ADESŨA 40
DWEIN 30 M’agya, Me Nyankopɔn, ne M’adamfo
Yehowa ‘Kyekye Bɛ Bɔ Bɛ Wora Abɔ Ne Wora’
“Ɔkyekye bɛ bɔ bɛ wora abɔ ɔ wora, na ɔteta bɛ ngena nu.” —EDW. 147:3.
BƆ ADESŨA NE KƆHÃ YENWO DWIRƐ Ɔ
Bɛbɔ ɔnate edwirɛ bie bɔ ɔtole bɛ nati bedi yealɛ ne, Yehowa dwene bɛnwo paa. Sɛ yɛwɔ ɔhaw bɔ ɔte sɔ nu a, adesua he kɔboka yɛ maa yekonwu kyɛbɔ Yehowa kyekye yɛ wora, na wamaa yɛ koso yahora yakyekye mmeni foforɛ wora.
1. Bɛbɔ bɛsõ Yehowa ne, nzu yeɛ onwu ye wɔ bɛnwo ɔ?
BƐBƆ bɛsõ Yehowa ne, bɔ bɛfa nu wɔ aseɛ so mukoraati ne, onwu ye. Yeti sɛ yɛnye gye oo, yedi aworabɔlɛ oo, yenye ta ye mukoraati. (Edw. 37:18) Sɛ onwu ye kyɛ ɔmva yenwo ne ɔhaw bɔ yɛfa nu ne mukoraati sĩ ne, yɛbɔ mmɔden yɛso ye a, ɔmaa yenye gye paa! Nakoso, bɔ yenwo hia ye paa yeɛ ole kyɛ ɔkɔboka yɛ, na wakyekye yɛ wora.
2. Bɛbɔ bɛ wora abɔ ne, nzu yeɛ Yehowa yɛ ma bɛ ɔ, na mmokalɛ bɔ ɔfa ma yɛ ne, yɛkɔyɛ sɛɛ né yanya so mvasoɛ?
2 Edwein 147:3 kã kyɛ bɛbɔ bɛ wora abɔ ne, Yehowa ‘teta bɛ ngena nu.’ Sɔ tworɔnzɛm he maa yenwu kyɛbɔ Yehowa to ye boase boka bɛbɔ bɛ wora abɔ ne ɔ. Yede yɛkɔyɛ sɛɛ né yanya sɔ mmokalɛ bɔ Yehowa fama yɛ naso mvasoɛ? Ɛmɔma yɛnea sɔ mvandoho he. Dɔktaniɛ bɔ ɔse adwuma paa ne, sɛ ebie pura a, ɔkora nea ye maa yenwo tɔ ye. Nakoso sɛ ɛhe kɔhora kɔyɛ yé a, sana sona di akwangyerɛ biala bɔ dɔktaniɛ ne kɔfa kɔma ye naso. Bɔ Yehowa ahahyire bɛbɔ bédi yealɛ bɔ yenwo dwirɛ wɔ Bible nanu ne, adesua he kɔmaa yekonwu ye. Afei afutue bɔ ofi ɔdɔ nu fama yɛ ne, yɛkɔnea kyɛbɔ yɛkɔfa yɛkɔyɛ adwuma ɔ.
YEHOWA MA YƐ AWERƐHYƐMUƐ KYƐ YƐNWO HIA YE
3. Nzuati yeɛ ebiemɔ anya adwene kyɛ mvasoɛ biala nne bɛ so ɔ?
3 Sɛ yɛnea ewiase bɔ yɛte nu ne a, mmeni pee nala belle dɔ. Bɔ ɔyɛ aworabɔ ne, ebiemɔ amaa mmeni pee anya adwene kyɛ bɛ so lle mvasoɛ. Aliemaa brasua bie bɔ bɛfrɛ ye Helena hane kyɛ: “M’awofoɛ anyɛ nikyefee bɔ okyire kyɛ bekuro me dwirɛ ɔ. Né me baba tianu yɛ se, na daa né ɔkã kyire me ne nniema nemɔ kyɛ mvasoɛ biala nne yɛ so.” Kyɛbɔ ɔtole Helen ne, ebia wɔ koso daa né mmenia di wɔnye, bɛpɛ wɔ nzoaa, anaa bɛmaa enya adwene kyɛ mvasoɛ biala nne wɔ so. Sɛ ɔba sɔ a, ebia ɔkɔyɛ se kyɛ ekole koli kyɛ ebie dwene wɔnwo ɔ.
