Nekaabiala Bɔ Yɛhɔle Ne, Yehowa Bokale Yɛ Maa Yɛnye Hane

Aliemaa Mats Kassholm ne ɔye Ann-Catrin hɔle Gilead Sukuu wɔ 1979 nu, na ofi berɛ ne, bamaa baasõ wɔ Iran, Mauritius, Myanmar, Tanzania, Uganda, ɔne Zaire. Mmerɛ bɔ ne bɛwɔ Gilead ne, bɛ tikyaniɛ ko bɔ bɛfrɛ ye Jack Redford yeɛ ɔhane edwirɛ bɔ yalimoa yahã ne ɔ. Sɔ afutue ne aboka bɛ paa wɔ nekaa biala bɔ asafo ne fale bɛ hɔle ɔ. Yede ɛmɔma yetie bɛnoa nu dwirɛ.

Yɛsrɛ ɛmɔ, ɔyɛle sɛɛ yeɛ ɛmɔ nwuni nahorɛ ne ɔ?

Mats: Mmerɛ bɔ ne Wiase Koɛ II ne kɔso ne, ne me baba wɔ Poland, na bɔ ne ɔkɔso wɔ Roman asɔre nanu ne, ɔmaa onwuni kyɛ bɛnga nahorɛ. Nakoso ne ɔtaa kã kyɛ, “Ɔyɛ sɛɛ alaa a nahorɛ soen bie wɔ berɛ.” Siɛ ye mmanwuni kyɛ sãa ne ɔnnaka. Ne metaa metɔ nwomaa pee mekenga, na ko bie bɔ ngɔndɔle ne de, ne yenwo te bruu, na ne bɛfrɛ ye The Truth That Leads to Eternal Life. Nwuni sɔ dwirɛ ne wɔ nwomaa ne si nala yeɛ menye gyele yenwo ɔ, yeti ɛlɛho deinn bɔ ndɔle ne, mmɔle asiripɛ ngengale yemu. Aleɛ hyene ne, nwuni kyɛ manwu nahorɛ ne.

Ofi April 1972 bɔ ɔkɔ ne, ngengale Yehowa Adanzefoɛ nwomaa pee, na ɔmaa nyane edwirɛ biemɔ bɔ ɔkye m’adwene nanwo mmuayɛɛ. Ndele nga tekyɛ dwadiniɛ bɔ Yesu hane yenwo dwirɛ wɔ ye mvandoho bie nu ne. Mmerɛ bɔ onwuni afire pá ko bɔ ye nyɔboɛ yɛ se ne, ɔɔtɔnene ye agyapadeɛ amukoraa fa tɔle. Ne ogyi menye so kyɛ ngɔhɔ univasiti na maayɛ dɔktaniɛ, nakoso mvale yemu mmɔle afɔleɛ, kyɛbɔ ɔkɔyɛ a ngɔhora ngɔtɔ ‘afire pá’ bɔ yeɛ ole nahorɛ bɔ manwu ye ne ɔ. (Mat. 13:​45, 46) Yeti mmɔle asu December 10, 1972.

M’awofoɛ ne nniema brienzua kaamba koso, bɛhyɛle yebo kyɛ besua nikye, na afoɛ ko si ne bɛbɔle asu. Wɔ July 1973 nu ne, mmanyɛle ateepakyelɛniɛ. Ateepakyelɛfoɛ bɔ ne bɛbɔ bɛnwo mmɔden paa wɔ y’asafo nanu ne, ne aliemaa brasua bie bɔ bɛfrɛ ye Ann-Catrin bokaso. Ne yenwo yɛ nyemene paa, na ne ɔmva Yehowa soen nni angorɛ. Ne yekuro yɛnwo, yeti wɔ 1975 nu ne, yegyale. Yɛtenane kuro bie bɔ bɛfrɛ ye Strömsund bɔ ɔwɔ Sweden afoɛ nna. Ne ɛberɛ yɛ nyemene paa, na mmenia bɔ bɛwɔ berɛ ne koso ne bɛnye gye nzɛmba nanwo.

