Bible Nu Dwirɛ Biemɔ Bɔ Elimoa Suane Ne, Aso Ɔkɔhora Kɔboka Wɔ Ɛnnɛ?

1. Mmerɛ bɔ ɛhyɛle yebo kyɛ esua nahorɛ bɔ ɔwɔ Bible nanu nanwo nikyee ne, sɛɛ yeɛ ɔbokale wɔ ɔ?

BIBLE nu dwirɛ biemɔ bɔ yelimoa yesuane ne, waboka yɛ paa. Ebie yeɛ ole kyɛ, mmerɛ bɔ yeenwuni kyɛ Nyameɛ dumaa li Yehowa ne, ɔmaa yɛbɔle mmɔden kyɛ yɛkɔfa ye adamvoa. (Yes. 42:8) Mmerɛ bɔ yenwuni nahorɛ bɔ ɔfa bɛbɔ bawu nanwo ne koso, ɔmaa y’ahone tɔle yɛ kunu, ofikyɛ yannya adwene kõ kyɛ y’adɔfo bɔ bawu ne, benwu amaneɛ. (Nwo. 9:10) Afei koso, mmerɛ bɔ yeenwuni kyɛ Nyameɛ ahyɛ bɔ kyɛ ɔkɔmaa aseɛ he kɔyɛ Paradise ne, yamva bɔ ɔkɔto yɛ kyẽabie nanwo dwirɛ yanha yɛnwo kõ. Yeenyane gyidie kyɛ nna afoɛ 70 anaa 80 bie yeɛ yɛkɔfa yɛkɔtena ase ɔ, na mmom yɛkɔtena ase daa.—Edw. 37:29; 90:10.

2. Kristofoɛ bɔ basõ Yehowa bahyɛ ne po, sɛɛ yeɛ 2 Petro 1:​12, 13 maa yenwu kyɛ Bible nu dwirɛ biemɔ bɔ belimoa besuane ne kɔhora kɔboka bɛ ɔ?

² Bible nu dwirɛ biemɔ bɔ yelimoa yesuane ne, ɔnzɛkyɛ yɛtoto ye ase koraa. Kristofoɛ bɔ somafoɛ Petro hworɔle ye krataa bɔ ɔtɔ so nyɔ ne ɔɔmane bɛ ne, né ‘batira ndii wɔ nahorɛ ne anu.’ (Kenga 2 Petro 1:​12, 13.) Nakoso né nningyein biemɔ kɔso bɔ né ɔkɔhora kɔhwe bɛ kofi Yehowa nwo ɔ. Ebie yeɛ ole kyɛ, né ebiemɔ afa ngondombo ngyerɛkyerɛ baawura asafo nanu, na né ebiemɔ koso subaen ttemaye. (2 Pet. 2:​1-3) Né Petro pena kyɛ ɔhyɛ aliemaa nemɔ ngunaen, kyɛbɔ ɔkɔyɛ a, bɔ ɔkɔso ne ngɔma bɛngɔhwe bɛnwo bengofi Yehowa nwo ɔ. Yeti nningyein bɔ né balimoa basua ne, ɔkaele bɛ. Né sɔ ngyerɛkyerɛ ne kɔboka bɛ maa bekoli nahorɛ bɛkɔma Yehowa bekoodwu ayieleɛ.

3. Bɔ yeti yeɛ odikyɛ Kristofoɛ mukoraati kɔso susu Bible nu dwirɛ biemɔ bɔ belimoa besuane nanwo ne, fa mvandoho kyirekyire nu.

