Kyɛbɔ Yehowa Boka Yɛ Maa Yegyina Yɛ Haw Noa Ɔ

1. Nzuati yeɛ ɔlla ase kyɛ yekomia yɛnye ɔ, nakoso nzu yeɛ ɔkɔhora kɔboka yɛ ɔ? (1 Petro 5:10)

YƐWƆ ewiase he ayieleɛ mmerɛ bɔ nningyein nu ayɛ se paa nanu, yeti yɛbɔ yɛsõ Yehowa ne, odikyɛ yemia yɛnye paa. Anwonyerɛ ateetee yenu biemɔ afoɛ pee ɛhe. Ebiemɔ koso, b’adɔfo bie awu maa bedi yealɛ. Yeɛ yɛ nu biemɔ wora, y’abusuafoɛ anaa awaen ne tane yɛnye. (Mat. 10:​18, 36, 37) Nakoso, nya gyidie kyɛ ɔmva yenwo ne ɔhaw biala bɔ ɛfa nu ne, Yehowa kɔboka wɔ maa ekogyina yenoa.—Kenga 1 Petro 5:10.

2. Nzu yeɛ ɔmaa yɛkora yemia yɛnye yegyina ɔhaw noa ɔ?

² Sɛ bɛkã animia a, bɔ okyire yeɛ ole kyɛ sɛ ebie fa ɔfa ɔhaw nu, bɛtane yenye, anaa nzɔhwɛ bie to ye a, ɔmma ye abanu mmu. Na mmom ɔkɔso fa anigye sõ Yehowa, na ɔfa ye adwene sie anyelasoɛ bɔ ole ye naso. Yɛ de, nna yɛbɔbɔ y’anwoserɛ yeɛ ɔmaa yɛkora yemia yɛnye yegyina yɛ haw noa ɔ. Na mmom, ‘tumi bɔ ɔbo sona deɛ so’ bɔ Yehowa fama yɛ ne yeɛ ɔboka yɛ ɔ. (2 Kor. 4:7) Wɔ adesua he anu ne, yɛkɔnea nningyein nna bɔ Yehowa nate so boka yɛ maa yɛkora yemia yɛnye yegyina ɔhaw noa ɔ. Afei yɛkɔnea bɔ yɛkɔyɛ na yahora yanya so mvasoɛ ɔ.

MBAEƐ

3. Nzuati yeɛ yɛkɔhora yɛkɔhã kyɛ mbaeɛ te anwanwadeɛ ɔ?

³ Yehowa ayɛ nikyeebie bɔ ɔyɛ nwanwa paa bɔ ɔboka yɛ maa yemia yɛnye yegyina yɛ haw noa ɔ. Yeɛ ole kyɛ, ɔmva yenwo kyɛ bɔne wɔ yɛnwo ne, wama yɛ atee kyɛ yɛbɔ ye mbaeɛ. (Heb. 4:16) Wɔde dwene yenwo nea: Yɛkɔhora yɛkɔbɔ Yehowa mbaeɛ mmerɛ biala bɔ yekuro ɔ. Edwirɛ biala bɔ yɛpena kyɛ yɛkã yekyire ye ne, yɛkɔhora yɛkɔhã. Afei sɛ yɛbɔ mbaeɛ wɔ edwudwolɛ biala nu a, ɔte. Yeɛ nekaabiala bɔ yewura ne koso ɔte yɛ nga, kyɛ ebiaa yɛla priza, anaa yɛ ngome yewura nekaabie ne. (Yona 2:​1, 2; Aso. 16:​25, 26) Sɛ yɛ wora abɔ alaa maa yennwu bɔ yɛhã po a, Yehowa kora nwu bɔ yɛpena yekyire ɔ. (Rom. 8:​26, 27) Amba, mbaeɛ te anwanwadeɛ!