4. Kyɛbɔ Edwein 34:18 kã ne, awerɛhyɛmuɛ beni yeɛ Yehowa fama yɛ ɔ?
4 Sɛ ye po mmenia di wɔnye a, ɛkɔhora konya gyidie kyɛ Yehowa kuro wɔ dwirɛ na wɔnwo hia ye, ofikyɛ ‘opingye bɛ bɔ bɛ wora abɔ ɔ.’ (Kenga Edwein 34:18.) Sɛ wɔ “kra aboto” a, kae kyɛ Yehowa nwuni nningyein pá biemɔ wɔ wɔnwo, na ɛhene yeɛ ɔmaa ɔhwene wɔ wale yenwo ɔ. (Yoh. 6:44) Wɔnwo hia ye paa, yeti mmerɛ biala ɔpena kyɛ ɔboka wɔ.
5. Bɛbɔ né mmenia mva bɛ nyɛ hwee ne, Yesu hyirele kyɛ okuro bɛ dwirɛ. Nzu yeɛ yesua yefi nu ɔ?
5 Sɛ yɛnea bɔ Yesu yɛle mmerɛ bɔ né ɔwɔ aseɛ so ne a, ɔmaa yenwu adwene bɔ Yehowa le ye wɔ yɛnwo ɔ. Ohyirele kyɛ bɛbɔ né mmenia mva bɛ nyɛ hwee ne, yede okuro bɛ dwirɛ na ɔdwene bɛnwo. (Mat. 9:9-12) Maame bie bɔ né anwonyerɛ bɔ ɔyɛ suro bie abɔ ye ne, ɔɔfale yesa hane Yesu ataadeɛ, ofikyɛ ne ole gyidie kyɛ sɛ ɔyɛ sɔ a yenwo kɔtɔ ye. Mmerɛ bɔ ɔyɛle sɔ ne, Yesu hane ye ahone tole ye kunu, na ɔkamvole ye kyɛ wanya sɔ gyidie ne ɔ. (Mak. 5:25-34) Yesu suesua ye Baba subaen pɛpɛɛpɛ. (Yoh. 14:9) Yeti ɛkɔhora konya gyidie kyɛ wɔnwo hia Yehowa, na subaen pá bɔ ele ye ne koso, ɔse ye mukoraati. Ebie yeɛ ole gyidie ne ɔdɔ bɔ ele ma ye ne.
6. Sɛ ebie le adwene kyɛ mvasoɛ biala nne ye so a, nzu yeɛ ɔkɔhora kɔyɛ ɔ?
6 Sɛ ele adwene kyɛ mvasoɛ biala nne wɔ so a, nzu yeɛ ɛkɔhora kɔyɛ ɔ? Bible nu dwirɛ biemɔ bɔ ɔmaa enwu ye kyɛ wɔnwo hia Yehowa ne, ɛyɛ a kenga na dwenedwene yenwo.b (Edw. 94:19) Sɛ ɛfa nikyeebie sie wɔnye so na angora andwu yenwo, anaa ɛngora nyɛ pee kyɛbɔ ebiemɔ yɛ ne a, nnɛbua wɔnwo fɔ. Yehowa nnea atee kyɛ ɛkɔyɛ bɔ ɔbo w’anwoserɛ so ɔ. (Edw. 103:13, 14) Sɛ mmerɛ bie, ebie ne wɔ lili ye yeayea a, nnenya adwene kyɛ wɔ yeɛ ɛmaa ɔwale ye sɔ ɔ. Kae kyɛ bɛbɔ bayɛ mmenia bɔne ne, bɛ yeɛ Yehowa kobua bɛ ndɛen ɔ, na ɔtte bɛbɔ bafa edwirɛ ne bali bɛ ne. (1 Pet. 3:12) Sandra te ebie bɔ bɛfale nikyee yeayea belili ye wɔ yɛ ngwalaa nu ɔ. Ɔhane kyɛ: “Daa mebɔ mbaeɛ kyɛ Yehowa boka me ma nwu subaen pá bɔ onwu ye wɔ menwo ne.”
