Sɛ Ɛkyɛ Nikye A, Ɔkɔmaa Wɔnye Kɔgye Paa

1-2. Kyɛbɔ Yehowa bɔle yɛ ne, mvasoɛ beni yeɛ yenya yefi so ɔ?

ƆNATE kyɛbɔ Yehowa bɔle yɛ nati, sɛ yɛkyɛ nikyee a, ɔmaa yɛnye gye paa tra kyɛ ebie kɔhyɛ yɛ nikye ɔ. (Aso. 20:35) Aso ɛhe kyire kyɛ sɛ ebie kyɛ yɛ nikye a, yɛnye ngɔgye anaa? Ɔtte sɔ. Yɛse kyɛ sɛ ebie kyɛ yɛ nikyee a, ɔmaa yɛnye gye. Nakoso sɛ yɛ mmom yɛkyɛ ebie nikyee a, anigye bɔ yenya ye ne de bɛnga. Yeti ɔte pá paa kyɛ Yehowa bɔle yɛ wɔ sɔ atee naso ɔ. Nzuati ɔ?

² Ɔnate kyɛ Yehowa bɔle yɛ wɔ sɔ atee naso nati, yɛbɔbɔ yɛkora yɛyɛ nningyein biemɔ bɔ ɔmaa yɛnye gye ɔ. Sɛ yɛpena yenwo atee bɔ yɛkɔfa so yɛkɔhyɛ nikyee a, ɔmaa sɔ anigye bɔ yele ye ne, ɔyɛ piri. Aso ɛhene ngyire kyɛ atee bɔ Yehowa fale so bɔle yɛ ne, ɔyɛ nwanwa anaa?—Edw. 139:14.

3. Nzuati yeɛ Bible ne kã Yehowa nwo dwirɛ kyɛ ɔte ‘anigye Nyameɛ’ ɔ?

³ Bible ne maa yenwu ye kyɛ sɛ yɛkyɛ nikyee a, ɔmaa yɛnye gye. Ɛhene ati ɔnyɛ nwanwa kyɛ ɔkã Yehowa nwo dwirɛ kyɛ ɔte ‘anigye Nyameɛ’ ɔ. (1 Tim. 1:11) Yehowa yeɛ olimoa hyɛle nikyee ɔ, na ebiala nne berɛ bɔ ɔkyɛ nikyee tra ye ɔ. Kyɛbɔ somafoɛ Pɔɔlo hane ne, ɔnate ye so “yeɛ yɛte ase, yɛkɔ yɛba, ná yɛnya ngoa ɔ.” (Aso. 17:28) Amba, “akyɛdeɛ paa amukoraa ne akyɛdeɛ bɔ odi mu amukoraa” fi Yehowa berɛ.—Yak. 1:17.

4. Yɛkɔyɛ sɛɛ né yɛnye ahora agye paa?

⁴ Anigye bɔ ebie nya ye mmerɛ bɔ wahyɛ nikyee ne, yɛ mukoraati yɛpena kyɛ yenya bie. Sɛ yɛkɔhora yɛkɔyɛ sɔ a, sana yesuesua kyɛbɔ Yehowa fia ye kunu kyɛ nikyee ne. (Ɛfe. 5:1) Yɛkɔyɛ sɛɛ né yahora yayɛ sɔ? Afei sɛ yɛkyɛ ebie nikye, na wanyɛ nikyefee bɔ okyire kyɛ yenye asɔ a, yɛkɔyɛ ye sɛɛ? Yekosusu sɔ dwirɛ hemɔ nwo wɔ adesua he anu. Ɛhene kɔboka yɛ maa yɛkɔhɔ so yɛkɔhyɛ nikye, na wamaa yɛnye agye.