³ Sɛ yafa afoɛ pee yasõ Yehowa po a, yɛkɔhora yekosua nningyein foforɛ pee yekofi Bible nu dwirɛ biemɔ bɔ yalimoa yasua nanu. Ɛmɔma yɛnea sɔ mvandoho he: Yɛfa ye kyɛ bafa nningyein komapɛ nala bama ebie bɔ ɔse aleɛ tõ paa, ɔne ebie bɔ bekye yeɛ osua aleɛ tõlɛ kyɛ bɛfa bɛtõ aleɛ. Bɔ ɔse aleɛ tõ paa ne, ɔkɔhora kɔfa sɔ nningyein ne kɔtõ aleɛ ahoroɛ pee. Nakoso bɔ bekye yeɛ osua ne de, ebiaa ɔngɔhora ngɔyɛ ye sɔ. Sɔ ala yeɛ bɛbɔ bafa afoɛ pee basõ Yehowa, ɔne bɛbɔ bekye yeɛ bésua Bible ne, sɛ bɛkenga tworɔnzɛm bie a, ɔsono kyɛbɔ benu biala kɔte yebo ɔ. Ofi mmerɛ bɔ yɛbɔle asu ne, yenwo atee bɔ yele ye wɔ asafo nanu, ɔne bɔ ɔkɔso wɔ y’asetena nu ne, ebiaa nzakrayɛɛ awa nu. Yeti nningyein bɔ yasua ye dada ne, sɛ yesa yesusu yenwo a, ebiaa yekonwu nningyein foforɛ wɔ nu bɔ ɔkɔboka yɛ kesaalae ɔ. Yede, bɛbɔ bafa afoɛ pee basõ Yehowa ne, ma yɛnea bɔ bɛkɔhora bekosua bekofi Bible nu dwirɛ nza biemɔ bɔ belimoa besuane nanu ɔ.

YEHOWA YEƐ ƆTE ƆBƆADEƐ Ɔ

4. Ɔnate kyɛ yanwu ye kyɛ Yehowa yeɛ ɔbɔle nningyein mukoraati nati, sɛɛ yeɛ waboka yɛ ɔ?

⁴ ‘Nyameɛ yeɛ ɔyɛle nningyein mukoraa ɔ.’ (Heb. 3:4) Yɛse kyɛ ebie bɔ ɔse nworɛ na ole tumi paa yeɛ ɔbɔle aseɛ he ne nikyeebiala bɔ ɔwɔ so ne ɔ. Ɔnate kyɛ ye yeɛ ɔbɔle yɛ nati, ɔse yɛnwo dwirɛ mukoraati, na ɔdwene yɛnwo paa. Ɛhene ati, ye yeɛ ɔse bɔ ɔte pá ma yɛ ɔ. Ɔnate kyɛ yanwu ye kyɛ Yehowa yeɛ ɔbɔle nikyeebiala nati, waboka yɛ paa, na wamaa yanwu ye kyɛ sãa asetena pá bie la yɛ nyunu.

5. Nahorɛ dwirɛ beni yeɛ ɔkɔhora kɔboka yɛ maa yɛkɔbrɛ yɛnwo ase ɔ? (Yesaya 45:​9-12)

⁵ Nahorɛ dwirɛ bɔ yeɛ ole kyɛ Yehowa yeɛ ɔte Ɔbɔadeɛ ne, ɔmaa yesua kyɛ yɛkɔbrɛ yɛnwo ase. Mmerɛ bie, Yob damvo nza nemɔ bɔle ye somoɛ, na ɛhene maa obuale yenwo bẽ, na osa hane edwirɛ biemɔ bɔ ɔtte nahorɛ fale Yehowa nwo. Nakoso siɛ ye, Yehowa maa onwuni kyɛ, ye yeɛ ɔbɔle nikyeebiala ɔ, na ole tumi paa. (Yob 38:​1-4) Sɔ dwirɛ ne maa Yob nwuni kyɛ atee bɔ Nyameɛ faso yɛ ye nikyee ne, ɔbo sona ndeaseɛ so koraa. Siɛ ye, diyifoɛ Yesaya koso hane kyɛ ɔnzɛkyɛ kuro sona nya adwene lle kyɛ ɔse nworɛ tra Nyameɛ bɔ ɔbɔle ye ne.—Kenga Yesaya 45:​9-12.

6. Mmerɛ beni paa yeɛ odikyɛ yesusu kyɛbɔ Ɔbɔadeɛ ne se nworɛ, na ole tumi paa nanwo ɔ? (Nea foto ne koso.)

⁶ Kristoniɛ bɔ wafa afoɛ pee wasõ Yehowa ne, sɛ wannea yé a, ɔkɔfa yenwo kɔto ye bɔbɔ ye nimdeɛ so tra kyɛ ɔkɔfa yenwo kɔto Yehowa so, ná wapena akwangyerɛ wafi ye Dwirɛ nanu ɔ. (Yob 37:​23, 24) Nakoso sɛ sɔ sona ne dwenedwene kyɛbɔ Ɔbɔadeɛ ne se nworɛ na ole tumi paa nanwo a, sɛɛ yeɛ ɔkɔboka ye ɔ? (Yes. 40:22; 55:​8, 9) Ɔkɔmaa okonwu kyɛ sɛ ɔfa nimdeɛ bɔ ole ye ne toto Yehowa deɛ nanwo a, ondwu ye nekaafee, na ɛhene kɔmaa ɔkɔbrɛ yenwo ase.

