Nhwehwɛmuɛ Ma Abrabɔ Ne Asɛnga Adesũa Nwomaa
© 2024 Watch Tower Bible and Tract Society of Pennsylvania
NOVEMBER 4-10
NYAMEƐ DWIRƐ NANU ASUADEƐ | EDWEIN 105
“Ɔkaye Ye Apam Ne Daa”
w23. 04 28 ¶11-12
Wiase Foforɛ Bɔ Yehowa Afa Hyɛ Yɛ Bɔ Ne, Yɛkɔyɛ Sɛɛ Né Yanya Gyidie Kyɛ Ɔkɔwa Amba?
Ɛbɔ bɔ Yehowa hyɛle ye mmenia tete ne, sona nye so de, né waayɛ kyɛ ɔngɔhora ngɔwa nu lle. Ma yɛnea bie. Né Abraham ne Sara abɔ nworowaa, nakoso Nyameɛ hane kyɛ bɛkɔwo baa brienzua. (Gye. 17:15-17) Osa hahyirele Abraham kyɛ ɔkɔfa Kanaan aseɛ ne kɔma ye bosofoɛ. Nakoso Yisraelfoɛ bɔ né bɛte Abraham bosofoɛ ne, bɛɛyɛle ngoaa wɔ Egypt. Yeti sona nye so de, né ɔkɔyɛ se kyɛ sɔ bɔhyɛ ne kɔwa nu. Koso ɔwale nu. Afoɛ pee si ne, Yehowa hahyirele Elisabɛte bɔ né wabɔ aworowaa ne kyɛ ɔkɔwo. Mary koso né ɔne brienzua lalle lle, koso Nyameɛ hane kyɛ, ye yeɛ ɔkɔwo Ɔwa ne ɔ. Sɔ akwalaa ne yeɛ ɔhyɛle yenwo bɔ wɔ Eden turo nanu afoɛ pee ne. Bɔhyɛ he koso wale nu.—Gye. 3:15.
Sɛ yɛdwen kyɛbɔ Yehowa lili ye bɔhyɛ so tete nanwo a, ɔmaa yenya gyidie kyɛ, wiase foforɛ bɔ wafa wahyɛ yɛ bɔ ne kɔwa nu. (Kenga Yosua 23:14; Yesaya 55:10, 11.) Ɔba sɔ a, yɛkɔhora yɛkɔboka mmenia maa bekonwu kyɛ wiase foforɛ ne kɔwa amba, na nna kyɛ Yehowa titĩ yenoa nu mbaen. Yehowa bɔbɔ hane anwuro foforɛ ne aseɛ foforɛ nanwo dwirɛ kyɛ: “Ɔte turoloo ne nahorɛ.”—Nye. 21:1, 5.
it-2 1201
Edwirɛ Ne
Nningyein bɔ Yehowa abɔ ne, ɔkɔhora kɔfa nu biala so kɔmaa ye atirimbɔ kɔwa nu. Kyɛ ɔte sona oo, kaka oo, nyɔboɛ oo, ɛhene de ɔmva yenwo. (Edw 103:20; 148:8) Ɔka dwirɛ a, ɔnzesa yenoa, yeɛ ye wora mvi koso. (Deu 9:5; Edw 105:42-45) Nyameɛ bɔbɔ hane kyɛ ye dwirɛ bɔ ɔkɔha biala “timu berɛ afebɔɔ.” Na ongosa ngɔwa ye berɛ, sana oyie bɔ yeti yeɛ ɔsomane ye ne.—Yes 40:8; 55:10, 11; 1Pe 1:25.
Bible Nu Dwirɛ Titire
w86 11/1 19 ¶15
Ngwalaa—Ɛmɔboka Ma Anigye Ne Ngabom Bra Abusua Nu
“Beguale [Yosef] gya ngɔnzɔngɔnzɔ ma omiane ye, bɛfale ngɔnzɔngɔnzɔ bɛsɔle ye kɔme, kɔpem kyɛ edwirɛ bɔ ɔhane ne wale nu ɔ: AWURADE dwirɛ ne mane ye nwo sale.” (Edwein 105:17-19) Yosef nwuni amaneɛ kyɛ akoaa, na bɛhyele ye bɛtole nu. Ɛhe hɔle so alaa afoɛ 13, kodwu kyɛ Yehowa bɔhyɛ wale nu ɔ. Bɔ ɔtotole ye ne, ne waayɛ kyɛbɔ bɛfa ye bɛfa see nu ne. Ɔwɔ nu, nna Yehowa yeɛ ɔmaa onwuni amaneɛ ɔ, nakoso nikyee bie ti yeɛ ɔmane yenwo atee maa ɛhe amu tole ye ɔ. Edwirɛ bɔ ɔtole Yosef ne, né ɔtte dwirɛ mmaammaa. Yeti ne ɔkɔhɔso kɔfa yenwo kɔto “AWURADE bɔhyɛ” so anaa? Subaen pa tekyɛ aboterɛ, ɔne ahobrɛaseɛ bɔ ne ole ye ne, né okonya bie kɔboka so? Né ɔkɔyere yenwo kɔso Yehowa ɛne? Na sɛ bɛma ye adwuma bie bɔ ɔyɛ se a, né okomia yenye kɔyɛ anaa? Sɔ pɛpɛɛpɛ yeɛ ɔyɛle ɔ. Yosef ɔɔyɛle tekyɛ sika kɔkorɛ bɔ bafa bafa see nu ɔ. Yeti ne Nyameɛ fa ye yɛ nikyee biala a, ɔyɛ yé. Na ɔnate ye so bɔle adwuma paa.