Ann-Catrin: Me baba hɔle univasiti wɔ Stockholm, na ɔka kaa maa oyie ne yeɛ onwuni nahorɛ ne ɔ. Sɔ mmerɛ ne, ne mali bosome nza pɛ, nakoso sɛ ne me baba kɔ adesua ne asɛnga a, ne ɔfa me kɔ. Ne me maame nye ngye bɔ ɔkɔso nanwo, yeti daa ne ɔne me baba su aporowaa wɔ Yehowa Adanzefoɛ ngyerɛkyerɛ nwo. Nakoso wangɔ anzi hwee, ofikyɛ mmerɛ bie si ne, ye koso ɔbɔle asu. Nyane afoɛ 13 ne, mmɔle asu, na nnili afoɛ 16 ne, nyɛle ateepakyelɛniɛ. Ngɔnyɛle asɛnga adwuma ne wɔ Umeå, ofikyɛ ne behia adawurubɔfoɛ pee maa bɛkã nzɛmba ne wɔ dɔ, na yesi ne, mmanyɛle ateepakyelɛniɛ titire.

Yegyale ne si ne, yɛbokale mmeni pee maa benwuni nahorɛ ne, na ɛhene maa yɛnye gyele paa. Bɛ nu ko yeɛ ole taluwa bie bɔ bɛfrɛ ye Maivor. Adwuma bɔ ne ɔyɛ ne, ne wamaa wanya sikaa na ne wasa wale dumaa. Nakoso ɔyakyili, na siɛ ye ɔne nniema brasua kaamba bɔle nu yɛle ateepakyelɛ adwuma ne. Bɛhɔle Gilead Sukuu wɔ 1984 nu, na kesaalae bɛte nzɛmbatrɛlɛfoɛ wɔ Ecuador.

Afutue bɔ yeɛ ole kyɛ “nekaabiala bɔ ɛkɔhɔ ne, wɔnye kɔhora kɔhã” ne, sɛɛ yeɛ waboka ɛmɔ wɔ ɛmɔ nzɛmbatrɛlɛ adwuma nanu ɔ?

Mats: Ne bɛtaa bɛsesã yɛ dwumadie mmerɛ pee. Yeti sɛ bɛfa yɛ bɛkɔ ɛwa ɛnnɛ a, ɛhema ne bafa yɛ bahɔ nekaa foforɛ. Nakoso yɛbɔle mmɔden kyɛ yekosuesua Yesu, ye titire ne ye anwobrɛaseɛ ne. Ɛhene maa ‘yetirale ndii wɔ ye nu.’ (Kol. 2:​6, 7) Nekaa ahoroɛ bɔ yɛhɔle ne, yannea atee kyɛ aliemaamɔ bɔ yaato bɛ ne, bɛkɔyɛ bɛ nikyee tekyɛ yɛ, na mmom bɔ yeti yeɛ bɛyɛ nningyein biemɔ ne, yɛbɔle mmɔden kyɛ yɛkɔte yebo. Afei ne yɛpena kyɛ yenwu kyɛbɔ besusu nningyein nwo, ɔne b’amammerɛ. Ɔnate kyɛ yesuesuane Yesu nati, ɔyɛle tekyɛ bɔ ‘balua yɛ wɔ asue noa’ ne. Yeti nekaabiala bɔ yɛhɔle ne, yɛnye hane.—Edw. 1:​2, 3.

Ann-Catrin: Sɛ betu bakaa bie bekodua ye wɔ nekaa bie a, sana onya eyia kora ne wahora wayɛ yé. Yɛ koso, Yehowa yɛle kyɛ “eyia” bɔ ɔma yɛ anwoserɛ ɔ. (Edw. 84:11) Ɔmaa yesa yenyane aliemaamɔ mmrienzua ne mmrasua pee bɔ bekuro yɛ dwirɛ ɔ. Yɛwɔ Iran ne, asafo kaamba bie bɔ ne yɛwɔ nu wɔ Tehran ne, aliemaamɔ bɔ bɛwɔ berɛ ne, menwa sɛ owura bɛnoa nu po a bɛkɔye bɛkɔma wɔ. Bɛ subaen sɔ ne de, ne waayɛ kyɛ bɛbɔ Bible kã bɛnwo dwirɛ kyɛ ne bebukye bɛsa nu nala. Yenyane a ahaa yɛkɔtena Iran berɛ ala, nakoso wɔ July 1980 nu ne, awaen ne brale Yehowa Adanzefoɛ wɔ berɛ, na bɛmane yɛ dɔnhwere 48 kyɛ yɛfa yefi berɛ. Yeti bɛfale yɛ bɛhɔle Zaire bɔ ɔwɔ Africa ne. Ɛnnɛ bɛfrɛ berɛ Congo.