SUESUA KYƐBƆ YEHOWA YE YEKUNU KYƐ NIKYEE NE

5. Nningyein benimɔ yeɛ Yehowa fama yɛ ɔ?

⁵ Nningyein bɔ Yehowa ayɛ bɔ okyire kyɛ ofia ye kunu kyɛ nikyee ne, ɛmɔma yesusu nu bie nwo. Ɔmaa yɛsa ka bɔ yehia ɔ. Ebia yelle esikaa pee wɔ y’asetena nu, nakoso Yehowa adaworoma, ɔmaa yɛnu pee sa ka nningyein bɔ yehia ɔ. Ebie yeɛ ole kyɛ ɔmaa yenya aleɛ bɔ yekoli, bɔ yekowura, ɔne nekaa bɔ yɛkɔfa yɛ ti yɛkɔto ɔ. (Edw. 4:8; Mat. 6:​31-33; 1 Tim. 6:​6-8) Aso odikyɛ Yehowa fa sɔ nningyein hemɔ ma yɛ nati yeɛ ɔmaa ɔyɛ sɔ anaa? Daabi ɔtte sɔ. Yede nzuati yeɛ Yehowa yɛ ɛhe mukoraati ma yɛ ɔ?

6. Nzu yeɛ yesua yefi Mateo 6:​25, 26 nanu ɔ?

⁶ Ye tikaape yeɛ ole kyɛ Yehowa kuro yɛ dwirɛ nati, yeɛ ɔmaa yɛsa kã nningyein bɔ yehia ɔ. Wɔde susu edwirɛ bɔ Yesu hane ye wɔ Mateo 6:​25, 26 nanwo nea. (Kenga.) Nningyein bɔ Yehowa abɔ ne, Yesu fayɛle mvandoho ahoroɛ. Ɔhane nnomaa nwo dwirɛ kyɛ: “Bɛnyɔ boo, bɛngɔmva eboo so aleɛ, yeɛ bɛmmoaboa aleɛ bengua pata so.” Nakoso hyɛ edwirɛ bɔ ɔha toale so ne nzorɛ. Ɔhane kyɛ: “Ɛmɔ Baba bɔ ɔwɔ nyameɛso ne ɔma bɛ aleɛ.” Afei Yesu bisale kyɛ: “Aso ɛmɔ nwo nhia ndra bɛ?” Yede nzu yeɛ né ɔpena kyire ɔ? Bɛbɔ bɛso Yehowa ne, bɛnwo hia ye paa tra ngaka. Yeti sɛ Yehowa nea ngaka maa bɛsa ka bɔ behia a, yele gyidie paa kyɛ atee biala so ɔkɔnea yɛ. Kyɛbɔ baba bie bɔ okuro ye abusua dwirɛ nea bɛ ne, sɔ ala yeɛ Yehowa koso te ɔ.—Edw. 145:16; Mat. 6:32.

7. Sɛɛ yeɛ yɛkɔhora yekosuesua kyɛbɔ Yehowa fia ye kunu kyɛ nikyee ne ɔ? (Nea foto ne koso.)

⁷ Tekyɛ Yehowa ne, yɛ koso yɛkɔhora yɛkɔboka mmenia maa bɛsa kɔhã bɔ behia ɔ. Aso ɛse aliemaa bie bɔ aleɛ bɔ okoli, ɔne bɔ okowura po nwo ayɛ se ama ye anaa? Yehowa kɔhora kɔfa wɔ so maa yesa kɔhã sɔ nningyein ne. Bɛbɔ bɛso Yehowa ne de, sɛ atorɛngyɛm bie si a, bɛboka bɛnwo paa. Ebie yeɛ ole kyɛ mmerɛ bɔ COVID-19 anwonyerɛ ne wale ne, aliemaa biemɔ fale aleɛ, ndaadeɛ, ɔne nningyein foforɛ bokale aliemaamɔ bɔ né bahɔ anwokyere nu ne. Ebiemɔ koso yele ndoboa fa bokale adwuma bɔ yɛyɛ ye wɔ ewiase mukoraati ne. Ɛhene maa yɛhora yɛbokale aliemaamɔ bɔ né bɛnwo ahyere bɛ wɔ ewiase mukoraati ne. Sɔ aliemaa nemɔ fale edwirɛ bɔ ɔwɔ Hebrifoɛ 13:16 ne bɛyɛle adwuma. Ɔkã kyɛ: “Nnɛma ɛmɔbu ɛmɔ nye begua so kyɛ ɛmɔkɔyɔ paa ná ɛmɔkɔbokaboka bɛ nwo ɔ, ofikyɛ sɔ afɔleɛ nemɔ yeɛ ɔsɔ Nyameɛ nye ɔ.”