4. Sɛ yɛbɔ mbaeɛ kyɛ Yehowa boka yɛ ma yemia yɛnye yegyina ɔhaw bie noa a, nzu yeɛ ɔmaa yedé yedi kyɛ okotie ɔ?

⁴ Yehowa ahyɛ yɛ bɔ kyɛ ‘sɛ yɛbisa nikyee biala kyɛbɔ ye pɛ te a, okotie yɛ.’ (1 Yoh. 5:14) Aso yɛkɔhora yɛkɔsrɛ ye kyɛ ɔboka yɛ maa yemia yɛnye yegyina ɔhaw bie noa anaa? Yóo, yɛkɔhora ofikyɛ ɔne ye apɛdeɛ yia. Yɛyɛ sɛɛ yeɛ yenwu ye sɔ ɔ? Sɛ yemia yɛnye yegyina nzɔhwɛ noa a, ɔmaa Yehowa nya mmuayɛɛ ma Satan Abɔnzam bɔ odwudwo tia ye ne. (Any. 27:11) Sɛ ɛhene la ahameɛ a, Bible ne nwa ‘bɛ bɔ bedi nahorɛ bɛma Yehowa ne, okogyina bɛ si.’ (2 Abe. 16:9) Yeti odikyɛ yenya gyidie kyɛ Yehowa le tumi bɔ ɔkɔfa kɔboka yɛ maa yekogyina yɛ haw noa ɔ, na okuro kyɛ ɔkɔyɛ sɔ koso.—Yes. 30:18; 41:10; Luka 11:13.

5. Sɛɛ yeɛ mbaeɛ kɔhora kɔboka yɛ ɔ? (Yesaya 26:3)

⁵ Bible ne nwa sɛ yɛbɔ mbaeɛ a, ‘Nyameɛ asomdwee bɔ ɔbo ndeaseɛ amukoraa so ne, ɔkɔnea y’ahone ne y’adwene so.’ (Flp. 4:7) Wɔde susu bɔ sɔ dwirɛ ne kyire nanwo nea. Bɛbɔ bɛnzo Yehowa ne, bɛ koso ɔhaw kora to bɛ. Nakoso bɛde sɛ ɔba sɔ a, bɛkora bɛfa atee biemɔ so bɛpena asomdwee. Ebiemɔ wɔ berɛ a, odwu mmerɛ bie a, bɛbɔ mmɔden kyɛ bɛkɔye nikyeebiala bekofi betianu bɔ bɛngɔdwenedwene nikyeefee nwo ɔ. Nakoso sɛ adwene ne la berɛ pandann sɔ a, ɔyɛ suro, ofikyɛ sunzummɔne mɔ kɔhora kole sona ne adwene kɔbɔ so. (Fatoto Mateo 12:​43-45 nanwo.) Sɛ ebie yɛ sɔ a, ebiaa okonya asomdwee mmerɛ tikaape bie. Nakoso, sɛ ɛfa ɛhene toto asomdwee bɔ Yehowa fama yɛ nanwo a, ondwu ye nekafee. Ofikyɛ sɛ yɛbɔ Yehowa mbaeɛ a, okyire kyɛ yafa yɛnwo yato ye so, na ye koso ɔkɔhɔso kɔma yɛ “asomdwee bɔ odi mu ɔ.” (Kenga Yesaya 26:3.) Atee kõ bɔ Yehowa faso yɛ sɔ yeɛ ole kyɛ, ɔmaa yɛkae tworɔnzɛm bie bɔ ɔkyekye yɛ wora ɔ. Ɛhene maa yenwu ye kyɛ okuro yɛ dwirɛ, na ɔpena kyɛ ɔboka yɛ maa y’ahone tɔ yɛ kunu.—Edw. 62:​1, 2.

6. Sɛ ɛ́bɔ mbaeɛ a, nningyein benimɔ yeɛ ɛkɔhora kɔhã yenwo dwirɛ ɔ? (Nea foto ne koso.)

⁶ Bɔ ɛkɔhora kɔyɛ ɔ. Sɛ ɛfa ɔhaw bie nu a, “fa w’adesoa to AWURADE so,” na srɛ ye kyɛ ɔboka wɔ ma enya asomdwee. (Edw. 55:22) Afei koso, srɛ ye kyɛ ɔma wɔ nworɛ bɔ ɛkɔfa kogyina bɔ wato wɔ ne noa ɔ. (Any. 2:​10, 11) Mmerɛ bɔ ɛsrɛ ye kyɛ ɔboka wɔ ne, nnɛmaa wɔ wora fi kyɛ ɛkɔla ye ase. (Flp. 4:6) Fa wɔnye to ase nea nningyein bɔ Yehowa yɛ faboka wɔ maa ɛkora gyina wɔ haw ne noa ne, na da ye ase. Ebiaa bɔ ɛfa nu ne amaa enwu amaneɛ, nakoso nnɛmaa wɔ wora fi nningyein bɔ Yehowa alimoa ayɛ afa aboka wɔ ne.—Edw. 16:​5, 6.