7. Nzu yeɛ ɔbokale Rahela maa olɛle nzakrayɛɛ foforɛ bie tole nu ɔ?

⁷ Rahela wɔ Slovenia. Mmerɛ bɔ ɔdwenedwenene kyɛbɔ Yehowa te Ɔbɔadeɛ nanwo ne, ɔbokale ye maa olɛle nzakrayɛɛ bie bɔ ahyehyɛdeɛ ne yɛle ne tole nu. Ɔhane kyɛ: “Sɛ mbanyi bɔ beli ahyehyɛdeɛ ne nyunu ne si gyinayɛɛ bie a, odwu mmerɛ bie a né ɔyɛ se ma me kyɛ ngole ngɔto nu ɔ. 2023 Amaneɛbɔ Bɔ Ofi Akwangyerɛ Kue Ne Berɛ #8 ne sɔa, nnea nyiele ne si po ne, mmerɛ bɔ olimoa bɔ nwuni kyɛ aliemaa bie bɔ wasie ye kanza ɔma tɔɔk ne, ɔyɛle me nwanwa paa. Yeti mmɔle mbaeɛ kyɛ Yehowa boka me ma ngora nne sɔ nzakrayɛɛ ne ndonu.” Rahela nwuni kyɛ, ɔnate kyɛ Yehowa te Ɔbɔadeɛ nati, ɔse atee pá bɔ ɔkɔfa so kohyire ye ahyehyɛdeɛ ne atee ɔ. Wɔ koso, sɛ ɔyɛ se ma wɔ kyɛ ekole nzakrayɛɛ foforɛ bie kɔtonu a, nzuati yeɛ enzusu kyɛbɔ Ɔbɔadeɛ ne se nworɛ, na ole tumi paa nanwo ɔ?—Rom. 11:​33-36.

BƆ YETI YEƐ NYAMEƐ MA ATEE MAA YENWU AMANEƐ Ɔ

8. Bɔ yeti yeɛ Nyameɛ ma atee maa yenwu amaneɛ nanwo nikyee bɔ yasua ne, sɛɛ yeɛ waboka yɛ ɔ?

⁸ Nzuati yeɛ Nyameɛ ma atee maa yenwu amaneɛ ɔ? Bɛbɔ benyanne sɔ dwirɛ nanwo mmuayɛɛ ne, bafɛ Nyameɛ so yaa anaa banya adwene kyɛ Nyameɛ biala nne berɛ. (Any. 19:3) Nakoso wɔ de, bɔ asua ne amaa anwu ye kyɛ bɔne bɔ bɛfa bɛwole yɛ, ɔne mvomsoɛ bɔ ɔwɔ yɛnwo ne yeɛ ɔmaa yenwu amaneɛ ɔ, na offi Yehowa. Asa koso, anwu ye kyɛ aboterɛ bɔ Yehowa anya ye ne, waboka mmeni pee mbaen maa baasua yenwo nikye, na baanwu ye kyɛ ɔkɔye amaneɛnwunɛ kofi berɛ koraa. (2 Pet. 3:​9, 15) Sɔ nahorɛ dwirɛ ne bɔ ɛse ne, wakyekye wɔ wora na wamaa apingye Yehowa.

9. Mmerɛ beni yeɛ ebiaa ɔkɔyɛ pá kyɛ yekosusu bɔ yeti yeɛ Yehowa ma atee maa yenwu amaneɛ nanwo ɔ?

⁹ Mmerɛ bɔ yɛnwondɛ kyɛ Yehowa kɔye amaneɛnwunɛ kofi berɛ ne, yɛse kyɛ odikyɛ yenya aboterɛ. Nakoso sɛ yenwu amaneɛ, bɛne yɛ anaa yɛnwoniɛ bie di ye yeayea, anaakyɛ yɛnwoniɛ bie wu a, ebiaa yekonya adwene kyɛ Yehowa ahyɛ soma. (Hab. 1:​2, 3) Sɛ ɔba sɔ a, ɔkɔyɛ pá kyɛ yekosusu bɔ yeti yeɛ Yehowa ma atee maa yenwu amaneɛ nanwo.a (Edw. 34:19) Afei koso, adwene bɔ Yehowa le ye kyɛ ɔkɔye amaneɛnwunɛ kofi berɛ koraa ne, yɛkɔhora yɛkɔdwenedwene yenwo.