8. Anwoserɛ bɔ Yehowa fa ma yɛ ne, sɛɛ yeɛ ɔboka yɛ ɔ? (Filipifoɛ 2:13)

⁸ Yehowa yeɛ ɔma y’anwoserɛ ɔ. Yehowa le anwoserɛ paa, na yenye gye yenwo kyɛ ɔkɔfa bie kɔma bɛbɔ bedi nahorɛ bɛma ye ne. (Kenga Filipifoɛ 2:13.) Aso abɔ mbaeɛ kyɛ Yehowa ma wɔ anwoserɛ ma egyina ɔhaw bie bɔ nu yɛ se, anaa nzɔhwɛ bie noa le? Anaa ebia abɔ Yehowa mbaeɛ le kyɛ ɔma wɔ anwoserɛ ma ɛfa yɛ nningyein bɔ odikyɛ ɛyɛ ye wɔ kyẽa nanu ne. Mmerɛ bɔ Yehowa mane wɔ mbaeɛ nanwo mmuayɛɛ ne, enwuni kyɛ edwirɛ bɔ somafoɛ Pɔɔlo hane he te nahorɛ. Ɔhane kyɛ: ‘Mekora meyɔ nnningyein amukoraa bɔ ɔma me anwoserɛ ne ati.’—Flp. 4:13.

9. Yɛkɔyɛ sɛɛ né yasuesua kyɛbɔ Yehowa fia ye kunu fa ye anwoserɛ boka mmenia ne? (Nea foto ne koso.)

⁹ Ɔwɔ nu kyɛ bɔne wɔ yɛnwo de, nakoso yɛkɔhora yekosuesua kyɛbɔ Yehowa fia ye kunu fa ye anwoserɛ boka mmenia ne. Anwoserɛ de, ebie ngora mva ye deɛ mma ye mango. Nakoso yɛkɔhora yɛkɔfa anwoserɛ bɔ yele ye ne yɛkɔboka mmenia wɔ atee pee so. Ebie yeɛ ole kyɛ, aliemaamɔ bɔ bayɛ mbanyi anaa bɛnde apɔ ne, yɛkɔhora yekooli dwaa yɛkɔma bɛ, anaa yɛkɔboka bɛ maa bɛkɔyɛ b’awuro nningyein biemɔ. Sɛ yenwo atee ne wɔ berɛ koso a, aliemaamɔ bɔ sɛ nikyeebie sɛkye wɔ Ahennie Asa bie nwo a besiesie ne, yɛkɔhora yɛkɔboka bɛso. Sɛ yɛfa y’anwoserɛ yedi dwumaa wɔ sɔ atee naso a, ɔkɔboka aliemaamɔ pee.

10. Yɛkɔyɛ sɛɛ né yafa yɛnoa dwudwolɛ yahyɛ mmenia ngunaen?

¹⁰ Yɛkɔhora koso yɛkɔfa yɛnoa dwudwolɛ yɛkɔhyɛ mmenia ngunaen. Aso ɛse ebie bɔ wayɛ nikyeebie bɔ sɛ ɛkamvo ye a, ɔkɔhora kɔhyɛ ye ngunaen anaa? Anaa ɛse ebie bɔ ohia awerɛkyekyerɛ ɔ? Sɛ ɛse ebie bɔ ɔte sɔ a, yede yɛ nikyeebie ma sona ne nwu ye kyɛ ɛdwene yenwo. Ebie yeɛ ole kyɛ, ɛkɔhora kɔɔnea ye boso, ɛkɔfrɛ ye wɔ fon so, anaa ɛkɔsɛnde ye tɛs mɛsege. Ɛyɛ a, nnenya adwene kyɛ edwirɛ pee bɔ ɛkɔha ne yeɛ ɔkɔboka sona ne ɔ. Mmom, edwirɛ kãa bie bɔ ekofi w’ahone nu kɔhã ne kɔhora kɔboka eliema ne maa yewora kɔkyekye, na wahɔso waso Yehowa.—Any. 12:25; Ɛfe. 4:29.