NYAMEƐ DWIRƐ NE

7. Sɛ yɛkenga Bible ne a, sɛɛ yeɛ ɔkɔhora kɔboka yɛ maa yekomia yɛnye yekogyina yɛ haw noa ɔ?

⁷ Yehowa nate ye Dwirɛ Bible naso boka yɛ maa yemia yɛnye yegyina yɛ haw noa. Edwirɛ pee wɔ Bible nanu bɔ ɔmaa yenwu kyɛ Yehowa kɔboka yɛ. Nu kõ yeɛ ole Mateo 6:8 ne. Ɛberɛ kã kyɛ: ‘Ɛmɔ Baba ne se bɔ ɛmɔhia ɔ, koraka ná ɛmɔabisa ye.’ Yesu bɔ ɔse Yehowa paa tra ebiala ne, yeɛ ɔhane sɔ dwirɛ ne ɔ. Ɛhe maa yenya gyidie kyɛ, sɛ yɛfa ɔhaw bie nu a, Yehowa se bɔ yehia ɔ, na ɔkɔboka yɛ. Yele edwirɛ sɔaa mɔ pee wɔ Bible nanu bɔ ɔkɔhora kɔboka yɛ maa yekonya anwoserɛ yekogyina yɛ haw noa ɔ.—Edw. 94:19.

8. (a) Bible nu afutue bɔ ɔboka yɛ maa yemia yɛnye yegyina yɛ haw noa ne, kã nu ko. (b) Sɛ edwirɛ bie to yɛ a, nzu yeɛ ɔbɔboka yɛ maa yɛkɔkae Bible nu afutue ɔ?

⁸ Afutue biemɔ koso wɔ Bible nanu bɔ ɔkɔhora kɔboka yɛ maa yekomia yɛnye yekogyina yɛ haw noa ɔ. Afutue bɔ ɔte sɔ ne, ɔmaa yɛkora yesi gyinayɛɛ pá. (Any. 2:​6, 7) Ebie yeɛ ole kyɛ, Bible ne tu yɛ foɛ kyɛ nnɛmaa yɛfa bɔ okosi ɛhema nanwo dwirɛ yɛha yɛnwo, na mmom yɛfa yɛnwo yɛto Yehowa so kyẽa biala. (Mat. 6:34) Sɛ yɛte mmenia bɔ yɛtaa yɛkenga Bible ne yɛdwenedwene yenwo a, ɔkɔmaa sɛ edwirɛ bie to yɛ a, ɔngɔyɛ se kyɛ yɛkɔkae nu afutue bie bɔ ɔkɔboka yɛ maa yekosi gyinayɛɛ pá ɔ.

9. Sɛ yɛkenga kyɛbɔ Yehowa bokale ye mmenia nwo dwirɛ wɔ Bible nanu a, ɔboka yɛ sɛ?

⁹ Sɛ yɛkenga Bible ne a, yesa yenwu mmenia biemɔ nwo dwirɛ wɔ nu, na bɛ koso né bɛte kyɛ yɛ ala. Bɛfale bɛnwo bɛtole Yehowa so, na ye koso ɔbokale bɛ. (Heb. 11:​32-34; Yak. 5:17) Sɛ yɛdwenedwene edwirɛ bɔ ɔte sɔ nanwo a, ɔmaa yenya gyidie paa kyɛ Yehowa te “yɛ nwo waenbɔlɛ ne y’anwoserɛ, bokafoɛ paa bɔ opingye yɛ wɔ amaneɛnwunɛ mmerɛ nu ɔ.” (Edw. 46:1) Kyɛbɔ sɔ mmenia nemɔ miane bɛnye sone Yehowa, ɔne gyidie bɔ né bele ye ne, sɛ yesusu yenwo a, ɔkɔmaa yekosuesua bɛ.—Yak. 5:​10, 11.

10. Ɛkɔyɛ sɛɛ né anya Nyameɛ Dwirɛ naso mvasoɛ paa?