NOVEMBER 11-17
NYAMEƐ DWIRƐ NANU ASUADEƐ EDWEIN 106
“Bɛ Wora Fili Nyameɛ Bɔ Ɔte Bɛ Defoɛ Ne”
w18. 07 20 ¶13
‘Nwa Yeɛ Ɔwɔ AWURADE Bue Ɔ?’
Awosii kabii, agralaa bɔ ɔtete, ɔne nzɛngyerɛneɛ ahoroɛ bɔ Yehowa yɛle ne, ɔmaa esuronyi hane Yisraelfoɛ nemɔ. Ɛhe ati bɛha behyirele Mose kyɛ, ɔne Yehowa dwudwo ma bɛ. Mose koso penene so, na ɔne Yehowa dwudwole wɔ bokaa Sinai so. (Ɛks. 20:18-21) Mmerɛ bɔ Mose dwuli bokaa naso berɛ ne, ɔhyɛle. Ɛhe maa Yisraelfoɛ nemɔ adwene tu frale. Na né bɛdwene kyɛ bɛ kannifoɛ bɔ né bede ye bedi ne, wayakyi bɛ agua serɛ naso anaa? Ɔkɔhora kɔwa kyɛ, ne mmenia ne afa bɛwora mukoraa bawura Mose nu soma, ɔnate kyɛ daa né benwu ye. Né bennwu bɔ bɛyɛ ɔ. Yeti bɛha behyirele Aarɔn kyɛ: ‘Dwɔso ná yɛ bosoen mɔ bɔ bekoli yɛ nyunu ma yɛ. Ofikyɛ sɔ Mose ne, akoaa he bɔ ɔɔyele yɛ fili Egypt aseɛ so wale ne de, yɛnze bɔ wato ye ɔ.’—Ɛks. 32:1, 2.
Bible Nu Dwirɛ Titire
w06 7/15 13 ¶9
Edwein Nwomaa Ne Bue Bɔ Ɔtɔ So Nza Ne Nna Nanu Dwirɛ Titire
Edwein 106:36, 37. Ebie bɔ ɔso bosoen, ɔne ebie bɔ ɔbɔ afɔleɛ ma sunzummɔne ne, tworɔnzɛm he maa yenwu kyɛ ɔte nikyee ko. Ɛhe kyire kyɛ, sɛ ebie fa bosoen di dwumaa a, sunzummɔne kɔhora konya ye so tumi. Bible ne tu yɛ foɛ kyɛ: “Ɛmɔhwe ɛmɔ nwo béfi mmosoen nwo.”—1 Yoh. 5:21.
NOVEMBER 18-24
NYAMEƐ DWIRƐ NANU ASUADEƐ EDWEIN 107-108
“Ao, Ɛmɔla AWURADE Ase, Ofikyɛ Ɔte Paa”
w07 4/15 20 ¶2
Ɛmɔ Ma Asafo Ne Bɛye Yehowa Ayɛ
Asafo ne tte kyɛ mmenia biemɔ bɔ baha bɛnwo babonu ɔ. Yeɛ ɔtte kyɛ mmenikue bie bɔ bɛbonu bɛgye bɛnye, anaa bɛkɔ party ɔ. Na mmom nikyee titire bɔ asafo ne yɛ ne, yeɛ ole kyɛ bɛkɔye Yehowa ayɛ ɔ. Kyɛbɔ Edwein nwomaa ne ka yenwo dwirɛ ne, ofi tete sɔ ala yeɛ bɛyɛ ɔ. Edwein 35:18 ne ka kyɛ: “Na afei ngɔla wɔ ase wɔ badwa kandinga ne anu; ngɔye wɔ ayɛ wɔ ɛlɔen kandinga ne anyunu.” Sɔ ala koso yeɛ Edwein 107:31, 32 koso hyɛ yɛ ngunaen kyɛ: “Odi kyɛ bɛye AWURADE ayɛ wɔ ye ɔdɔ bɔ onni ngasi ne ati, wɔ ye anwanwadeɛ bɔ ɔyɔ ma adasa mmaa ne ati. Odi kyɛ bɛkamvo ye wɔ maen nyianu ne anu.”
w15 1/15 9 ¶4
Da Yehowa Ase Na Nya Nhyiraa
Nhyiraa bɔ Yehowa fa ma yɛ ne, sɛ yannwu ye a, ɔkɔyɛ se kyɛ yɛkɔla ye ase. Ɔwɔ nu alaa nningyein bɔ Yehowa ayɛ ama yɛ ne, odikyɛ yɛtena ase konn na yɛdwene yenwo. Sɛ yɛyɛ sɔ a, yekonwu ye kyɛ saa Yehowa okuro yɛ dwirɛ paa. Dweintolɛniɛ ne yɛle sɔ, na mmerɛ bɔ owuni bɔ Yehowa ayɛ ama ye ne, yenwo dwirili ye.—Kenga Edwein 40:5; 107:43.