7. Bɔ yafa nu wɔ y’asetena nu ne, sɛɛ yeɛ ɔkɔhora kɔboka yɛ wɔ Yehowa soen nu ɔ?
7 Nnɛmaa ɔyɛ wɔ nwanwa kyɛ Yehowa kɔhora kɔfa wɔ so kɔboka mmenia ɔ. Ofikyɛ wamaa anya yenwo atee bɔ ɛne ye bɔ nu yɛ asɛnga adwuma ne ɔ. (1 Kor. 3:9) Ɔnate bɔ afa nu nati, wamaa ɛdwene mmenia nwo, na bɔ bɛfa nu biala koso ɛte yebo. Yeti ɛkɔhora kɔboka bɛ paa. Helen bɔ yalimoa yahã yenwo dwirɛ ne, ɔnate kyɛ ebiemɔ bokale ye nati, kesaalae ye koso ɔkora boka mmenia. Ɔhane kyɛ: “Né menwu menwo kyɛ mvasoɛ biala nne me so. Nakoso Yehowa amaa manwu ye kyɛ okuro me dwirɛ, na ɔnate me so ɔboka mmenia po.” Kesaalae, Helen te ateepakyelɛniɛ, na yenye gye paa.
YEHOWA PENA KYƐ YEDE YƐTO NU KYƐ WAFA YƐ BƆNE WAHYƐ YƐ
8. Awerɛhyɛmuɛ beni yeɛ Yehowa fama yɛ wɔ Yesaya 1:18 ne ɔ?
8 Bɛbɔ bɛso Yehowa ne, benu biemɔ wɔ berɛ a koraka bɛbɔ asu anaa bɛbɔle asu beyiele ne, bɛyɛle nningyein biemɔ bɔ ɔttemaye, na ɛhene anwo dwirɛ té ha bɛ paa. Nakoso odikyɛ yɛkae kyɛ ɔnate kyɛ Yehowa kuro yɛ dwirɛ nati, yeɛ ɔmaa Ɔwa ne oowu mane yɛ ɔ. Sɔ akyɛdeɛ bɔ wafa wama yɛ ne, ɔpena kyɛ yɛsɔ nu. Yehowa nwa sɛ yɛne ye “yɛsiesie yɛ afia”c yeyie a, ommu yɛ bɔne nwo ngondaa ngua yɛ so ko. (Kenga Yesaya 1:18.) Ɔyɛ yɛ fɛ paa kyɛ bɔne bɔ yayɛ yapɛ nu ne, Yehowa ngae ye ko ɔ. Sɔ ala yeɛ nningyein pá bɔ yayɛ ne koso, ye wora mvi ye lle ɔ.—Edw. 103:9, 12; Heb. 6:10.
9. Bɔ yɛyɛ ye kesaalae, ɔne bɔ yɛkɔyɛ ye kyẽa bie ne, nzuati yeɛ odikyɛ yɛfa y’adwene yesie so tra kyɛ yɛkɔdwenedwene bɔ wapɛ nu nanwo ɔ?