¹⁰ Bɔ ɛkɔhora kɔyɛ ɔ. Kenga Bible ne kyẽa biala, na tworɔnzɛm biemɔ bɔ enwu ye kyɛ ɔboka wɔ paa ne, tworɔ to berɛ. Mmeni pee anwu ye kyɛ, sɛ bɛyɛ daa asɛm ne ngyerɛmɔ biala a, ɔmaa benya tworɔnzɛm bie bɔ ɔhyɛ ngunaen bɔ bɛkɔdwenedwene yenwo sɔ kyẽa ne ɔ. Aliemaa brasua bie bɔ bɛfrɛ ye Mariea nwuni kyɛ sɔ dwirɛ ne te nahorɛ paa mmerɛ bɔ bɛhane kyɛ ye maame ne ye baba anya kansa ne. Mmerɛ bɔ né bɛla awusu ne, nzu yeɛ ɔbokale ye maa omiane yenye neane bɛ ɔ? Ɔhane kyɛ: “Tworɔnzɛm bɔ daa asɛm ne gyi so ne, ngyerɛmɔ biala né mekenga medwenedwene yenwo. Ɛhene bokale me maa mvale m’adwene nziele Yehowa so. Yeti ɔhaw bɔ né mefa nu ne, mamma yenwo adwenedwene anhyɛ me so.”—Edw. 61:2.

YELIEMAMƆ KRISTOFOƐ

11. Yeliemamɔ bɔ bɛwɔ ewiase amukoraati ne, sɛ yesusu bɔ bɛfa nu nanwo a, ɔboka yɛ sɛ?

¹¹ Yeliemamɔ bɔ bɛwɔ ewiase mukoraati ne, Yehowa nate bɛ so boka yɛ maa yegyina yɛ haw noa. Yɛse kyɛ ‘amaneɛnwunɛ komapɛ nala yeɛ yeliemamɔ bɔ bɛwɔ ewiase amukoraati ne koso, benwu ye ɔ.’ Ɛhene mbaen po maa y’ahone tɔ yɛ kunu, ofikyɛ ɔmaa yenwu kyɛ nna yɛ ngome yeɛ yamia ɔ. (1 Pet. 5:9) Bɔ ɔte yeɛ ole kyɛ, bɔ yɛfa nu biala ne, ebiemɔ afa nu le, na bahora bagyina yenoa. Yeti yɛ koso yɛkɔhora yekogyina yɛ deɛ ne noa.—Aso. 14:22.

12. Sɛɛ yeɛ yeliemamɔ Kristofoɛ kɔhora kɔboka yɛ ɔ, na yɛ koso sɛɛ yeɛ yɛkɔhora yɛkɔboka bɛ ɔ? (2 Korintofoɛ 1:​3, 4)

¹² Yeliemamɔ Kristofoɛ kɔhora kɔhyɛ yɛ ngunaen maa yekogyina yɛ haw noa. Somafoɛ Pɔɔlo nwuni kyɛ sɔ dwirɛ ne te nahorɛ. Mmerɛ bɔ bɛhyɛle ye kyɛ nnɛmaa ofite fi ye awuro ne, aliemaa biemɔ kyekyele ye wora, bɛhyɛle ye ngunaen, na besa bɛyɛle nningyein biemɔ bɛfa bɛbokale ye. Siɛ ye, ɔbobɔle sɔ aliemaa nemɔ dumaa ɔlale b’ase. (Flp. 2:​25, 29, 30; Kol. 4:​10, 11) Ɛnnɛ koso sɔ yeɛ ɔte ɔ. Sɛ yɛfa ɔhaw nu a, yeliemamɔ boka yɛ maa yegyina yenoa, na bɛ koso sɛ edwirɛ to bɛ a, yɛboka bɛ sɔ ala.—Kenga 2 Korintofoɛ 1:​3, 4.

13. Nzu yeɛ ɔbokale aliemaa brasua Maya maa ɔhora gyinane nzɔhwɛ bie noa ɔ?

¹³ Aliemaa brasua bie bɔ bɛfrɛ ye Maya wɔ Russia. Wɔ 2020 nu ne, polisifoɛ bɔ wurale ye awuro, na beeturuli ye nningyein nu. Siɛ ye bɛbɔle ye kyaagye kyɛ wahã ye gyidie nwo dwirɛ wahyire mmenia, yeti bɛfale ye bɛhɔle kɔɔt. Ɔhane kyɛ: “Sɔ mmerɛ ne, né m’abanu abu, nakoso aliemaamɔ frɛle me wɔ fon so, bɛhworɔle ngrataa bɛbrɛle me, na bɛmaa nwuni kyɛ bekuro me dwirɛ paa. Né mese ye dada kyɛ nna abusua kandinga bie nu, na nu mmenia kuro me dwirɛ, nakoso ofi 2020 bɔ ɔba ne, yeɛ manwu ye paa kyɛ sãa sɔ yeɛ ɔte ɔ.”

