Ɔsatu Titire Bɔ Yɛkɔfa Yɛkɔhyɛ Bible Adesũa Bo Wɔ September Nu Ɔ

Wɔ September nu ne, yɛkɔyere yɛnwo paa yɛkɔfa Nya Asetena Nu Anigye Daa! brohyeɔ ne, yɛkɔhyɛ Bible adesũa bo wɔ awuro biala nu. Adawurubɔfoɛ kɔhora kɔsõ kyɛ atẽepakyelɛ bokafoɛ, ná bafa nnɔnhwere 30 bayɛ asɛnga adwuma ne. Sɛɛ yeɛ yɛkɔyɛ ɔsatu titire he ɔ?

• Nzrahwɛ Bɔ Olimoa Nu: Fa edwirɛ bɔ ɔwɔ brohyeɔ ne sĩ ne kanyaen mmenia anigye, na kyire bɛ kyɛbɔ yɛfa yɛyɛ Bible adesũa ɔ. Kae bɛbɔ behyirele edwirɛ nanwo anigye mmerɛ bie ne, ɔne sakɔnea ahoroɛ bɔ ɛyɛle ne. Na sɛ yepo, né bɛnye ngye edwirɛ nanwo mmerɛ bie bɔ wapɛ nu ne a, ebia bɛnye kɔgye atẽe foforɛ ɔne brohyeɔ foforɛ bɔ yɛfa yɛyɛ adwuma nanwo. Bɛbɔ bala y’ali kyɛ bɛnye ngye edwirɛ nanwo wɔ mmerɛ bie bɔ wapɛ nu ne, yenwo nhia kyɛ yɛkɔyakyi brohyeɔ ne bie wɔ b’awuro nu mmerɛ bɔ yaando bɛ ne. Asafo Sõen Boayikue ne kɔhora kɔyɛ asɛnga nhyiamu ahoroɛ nwo nhyehyɛeɛ wɔ sɔ bosome nanu.

• Yenwo Atẽe Foforɛ: Sɛ ɛmɔ asafo ne le badwanu adanzeɛlilɛ trɔg ne bie a, yede ɛmɔfa Nya Asetena Nu Anigye Daa! brohyeɔ ne beli dwumaa. Sɛ ebie dé brohyeɔ ne bie a, má onwui kyɛ, yɛkɔhora yɛne ye kɔyɛ Bible adesũa bɔ ongotua hwee ɔ. Mmerɛ bɔ ɛne ye bɛbɔ ngɔmmɔ wɔ trɔg nanwo ne, kyire ye kyɛbɔ yɛyɛ Bible adesũa ne, anaa yɛ ye sɔ kyẽa foforɛ. Asɛnga soneafoɛ ne kɔhora kɔyɛ nhyehyɛeɛ maa adawurubɔfoɛ bɔ bɛfata ne koli adanzeɛ wɔ nekaa bɔ nyumakue ahoroɛ wɔ, wɔ́ aseɛsĩi nanu ne. Ɛkɔhora ne wɔ mangõ adwumayɛfoɛ, ɔne bɛbɔ eyia bɛ wɔ dwaaso ne kosũa Bible ne.

Yesu hyɛle yɛ kyɛ “yɛyɛ mmenia asũafoɛ,” “yehyirehyire bɛ.” (Mat 28:19, 20) Ɔbra kyɛ, ɔsatu titire he kɔboka yɛ maa yekodwu sɔ botaeɛ nanwo nate Nya Asetena Nu Anigye Daa! naso