9 Sɛ nningyein biemɔ bɔ ayɛ apɛ nu nati wɔ wora abɔ a, nnɛmaa w’abanu bu, na mmom bɔ mmɔden fa w’adwene sie bɔ ɛyɛ ye kesaalae, ɔne bɔ ɛkɔhora kɔyɛ ye kyẽabie naso. Wɔde ma yɛnea bɔ ɔtole somafoɛ Pɔɔlo ɔ. Né ɔha ye paa kyɛ mmerɛ bie otuli yenye siele Kristofoɛ nemɔ aso ɔ, nakoso né ɔse kyɛ Yehowa afa ahyɛ ye. (1 Tim. 1:12-15) Aso ɔhɔleso dwenedwenene bɔne bɔ wayɛ wapɛ nu nanwo anaa? Daabi wanyɛ sɔ. Kyɛbɔ nningyein bɔ né wayɛ wapɛ nu wɔ Yudasom nu ne, wandwenedwene yenwo ne, sɔ ala yeɛ wandwenedwene bɔne ahoroɛ bɔ ɔyɛle ne koso nwo ɔ. (Flp. 3:4-8, 13-15) Mmom asɛnga adwuma bɔ né ɔyɛ ye sɔ mmerɛ ne, ɔne bɔ ɔkɔhora kɔyɛ ye kyẽa bie ne yeɛ ɔfale ye adwene siele so ɔ. Kyɛbɔ ɔtole Pɔɔlo ne, wɔ koso bɔ ngaka ali ne, ma beli bɛhɔ. Kesaalae de, yere wɔnwo so Yehowa, na fa w’adwene sie bɔ wahyɛ wɔ bɔ kyɛ ɔkɔyɛ kɔma wɔ kyẽa bie naso.
10. Sɛ nningyein biemɔ bɔ ɛyɛle nati, wamaa ebiemɔ nwu amaneɛ a, nzu yeɛ ɛkɔhora kɔyɛ ɔ?
10 Ebia nningyein biemɔ bɔ ɛyɛle nati, wamaa ebiemɔ nwu amaneɛ, na yenwo dwirɛ ha wɔ paa. Sɛ sɔ a, yede ɛkɔyɛ ye sɛɛ? Yɛ bɔ ɛkɔhora biala fa siesie ɔhaw ne; ebie yeɛ ole kyɛ bɛbɔ ayɛ bɛ bɔne ne, fi w’ahone nu pa bɛ kyerɛ. (2 Kor. 7:11) Bɛbɔ ɔnate bɔne bie bɔ ɛyɛle bɛ nati benwu amaneɛ ne, srɛ Yehowa kyɛ ɔboka bɛ. Yehowa kɔhora kɔboka ɛne bemukoraati maa ɛmɔkogyina bɔ ɛmɔ fa nu ne noa, na ɛmɔ anya asomdwee.
11. Nzu yeɛ yɛkɔhora yekosua yekofi diyifoɛ Yona dwirɛ nanu ɔ? (Nea koso.)
11 Sua nikyeebie fi mvomsoɛ bɔ elili nanu, na má Yehowa fa wɔ yɛ bɔ okuro ɔ. Kae bɔ ɔtole diyifoɛ Yona ne. Mmerɛ bɔ Yehowa hahyirele ye kyɛ ɔhɔ Niniwe ne, wangɔ na mmom ɔyɛle kyɛ ɔnwati kɔ nekaa foforɛ. Yehowa hwene Yona so, na ye koso osuane nikyeebie fili mvomsoɛ bɔ olili nanu. (Yona 1:1-4, 15-17; 2:7-10) Yehowa anga kyɛ yesɔ nati ɔngɔfa ye ngɔyɛ adwuma ko, na mmom osa fale yenwo atee ne mane ye kyɛ ɔhɔ Niniwe. Sɔ mmerɛ he de, Yehowa hane ne ala yeɛ ɔhɔle ɔ. Mvomsoɛ bɔ Yona lili ne, ɔyɛle ye yea paa. Nakoso wamma ɛhene ammu ye aba nu má wanga kyɛ ɔngɔyɛ adwuma foforɛ bɔ Yehowa afa awura yesa ne.—Yona 3:1-3.