Bible Nu Dwirɛ Titire
it-2 420 ¶4
Moab
Mmerɛ bɔ né Dawide di hene ne, né Yisrael ne Moabfoɛ afia ndwo koraa; daa né bɛko. Nakoso, Dawide lili Moabfoɛ so ngunim na ɔfale bɛ yɛle ngoaa bɔ betua toɔ bɛma ye ɔ. Ɔhyɛle bɛ sogyafoɛ nemɔ nu nza yeɛ ohuhuni benu nyɔ ɔ. Ɔmaa bemu bɛlelale aseɛ nwo yeɛ ɔhyɛle benu nza ɔ. Ohuni benu nyɔ, yeɛ ɔmaa kue ko bɔ waha ne tenane ngoa nu ɔ. (2Sa 8:2, 11, 12; 1Abe 18:2, 11) Ɔkɔyɛ kyɛ sɔ koɛ nala nu yeɛ Yehoada awa Benaya huni Ariel mmaamɔ nyɔ ne. (2Sa 23:20; 1Abe 11:22) Sɔ ngunim bɔ Dawide lili ne, ɔmaa ngɔm bie bɔ Balaam hyɛle ne wale nu. Ɔhyɛle sɔ ngɔm ne, né ɔbo afoɛ 400. Ɔnwa: “Bɔ menwu ye mefa ye nwo ne, nna kekesaala ye yeɛ ɔkɔwa nu ɔ; bɔ me nye tua fa ye nwo ne, ongosi kekesaala ye. Nzramaa bie kofi Yakob nu kofite, na ɛhɔtɔ bie kofi Yisrael nu kodwɔso. Okoli Moabo mbanyi so ngonim, ná wabrɛ Sɛti boso ama amukoraa ase.” (Num 24:17) Mmerɛ bɔ Dawide hane kyɛ Moab te Nyameɛ “nyanzɛen” ne, ɔkɔyɛ kyɛ ngunim bɔ olili nanwo dwirɛ yeɛ ne ɔka ɔ.—Edw 60:8; 108:9.
NOVEMBER 25–DECEMBER 1
NYAMEƐ DWIRƐ NANU ASUADEƐ EDWEIN 109-112
Ta Ɔhene Yesu Si!
w06 9/1 13 ¶6
Edwein Nwomaa Ne Bue Bɔ Ɔtɔ So Nnu Nanu Dwirɛ Titire
Edwein 110:1, 2—Yesu Kristo bɔ ɔte “[Dawide] mene” ne, mmerɛ bɔ ɔɔtenane Nyameɛ sa famaa so ne, nzu yeɛ ɔyɛle ɔ? Mmerɛ bɔ betingyele Yesu ne, ɔhɔle anwuro ɔɔtenane Nyameɛ sa famaa so. Ɔnwondɛle maa 1914 wale kora yeɛ bɛfa ye besi bia so kyɛ Ɔhene ɔ. Sɔ mmerɛ ne yeɛ Yesu lili ye asuafoɛ bɔ wapopa bɛ naso ɔ. Ɔfale asɛnga adwuma nanwo akwangyerɛ mane bɛ. Afei osiesiele bɛ, kyɛbɔ ɔkɔyɛ a, ɔne bɛ koli hene wɔ ye Ahennie nanu ɔ.—Mateo 24:14; 28:18-20; Luka 22:28-30.
w00 4/1 18 ¶3
Bɛbɔ Bedwɔso Betia Nyameɛ Ne, Bɛ Sa Kosi Ase!
Ofi afoɛ 1901 bɔ ɔba ne, batane Yehowa mmenia nye paa. Maen biemɔ wɔ berɛ a, bahyɛda kyɛ bɛngɔmaa yɛngɔyɛ asɛnga adwuma ne. Yɛ pɔfoɛ Satan Abɔnzam yeɛ ɔta bɔ bɛyɛ ne si ɔ. “Ofikyɛ odi akɔneaba, opo kyɛ gyata, na ɔpena sona bɔ okonya ye kɔhye ye ɔ.” (1 Petro 5:8) Mmerɛ bɔ “Amaenmaensofoɛ nemɔ bɛ mmerɛ ne” wale ayieleɛ wɔ 1914 nu ne, Nyameɛ fale Ɔwa ne siele bia so kyɛ Ɔhene. Afei ɔfale ahyɛdeɛ mane ye kyɛ: “Di hene wɔ wɔ pɔfoɛ mɔ b’afia.” (Luka 21:24; Edwein 110:2) Ɔhyɛle yebo kyɛ ɔfa ye tumi ne yɛ adwuma ne, Satan yeɛ olimoa foane ye fili anwuro wale aseɛ he aso ɔ. Satan se kyɛ ye mmerɛ bɔ waha te kaa, yeti Kristofoɛ bɔ bapopa bɛ, ɔne bɛbɔ bɛboka bɛ so ne, wafɛ bɛ so yaa piri paa. (Nyekyire 12:9, 17).
be 76 ¶2
Bɔ Wɔnwo Mmɔden—Kɔ Wɔ Nyunu
Fi w’ahone mukoraa nu fa w’adom akyɛdeɛ boka mmenia. Ɛyɛ a, ɛne afoforɛ bonu kɔ asɛnga? Bɛbɔ bawa asafo nanu foforɛ, ngwalaa, ɔne bɛbɔ bɛnde apɔ ne, ɛyɛ a ɛpena atee bie bɔ ɛkɔfa so kɔboka bɛ anaa? Sɛ besiesie Ahennie Asa, ɔne Nhyiamu Asa so a, ɛyɛ a efi w’ahone nu kɔboka? Ateepakyelɛ bokafoɛ adwuma ne, ɔwɔ nu alaa a, ɛkɔhora kɔyɛ bie anaa? Wɔnye gye yenwo kyɛ ɛkɔyɛ ateepakyelɛniɛ, anaa ɛkɔɔboka asafo bɔ behia mmokalɛ anaa? Sɛ ɛte brienzua wɔ asafo nanu a, aso ɛbɔ mmɔden kyɛ ekodwu bɔ tworɔnzɛm ne pena fi wɔ berɛ nanwo, kyɛbɔ ɔkɔyɛ a, ɛkɔhora kɔso kyɛ asafo nu somvoɛ anaa panyi? Sɛ yefi yɛ ahone nu yɛboka afoforɛ, na yede asɛdeɛ biala bɔ bɛkɔfa bɛkɔma yɛ ne to nu a, okyire kyɛ yɛkɔ yɛ nyunu.—Edw. 110:3.