11. Nworɛ bɔ Yehowa se ne, sɛɛ yeɛ ɔfa di dwumaa?

¹¹ Yehowa yeɛ ɔmaa yenwu nworɛ ɔ. Suaniɛ Yakobo hane kyɛ: “Sɛ ɛmɔ nu bie tɔ sii nworɛ nu a, maa obisa Nyameɛ bɔ ɔye ye kunu fa ma mmenia, bɔ ɔmva animguaseɛ mmata ye nwo ne.” (Yak. 1:5) Sɔ dwirɛ ne maa yenwu kyɛ nworɛ bɔ Yehowa se ne, ɔmva mmɔ yɛ atianuserɛ. Na mmom, ɔye ye kunu ma yɛ bie. Hyɛ ye nzorɛ koso kyɛ nworɛ bɔ Yehowa fa ma yɛ ne, ɔmva “animguaseɛ mmata ye nwo.” Yehowa nguro kyɛ yekonya adwene kyɛ gyamia yɛnze bɔ yɛyɛ ɔ, yeti yeɛ yɛpena akwangyerɛ yefi ye berɛ ne. Na mmom, ye bɔbɔ po yeɛ ɔhyɛ yɛ ngunaen kyɛ yɛyɛ sɔ ɔ.—Any. 2:​1-6.

12. Nworɛ bɔ yɛse ne, sɛɛ yeɛ yɛkora yɛfa yɛboka mmenia ɔ?

¹² Yɛ koso ɛɛ, aso nworɛ bɔ yɛse ne, yɛkɔhora yekosuesua Yehowa na yafa bie yaboka mmenia anaa? (Edw. 32:8) Bɛbɔ bɛso Yehowa ne de bɔ basua ne, bele yenwo atee pee bɔ bɛkɔhora bɛkɔfa bɛkɔboka mmenia ɔ. Ebie yeɛ ole kyɛ bɛbɔ bekye yeɛ bahyɛ asɛnga bo ne, yɛboka bɛ wɔ asɛnga nu. Asafo nu mbanyi nemɔ koso, bɛboka asafo nu asomvoɛ ne mmrandeɛ bɔ babɔ asu ne maa bɛyɛ bɛ dwumadie ahoroɛ bɔ owura bɛsa wɔ asafo nanu ne. Sɛ ɔba asafo ne sua ahoroɛ bɔ besisi ne koso a, aliemaamɔ bɔ bele suahu pee ne, bɛtete bɛbɔ bawa nu foforɛ ne maa benwu adwuma ne nye so.

13. Sɛ yɛfa ndeteyɛɛ yɛma mmenia a, yɔkɔyɛ sɛɛ né yasuesua Yehowa?

¹³ Bɛbɔ bɛfa ndeteyɛɛ bɛma ebiemɔ ne, bɛyere bɛnwo kyɛ bekosuesua Yehowa. Kae kyɛ Yehowa de, nworɛ bɔ ɔse ne, ɔye ye kunu fa bie ma yɛ. Yeti yɛ koso nimdeɛ bɔ yele ye ne, odikyɛ yɛye ye kunu yɛfa yɛboka bɛbɔ yɛtete bɛ ne. Ɔnzɛkyɛ yenya adwene kyɛ sɛ yɛfa nimdeɛ bɔ yele ne mukoraati yɛma mmenia bɔ yɛtete bɛ ne a, ebia bekosã yɛnwo bekoole yenwo atee bɔ yele ne bekofi yɛsa nu. Afei ɔnzɛkyɛ yɛkã kyɛ: ‘Sona ne bɔbɔ ɔyere yenwo sua ye nikye, ofikyɛ mewora mannya ebiala mma wangyire me!’ Sɔ subaen ne de, bɛmva bɛndena asafo nanu. Mmenia bɔ yɛtete bɛ ne, nna nimdeɛ bɔ yele ye ne ngome yeɛ yɛfa yɛma bɛ ɔ, na mmom ‘yɛfa yɛ nwo yɛbɔ afɔleɛ koso yɛma bɛ.’ (1 Tɛs. 2:8) Yele gyidie kyɛ bɛ koso “bɛkɔhora bekohyirehyire ebiemɔ.” (2 Tim. 2:​1, 2) Sɛ yɛye ye kunu yɛfa nimdeɛ bɔ yele ye ne yɛboka mmenia a, yɛne bɛ mukoraati yɛnye kɔgye.

