Yan Zabolotnyi/stock.adobe.com
ƐMƆHƆSO BƐWƐNE!
Amumuyɛɛ Kɔso Wɔ Ewiase Nekaa Biala—Nzu Yeɛ Bible Ne Ka Ɔ?
Sɛ yɛkɔ Haiti maen nanu a, mmenia bɔ bedi nzɛmmɔne ne asone paa. South Africa, Mexico ne maen ahoroɛ bɔ ɔwɔ Latin America ne koso, kyɛbɔ nzɛmmɔne si kɔso ne, bɛnga. Maen ahoroɛ bɔ sɔ nningyein ne ngɔso pá wɔ berɛ ne po, mmenia nwo ndɔ bɛ ɔnate kyɛ, sɛ betie amaneɛbɔ ahoroɛ a, benwu ye kyɛ mmenia wia nningyein, na bɛ sɛkye agyapadeɛ.
Nningyein tɛɛ bɔ ɔkɔso wɔ wiase nanu ɛnnɛ ne, nzu yeɛ Bible ne ka fa yenwo ɔ?
Bible ne ha tole berɛ kyɛ amumuyɛɛ kɔsone
Bible ne maa yenwu kyɛ nningyein bɔ okosisi bɔ ɔkɔmaa yekonwu kyɛ yɛte “ewiase ayieleɛ” nanu ne, amumuyɛɛ bokaso. (Mateo 24:3) Mmerɛ bɔ ne Yesu ka sɔ nningyein nanwo dwirɛ ne, ɔhane kyɛ:
“Na ɔnate kyɛ amumuyɛɛ kɔsone pee ne ati, mmenia pee b’ehurolɛ bɔ bekurokuro bɛ nwo dwirɛ ne, ye noa kodwo.”—Mateo 24:12.
Bible ne hatole berɛ kyɛ wɔ “ayieleɛ mmerɛ” nanu ne, mmenia ngɔhora ‘ngɔhyɛ b’akɔnnɔ so, bɛ tianu kɔyɛ se, na bɛkɔpo nikye paa biala.’ (2 Timoteo 3:1-5) Sɔ subaen tɛɛ hemɔ ati yeɛ wamaa amumuyɛɛ abu so sɔ ne.
Nakoso anyelasoɛ wɔ berɛ. Bible ne ahyɛ yɛ bɔ kyɛ, ɔngɔhyɛ amumuyɛɛ mukuraati kofi berɛ.
“Ɔngɔhyɛ biala, bɔnefoɛ bɛ boso konua; ɛmɔkɔyere bɛ nwo bɛkɔpena bɛ boso, nakoso ɛmɔngonwu bɛ. Nakoso anwobrɛaseɛfoɛ bɛ sa kɔhã aseɛ ne; ɔnate asomdwee kandinga ne ati, bɛ nye kɔgye.”—Edwein 37:10, 11.
Sɛ ɛkenga edwirɛ bɔ ɔwɔ ye bo berɛ ne a, ɔkɔboka wɔ maa ekonwu anyelasoɛ bɔ ɔwɔ Bible nanu. Ekosa konwu kyɛ nningyein bɔ osisi ɛnnɛ ne kyire kyɛ Bible ngɔmhyɛ awa nu.
“A Real Hope for a Better Tomorrow”
“Nneɛma Bɛn Na Esisi a Ɛbɛkyerɛ Sɛ Yɛwɔ “Awiei Mmere” Anaa “Nna a Edi Akyiri” No Mu?”