Bible Nu Dwirɛ Titire
it-1 524 ¶2
Apam
Apam Bɔ Ɔkɔmaa Ɔkɔyɛ Sɔfo Tekyɛ Mɛlkisɛdɛke. Edwein 110:4 ka sɔ apam nanwo dwirɛ. Bɔ ɔhworɔle Hebrifoɛ 7:1-3, 15-17 ne, ɔmaa yenwu kyɛ né ɔfa Yesu nwo. Yehowa ne Yesu yeɛ bɛyɛle sɔ apam ne ɔ. Mmerɛ bɔ Yesu ne ye asuafoɛ nemɔ yɛ ahennie apam ne, ɔhane sɔ apam nanwo dwirɛ. (Luk 22:29) Yehowa tale ndaen kyɛ ɔwa Yesu Kristo kɔyɛ sɔfo tekyɛ Mɛlkisɛdɛke. Né Mɛlkisɛdɛke te Nyameɛ sɔfo ne ɔhene wɔ aseɛ he aso. Nakoso Yesu de, né ɔkɔyɛ ɔhene ne sɔfo wɔ anwuro. Mmerɛ bɔ ɔhɔle anwuro ne, yeɛ bɛfale sɔ tumi ne mane ye afebɔɔ ɔ. (Heb 6:20; 7:26, 28; 8:1) Sɔ apam he de, ɔngɔpɛ nu lle. Ofikyɛ Yesu koli hene, na wayɛ sɔfo afebɔɔ kyɛbɔ Yehowa aha ne.—Heb 7:3.
DECEMBER 2-8
NYAMEƐ DWIRƐ NANU ASUADEƐ EDWEIN 113-118
Nzu Yeɛ Yɛkɔfa Yekotua Yehowa Kerɛ Ɔ?
w01 1/1 11 ¶13
Kɔso Nya Ɔdɔ
Yesu dwirɛ bɔ ɔhane ne maa yenwu kyɛ, nikyee bɔ olimoa bɔ yenwo hia paa yeɛ ole kyɛ, yɛkɔlɔ Yehowa. Ɔwɔ nu, ɔdɔ bɔ yele yɛma Yehowa ne, bamva banwo yɛ, nakoso yɛkɔhora yekosua. Mmerɛ bɔ olimoa bɔ yɛtele Yehowa nwo dwirɛ ne, yɛnye gyele. Afei ngakangaka, yeenwuni kyɛ, Nyameɛ siesiele aseɛ ne kama mane sona kyɛ ɔtena so. (Gyenesise 2:5-23) Afei, mmerɛ bɔ sona bɔ olimoa ne yɛle bɔne ne, yenwuni atee bɔ Nyameɛ fale so siesiele dwirɛ ne ɔ. Wanzɛkye bɛ wamvi aseɛ naso, na mmom ɔpenane atee bie bɔ ɔkɔfa so kole yɛ ɔ. (Gyenesise 3:1-5, 15) Bɛbɔ belili nahorɛ bɛmane Nyameɛ ne, ohyirele kyɛ ɔdwene bɛnwo, na ayieleɛ koraa ne ɔfale ɔwa bɔ okuro ye dwirɛ ne bɔle afɔleɛ mane yɛ, kyɛbɔ ɔkyɛ a, yekonya bɔne fakyɛ ɔ. (Yohane 3:16, 36) Yɛnye sɔ paa kyɛ Yehowa aboka yɛ maa yasua sɔ nningyein he amu ɔ. (Yesaya 25:1) Ɔhene Dawide hane kyɛ, okuro Yehowa dwirɛ, ofikyɛ wayɛ bie wama ye. (Edwein 116:1-9) Ɛnnɛ wora, Yehowa dwene yɛnwo, ɔbɔ yɛnwo waen, ɔma yɛ anwoserɛ, na ɔhyɛ yɛ ngunaen. Sɛ yɛkɔso yesua Yehowa nwo nikyee a, ɔdɔ bɔ yele yɛma ye ne, ɔkɔyɛ piri paa.—Edwein 31:23; Sefania 3:17; Romanfoɛ 8:28.
w09 7/15 29 ¶4-5
Dweintolɛniɛ ne bisale kyɛ: “Ɛlolɛ amukoraa bɔ AWURADE alo me ye, nzikyɛ yeɛ me wora ngɔyɔ ngɔma ye ɔ?” (Edw. 116:12) Nzu yeɛ né Yehowa ayɛ ama ye ɔ? “Amaneɛ ne aworabɔlɛ” bɔ ɔtole ye ne, Yehowa alaa yeɛ otiretirale ye nu ɔ. Bɔ ɔboka so yeɛ ole kyɛ, Yehowa ‘pepɛ lɛle ye kra fili ewue nu.’ Yeti, né osusu yenwo nea bɔ ‘ɔkɔhora kɔyɛ kɔma’ Yehowa ɔ. Nzu po yeɛ né ɔkɔhora kɔyɛ ɔ? Ɔnwa: “Ngotua m’aboadeɛ ngɔma AWURADE.” (Edw. 116:3, 4, 8, 10-14) Né wayɛ krado kyɛ ɛbɔ biala bɔ wahyɛ Yehowa ne, okoli so, na wayɛ bɔ Yehowa pena kyɛ ɔyɛ biala.