MMERƐ BƆ YAYƐ EBIE PÁ NAKOSO WANNA Y’ASE NE

14. Sɛ yɛyɛ nikyeebie yɛma mmenia a, nzu yeɛ benu pee nala yɛ ɔ?

¹⁴ Sɛ yɛyɛ nikyeebie yɛboka aliemaamɔ anaa yɛkyɛ bɛ nikyee a, ɛyɛ a bɛtaa bɛda y’ase. Ebia bɛkɔhworɔ edwirɛ bie bekogua krataa so bɛkɔla y’ase, anaa bɛkɔfa atee foforɛ so bɛkɔyɛ sɔ. (Kol. 3:15) Sɛ mmenia yɛ sɔ a, ɔmaa yɛnye gye paa.

15. Sɛ yɛyɛ nikyee yɛma ebie na wanna y’ase po a, nzu yeɛ odikyɛ yɛkae ɔ?

¹⁵ Nna mmenia namu yeɛ sɛ yɛyɛ bɛ pá a, bɛkɔla y’ase ɔ. Sɛ odwu mmerɛ bie a, yɛkora yɛfa yɛ mmerɛ, y’anwoserɛ anaa yɛ esikaa po yɛboka ebie. Nakoso, ebia sona ne ngɔyɛ nikyefee bɔ okyire kyɛ yenye asɔ bɔ yayɛ yama ye ne ɔ. Sɛ ɔba sɔ a, ɔkɔyɛ yɛ yea. Nakoso nzu yeɛ ɔkɔboka yɛ na yamma ɛhene anzɛkye anigye bɔ yele ye ne ɔ? Kae edwirɛ bɔ ɔwɔ Asomafoɛ 20:​35, bɔ adesua he gyi so ne. Sɛ yɛkyɛ ebie nikyee na yɛnye kɔgye a, oggyi asenaa bɔ ɔkɔla yɛ naso. Yeti yɛnye kɔhora kɔgye mmerɛ po bɔ yayɛ mmenia pá bɔ banna y’ase ne. Nzuati ɔ? Ɛmɔma yɛnea bɔ yeti yeɛ yɛkã sɔ ɔ.

16. Nzu yeɛ ɔkɔboka yɛ maa yɛkɔhɔso yɛkɔhyɛ nikyee ɔ?

¹⁶ Sɛ ɛkyɛ nikyee a, né esuesua Yehowa. Yehowa de, sɛ mmenia da ye ase oo, banna ye ase oo, ɔkɔso yɛ nningyein pá ma bɛ. (Mat. 5:​43-48) Wahyɛ yɛ bɔ kyɛ sɛ yɛyɛ nningyein biemɔ yɛboka mmenia ‘bɔ yɛnye ngoli ye si kyɛ yekosa yekole a; yekonya akatuaa piri.’ (Luka 6:35) Ɛhene ati, sɛ ɛyɛ mmenia pá na banna w’ase a, nnɛmaa w’abanu bu. Kae kyɛ, ɔnate kyɛ ɛyɛ nningyein pá ma mmenia, ná ‘ɛye wɔ kunu fitaa kyɛ nikyee’ nati, Yehowa koso koyira wɔ.—Any. 19:17; 2 Kor. 9:7.

