Kyɛbɔ Ɛkɔfa Bible Adesua Nwo Vidio Ahoroɛ Ne Koli Dwumaa Ɔ

Yele Bible adesua nwo vidio ahoroɛ 4 bɔ yɛfa yɛdi dwumaa wɔ asɛnga nu ɔ. Nzuati yeɛ bɛyɛle enu biala ɔ?

• 

  Bɛyɛle Nzuati Yeɛ Odikyɛ Esua Bible Ne Ɔ?—Ye Tendenn ne kyɛ yɛfa yɛboka mmenia maa benya Bible nanwo anigye, ɔmva yenwo ne sõen biala bɔ bɛwɔ nu ne. Ɔhyɛ bɛ ngunaen maa bɛpena asetena nu nzɛmmisa bɔ ɔkye b’adwene nanwo mmuaeɛ befi Bible nanu, na ɔmaa benwu kyɛbɔ Bible ne ma yenwo mmuaeɛ bɔ enu laberɛ ɔ. Afei ɔmaa benwu kyɛbɔ bɛkɔmaa ebie ne bɛ kosũa Bible ne ɔ.

• 

  Nzuati Yeɛ Odikyɛ Esũa Bible Ne Ɔ? (ye tika) ɔtekyɛ vidio tendenn ne, nakoso bapɛ ye tika. Ɔkɔhora kɔboka wɔ aseɛsĩi bɔ mmenia llé alagyé wɔ nu nanu.

• 

  Nzu Yeɛ Ɔkɔso Wɔ Bible Adesua Bo Ɔ? Bɛyɛle ye kyɛ yɛfa yɛboka mmenia maa bɛnye gye Bible adesũa bɔ bɛndua hwee nanwo, kyɛbɔ ɔkɔyɛ a, bekonya bɛ nzɛmmisa nwo mmuaeɛ ɔ. Afei koso ɔmaa benwu kyɛbɔ bɛkɔmaa ebie ne bɛ kosũa Bible ne ɔ.

• 

  Bɛyɛle, Yɛyɛ Wɔ Akwaaba Yɛba Wɔ Bible Adesua Naso ne kyɛ yɛye yehyire Bible asũafoɛ. Ɔwɔ nu kyɛ sɔ vidio ne wɔ Nya Asetena Nu Anigye Daa! nwomaa ne, ye krataabue bɔ ɔtɔ so nyɔ nanu de, nakoso ɛkɔhora kɔye kohyire ebie, mmerɛ bɔ ɛne ye bɛsusu Nya Asetena Nu Anigye Daa! brohyeɔ nanwo ne. Vidio ne maa yenwu bɔ ɔwɔ nwomaa nanu, ɔne bɔ sũaniɛ ne kɔhora kɔnea y’atẽe, mmerɛ bɔ ɛne ye besua nwomaa ne.

Ɔwɔ nu kyɛ bele nikyehorɛ tibɔ bɛyɛle vidio nanu biala de, nakoso yɛkɔhora yɛkɔye vidio ne, anaakyɛ yɛkɔhora yɛkɔsɛnde enu biala yɛkɔma mmenia, mmerɛ bɔ yenwo kohia ne. Yɛhyɛ adawurubɔfoɛ ngunaen kyɛ, benwu vidio ahoroɛ nanu dwirɛ yé, kyɛbɔ ɔkɔyɛ a, bɛkonwu kyɛbɔ bɛkɔfa bekoli dwumaa yé wɔ asɛnga nu ɔ.