Mmerɛ bɔ diyifoɛ Yona fili egyein ne kunu fitele ne, Yehowa sa hahyirele ye kyɛ ɔhɔ Niniwe, na ɔɔhã bɔ ɔkɔwa bɛso nanwo dwirɛ hyire bɛ (Nea ngyekyɛmuɛ 11)
YEHOWA NATE HONHOM KRONGRON NASO KYEKYE YƐ WORA
12. Sɛ edwirɛ yeayea bie to yɛ a, sɛɛ yeɛ Yehowa boka yɛ maa yenya asomdwee ɔ? (Filipifoɛ 4:6, 7)
12 Sɛ yɛkɔ ɔhaw bie bɔ nu yɛ se paa nu a, Yehowa nate ye honhom krongron naso kyekye yɛ wora. Ɛmɔma yɛnea aworabɔlɛ dwirɛ bie bɔ ɔtole Ron ne Carol ɔ. Bɛwa brienzua huni yenwo yeayea. Bɛhane kyɛ: “Ɔwɔ nu kyɛ yafa ɔhaw pee nu le de, nakoso ɛhe de né ɔbo yɛ so. Mmerɛ pee ne sɛ odwu kɔngɔen a né yɛngora da, yeti mbaeɛ de, né yɛfa yebia. Ɛhene maa yenyane asomdwee, kyɛbɔ Filipifoɛ 4:6, 7 kã ne.” (Kenga.) Sɛ edwirɛ yeayea bie to wɔ a, ɛkɔhora kɔhã w’ahone nu dwirɛ kohyire Yehowa wɔ mbaeɛ nu mmerɛ biala bɔ ekuro ɔ. (Edw. 86:3; 88:1) Kɔso srɛ Yehowa kyɛ ɔfa ye honhom krongron ne boka wɔ, na nya gyidie kyɛ ɔkɔboka wɔ.—Luka 11:9-13.
13. Sɛɛ yeɛ honhom krongron kɔhora kɔboka yɛ maa yɛkɔhɔso yɛkɔso Yehowa nahorɛ nu ɔ? (Ɛfesofoɛ 3:16)
13 Aso ɔhaw bie bɔ ɛfa nu ne, wamaa w’anwoserɛ mukoraati ayie anaa? Honhom krongron kɔhora kɔboka wɔ maa ekonya anwoserɛ, na ahɔso aso Yehowa nahorɛ nu. (Kenga Ɛfesofoɛ 3:16.) Ɛmɔma yɛnea bɔ ɔtole aliemaa brasua bie bɔ bɛfrɛ ye Flora ɔ. Né ɔne ohu mukoraati te nzɛmbatrɛlɛfoɛ, nakoso ohu ne bɔle adwaman yeti beyirale. Ɔhane kyɛ: “Bɔ ɔyɛle ne, ɔyɛle me yea paa, na né mennwu bɔ nyɛ menwo ɔ. Mmɔle Yehowa mbaeɛ kyɛ ɔfa ye honhom krongron ne boka me, kyɛbɔ ɔkɔyɛ a ngɔhora ngogyina yenoa ɔ. Nikyee bɔ né ahyɛaseɛ ne, né mengora yenoa gyina ne, afei de Yehowa bokale me maa ngora ngyinane yenoa.” Flora nwu ye kyɛ Nyameɛ aboka ye maa ye gyidie ayɛ se, yeti kesaalae ode di kyɛ ɔhaw biala bɔ ɔkɔto ye ne, ɔkɔboka ye maa okogyina yenoa. Osa hane kyɛ: “Edwirɛ bɔ ɔwɔ Edwein 119:32 ne, menwu ye kyɛ ɔfa menwo paa. Ɛberɛ nwa: ‘Ngɔfa wɔ mmeraa dwirɛ atee ne aso wɔ anwokekanɛ nu, ofikyɛ ɛtrɛ me nimdeɛ nu.’”