17. Sɛ yɛ́yɛ mmenia pá a, nzu yeɛ odikyɛ yɛmaa yenwo hia yɛ paa ɔ? (Luka 14:​12-14)

¹⁷ Atee foforɛ bɔ yɛkɔfa so yekosuesua Yehowa mmerɛ bɔ yɛyɛ mmenia pá ne, yeɛ ole kyɛ yɛkɔfa edwirɛ bɔ Yesu hane ye wɔ Luka 14:​12-14 ne yɛkɔyɛ adwuma ɔ. (Kenga.) Bɛbɔ yɛse kyɛ sɛ yɛyɛ bɛ pá a bɛ koso bɛkɔyɛ yɛ bie ne, sɛ yɛkyɛ bɛ nikyee a, ɔtte bɔne. Nakoso sɛ yenwu ye kyɛ bɔ yeti yeɛ yɛkyɛ mmenia nikyee yeɛ ole kyɛ, yɛnea atee kyɛ bɛ koso bɛkɔhyɛ yɛ bie a, nzu yeɛ yɛkɔhora yɛkɔyɛ ɔ? Yɛkɔhora yɛkɔfa afutue bɔ Yesu famane yɛ ne yɛkɔyɛ adwuma. Yeɛ ole kyɛ, ebie bɔ yɛse kyɛ sɛ yɛyɛ ye pá a, ɔngɔhora ngɔyɛ bie ngɔma yɛ ne, yɛkɔhora yɛkɔhyɛ ye nikye. Sɛ yɛyɛ sɔ a né yesuesua Yehowa, na ɛhene kɔmaa yɛnye kɔgye. Ɛhene koso kɔboka yɛ maa sɛ yɛyɛ mmenia pá na banna yɛ ase po a, yɛnye kɔgye.

18. Adwene beni yeɛ ɔnzɛkyɛ yenya ɔ, na nzuati ɔ?

¹⁸ Nnenya adwene kyɛ sona ne te boniayɛ. (1 Kor. 13:7) Sɛ yɛkyɛ mmenia nikye na banna y’ase a, yɛkɔhora yekobisa yɛnwo kyɛ: ‘Aso bɛte boniayɛ, anaa bɛwora yeɛ wafi kyɛ bɛkɔla yɛ ase ɔ?’ Ebia nikyeebie ti yeɛ banna yɛ ase ɔ. Ebiemɔ wɔ berɛ a, ebia né bɛnye asɔ bɔ yayɛ yama bɛ ne paa, nakoso ɔyɛ se kyɛ bɛkɔla y’ase ɔ. Ebia mmerɛ bie bɔ wapɛ nu ne, né bɛsa nu le bie yeti ne bɛkora bɛkyɛ mmenia nikye. Nakoso kesaalae de bɛngora bɛnyɛ sɔ, yeti ɛyɛ a né ɔyɛ bɛ fɛre kyɛ ebie kɔboka bɛ ɔ. Yeti sɛ yekuro aliemaamɔ dwirɛ a, yengonya adwene kyɛ bɛte boniayɛ, na mmom yɛkɔhɔso yɛkɔyɛ bɛ pá, na ɛhene kɔmaa yɛnye kɔgye.—Ɛfe. 4:2.

19-20. Nzuati yeɛ odikyɛ yenya aboterɛ mmerɛ bɔ yayɛ mmenia pá ne? (Nea foto ne koso.)

¹⁹ Nya aboterɛ. Ɔhene Solomon bɔ né ɔse nworɛ ne, ɔhane pá bɔ yɛkɔyɛ mmenia nanwo dwirɛ kyɛ: “Gyi wɔ paanoo gua nzue nye, na kyẽa bie wɔ sa kɔhã ye.” (Nwo. 11:1) Sɔ dwirɛ he maa yenwu kyɛ ebiemɔ wɔ berɛ a, sɛ yɛyɛ bɛ pá a, ebia “kyẽa bie” yeɛ bɛkɔla yɛ ase ɔ. Ɛmɔma yɛnea edwirɛ bie bɔ osili bɔ ɔmaa yenwu ye kyɛ ɛhe te nahorɛ ɔ.