Wɔ wora, ɛkɔhora kɔyɛ sɔ. Atee beni aso? Yeɛ ole kyɛ, ɛkɔfa Yehowa mmraa ne ye ahyɛdeɛ kɔbɔ wɔ bra mmerɛ biala. Ma Yehowa soen nwo hia wɔ paa, na nikyee biala bɔ ɛyɛ ne, ma ye honhom ne hyire wɔ atee. (Nwo. 12:13; Gal. 5:16-18) Nahorɛ dwirɛ yeɛ ole kyɛ, sɛ ɛtwe wɔ nu taenn po a, bɔ Yehowa ayɛ ama wɔ ne, ɛngɔhora ngotua ye kerɛ lle. Nakoso sɛ onwu kyɛ efi w’ahone mukoraati nu so ye a, ‘ɔmaa yenye gye.’ (Any. 27:11) Nea yenwo atee pirikua bɔ anya ye kyɛ ekofi w’ahone nu kɔso Yehowa, na amaa ye ahone atɔ ye kunu ɔ!
w19. 11 22-23 ¶9-11
Bɔ Yɛkɔhora Yekosua Yekofi Lewitikɔso Nwomaa Nanu Ɔ
Asuadeɛ bɔ ɔtɔ so nyɔ: Yɛsõ Yehowa ɔnate kyɛ yɛnye sɔ bɔ wayɛ wama yɛ ne. Asomdwee afɔleɛ bɔ ne tete Yisraelfoɛ nemɔ bɔ ne, ɔmaa yenwu ye sɔ. Wɔde, ma yesusu yenwo kaa. Né ɔte nikyee bɔ yenwo hia paa wɔ bɛ soen nu. Lewitikɔso nwomaa ne maa yenwu kyɛ, né Yisraelniɛ bie kɔhora kɔbɔ asomdwee afɔleɛ ‘kɔfa kɔla’ Yehowa ase. (Lew. 7:11-13, 16-18) Sɛ Yisraelniɛ bie kuro a, yeɛ ɔkɔbɔ sɔ afɔleɛ ne ɔ, na mmom ɔtte nhyɛ. Afei, né ofi ye ahone nu bɔ sɔ afɔleɛ ne fa kyire kyɛ ɔdɔ Yehowa. Né sona ne bɔ ɔbɔ afɔleɛ ne, ye abusuafoɛ, ɔne asɔfo ne, bedi naen bɔ bɛfa bɛbɔle afɔleɛ ne. Nakoso, kaka bɔ bɛfa bɛbɔ afɔleɛ ne bue bie wɔ berɛ a, ne ɔte Yehowa ngome deɛ. Nu beni ɛne?
Asuadeɛ bɔ ɔtɔ so nza: Yɛdɔ Yehowa, yeti bɔ ɔte pa paa yeɛ yɛfa yɛma ye ɔ. Sɛ beku kaka ne a, ye loe yeɛ né ɔsombo ma Yehowa paa ɔ. Yehowa sa maa benwuni kyɛ ye kunu nningyein nemɔ bie sombo ma ye. Ebie yeɛ ole kaka ne saa anaa kidney. (Kenga Lewitikɔso 3:6, 12, 14-16.) Sɛ Yisraelniɛ bie fi ye ahone nu fa kaka ne loe, ɔne ye kunu nningyein bɔ yaha yenwo dwirɛ ne bɔ afɔleɛ ma Yehowa a, né ɔmaa yenye gye paa. Sɛ ɔbɔ sɔ afɔleɛ ne a, né okyire kyɛ ɔfa bɔ ɔte pa paa ma Yehowa. Sɔ ala yeɛ Yesu yɛle ɔ. Ɔdɔ bɔ ɔle ma Yehowa ti, ofi ye ahone nu mukoraa sone ye. Yeti sɛ yɛkɔha a, bɔ ɔte pa paa yeɛ ɔfa mane ye ɔ. (Yoh 14:31) Né Yesu nye gye yenwo paa kyɛ ɔkɔyɛ bɔ Nyameɛ kuro ɔ, na né onni ye mmraa nanwo angorɛ. (Edw. 40:8) Sɛ Yehowa te anwuro dɔ na sɛ onwu kyɛbɔ né Yesu fi ye ahone nu so ye ne a, nea kyɛbɔ né yenye kɔgye ɔ!
Yɛkɔhora yɛkɔfa asomdwee afɔleɛ ne kɔtoto soen bɔ yɛfa yɛma Yehowa nanwo. Sɛ yefi y’ahone nu yɛso ye a, okyire kyɛ yɛnye sɔ bɔ wayɛ wama yɛ ne. Na bɔ ɔte pa paa yeɛ yɛfa yɛma Yehowa ɔ, ofikyɛ yefi y’ahone mukoraati nu yɛdɔ ye. Sɔ pɛpɛɛpɛ yeɛ ye asomvoɛ pee yɛ ɔ. Befi b’ahone mukoraati nu yeɛ bɛso ye ɔ, ofikyɛ bɛdɔ ye. Sɛ Yehowa nwu ye sɔ a, ɔmaa ye ahone tɔ ye kunu! Nna nningyein bɔ yɛyɛ ngome yeɛ Yehowa nea ɔ, na mmom adwene bɔ ɔta yesi ne koso, yenwo hia ye paa. Sɛ yɛte yebo sɔ a, ɔmaa y’ahone tɔ yɛ kunu. Yɛfa ye kyɛ abɔ aworowaa, yeti ɛngora nyɛ pee wɔ Yehowa soen nu. Sɛ sɔ a, nya gyidie kyɛ, kaa bɔ ɛkora yɛ ne, Yehowa te yebo. Ebia ɛkɔha kyɛ, mede nyɛɛ yeɛ mekora meyɛ ɔ? Nakoso, Yehowa de, nna ɛberɛ koraa yeɛ ɔnea ɔ. Ɔse kyɛ ɔdɔ bɔ ele ma ye nati, yeɛ ɔmaa ɛkora yɛ bɔ ɛyɛ ne. Yeti ɛhene yeɛ ɔfa ye adwene sie so ɔ. Bɔ ɛyɛ biala, sɛ ofi w’ahone nu ngome de a, ode tonu.