14. Yɛkɔyɛ sɛɛ né Nyameɛ honhom krongron ne ahora aboka yɛ?
14 Sɛ ɛbɔ mbaeɛ kyɛ Yehowa fa ye honhom krongron ne boka wɔ a, nzu yeɛ odikyɛ wɔ bɔbɔ koso ɛyɛ ɔ? Yɛ nningyein bɔ ɔkɔmaa Nyameɛ kɔfa ye honhom ne kɔboka wɔ ɔ. Ebie yeɛ ole adesua ne asɛnga bɔ ɛkɔhɔ ne. Afei koso, sɛ ɛkenga Bible ne kyẽa biala a, ɔkɔmaa ekonwu bɔ Yehowa pena kyɛ ɛyɛ ɔ. (Flp. 4:8, 9) Bɛbɔ bɛnwo dwirɛ wɔ Bible nanu bɔ bɛfale ɔhaw ahoroɛ nu ne, kenga kyɛbɔ Yehowa bokale bɛ maa begyinane yenoa nanwo dwirɛ. Sandra bɔ yalimoa yahã yenwo dwirɛ ne, ɔfale ɔhaw pee nu, nakoso ɔhane kyɛ: “Yosef nwo dwirɛ ne hane m’ahone paa. Amaneɛ bɔ ɔhɔle nu, ɔne ndeɛngyea bɔ bebuli ye ne, wamma wanzɛkye ɔne Yehowa afia.”—Gye. 39:21-23.
YEHOWA NATE YELIEMAMƆ SO KYEKYE YƐ WORA
15. Nwamɔ yeɛ bɛkɔhora bɛkɔkyekye yɛ wora ɔ, na atee beni yeɛ bɛfa so bɛyɛ ɛhe ɔ? (Nea foto ne koso.)
15 Sɛ yɛ́fa ɔhaw bie nu a, yeliemamɔ Kristofoɛ kɔhora kɔyɛ ‘aworakyekyerɛ kɔma yɛ.’ (Kol. 4:11) Atee bɔ Yehowa fa so kyire kyɛ okuro yɛ dwirɛ ne, nu ko yeɛ ole aliemaamɔ bɔ ɔfa bɛso boka yɛ ne. Bɔ bɛyɛ bɛfa bɛkyekye yɛ wora ne bie yeɛ ole kyɛ, bɛbaanea yɛ boso, na sɛ yedwudwo koso a, bɛyɛ asoɛ betie yɛ. Afei koso, bɛkora bɛfa Bible nu dwirɛ bie bɛkyekye yɛ wora, anaa bɛne yɛ bɔ nu bɔ mbaeɛ.d (Rom. 15:4) Odwu mmerɛ bie koso a, bɛboka yɛ maa yenwu ye kyɛ Yehowa dwene yɛnwo. Ɛhene maa y’ahone tɔ yekunu. Asa koso, sɛ nningyein nu yɛse ma yɛ a, aliemaamɔ kora ma yɛ aleɛ kãa bɔ yehia ɔ.
Aliemaamɔ bɔ bɛte yɛ damvomɔ bɔ yede bɛ yedi ne, bɛkɔhora bɛkɔkyekye yɛ wora, na baboka yɛ (Nea ngyekyɛmuɛ 15)
16. Sɛ yɛpena kyɛ aliemaamɔ boka yɛ a, nzu yeɛ odikyɛ yɛyɛ ɔ?
16 Aliemaamɔ nye gye yenwo paa kyɛ bɛkɔboka yɛ, nakoso ebia sana yɛbɔbɔ yɛkã bɔ yɛfa nanwo dwirɛ yekyire bɛ. (Any. 17:17) Ofikyɛ nna mmerɛ mukoraati yeɛ bekonwu bɔ yɛfa nu anaa yehia ɔ. (Any. 14:10) Sɛ edwirɛ bie hyɛ wɔ so a, nnɛfa fea na mmom kã yenwo dwirɛ kyire wɔ damvo Kristoniɛ bie. Ɛyɛ a, má benwu bɔ bɛyɛ bɛfa bɛboka wɔ ɔ. Sɛ ekuro koso a, kã yenwo dwirɛ kyire asafo nu panyi bie bɔ epingye ye paa ma ɔboka wɔ. Aliemaa mmrasua biemɔ anwu ye kyɛ sɛ bɛne aliemaa brasua bie bɔ yenye la ase susu bɛ haw nwo a, ɔboka paa.