14. Mmokalɛ bɔ yeliemamɔ Kristofoɛ fama yɛ ne, yɛkɔyɛ sɛɛ né yanya so mvasoɛ? (Nea foto ne koso.)

¹⁴ Bɔ ɛkɔhora kɔyɛ ɔ. Sɛ ɛfa ɔhaw bie nu a, nnɛtwe wɔnwo fi aliemaamɔ nwo. Afei nnɛmaa ɔha wɔ kyɛ ɛkɔmaa mbanyi nemɔ kɔboka wɔ. Bɛte kyɛ “afealeɛ bɔ mvrama tu a sona fea nu ɔ, nekaa bɔ mvrama piri tu a sona bɔ ye nwo waen ɔ.” (Yes. 32:2) Kae kyɛ, eliemamɔ Kristofoɛ koso bɛfa ɔhaw nu. Yeti sɛ ɛyɛ nikyeebie faboka aliemaa bie bɔ ɔfa ɔhaw nu a, ɔkɔmaa wɔnye kɔgye, na ɔkɔboka wɔ maa ekogyina wɔ haw deɛ ne noa.—Aso. 20:35.

Y’ANYELASOƐ NE

15. Sɛɛ yeɛ anyelasoɛ bokale Yesu ɔ, na yɛ koso anyelasoɛ bɔ yele ye ne, ɔboka yɛ sɛ? (Hebrifoɛ 12:2)

¹⁵ Yehowa amaa yanya anyelasoɛ bie, na ɔboka yɛ maa yegyina ɔhaw noa. (Rom. 15:13) Ɛlɛho bɔ Yesu baawu ne, ebie fale yenye so paa, nakoso kae kyɛ anyelasoɛ yeɛ ɔbokale ye maa ɔhora gyinane yenoa ɔ. (Kenga Hebrifoɛ 12:2.) Né Yesu se kyɛ sɛ odi nahorɛ a, ɔkɔmaa Yehowa dumaa nanwo kɔte. Né yenye la so kyɛ ɔkɔhɔ ye Baba dɔ, na siɛ ye ɔne oliemamɔ bɔ bapopa bɛ ne abonu ali bia wɔ anwuro. Yɛ koso, ɔnate anyelasoɛ bɔ yele ye kyɛ yɛkɔtena ase daa wɔ ewiase foforɛ nanu nati, ɔmaa ɔhaw biala bɔ yɛfa nu wɔ Satan wiase he anu ne, yɛkora yegyina yenoa.

16. Sɛɛ yeɛ anyelasoɛ bokale aliemaa brasua bie ɔ, na ye dwirɛ bɔ ɔhane ne, nzu yeɛ asua afi nu ɔ?

¹⁶ Alla te aliemaa brasua bie bɔ ɔwɔ Russia. Ɛmɔma yɛnea kyɛbɔ anyelasoɛ bɔ ole ye ne bokale ye ɔ. Bɛhyele ohu bɛtole nu, koso né bɛfalle ye bɛhɔlle kɔɔt. Ɔwale sɔ ne, Alla hane kyɛ: “Ndwenedwenene anyelasoɛ bɔ nne ye nanwo, na mmɔle yenwo mbaeɛ. Ɛhene ati m’abanu ammu koraa. Mese kyɛ amaneɛ bɔ yenwu ye ne, ɔngɔhyɛ okofi berɛ. Yehowa koli ngunim, na yɛ koso y’akatuaa ngɔbɔ yɛ.”