²⁰ Afoɛ pee ɛhe, manzini soneafoɛ bie aye hworɔle kraataa bie bɔ ɔkã ahone ɔɔmane aliemaa brasua bie bɔ né wabɔ asu foforɛ ɔ. Ɔhyɛle ye ngunaen kyɛ, ɔyere yenwo kyɛ okoli nahorɛ kɔma Yehowa. Kɔyɛ afoɛ mmɔtwɛ si ne, aliemaa brasua ne hworɔle krataa ɔfa ɔɔlale manzini soneafoɛ aye ne ase. Ɔhane kyɛ: “Mepena kyɛ enwu ye kyɛ aboka me paa wɔ sɔ afoɛ he mukoraati nu, nakoso ebia wɔde wɔ wora afi.” Ɔtoale so kyɛ: “Né wɔ dwirɛ ne hyɛ ngunaen, nakoso tworɔnzɛm bie bɔ né ɔwɔ nu ne, yeɛ ɔhane m’ahone paa ɔ. Mewora amvi sɔ tworɔnzɛm ne lle.”a Ɔhaw bɔ aliemaa brasua ne fale nu ne, ɔhane bie nwo dwirɛ, na yesi ne ɔhane kyɛ: “Sɛ odwu mmerɛ bie a, ɛyɛ a né m’adwene yɛ me kyɛ nyakyi Yehowa soen na mbena me nekaa bie ndena. Nakoso sɛ sɔ tworɔnzɛm ne pe me tianu a, ɔmaa mesesã m’adwene. Sɛ ngɔhã a, sɔ afoɛ mmɔtwɛ nanu ne, nikyefee nne berɛ bɔ wahyɛ me ngunaen paa watra sɔ tworɔnzɛm ne ɔ.” Manzini soneafoɛ ne aye ne, wɔde nea kyɛbɔ yenye si gyele mmerɛ bɔ yesa hane sɔ krataa ne afoɛ pee si ne. Yɛ koso sɛ yɛyɛ ebie pá a, ebia mmerɛ bie si ne, sona ne kɔkae na wala y’ase.

21. Nzuati yeɛ ɛpena kyɛ ɛkɔso suesua kyɛbɔ Yehowa ye yekunu kyɛ nikyee ne ɔ?

²¹ Kyɛbɔ yalimoa yaha ne, ɔnate kyɛbɔ Yehowa bɔle yɛ nati, sɛ ebie kyɛ yɛ nikyee a, yɛnye gye. Nakoso sɛ yɛ mmom yɛkyɛ mmenia nikyee a, yɛnye gye bo so. Afei koso, sɛ yɛkora yɛboka yeliemamɔ Kristofoɛ a y’ahone tɔ yɛ kunu, na sɛ bɛda yɛ ase a, ɔmaa yɛnye gye. Sɛ yɛyɛ mmenia pá na bɛda yɛ ase oo, sɛ banna yɛ ase oo, yɛnye kɔhora kɔgye ofikyɛ yɛse kyɛ yayɛ bɔ ɔte pá ɔ. Nnɛmaa wɔ wora fi kyɛ, akyɛdeɛ biala bɔ ɛkɔfa kɔma ebie ne, “AWURADE kɔhora kɔma wɔ bɔ ɔbo sɔ ɔ.” (2 Abe. 25:9) Yeti bɔ Yehowa kɔfa kosi wɔ gya nu ne, ɔkɔtra bɔ ɛfa mane sona ne koraa. Yɛse kyɛ Yehowa koso de sɛ otua wɔ kerɛ a, ɔtra akatua biala. Yeti ɛmɔma yɛyere yɛnwo kyɛ yɛkɔhɔ so yekosuesua yɛ Baba bɔ ɔwɔ anwuro, bɔ ɔye yekunu kyɛ nikyee ne.