10. Nzu yeɛ wakyekye Anne wora wɔ ye maame wue nanwo ɔ?

¹⁰ Ɔnate kyɛ yɛse bɔ yeti yeɛ Yehowa ma atee maa yenwu amaneɛ nati, ɔboka yɛ maa yemia yɛnye yegyina yɛ haw noa. Anne wɔ Mayotte supɔ so, na ɔhane kyɛ: “Me maame wuli ne afoɛ kãa ɛhe, na sɛ ɔbapẽ metianu a, ne me wora abɔ. Nakoso, daa mekae menwo kyɛ, nna Yehowa yeɛ ɔmaa yenwu amaneɛ ɔ. Okuro paa kyɛ ɔkɔye amaneɛnwunɛ kofi berɛ, ná watingye y’adɔfo mɔ bɔ bawu ne. Sɛ medwenedwene ɛhemɔ nwo a, ɔkyekye me wora na ɔkã m’ahone to me kunu.”

11. Bɔ yeti yeɛ Yehowa ma atee maa yenwu amaneɛ ne, sɛɛ yeɛ ɔboka yɛ maa yɛkɔso yɛkã nzɛmba ne ɔ?

¹¹ Ɔnate kyɛ yɛse bɔ yeti yeɛ Nyameɛ ma atee maa yenwu amaneɛ nati, ɔkɔhora kɔhyɛ yɛ ngunaen maa yɛkɔhɔso yɛkɔhã nzɛmba ne. Petro hane kyɛ Yehowa anya aboterɛ kyɛbɔ ɔkɔyɛ a, mmeni pee kɔsakyera b’adwene ɔ. Ɛhene si ne, ɔhworɔle kyɛ: “Nzikyɛ mmenia yeɛ ɔsɛ kyɛ ɛmɔyɛ ɔ? Ɔsɛ kyɛ ɛmɔtira bra krongron ne nyamesom paa nu.” (2 Pet. 3:11) Asɛnga adwuma bɔ yɛyɛ ne, ɔboka sɔ “nyamesom paa” naso. Tekyɛ yɛ Baba ne, yɛ koso yekuro mmenia dwirɛ, na yɛpena kyɛ bɛkɔ Nyameɛ ewiase foforɛ bɔ tenenee kɔtena nu nanu bie. Bɛbɔ bɛte wɔ mandanu berɛ ne koso, Yehowa anya bɛnwo aboterɛ kyɛbɔ ɔkɔyɛ a, bekonya yenwo atee bɛkɔɔsõ ye ɔ. Nea kyɛbɔ ɔte yenwo atee pirikua paa kyɛ ɛne Nyameɛ abonu bɛyɛ sɔ adwuma he, ná ɛboka mmeni pee maa besua yenwo nikyee kora né ayieleɛ ne awa ɔ!—1 Kor. 3:9.

YƐTE “AYIELEƐ MMERƐ” NANU

12. “Ayieleɛ mmerɛ” nanwo dwirɛ bɔ yɛse ne, waboka yɛ sɛ?

¹² Subaen bɔ yekonwu ye wɔ mmenia nwo wɔ “ayieleɛ mmerɛ” nanu ne, Bible ne hane yenwo dwirɛ tole berɛ pɛpɛɛpɛ. (2 Tim. 3:​1-5) Nekaabiala bɔ yɛte ne, yenwu ɛhe nwo adanzeɛ, na ɔmaa yenwu kyɛ sɔ dwirɛ ne awa nu. Kesaalae mmenia subaen sɛkyelɛ alaa yeɛ ɔsɛkye ɔ. Ɛhe maa yedé yedi paa kyɛ Bible nanu dwirɛ te nahorɛ turoloo.—2 Tim. 3:​13-15.

