Fa Nya Asetena Nu Anigye Daa! Ne Hyɛ Gyidie Serɛ Wɔ Yehowa Ne Yesu Nu

Sɛ Bible asũafoɛ kɔhora kɔsɔ Nyameɛpiri nye a, sana benya gyidie bɔ enu yɛ se. (Heb 11:6) Na yɛkɔhora yɛkɔfa Nya Asetena Nu Anigye Daa! nwomaa ne yɛkɔboka bɛ maa bɛkɔyɛ sɔ. Sɔ adesũa nwomaa he fa tworɔnzɛm titire biemɔ, edwirɛ bɔ enu la berɛ, nzɛmmisa bɔ ɔkanyaen anigye, vidio pẽe bɔ ɔkã ahõne, ɔne mvonini ahoroɛ bɔ ɔyɛ nyemene di dwumaa. Sɛ yɛboka yɛ Bible asũafoɛ maa benya subaen pá bɔ Kristofoɛ da y’ali ne bie, ná bɛne Nyameɛpiri nya abusũabɔ bɔ enu yɛ se a, okyire kyɛ yɛfa nningyein bɔ sẽe ngora nyera ye ne yesi sua ne.—1Ko 3:12-15.

Ebiemɔ wɔ berɛ a, ɔyɛ se ma bɛ kyɛ bɛkɔfa Nyameɛpiri bɔ bɛngora benwui ne adamvoa. Yeti odikyɛ yɛboka bɛ maa benwu Yehowa yé, ná benya ye nu gyidie.

NEA VIDIO BƆ YEƐ OLE FA “NYA ASETENA NU ANIGYE DAA!” NE HYƐ GYIDIE SERƐ WƆ YEHOWA NU NE, NA YE NZƐMMISA BƆ OLILI SO HEMƆ NOA:

• Yɛyɛ sɛɛ yeɛ yenwu ye kyɛ aliemaa brasua ne siesiele yenwo yé kora yeɛ ɔkwaayɛ adesũa ne ɔ?

• Sɛɛ yeɛ ɔfale nzɛmmisa foforɛ bɔ otu mbɔn lili dwumaa fa bokale sũaniɛ ne maa osusuli Aizaya 41:10, 13 nanwo ɔ?

• Vidio bɔ bɛneane, ɔne tworɔnzɛm ahoroɛ bɔ bɛkengale ne, sɛɛ yeɛ ɔhãne sũaniɛ ne ɔ?

Mmeni pẽe nde agyedeɛ afɔleɛ nwo nhyehyɛeɛ nabo, na yepó bemmu ye kyɛ ɔte akyɛdeɛ bɔ Nyameɛpiri afa ama bɛ ɔ. (Gal 2:20) Yeti odikyɛ yɛboka bɛ maa benya Yesu agyedeɛ afɔleɛ nanu gyidie.

NEA VIDIO BƆ YEƐ OLE FA “NYA ASETENA NU ANIGYE DAA!” NE HYƐ GYIDIE SERƐ WƆ YESU NU NE, NA YE NZƐMMISA BƆ OLILI SO HEMƆ NOA:

• Yɛyɛ sɛɛ yeɛ yenwu ye kyɛ aliemaa brienzua ne siesiele yenwo yé kora yeɛ ɔkwaayɛ adesũa ne ɔ?

• Sɛɛ yeɛ ɔfale “Nea Ɛhe Koso” bue berɛ ne lili dwumaa fa bokale sũaniɛ ne ɔ?

• Nzuati yeɛ yenwo hia kyɛ ɛbɔ mbaeɛ ma sũaniɛ ne ɔ?