sie wɔnye so ɔ?

¹² Sɛ ɛne ebie hyɛ yebo sua nikyee a, ahyɛaseɛ nala fasie wɔnye so kyɛ ɛkɔboka sona ne maa okonwu Yehowa ne Yesu yé, na wanya ɔdɔ wama bɛ. Bɔ ɔkɔboka wɔ maa ɛkɔyɛ ɛhe yeɛ ole kyɛ, ɛyɛ a twe adwene kɔ Bible naso, na mmom nnɛtwe adwene ba wɔnwo so. (Aso. 10:​25, 26) Né somafoɛ Pɔɔlo taa twe adwene kɔ Yesu Kristo so wɔ ye ngyerɛkyerɛ nu. Ofikyɛ sɛ yɛkɔhora yekonwu Yehowa, na yanya ɔdɔ yama ye a, ɔnate Yesu so. (1 Kor. 2:​1, 2) Pɔɔlo sa hane kyɛ bɛbɔ yɛne bɛ sua nikyee ne, odikyɛ yɛboka bɛ maa benya subaen pá. Ɔfale sɔ subaen ne totole esikaa kɔkorɛ, dwetɛ, ɔne nyɔboɛ bɔ ɔsombo nwo. (1 Kor. 3:​11-15) Sɔ subaen pá ne bie yeɛ ole nworɛ, ndeaseɛ, ɔne Yehowa surolɛ. (Edw. 19:​9, 10; Any. 3:​13-15; 1 Pet. 1:7) Ɛyɛ a suesua atee bɔ Pɔɔlo fale so hyirehyirele mmenia ne, na boka wɔ Bible asuafoɛ nemɔ ma bɛ gyidie yɛ se. Ɛhene kɔmaa bɛne bɛ Baba bɔ ɔwɔ anwuro ne kɔfa adamvoa.—2 Kor. 1:24.

13. Sɛ yɛ́boka bɛbɔ bɛnye gye nzɛmba nanwo a, yɛkɔyɛ sɛɛ ne yala aboterɛ ne ndeaseɛ ali? (2 Korintofoɛ 10:​4, 5) (Nea foto ne koso.)

¹³ Suesua atee bɔ Yesu fale so hyirehyirele mmenia ne, na da aboterɛ ne ndeaseɛ ali. Ɛyɛ a nnɛbisa bɔ ɛne ye sua nikyee ne dwirɛ biemɔ bɔ ɔkɔmaa ɔkɔfɛle ɔ. Edwirɛ biemɔ bɔ ɔyɛ se kyɛ ɔkɔte yebo ne, sɛ ɔkɔyɛ yé a yakyi to berɛ na ɛmɔtoa adesua naso, na siɛ ye ne ɛmɔ asusu yenwo. Kyɛ ahaa ɛkɔhyɛ ye maa okole Bible nu dwirɛ bie kɔto nu ne, ma ye mmerɛ ma ɔfa susu yenwo, na ɛhene kɔmaa ebiaa siɛ ye nahorɛ ne kole ndii wɔ ye ahone nu. (Yoh. 16:12; Kol. 2:​6, 7) Bible ne kã kyɛ ngondombo ngyerɛkyerɛ tekyɛ “anwoserɛ afealeɛ” anaa sua bie bɔ odikyɛ ‘yedwiri yegua’ ɔ. (Kenga 2 Korintofoɛ 10:​4, 5.) Yeti ɔnzɛkyɛ yɛhyɛ bɔ yɛne ye sua nikyee ne kyɛ otutu sɔ gyidie bɔ wale ndii wɔ yenu nabo, na mmom odikyɛ yɛhyɛ ye ngunaen maa ɔfa yenwo to Yehowa so.—Edw. 91:9.

KYƐBƆ YƐKƆBOKA BƐBƆ BAWA ADESUA FOFORƐ NE Ɔ

14. Bɛbɔ bɛkɔwa adesua foforɛ ne, sɛɛ yeɛ odikyɛ yɛne bɛ di ɔ?

¹⁴ Bɛbɔ bɛkɔwa adesua foforɛ ne, sɛ befi ni, b’amammerɛ te sɛ oo, bɛte asikafoɛ oo, sɛ wahia bɛ oo, Yehowa pena kyɛ yɛfa obuo yɛma bɛ benu biala. (Yak. 2:​1-4, 9) Yede yɛkɔyɛ sɛɛ ne yamaa bɛbɔ bawa adesua foforɛ ne anwu ye kyɛ yekuro bɛ dwirɛ?