17. Anyelasoɛ bɔ Yehowa afa ama yɛ ne, yɛkɔyɛ sɛɛ né yahyire kyɛ ɔsombo ma yɛ? (Nea foto ne koso.)

¹⁷ Bɔ ɛkɔhora kɔyɛ ɔ. Nningyein pá bɔ Yehowa afa ahyɛ yɛ bɔ ne, to wɔ boase dwenedwene yenwo. Ɛyɛ a fa ye kyɛ ɛwɔ ewiase foforɛ nanu bɔ Nyameɛ bɔhyɛ mukoraati awa nu maa anwu ye ɔ. Sɛ ɛyɛ sɔ a, ekonwu ye kyɛ ɔhaw biala bɔ ɛfa nu ɛnnɛ ne, ‘ɔte kãa na ɔngɔhyɛ.’ (2 Kor. 4:17) Afei koso, bɔ Nyameɛ ahyɛ bɔ kyɛ ɔkɔyɛ ye kyeãbie ne, bɔ mmɔden kã yenwo dwirɛ kyire mmenia. Bɛbɔ bɛnzo Yehowa ne, wɔde nea kyɛbɔ bɛ dwirɛ si yɛ anwumvo ɔ. Bɛ́fa ɔhaw pee nu wɔ b’asetena nu, nakoso belle anyelasoɛ biala. Yeti sɛ yɛkã anyelasoɛ bɔ yele ye nanwo dwirɛ kãa po yekyire bɛ a, wɔde nea kyɛbɔ ɔkɔyɛ bɛ fɛ kyɛ bekosua pee bɛkɔboka so ɔ.

18. Nzuati yeɛ yɛkɔhora yekonya gyidie wɔ Yehowa bɔhyɛ nu ɔ?

¹⁸ Yob miane yenye gyinane ɔhaw nwora-nwora bɔ ɔwale ye so ne noa, na ɛhene si ne, ɔhahyirele Yehowa kyɛ: “Mese kyɛ ɛkora yɔ nikyee biala, na ebiala ngɔhora ngosi wɔ nhyehyɛleɛ ate.” (Yob 42:2) Yob nwuni kyɛ, bɔ Yehowa ahã kyɛ ɔkɔyɛ ne, nikyefee ngɔhora ngosi ye atee. Sɔ dwirɛ bɔ Yob hane ne sɛ yesusu yenwo a, ɔkɔhora kɔma yɛ anwoserɛ maa yekogyina yɛ haw noa. Wɔde yɛfa ye kyɛ, anwonyerɛ abɔ maame bie, na wahyini dɔktafoɛ pee so, koso bɛhora bɛsalle ye anwonyerɛ. Ɛhe amaa ye abanu abu. Nakoso siɛ ye, oonyane dɔktaniɛ bie bɔ ɔse adwuma na mmenia dé ye di ɔ. Dɔktaniɛ ne maa maame ne nwuni anwonyerɛ bɔ ɔha ye ne, na osa maa onwuni atee bɔ ɔkɔfa so kɔsa ye anwonyerɛ ɔ. Ɛhene maa ye ahone tɔle ye kunu, ɔmva yenwo kyɛ ɔkɔhyɛ kãa kora ne yenwo atɔ ye ne. Sɔ anyelasoɛ bɔ wanya ye kyɛ ɔyɛ sɛɛ alaa a yenwo kɔtɔ ye nati, afei de ɔkɔhora komia yenye kogyina bɔ ɔfa nu ne noa. Yɛ koso gyidie bɔ yele ye kyɛ Paradise kɔwa ne, ɔboka yɛ maa yɛkora yemia yɛnye yegyina yɛ haw noa.

19. Nzu yeɛ ɔkɔboka yɛ maa yekomia yɛnye yekogyina yɛ haw noa ɔ?

¹⁹ Kyɛbɔ yanwu ye ne, Yehowa nate mbaeɛ, ye Dwirɛ ne, yeliemamɔ Kristofoɛ, ɔne anyelasoɛ bɔ yele ye naso boka yɛ maa yemia yɛnye yegyina yɛ haw noa. Yeti odikyɛ yɛyere yɛnwo yɛbɔ mbaeɛ, yɛkenga Bible ne, yɛmaa yeliemamɔ Kristofoɛ boka yɛ, na yɛdwenedwene y’anyelasoɛ nanwo. Sɛ yɛyɛ sɔ a, ɔhaw biala bɔ yɛkɔfa nu ne, Yehowa kɔboka yɛ maa yekogyina yenoa kodwu kyɛ Satan wiase he kɔwa ayieleɛ ɔ.—Flp. 4:13.