Pena Bible Nu Dwirɛ Bie Bɔ Ɛkɔfa Kɔbɔ Wɔ Bra Ɔ

Sɛ yɛkenga Bible ne a, edwirɛ biemɔ bɔ yenwo hia paa ne, yɛkɔhora yɛkɔyɛ yenwo nhwehwɛmuɛ. Nakoso, yɛkɔyɛ sɛɛ né yanya mvasoɛ pẽe yafi sɔ nhwehwɛmuɛ naso ɔ?

Sũa pẽe fa Bible nu dwirɛ bɔ ɛkenga nanwo. Ebie yeɛ ole kyɛ, pena sonahorɛ bɔ ɔhworɔle sɔ dwirɛ ne, mmenia bɔ ɔhworɔ mane bɛ, ɔne mmerɛ bɔ yeɛ ɔfa hworɔle ɔ. Afei ɛkɔhora kobisa wɔnwo kyɛ, ‘Mmerɛ bɔ né ɔtworɔ nwomaa ne, edwirɛ benimɔ yeɛ né osisi sɔ mmerɛ ne ɔ? Ebiekũ koso, koraka ɔbaahworɔ nwomaa ne, edwirɛ benimɔ yeɛ né wasisi ɔ, na nzu yeɛ osili wɔ ɛhẽne sĩ ɔ?

Bɔ mmɔden nwu asũadeɛ bɔ ɔwɔ nu ne. Sɛ ɛyɛ nhwehwɛmuɛ fa edwirɛ hemɔ nwo a, ɔkɔboka wɔ. Ebie yeɛ ole kyɛ: ‘Mmenia bɔ edwirɛ ne fa bɛnwo ne, sɛɛ yeɛ né bɛte ngã ɔ? Subaen beni yeɛ bɛlale ye ali ɔ? Aso odikyɛ mesuesũa sɔ subaen ne, anaa ɔnzɛkyɛ meyɛ sɔ?’

Fa bɔ asũa ne bɔ wɔ bra, na fa boka mmenia wɔ asɛnga nu. Sɛ ɛyɛ sɔ a, okyire kyɛ ɛse nworɛ. Bible ne kã kyɛ: “Ebiala bɔ ɔse nworɛ ne, odi kyɛ ɔdwene sɔ edwirɛ hemɔ anwo.”—Edw. 107:43.

• Ɛhe kɔboka wɔ: Nyameɛ Dwirɛ Nanu Asuadeɛ bɔ yesusu yenwo wɔ Kristofoɛ Abrabɔ nanu ne, ekonwu foto, nzɛmmisa, ɔne edwirɛ biemɔ bɔ ɛkɔhora kɔdwenedwene yenwo wɔ nu. Ɛhe kɔboka wɔ maa ekonwu kyɛbɔ ɛkɔfa bɔ esũa fi Bible nanu ne kɔbɔ wɔ bra ɔ.