Mmerɛ bɔ ndele kyɛ bɛfa yɛ bɛkɔ Africa ne, nzuni. Ne mate kyɛ ewoo ne anwonyerɛ pee wɔ dɔ, yeti ne wamaa esuronyi ahã me. Nakoso aliemaa bie ne ɔye bɔ bɛte yɛ damvomɔ ne bokale yɛ paa. Bɛde ne baaso wɔ Africa afoɛ pee. Bɛhã behyirele yɛ kyɛ: “Ɛmɔnya bedwulli dɔ nati yeɛ ɛmɔkunu tete ɛmɔ ne. Ɛmɔde ɛmɔhɔ, na ɛmɔ konwu kyɛ sãa ɛdɔ yɛ fɛ paa.” Amba-ne-amba ne ɛdɔ yɛ fɛ, ofikyɛ ne aliemaa nemɔ kuro sona paa. Yelili Zaire dɔ afoɛ nzia, na ɛhene si ne, awaen ne brale Yehowa Adanzefoɛ wɔ maen nanu, yeti ne odikyɛ yefi berɛ. Ɔwale sɔ ne, mmɔle Yehowa mbaeɛ kyɛ, “Mesrɛ wɔ, nnɛmaa yefi Africa.” Nakoso me bɔbɔ deinn po, ne osa yɛ me sere kyɛ mebɔ sɔ mbaeɛ ne ɔ.

Nhyiraa beni yeɛ ɛmɔanya ye wɔ sɔ afoɛ he mukoraati nu ɔ?

Mats: Ɔnate nzɛmbatrɛlɛ adwuma nati, wamaa nzɛmbatrɛlɛfoɛ bɔ ɔsono nekaa bɔ befi ne b’amammerɛ ne, baayɛ yɛ damvomɔ. Afei koso, nekaa bɔ yɛhɔle ne bie wɔ berɛ a, ne yɛkora yenya mmeni pee yɛne bɛ sua Bible ne. Odwu mmerɛ bie po a, ne yɛ nu biala kora yɛ Bible adesua kɔyɛ 20! Ɛhene maa yɛnye gyele paa. Aliemaamɔ bɔ bɛwɔ Africa ne koso, kyɛbɔ ne besi bekuro yɛ dwirɛ, na bɛne yɛ tenane kama ne, me wora ngofi ye lle. Yɛwɔ Tanzania ne sɔa, sɛ ne yɛkɔsra asafo ahoroɛ ne a, yɛ kar nu yeɛ ne yɛla ɔ. Ɔwɔ nu, ne aliemaa nemɔ lle bie, nakoso bɛyɛle “bɔ ɔbo b’anwoserɛ so” kyɛbɔ ɔkɔyɛ a yekonya bɔ yehia ɔ. (2 Kor. 8:3) Ne yɛye mmerɛ bie yesi berɛ yɛfa yɛdwenedwene nningyein nwo, na ɛhene koso maa menye gyele paa. Bɔ ne mene Ann-Catrin yɛyɛ yeɛ ole kyɛ, nɔsoa biala, bɔ ɔhɔleso wɔ kyẽa nanu ne, ne yɛbɔ yenwo ngɔmmɔ. Afei ne yɛda Yehowa ase kyɛ ɔbokale yɛ ɔ.

Ann-Catrin: Me koso nikyee ko bɔ ɔmaa menye gyele paa yeɛ ole kyɛ, yenyane yenwo atee yeyiale aliemaamɔ bɔ befi nekaa ahoroɛ pee. Yesuane dwudwolɛ biemɔ tekyɛ Farsi, French, Luganda, yeɛ Swahili. Yesa koso yesuane amammerɛ ahoroɛ pee. Yɛbokale bɛbɔ ne bawa asafo nanu foforɛ ne, yenyane nnamvoa pee, na yɛne bɛ bɔle nu sone Yehowa.—Sef. 3:9.