13. Kyɛbɔ Yesu mvandoho bɔ ɔwɔ Luka 12:​15-21 maa yenwu ye ne, edwirɛ benimɔ yeɛ yɛkɔhora yekobisa yɛnwo ɔ?

¹³ Yɛse kyɛ yɛte ayieleɛ mmerɛ nanu, yeti nningyein bɔ yenwo hia paa ne yeɛ yɛfa y’adwene yesie so ɔ. Bɔ yeti yeɛ odikyɛ yɛyɛ sɔ ne, Yesu mvandoho bɔ ɔwɔ Luka 12:​15-21 ne maa yenwu ye. (Kenga.) Nzuati yeɛ bɛfrɛle sikaniɛ ne “kwaseambane” ɔ? Nna ye anwonyadeɛ ti yeɛ ɔmaa ɔfrɛle ye sɔ ɔ, na mmom bɔ né yenwo hia ye wɔ ye asetena nu nati ɔ. Né waboaboa ‘agyapadeɛ noa wama yenwo, nakoso né olle anwonyadeɛ biala wɔ Nyameɛ nu.’ Né ɛhe te anyeborolɛ dwirɛ paa. Nzuati ɔ? Ofikyɛ Nyameɛ hahyirele biaa ne kyɛ: ‘Kɔngɔen ye ala bekole wɔ kra bekofi wɔ sa nu.’ Yɛ koso, mmerɛ bɔ ewiase he ayieleɛ apingye paa ne, yɛkɔhora yekobisa yɛnwo kyɛ: ‘Nningyein bɔ mafa masie menye so ne kyire kyɛ, medé medi kyɛ ɔngɔhyɛ ewiase he kɔhɔ ayieleɛ anaa? Nzu yeɛ mehyɛ me mmaamɔ ngunaen kyɛ bɛfa besie bɛnye so ɔ? Aso mefa m’anwoserɛ, me mmerɛ, ɔne me sikaa meboa agyapadeɛ noa mema menwo, anaa meboa m’agyapadeɛ noa wɔ anwuro?’

14. Kyɛbɔ Miki dwirɛ ne maa yenwu ye ne, adanzeɛ bɔ okyire kyɛ yɛte ayieleɛ mmerɛ nanu ne, nzuati yeɛ ɔte pá kyɛ yekosusu yenwo ɔ?

¹⁴ Adanzeɛ bɔ okyire kyɛ yɛte ayieleɛ mmerɛ nanu ne, sɛ yesusu yenwo a, ɔkɔmaa yekonwu bɔ odikyɛ yɛfa y’asetena yɛyɛ ɔ. Sɔ yeɛ aliemaa brasua bie bɔ bɛfrɛ ye Miki yɛle ɔ. Ɔhane kyɛ: “Nyiele secondary sukuu ne, ne mepena kyɛ mekosua ngaka nwo nikye. Né osa gyi menye so kyɛ ngɔyɛ ateepakyelɛniɛ, ná maaboka wɔ nekaa bɔ behia adawurubɔfoɛ pee maa bɛkã nzɛmba ne. Aliemaa biemɔ tuli me foɛ kyɛ nzusu yenwo nnea kyɛ, ngɔhora ngɔfa sɔ adwuma ne ngosie menye so, na mmerɛ komapɛ nala maayɛ ateepakyelɛniɛ anaa? Bɛmaa nwuni kyɛ ɔngɔhyɛ ewiase he kɔhɔ ye ayieleɛ. Nakoso, yedwu ewiase foforɛ nanu a, ngonya yenwo atee ngosua ngaka nwo nikyee afebɔɔ. Yesɔ nati nzili gyinayɛɛ kyɛ ngɔfa mmerɛ kãa bie ngosua nzaano dwuma bie. Ɛhene maa nyane adwuma nyɛle, yeti ngora nyɛle ateepakyelɛ adwuma ne. Siɛ ye, ndu ngɔle Ecuador ngɔnyɛle asɛnga adwuma ne wɔ dɔ.” Kesaalae Miki agya manzini soneafoɛ, na bɛyɛ manzini adwuma wɔ sɔ maen nanu.

15. Sɛɛ yeɛ Yakobo dwirɛ ne maa yenwu kyɛ, mmenia bɔ ahyɛaseɛ ne, ne bɛnye ngye nzɛmba nanwo ne, ɔnzɛkyɛ yɛyakyi besi lilɛ ɔ? (Nea foto ne koso.)