17. Nzu yeɛ ɔkora maa ɔyɛ se kyɛ yɛkɔmaa aliemaamɔ kɔboka yɛ ɔ, na yɛkɔyɛ sɛɛ né yahora yali so?
17 Ɛyɛ a nnɛte wɔnwo fi aliemaamɔ nwo. Ebia ɔnate ɛyealɛ bɔ ɛfa nu nati, ɛmbena kyɛ mmenia kopingye wɔ. Afei nna mmerɛ namu yeɛ aliemaamɔ kɔte bɔ ɛfa nu nabo ɔ, yeti ebia bɛkɔhã edwirɛ bie maa ɔkɔha wɔ. (Yak. 3:2) Sɛ ɔba sɔ a, nnɛkã kyɛ ɛhene ati ɛtwe wɔnwo fi bɛnwo, ofikyɛ Yehowa nate bɛso kɔhora kɔkyekye wɔ wora. Gavin te asafo nu panyi, ɛyɛ a ye wora taa bɔ paa. Ɔhane kyɛ: “Sɛ odwu mmerɛ bie a me damvomɔ po, me mbena kyɛ bepingye me.” Gavin amma ɛhe anhyɛ ye so, na mmom ɔbɔle mmɔden kyɛ okopingye ye damvo nemɔ, na ɛhene aboka ye paa. Aliemaa brasua bie bɔ bɛfrɛ ye Amy hane kyɛ: “Ɔnate bɔ mafa nu wɔ asetena nu nati, ɔmaa menne sona menni. Nakoso, mebɔ mmɔden kyɛ ngɔfa menwo ngɔto aliemaamɔ so kyɛbɔ Yehowa yɛ ne. Meyɛ sɔ a, mese kyɛ Yehowa ngye kɔgye, na me wora menye kɔgye.”
BƆ YEHOWA AHYƐ BƆ KYƐ ƆKƆYƐ YE KYẼA BIE NE, ƆKYEKYE YƐ WORA
18. Nzu yeɛ yɛkɔhora yɛkɔnea ye atee kyẽa bie ɔ, na nzu yeɛ yɛkɔhora yɛkɔyɛ ye ɛnnɛ ɔ?
18 Yɛkɔhora yekonya gyidie kyɛ ɔngɔhyɛ, nikyeebiala bɔ ɔmaa yenwu amaneɛ na yɛ wora bɔ ne, Yehowa kɔye kofi berɛ koraa. (Nye. 21:3, 4) Sɔ mmerɛ ne, nningyein bɔ ɔmaa yedi aworabɔlɛ ne, ‘ɔngɔpe yɛ ti anu ko.’ (Yes. 65:17) Kyɛbɔ yanwu ye ne, ɛnnɛ po sɛ yɛ́fa ɔhaw nu a, Yehowa boka yɛ. Yeti nhyehyɛɛ bɔ Yehowa ayɛ bɔ ɔnate so ɔboka wɔ na ɔkyekye wɔ wora ne, dé to nu. Nnɛmaa wɔ wora fi ye lle kyɛ, Yehowa ‘dwene wɔnwo.’—1 Pet. 5:7.
DWEIN 7 Yehowa, Yɛn Botan Kɛse
a Basesã dumaa nemɔ.
b Kenga edwirɛ bɔ ɔwɔ alaka nanu bɔ yenwa, “Wɔnwo Hia Yehowa” ne.
c Sɛ yɛne Yehowa kɔhora ‘kosiesie yɛ afia’ mmerɛ bɔ yayɛ bɔne bie a, sana yɛsrɛ ye kyɛ ɔfa hyɛ yɛ. Yɛyɛ sɔ a yeɛ okyire kyɛ yanu yɛnwo ɔ. Afei odikyɛ yɛsesã yefi sɔ bɔne nanwo. Sɛ yɛyɛ bɔne pirikua bie a, odikyɛ yɛkã yenwo dwirɛ yekyire asafo nu mbanyi nemɔ maa bɛboka yɛ.—Yak. 5:14, 15.
d Kenga tworɔnzɛm bɔ ɔwɔ Bible Mu Nsɛm a Kristofo De Bɔ Wɔn Bra nwomaa nanu ne, edwirɛti bɔ yeɛ ole “Adwinnwen,” ɔne “Awerɛkyekye.”