Yesu Kɔmaa Nzɛmmɔnelilɛ Bo Kɔpɛ

Sɛ ebie sisi yɛ, anaa ɔne yɛ anni ye yé a, yealɛ bɔ ɔmaa yɛdi ne, Yesu te yebo paa. Ofikyɛ, mmerɛ bɔ ne Yesu wɔ aseɛ he aso ne, bɛfale edwirɛ bɛtole ye so, bɛbole ye, bɛfale atee bie so belili ye dwirɛ, mmerɛ bɔ ne ɔyɛlle bɔne biala ɔ, na behune ye yaayaa. Ɔwɔ nu, ne ɔyɛlle bɔne biala, nakoso ‘ɔfale ye ngoa tole berɛ fa lɛle mmenia pee ngoa.’ (Mateo 20:28; Yohane 15:13) Kesaalae, Yesu te Nyameɛ Ahennie naso Hene, na ɔngɔhyɛ biala ɔkɔye nningyein tɛɛ bɔ ɔkɔso namukoraati kofi aseɛ he aso, na nzɛmmɔnelilɛ kofi berɛ koraa.—Yesaya 42:3.

Sɛ Yesu kekã yenwo a, sɛɛ yeɛ asetena kɔyɛ ɔ? Wɔ de, nea bɔ Bible ne ka ɔ:

• “Ɔngɔhyɛ biala, bɔnefoɛ bɛ boso konua; ɛmɔkɔyere bɛ nwo bɛkɔpena bɛ boso, nakoso ɛmɔngonwu bɛ. Nakoso anwobrɛaseɛfoɛ bɛ sa kɔhã aseɛ ne; ɔnate asomdwee kandinga ne ati, bɛ nye kɔgye.”—Edwein 37:10, 11.

Bɔ Yesu ayɛ ama yɛ, ɔne bɔ ɔngɔhyɛ ɔkɔyɛ kɔma yɛ ne, yɛkɔyɛ sɛɛ ne yahyire yenwo anisɔ? Atee kõ bɔ yɛkɔfaso yɛkɔyɛ sɔ yeɛ ole kyɛ, “Nyameɛ ahennie ne nwo nzɛmba” bɔ Yesu bɔle ye dawure ne, yekosua yenwo nikye. (Luka 4:43) Kenga edwirɛ bɔ yeɛ ole “Dɛn ne Onyankopɔn Ahenni?”