15-16. Bɛbɔ bɛkɔwa adesua foforɛ ne, yɛkɔyɛ sɛɛ ne yamaa bɛnye ahã?

¹⁵ Bɛbɔ bɛba y’adesua ne bie ne, benu biemɔ wɔ berɛ a ɛyɛ a ne bɛpena kyɛ bɛbanea bɔ ɔkɔso wɔ berɛ ɔ. Yeɛ ebiemɔ koso ebiaa aliemaa bie bɔ ɔwɔ nekaa foforɛ yeɛ ɔhane kyɛ bɛhɔ ɔ. Yeti sɛ enwu ɛwɔfoɛ bie wɔ adesua bo a, ɛyɛ a yɛ ye akwaaba, na ɛne ye bɛbɔ ngɔmmɔ. Nakoso nnɛyɛ maa ɔbo so, anyɛ sɔ a, ebiaa sona ne kɔyɛ basaa. Ɛkɔhora kɔmaa ɔkɔɔtena wɔnwo berɛ na amaa wanea wɔ Bible, anaa nwomaa bɔ yesua nanu bie, anaakyɛ ekole bie kɔma ye. Ɛkɔhora koso kɔfa atee foforɛ so kɔmaa yenye kɔhã. Kyẽa bɔ olimoa bɔ biaa bie wale adesua ne, ɔhahyirele aliemaa bɔ ɔyɛle ye akwaaba ne kyɛ wafɛle paa, ofikyɛ ye ataadeɛ bɔ owura ye ne, onwu ye kyɛ wamaa watɔ nu. Aliemaa ne hane ye ahone tole yekunu, na ɔmaa onwuni kyɛ Yehowa Adanzefoɛ mmu bɛnwo kyɛ bedi mu bɛtra mmeni foforɛ. Siɛ ye, sɔ biaa ne bɔle asu, nakoso ye wora amvi bɔ aliemaa ne hahyirele ye ne lle. Sɛ ɛne bɛbɔ bawa adesua foforɛ ne bɔ ngɔmmɔ a, odikyɛ ɛnea yé na amvefee bɛ dwirɛ nu.—1 Pet. 4:15.

¹⁶ Sɛ yɛne bɛbɔ bawa adesua foforɛ ne bɔ ngɔmmɔ, yɛ́ma mmuayɛɛ, anaa yɛyɛ asamɛnt a, odikyɛ yɛnea yé na yanga edwirɛ biemɔ bɔ ɔkɔmaa bekonya adwene kyɛ yebu bɛ animtia, anaa ɔkɔto bɛ sindidua ɔ. Ɛhene kohyire kyɛ yebu bɛ, na ɔkɔmaa bɛnye kɔhã. (Tito 2:8; 3:2) Afei koso, yɛngɔhã edwirɛ biemɔ bɔ ɔkɔyɛ kyɛ yɛgoro soen bɔ bɛwɔ nu nanwo ɔ. (2 Kor. 6:3) Aliemaamɔ bɔ bɛma badwanu dwudwolɛ ne, bɛ paa yeɛ odikyɛ bɛmaa bɛnye kɔ ɛhe anwo ɔ. Sɛ bɛma tɔɔk a, edwirɛ biemɔ bɔ sɛ bɛkã a, ɔkɔyɛ se kyɛ bɛbɔ bɛtte Yehowa Adanzefoɛ ne kɔte yebo ne, odikyɛ bekyirekyire nu maa nu da berɛ.

17. Sɛ yenya ‘bɛ bɔ bekuro kyɛ benya daa ngoa’ ne wɔ asɛnga nu a, nzu yeɛ odikyɛ yɛfa yesie yɛnye so ɔ?

¹⁷ Yenwo aahia paa kyɛ yɛyere yɛnwo yɛkã nzɛmba ne ɛnnɛ yɛtra mmerɛ biala, na yɛkɔso yɛpena ‘bɛ bɔ bekuro kyɛ benya daa ngoa’ ne. (Aso. 13:48) Sɛ yenya sɔ mmenia nemɔ a, odikyɛ ndɛen nala yɛkã Bible adesua nwo dwirɛ yekyire bɛ, na yɛto yɛsa yɛfrɛ bɛ maa bɛba adesua. Sɛ yɛyɛ sɔ a, ne yɛboka bɛ maa betu bɛ gya besie ‘atee bɔ ɔkɔ ngoa nu’ naso.—Mat. 7:14.