¹⁵ Sɛ yɛkã nzɛmba ne yekyire mmenia na ahyɛaseɛ ne bandie a, ɔnzɛkyɛ yɛmaa y’aba nu bu, ofikyɛ mmenia kora sesã. Sɔ yeɛ ɔtole Yesu aliemaa Yakobo ɔ. Ofi Yesu ngwalaa nu tonn oodwuli mmerɛ bɔ ɔɔyɛle Mɛsaya ne, onwuni ye. Afei koso onwuni kyɛ né Yesu se ngyerɛkyerɛ tra sona biala. Nakoso ɛhe mukoraati si ne, wanni Yesu si. Betingyele Yesu befili ewue nu ne mmom, yeɛ ɔɔyɛle ye suaniɛ ɔ, na né ɔbɔ yenwo mmɔden paa.b (Yoh. 7:5; Gal. 2:9) Yeti w’abusuafoɛ, ɔne mmenia bɔ bɛnye ngye nzɛmba nanwo ne, kɔso kã kyire bɛ, na nikyee pá bie kɔhora kofi nu kɔwa. Kae kyɛ yɛte ayieleɛ mmerɛ nanu, yeti odikyɛ yɛkã nzɛmba ne yekyire mmenia ndɛ. Edwirɛ bɔ ɛkã kyire bɛ ɛnnɛ ne, ebiaa kyẽabie bɛkɔkae maa ɔkɔboka bɛ mmerɛ bɔ amaneɛnwunɛ piri ne ahyɛ yebo ne.c

KƆSO MA WƆNYE GYE YEHOWA DWIRƐ NANWO

16. Nningyein bɔ asafo ne fa kyirekyire yɛ ne, sɛɛ yeɛ waboka wɔ ɔ? (Nea alaka nanu dwirɛ bɔ yeɛ ole “Fa Boka Mmeni Foforɛ” ne koso.)

¹⁶ Nningyein bɔ asafo ne fa kyirekyire yɛ ne, nu biemɔ wɔ berɛ a, bɛhyɛda bɛyɛ bɛma mmenia bɔ bɛnze Bible nanu pá ne. Sɛ yɛnea badwanu dwudwolɛ bɔ bɛma ye dapɛen biala, edwirɛ ne vidio biemɔ bɔ ɔwɔ jw.org so, ɔne magazin bɔ yɛfa yɛkɔ asɛnga ne sɔa a, bɛbɔ bɛtte Yehowa Adanzefoɛ ne paa yeɛ ɔkɔ ma bɛ ɔ. Ɛhene po ne, yɛ koso ɔboka yɛ paa. Ɔmaa ɔdɔ bɔ yele yɛma Yehowa, ɔne gyidie bɔ yele ye wɔ ye Dwirɛ nanu ne, nu yɛse. Afei nahorɛ bɔ ɔwɔ Bible nanu ne, ɔmaa yɛkora yekyirekyire nu yé yekyire mmenia.—Edw. 19:7.

17. Bible nu dwirɛ biemɔ bɔ yalimoa yasua ne, mmerɛ beni yeɛ odikyɛ yɛdwenedwene yenwo ɔ?

¹⁷ Yɛbɔ yɛte Yehowa Adanzefoɛ ne de, sɛ yenya ndeaseɛ foforɛ wɔ Bible nu dwirɛ bie nwo a, yɛnye gye paa. Nakoso, Bible nu dwirɛ biemɔ bɔ yelimoa yesuane bɔ ɔmaa yeenwuni nahorɛ ne koso, yɛndoto ye ase koraa. Yeti sɛ asafo ne fa akwangyerɛ bie ba, na y’adwene yɛyɛ kyɛ bɔ yɛse ye dada nala te pá a, odikyɛ yɛkae kyɛ Ɔbɔadeɛ bɔ ɔse nworɛ, na ole tumi tra ebiala ne yeɛ okyire ahyehyɛdeɛ ne atee ɔ. Sɛ ɔba sɔ a, ɔkɔmaa yɛkɔbrɛ yɛnwo ase. Sɛ yɛbɔbɔ anaa yɛnwoniɛ bie nwu amaneɛ a, odikyɛ yenya aboterɛ na yesusu bɔ yeti yeɛ Yehowa ma atee maa yenwu amaneɛ nanwo. Afei koso, bɔ yɛkɔfa yɛ mmerɛ, ne y’anwonyadeɛ yɛkɔyɛ ne, sɛ yési yɛnwo gyinayɛɛ a, odikyɛ yɛkae kyɛ yɛwɔ ayieleɛ mmerɛ nanu. Yeti ɛmɔma Yehowa Dwirɛ ne hɔso ma y’anwoserɛ, ɔhyɛ yɛ ngunaen, na ɔma yenwu nworɛ.