Bible Nu Dwirɛ Titire
w12 5/15 22 ¶1-2
Edwirɛ Bɔ Ebiemɔ Bisa Ɔ
Nyameɛ honhom maa dweintolɛniɛ bie tole dwein kyɛ: “AWURADE ye teneneefoɛ bɛ wue, odi mu wɔ ye nyunu.” (Edw. 116:15) Ebiala bɔ ɔso Yehowa nahorɛ nu ne, ye ngoa sombo ma ye. Nakoso Edwein 116 bɔ yafa nu dwirɛ yaha ne, ɔmva sonahorɛ nwo, na mmom ɔkɔ siɛ tra sɔ.
Sɛ Kristoniɛ bie di nahorɛ ma Yehowa na owu a, bɔ ɔma ye sɛen bo dwudwolɛ ne ngɔhora ngɔha kyɛ Edwein 116:15 fa yenwo. Nzuati yeɛ yɛka sɔ ɔ? Ofikyɛ, sɔ tworɔnzɛm ne fa Yehowa asomvoɛ mukoraati nwo, na nna sona bɔ wawu ne angome. Sɔ tworɔnzɛm ne kyire kyɛ, Yehowa ngɔma atee maa bɛbɔ bedi nahorɛ bɛma ye ne amukoraati ngowu lle. Ɔba sɔ a, ɔkɔfa ye kyɛ wahwere nikyee kandinga paa.—Nea Edwein 72:14; 116:8.
DECEMBER 9-15
NYAMEƐ DWIRƐ NANU ASUADEƐ
EDWEIN 119:1-56
“Ɔkɔyɛ Sɛɛ Né Aberandeɛ Ama Ye Bra Ayɛ Sannwuu?”
w87 11/1 18 ¶10
Ɛma Wɔnwo Te Wɔ Nikyee Biala Nu Anaa?
Pɔɔlo bɔle yɛ kɔkɔ wɔ Ɛfesofoɛ 5:5 kyɛ: “Ɛmɔse ye dada kyɛ, adwamanbɔlɛniɛ anaa bra fiɛ bɔlɛniɛ anaa anyeboroborolɛniɛ (bɔ ɔte bosoensolɛniɛ) biala nne berɛ bɔ ole agyapadeɛ wɔ Kristo ne Nyameɛ ahennie ne anu ɔ.” Nakoso adwamamɔ ti, afoɛ biala bɛka aliemaamɔ pee nyunu, na betu pee koso. Bɔ ɔmaa ɔba sɔ ala yeɛ ole kyɛ ‘bɛnnea [Nyameɛ] dwirɛ naso bɛmmɔ bɛbra.’ (Edwein 119:9) Ebie bɔ ɔbɔ adwaman koso de, ‘ɔyɛ bɔne tia ye bɔbɔ ye nipadua.’ (1 Korintofoɛ 6:18) Aliemaamɔ pee wɔ berɛ a, sɛ bɛma atee anaa bɛngɔ adwuma a, yeɛ bɛfa bɛnwo bewura sɔ abrabɔ nanu ɔ. Kyɛ ahaa bɛne aliemaamɔ kɔbɔ ne, bɛne bɛbɔ bɛnzo Yehowa mmom yeɛ bedi hwebom ɔ. Bebu bɛ kyɛ bɛte mmeni pa, yeti bɛne bɛ bonu yɛ nningyein biemɔ bɔ annea a, ɛkɔha kyɛ mvomsoɛ biala nne yenwo ɔ. Aliemaa biemɔ koso wɔ berɛ a, bɛne b’adwumayɛfoɛ bɔ soma. Bɔ yɛka ye, asafo nu panyi bie yɛle bie. Ɔne taluwa bie bɔ ɔne ye yɛ adwuma bɔle pambee. Ɔyakyili ye abusua berɛ, yeɛ ɔne taluwa ne bɛɛtenane ɔ. Bɔ osili yeɛ ole kyɛ, betuli ye befili asafo nanu. Sɛ Bible ne ka kyɛ: “Abiɛngoɛ tɛɛ sɛkye bra paa” a, ɔnnaka!—1 Korintofoɛ 15:33.
w06 6/15 25 ¶1
“Wɔ Noa Dwirɛ Yeɛ Me Nye Gye Ye Nwo Ɔ”
Ewiase nanu ayɛ se, na bɔ yɛfa nu ne, nna ebie ɛhe. Yeti daa Yehowa kaekae yɛ kyɛbɔ ɔkɔyɛ a, yɛkɔhora yekogyina ye noa ɔ. Atee bɔ Yehowa fa so kaekae yɛ ne, ebie ɛhe: Mmerɛ bɔ yɛbɔbɔ yɛkenga Bible, ɔne aliemaamɔ mmuayɛɛ ne dwumadie bɔ bɛyɛ ye wɔ adesua abo ne. Bɔ yɛkenga, ɔne bɔ yesua ye wɔ adesua abo ne, ebie wɔ berɛ a yasua ye le, yeti ɔtte nikyee foforɛ mma yɛ. Nakoso kuro sona de, ɔngyɛ na yɛ wora afi. Yeti daa odikyɛ yɛkaekae yɛnwo Yehowa mmraa, ye akwangyerɛ, ɔne ye atirimbɔ. Odikyɛ yɛmaa yɛnye gye kyɛ daa Yehowa kaekae yɛ ɔ. Ofikyɛ, ɔboka yɛ maa yɛfa y’adwene yesie bɔ yeti yeɛ yɛnwa yɛkɔso ye naso. Ɛhe ati yeɛ dweintolɛniɛ ne tole dwein mane Yehowa kyɛ: “Wɔ noa dwirɛ yeɛ me nye gye ye nwo” ne.—Edwein 119:24.
w10 4/15 20 ¶2
Nnɛnea Nikyee Biala Bɔ Mvasoɛ Nne So Ɔ!