Yesa koso yenyane yenwo atee yenwuni Yehowa abɔdeɛ ahoroɛ bɔ ɔyɛ nyemene ne. Mmerɛ biala bɔ bɛkɔma yɛ dwumadie foforɛ ne, ne yenwu ye kyɛ wayɛ kyɛbɔ yɛne Yehowa nate bɔ okyire y’atee ɔ. Osuahu pee bɔ Yehowa amaa yanya ye ne, sɛ nna ye a, ahãa yɛnwo nyɛɛ ne yanya ye?

Ɔhaw beni yeɛ ɛmɔ afa nu ɔ, na sɛɛ yeɛ ɛmɔ gyinane yenoa ɔ?

Mats: Odwu mmerɛ bie a ne anwonyerɛ bɔ yɛ, na nu ko yeɛ ole malaria. Ann-Catrin po de, odwuli mmerɛ bie ne, yɛkwaate ɔ, bɛnwa odikyɛ bɛyɛ ye oprehyen. Y’awofoɛ koso ne bɛyɛ mbanyi, yeti ne ɛhene afa adwenedwene aato yɛso. Nakoso y’abusuafoɛ neane bɛ mane yɛ, na yɛda b’ase paa. Benyane bɛnwo aboterɛ, na bɛfale anigye bɛyɛle sɔ adwuma ne bɛfa behyirele kyɛ bɛdwene bɛnwo. (1 Tim. 5:4) Ɔwɔ nu kyɛ ne yɛwɔ dede, koso yɛyɛle bɔ yɛkɔhora biala yɛfa yɛbokale bɛ. Nakoso yenyane a ahaa yɛwɔ bɛnwo berɛ bɔ yɛnea bɛ ɔ, yeti odwu mmerɛ bie a ne ɔha yɛ.

Ann-Catrin: Wɔ 1983 nu mmerɛ bɔ ne yɛso wɔ Zaire ne, kɔlera bie hyele me, na ne ɔtte angorɛ koraa. Dɔktaniɛ bɔ ɔnea me ne hahyirele Mats kyɛ, “Fa ye fi maen he anu ɛnnɛ ala, wanyɛ sɔ a bɔ okosi ttemaye!” Yeti aleɛ hyene ne, yɛfole alupre bɔ ɔfa nningyein yɛhɔle Sweden, ofikyɛ ɛhene alaa yeɛ ne ɔwɔ berɛ ɔ.

Mats: Ɔwale sɔ ne, y’adwene yɛle yɛ kyɛ yɛngɔhora yɛngɔyɛ nzɛmbatrɛlɛ adwuma ne kõ, yeti yesuni paa. Ɔwɔ nu kyɛ ne dɔktaniɛ ne adwene yɛ ye kyɛ Ann-Catrin nwo ngɔtɔ ye, nakoso siɛ ye yenwo tɔle ye. Yeti afoɛ ko si ne, yesa yɛhɔle Zaire, na yɛɛsone wɔ Swahili asafo kaamba bie nu wɔ Lubumbashi.

Ann-Catrin: Mmerɛ bɔ ne yɛwɔ Lubumbashi ne nwonzɛle, nakoso ɔsɛkyele. Ɔwɔ nu, ne yɛyɛlle y’adwene kyɛ yɛkɔwo, nakoso yɛwa bɔ owuli ne, ɔmaa me wora bɔle paa. Sɔ mmerɛ nanu ne, Yehowa yɛle nikyeebie mane yɛ bɔ yanna yandwene yenwo koraa ɔ. Ye ole kyɛ yɛhora yɛyɛle Bible adesua pee, na ne yɛyɛlle bie sɔ lle. Yeti wandwu afoɛ ko po, asafo bɔ ne nu adawurubɔfoɛ te 35 ne, bedwuli 70. Bɛbɔ ne bɛba adesua ne koso ne bɛte 40, nakoso ohuri hɔle 220. Yɛyerele yɛnwo yɛyɛle asɛnga adwuma ne, na Yehowa koso yirale yɛ. Ɛhe maa me wora kyekyele. Ɛnnɛ mukoraati, ɛyɛ a ne yɛwa nanwo dwirɛ aapẽ yɛ tianu. Yeti yɛnea atee kyɛ yedwu Paradise a, Yehowa kɔye ɛyealɛ biala bɔ yedi ne kofi berɛ.

