Aso Ɛkae Bɔ Yasũa Ne?

Ɛwɛnelɛ Waen bɔ ɔwale afoɛ he ne, ato wɔ boase akenga nu anaa? Sɛ sɔ a, yede nea sɛ ɛkɔhora kɔye edwirɛ hemɔ noa a:

Nzu yeɛ Yehowa ayɛ bɔ okyire kyɛ obu mmrasua ɔ?

Obu mmrienzua ne mmrasua mukoraati pɛ, na onguro mmrienzua dwirɛ ndra mmrasua. Nyameɛ tie mmrasua dwirɛ, na ɔhaw bɔ bɛfa nu ne koso, yenwo dwirɛ hia ye paa. Afei, ode di kyɛ bɛkɔhora bɛkɔyɛ ye adwuma.—w24.01, kr. 15-16.

Edwirɛ bɔ ɔwɔ Ɛfesofoɛ 5:7 bɔ yenwa: “Nnɛma ɛmɔ ne bɛ bɛbɔ afɛ” ne, yɛkɔyɛ sɛɛ né yafa yayɛ adwuma?

Né somafoɛ Pɔɔlo bɔ yɛ kɔkɔ kyɛ, mmenia bɔ bɛmaa ɔyɛ se ma yɛ kyɛ yɛkɔyɛ bɔ Yehowa kuro ne, nnɛmaa yɛfa yɛnwo yɛbɔ bɛ. Nna bɛbɔ yɛne bɛ wɔ adwuma nu, sukuu nu, anaa yɛne bɛ te mandanu ne ngome yeɛ yɛkɔhora yɛkɔfa bɛ adamvoa ɔ. Na mmom, bɛbɔ yɛne bɛ bɔ ngɔmmɔ wɔ sohyial midia so ne koso bokaso.—w24.03, kr. 22-23.

Edwirɛ bɔ ɔtte nahorɛ benimɔ yeɛ odikyɛ yɛnea yɛnwo yé wɔ yenwo ɔ?

Edwirɛ bɔ aliemaa biemɔ fa sɛnde yɛ, mmerɛ bɔ bɛyɛlle nu nhwehwɛmuɛ biala ne, odikyɛ yɛnea yé wɔ yenwo. Afei koso, sɛ ebie bɔ yɛnze ye sɛnde yɛ email bie, anaa awaefoɛ yɛ bɛnwo kyɛ bɛnye gye nzɛmba nanwo a, ɛhene koso, odikyɛ yɛnea ye yé.—w24.04, kr. 12.

Kyɛbɔ Yehowa kobua Ɔhene Solomon, mmenia bɔ bewuli wɔ Sodom ne Gomora, yeɛ bɛbɔ bewuli wɔ Nzueyilɛ nanu ndɛen ne, yenwo dwirɛ beni yeɛ yɛse ɔ, na beni yeɛ yɛnze ɔ?

Kyɛ Yehowa asɛkye sɔ mmenia nemɔ koraa bɔ ongotingye bɛ ne de, yɛnze. Nakoso yɛse kyɛ ɔse bɔ ɔwɔ ebiala ahone nu, na ye anwumvoinnwunɛ sone.—w24.05, kr. 3-4.

Nyameɛ te “Nyɔbotaen.” Gyidie beni yeɛ ɛhene maa yenya ye ɔ? (Deut. 32:4)

Yɛkɔhora yɛkɔfa Yehowa yɛkɔyɛ y’afealeɛ. Mmerɛ biala odi ye bɔhyɛ so, yeti yɛkora yɛfa yɛnwo yɛto ye so. Afei ɔnzesa nati, kyɛbɔ ɔte nala yeɛ ɔte ɔ, na bɔ wabɔ ye tianu kyɛ ɔkɔyɛ ne koso, ɔnzesa ye.—w24.06, kr. 26-28.

Sɛ ɛkɔ asafo foforɛ nu a, ɛkɔyɛ sɛɛ né wɔnye aha?

Fa wɔnwo to Yehowa so, na ɔkɔboka wɔ kyɛbɔ ɔbokale ye asomvoɛ tete ne. Afei nnɛfa asafo foforɛ ne toto daa deɛ nanwo. Bɔ bɛyɛ biala, yɛ bie, na pena nnamvoa.—w24.07, kr. 26-28.

Mvandoho nza bɔ ɔwɔ Mateo yeti 25 nanu ne, asuadeɛ beni yeɛ ɔwɔ nu ɔ?

Mmoaen ne mmɔngye nwo mvandoho ne, ɔmaa yenwu ye kyɛ odikyɛ yenya gyidie, ná yedi nahorɛ. Mmabunu bɔ bɛse nworɛ ne mmabunu ngwaseafoɛ nanwo mvandoho ne koso, bɔ yesua yefi nu yeɛ ole kyɛ odikyɛ yɛboa yɛnwo, na yɛmaa yɛnye da berɛ. Yeɛ talɛnde nwo mvandoho ne maa yenwu kyɛ yenwo hia kyɛ yɛbɔ yɛnwo mmɔden, na yekuro adwuma.—w24.09, kr. 20-24.

Solomon asɔre awuro ne abrannaa ne, ofi ye aseɛnwo bɔ ɔkwaadwu ye anwuro ne, né ye tendenn te sɛɛ?

Edwirɛ bɔ ɔwɔ 2 Aberɛso Dwirɛ 3:4 ne, tete asaanoa ndworɔyɛɛ biemɔ kã kyɛ, né abrannaa ne tendenn te “agyirɛ 120,” kyire kyɛ fiit 175 (mita 53). Nakoso asaanoa ndworɔyɛɛ foforɛ bɔ bede bɛto nu paa ne, ɔkã kyɛ né abrannaa ne tendenn te “agyirɛ 20,” kyire kyɛ fiit 30 (mita 9). Ɛhene mmom kɔyɛ nahorɛ ɔnate kyɛbɔ bɛtole asɔre awuro ne bo nati.—w24.10, kr. 31.

Sɛ bɛkã kyɛ odikyɛ asafo nu somvoɛ aye yɛ komapɛ a, okyire sɛɛ? (1 Tim. 3:12)

Okyire kyɛ ogya brasua komapɛ, na ɔnzɛkyɛ ɔbɔ adwaman. Afei koso, ɔnzɛkyɛ ɔyɛ nikyefee fakyire kyɛ okuro mmrasua foforɛ.—w24.11, kr. 19.

Edwirɛ bɔ ɔwɔ Yohane 6:53 ne, nzuati yeɛ ongyire bɔ odikyɛ yɛyɛ ye wɔ Awurade Nɔsoa Aleɛ nabo ɔ?

Yohane 6:53 kã kyɛ odikyɛ bedi Yesu nwonaen, na bɛno ye mogya. Yesu hane sɔ dwirɛ ne wɔ Galilea afoɛ 32 Y.A hyirele Yudafoɛ bɔ né odikyɛ benya ye nu gyidie ne. Nakoso Awurade Nɔsoa Aleɛ ne de, kɔyɛ afoɛ kora yeɛ ɔfa sie berɛ wɔ Yerusalem ɔ. Ɛberɛ de, bɛbɔ ɔne bɛ koli bia wɔ anwuro ne yeɛ né odwudwo kyire bɛ ɔ.—w24.12, kr. 10-11.