Nningyein bɔ yɛnea ne, ɔkɔhora koli yɛ awue. Bɔ yɛnea ne, ɛhene ala yeɛ yɛdwene yenwo ɔ. Anyeɛ ne nwu nikyee bie pɛ, ná wafa wama adwene ne. Yeti ekonwu ye ne, na yanya nikyee nanwo akɔnnɔ wɔ y’ahone nu. Ewiase bɔ Satan di so he anu ne, mmenia abrabɔ aporɔ, na bɔ bekuro alaa yeɛ ole kyɛ bɛkɔdwodwo b’akɔnnɔ noa. Ɛhe ati, foto ne edwirɛ bɔ ɔkɔhora kɔsɛkye yɛ abrabɔ ne, ɔnyɛ nna wɔ ewiase he anu. Sɛ yɛnye bɔ so mbaen po a, yɛkora nya yenwo akɔnnɔ bɔ nu yɛ se. (1 Yoh. 5:19) Yeti ɔnyɛ nwanwa kyɛ dweintolɛniɛ ne srɛle Nyameɛ kyɛ: “Nningyein bɔ mvasoɛ nne so ne, ye me nye fi bɛ nealɛ so, maa nya ngoa wɔ w’atee ne aso.”—Edw. 119:37.
Bible Nu Dwirɛ Titire
w05 4/15 10 ¶2
Fa Wɔnwo To Yehowa Dwirɛ Naso
Sɛ ɛnea Edwein 119 nu a, aba bɔ ɔwɔ nu paa yeɛ ole mvasoɛ bɔ ɔwɔ Nyameɛ dwirɛ naso ne. Bɔ ɔhworɔle sɔ dwirɛ ne, ɔhyehyɛle ye nnidisoɛ-nnidisoɛ kyɛbɔ ɔkɔyɛ a yɛkɔkae ɔ. Ole ngyekyɛmuɛ 176, na bɛfale Hebri ndwerɛleɛ yeɛ bɛhyehyɛle ye nnidisoɛ-nnidisoɛ ɔ. Bahyehyɛ nu 22, yeɛ ko biala le ngyekyɛmuɛ 8. Hebri dwudwolɛ bɔ belimoa bɛfa bɛhworɔle ne, bɛfale ndwerɛdeɛ komapɛ (the same letter) yeɛ bɛhyɛle ngyekyɛmuɛ biala bo ɔ. Bɔ dwein ne ka yenwo dwirɛ yeɛ ole Nyameɛ mmraa, nkaesɛm, ye atee, ye ahyɛdeɛ, ye atemmusɛm, ɔne ye akwangyerɛ.
DECEMBER 16-22
NYAMEƐ DWIRƐ NANU ASUADEƐ
EDWEIN 119:57-120
Sɛ Nningyein Ngoye A, Nzu Yeɛ Ɔkɔboka Ɔ?
w06 6/15 20 ¶2
“Ao, Kyɛbɔ Mesi Mekuro Wɔ Mmeraa Ne Ɔ!”
Ebia ekobisa kyɛ, “Mmerɛ bɔ né dweintolɛniɛ ne wora abɔ ne, sɛɛ yeɛ Nyameɛ mmraa ne kyekyele ye wora ɔ?” Bɔ ɔbokale ye yeɛ ole kyɛ, ne ole gyidie kyɛ Yehowa dwene yenwo. Ye pɔfoɛ nemɔ maa ebie fale yenye so paa. Nakoso né ɔse mmraa bɔ ɔdɔ wɔ nu ne, yeti né yenye gye. Oonwuni kyɛ Yehowa ne ye ali ye yé. Afei koso, mmerɛ bɔ ɔfale Nyameɛ mmraa yɛle adwuma ne, ɔmaa onwuni nworɛ trale ye pɔfoɛmɔ, na ɛhene bɔle ye ngoa nwo waen. Ɔfale mmraa ne yɛle adwuma ne, ɔmaa ye soanu dwole ye, na onyane tiboa pa.—Edwein 119:1, 9, 65, 93, 98, 165.
w00 12/1 14 ¶3
Wɔnye Gye Yehowa Ngaesɛm Nwo Anaa?