Mats: Odwuli nekaa bie ne, sɛ Ann-Catrin yɛ nikyee kaa a ne wafɛ. Me koso dɔktafoɛ nwuni kyɛ manya kansa, na ne wadidi me nipadua nanu, yeti ne odikyɛ bɛyɛ me oprehyɛn. Nakoso kesaalae de menwo te pa, na Ann-Catrin koso ogu so ngakangaka.

Yaanwu ye kyɛ nna yɛ ngome yeɛ yɛfa ɔhaw nu ɔ. Mmerɛ bɔ ngondii bɔ ne ɔkɔso wɔ Rwanda ne wale ayieleɛ wɔ 1994 nu ne, yɛhɔle atukɔfoɛ atenaleɛ ahoroɛ nu yɛɛneane aliemaamɔ boso. Sɛ yɛnea bɛ gyidie, b’animia, ɔne kyɛbɔ ne bɛbokaboka bɛnwo ne a, ɔmaa yenwuni kyɛ Yehowa le tumi bɔ ɔfa boka ye mmenia, ɔmva yenwo ne ɔhaw biala bɔ bɛfa nu ne.—Edw. 55:22.

Ann-Catrin: Mmerɛ bɔ ne beyira Bɛtɛl bɔ ɔwɔ Uganda naso wɔ 2007 nu ne, yɛhɔle bie, na ɛhene anu ne, edwirɛ foforɛ bie tole yɛ. Dwumadie ne wale ayieleɛ ne, ne yɛne Bɛtɛlfoɛ ne nzɛmbɛtrɛlɛfoɛ biemɔ nate atee so yɛkɔ Nairobi, Kenya. Ne yɛte mmenia kɔyɛ 25. Ɔka kaa maa yedwu Kenya bɔda naso ne, yenwu ye nala ne kar bie fi ye atee so wate wasie y’atee deɛ nanu, na ɔfa bɔle yɛ kar nanu. Ɔwale sɔ ne, dravaniɛ ne, ɔne aliemaamɔ nnu wuli ɛberɛ ala, na siɛ ye aliemaa brasua ko koso wuli wɔ hɔspitel. Yɛ wora adɔ yɛ damvo nemɔ paa, na yɛnea atee kyɛ yekonwu bɛ bieku.—Yob 14:​13-15.

Me koso mburale, na ngakangaka menwo tɔle me. Yɛ bɔ yenyane sɔ asedɛnt ne, yenu biemɔ wɔ berɛ a, bɔ ɔtole yɛ yeɛ ole kyɛ, ɛyɛ a ne ogyigyi yɛnye so, yeti ɔwɔ nu alaa a ne yabɔ brim. Me deɛ ne de, ɛyɛ a ɔba kɔngɔen. Sɛ ɔba sɔ a ne wayɛ kyɛbɔ nikyeebie te m’ahone ne, na ɛyɛ a ne esuronyi ahã me. Nakoso mbaeɛ bɔ yɛbɔle, ɔne tworɔnzɛm biemɔ bɔ yɛkengale ne, ɔkyekyele yɛ wora maa yɛhora yegyinane yenoa. Yesa yɛhɔle yenwo hɔspitel maa dɔktafoɛ neane yɛ, na ɛhene koso bokale yɛ paa. Sɛ ngɔhã a, kesaalae de wahɔ ase kãa. Yeti bɛbɔ bɛ koso bɛfa sɔ haw nanu ne, ɛyɛ a yɛbɔ mbaeɛ kyɛ Yehowa boka yɛ ma yɛkyekye bɛ wora.

Mmerɛ bɔ ne ɛmɔkã bɔ waboka ɛmɔ maa ɛmɔ agyina ɛmɔ haw ahoroɛ noa ne, ne ɛmɔ nwa Yehowa “tirale ɛmɔ nu kyɛ kyiremvua.” Ne ɛmɔpena bekyire sɛɛ?

Mats: Sɔ dwirɛ “betirale yɛnu kyɛ kyiremvua” ne, yenya yefili Swahilifoɛ anyandera bie nu. Kyɛbɔ sɛ ebie tira kyiremvua a ɔnea ye yé ná wammɔ ne, sɔ ala yeɛ Yehowa koso ahɔso atira yɛnu wɔ dwumadie ahoroɛ bɔ bɛfa bɛmane yɛ nanu ɔ. Nikyeebiala bɔ yehia ne, Yehowa fama yɛ, na ɔyɛ maa ɔbo yɛso po. Kyɛbɔ Akwangyerɛ Kue ne si le tema ma yɛ ne, ɔte nikyee kõ bɔ ɔmaa yenwu kyɛ Yehowa kuro yɛ dwirɛ na yenye wɔ yɛ so paa.

Ann-Catrin: Atee bɔ Yehowa afa so aboka yɛ ne, mepena kyɛ mekã nu kõ nwo dwirɛ. Ɛlɛho bie, bɛfrɛle me befili Sweden kyɛ me baba nde apɔ koraa, na ɔla hɔspitel. Sɔ mmerɛ ne, ne Mats anya malaria, na ne yenwo tɔle ye hyɛlle. Afei koso ne yelle esikaa bɔ yɛkɔfa yɛkɔpɛ plane tekiti yɛkɔhɔ yɛ kuro ɔ. Yeti yɛyɛle kyɛ yɛkɔtɔne yɛ kar. Nu berɛ ala yeɛ aliemaa kõ ne ɔye frɛle yɛ wɔ fon so ɔ. Ne bɛnwa bate bɔ wasi ne, yeti bɛpena kyɛ bɛpɛ tekiti ne kõ bɛma yɛ. Aliemaa braa panyi bie koso frɛle yɛ wɔ fon so. Ne yenwa wafa esikaa wasie alaka nu wasie berɛ kyɛ sɛ ebie nwo kyire ye a ne wafa wama ye. Yeti kyɛ yɛbɔ yɛnye prɛ ne, ne Yehowa afa sɔ atee naso apepɛ ale yɛ.—Heb. 13:6.

Sɛ ɛmɔnea afoɛ 50 bɔ ɛmɔ afa bayɛ mmerɛ mukoraati soen adwuma ne a, nzu yeɛ ɛmɔ asua ɔ?

Ann-Catrin: Maanwu ye kyɛ, sɛ ‘yɛyɛ konn na yɛfa yɛnwo yɛto Yehowa so’ a, ɔmaa yenya anwoserɛ. Sɛ yɛfa yɛnwo yɛto Yehowa so a, yebɔbɔ ɔkõ ma yɛ. (Yes. 30:15; 2 Abe. 20:​15, 17) Dwumadie biala bɔ bɛfa bɛmane yɛ ne, yɛyerele yɛnwo yɛyɛle na ɛhene amaa yanya nhyiraa pee. Sɛ yɛɛyɛle adwuma foforɛ biala a, ahãa yengonya sɔ nhyiraa ne llé.

Mats: Nikyee kõ bɔ masua yeɛ ole kyɛ tebea biala bɔ ngɔhɔ nu ne, odikyɛ mefa menwo meto Yehowa so, na menea atee bɔ ɔkɔfa so kɔboka me ɔ. (Edw. 37:5) Yehowa lilli me hwamɔ llé. Kesaalae yɛwɔ Myanmar Bɛtɛl, na ɛwa koso Yehowa té boka yɛ.

Yɛ mbaeɛ yeɛ ole kyɛ mmrandeɛ ne ndaluwa bɔ bɛpena kyɛ bɛyɛ pee wɔ Yehowa soen nu ne, ɔdɔ bɔ onni ngasi bɔ ɔlale ye ali hyirele yɛ ne, ɔye bie ali ohyire bɛ. Yedé yedi paa kyɛ sɛ bɛfa bɛnwo bɛto Yehowa so a, nekaabiala bɔ bɛkɔhɔ ne bɛnye kɔhã.