Né dweintolɛniɛ ne nni Nyameɛ mmraa nwo angorɛ koraa. Yeti ɔhane kyɛ: “Mema me nwo yɛ nyera, na menyɛ ngyɛkyerɛ kyɛ ngoli wɔ mmeraa dwirɛ so ɔ. Ɔwɔ nu kyɛ bɔnefoɛ nyamaa abrabra me de, nakoso me wora mvi wɔ mmeraa ne.” (Edwein 119:60, 61) Sɛ yɛ pɔfoɛmɔ fa ɔhaw ba yɛ so tekyɛ bɔ bafa nyamaa bakyekye yɛ a, yedé yedi kyɛ yɛ Baba bɔ ɔwɔ anwuro kɔhora kɔnyagye nyamaa ne maa yɛnwo kɔtɔ yɛ. Sɛ wamma sɔ po a, ɔkɔboka yɛ maa yekogyina ye noa kyɛbɔ ɔkɔyɛ a, yɛkɔhora yɛkɔha nzɛmba ne.—Marko 13:10.
w06 9/1 14 ¶4
Edwein Nwomaa Ne Bue Bɔ Ɔtɔ So Nnu Nanu Dwirɛ Titire
119:71—Sɛ yenwu amaneɛ a, nikyee pá beni yeɛ ofi nu ba ɔ? Sɛ yenwu amaneɛ a, ɔmaa yɛfa yɛnwo yɛto Yehowa so paa, yɛyere yɛnwo yɛbɔ mbaeɛ, yɛmva Bible adesua yenni angorɛ, na yɛfa bɔ yesua ne koso yɛyɛ adwuma. Afei koso, sɛ amaneɛ bie to yɛ a, ɔtɔ mmerɛ bie a ɔmaa yenwu subaen bɔ ɔngoye pa wɔ yɛnwo, ná yasiesie.
w17. 07 13 ¶3, 5
“Ɛmɔ Ne Bɛ Bɔ Besu Ne Besu”
Yɛ baba bɔ ɔwɔ anwuro ne, ye berɛ yeɛ awerɛkyekye mukoraa fi ɔ, ofikyɛ onwu mmenia anwumvoin. (Kenga 2 Korintofoɛ 1:3, 4.) Yeka ebie bɔ ole tema paa, yeɛ ole Yehowa. Ɔhyɛ ye mmenia bɔ kyɛ: “Me, me yeɛ mekyekye ɛmɔ wora ɔ.”—Yes. 51:12; Edw. 119:50, 52, 76.
Yɛkɔhora yekonya gyidie kyɛ Yehowa kɔboka yɛ. Sɛ nikyee bie ngoye ma yɛ a, ɔnzɛkyɛ yɛfa yewura yɛnwo, na mmom odikyɛ yɛka yenwo dwirɛ yekyire Yehowa wɔ mbaeɛ nu. Sɛ yenwu ye kyɛ ɔhaw biala bɔ yɛfa nu ne, Yehowa te yɛ bo, na ɔkɔkyekye yɛ wora a, ɔmaa yɛ ahone tɔ yɛ kunu.
Bible Nu Dwirɛ Titire
w06 9/1 14 ¶5
Edwein Nwomaa Ne Bue Bɔ Ɔtɔ So Nnu Nanu Dwirɛ Titire
119:96—Sɛ bɛka “nekaa bɔ pɛpɛɛpɛyɛlɛ amukoraa ye noa kɔpem” a, okyire sɛɛ? Nikyee bɔ sona nwu ye kyɛ bɔne biala nne yenwo ne, yeɛ né dweintolɛniɛ ne ka yenwo dwirɛ ɔ. Kyire kyɛ, nikyee bɔ sona bu ye kyɛ efiɛ biala nne yenwo ne, ɛkɔnea ne, né nikyee bie ngoye wɔ yenwo. Nakoso Yehowa mmraa de, fiɛ biala nne yenwo. Nikyee biala bɔ yɛyɛ ye wɔ y’abrabɔ nu ne, yɛkɔhora yɛkɔfa Yehowa mmraa yɛkɔyɛ adwuma. Bible ne ka kyɛ “Manwu nekaa bɔ pɛpɛɛpɛyɛlɛ amukoraa ye noa kɔpem ɔ, nakoso wɔ mmeraa dwirɛ ne de, nu trɛ paa.”
DECEMBER 23-29
NYAMEƐ DWIRƐ NANU ASUADEƐ
EDWEIN 119:121-176
Nnɛyɛ Nikyee Biala Bɔ Ɔkɔmaa Wɔwora Kɔbɔ Ɔ
w18. 06 17 ¶5-6
Sɛ Nyameɛ mmraa ne kɔboka yɛ a, ɔnzɛkyɛ yɛkenga, anaa yedi ye baba yegua yɛ tianu mbaen. Odikyɛ yenya obuo yɛma mmraa ne, na yɛnye gye yenwo. Nyameɛ Dwirɛ ne nwa: “Ɛmɔhyi bɔne ná ɛmɔhuro bɔ ɔte paa ɔ.” (Amose 5:15) Nzu yeɛ ɔkɔboka yɛ maa yɛkɔyɛ sɔ ɔ? Yeɛ ole kyɛ, yekonwu nningyein kyɛbɔ Yehowa nwu ye ne. Nea mvandoho he: Yɛfa ye kyɛ ɛngora da. Yeɛ dɔkta hahyirele wɔ kyɛ, didi yé, tengyɛ waporɛ nu, na yɛ nzakrayɛɛ ahoroɛ wɔ w’asetena nu. Mmerɛ bɔ ɛyɛle sɔ ne, enwuni kyɛ ɔkɔ yé paa. Wɔnye kɔgye paa kyɛ dɔkta ne aboka wɔ maa nningyein kɔ yé wɔ w’asetena nu ɔ.
Yɛ bɔfoɛ ne koso, ɔhaw bɔ bɔne fa ba ne, ɔbɔ yɛnwo waen wɔ yenwo, na ɛhene maa y’abrabɔ kɔ yé. Bible ne ahyɛ mmraa kyɛ nnɛmaa yɛpɛ anoanu, nnɛmaa yɛyɛ azãa, nnɛmaa yewia, nnɛmaa yɛbɔ adwaman, nnɛmaa yɛyɛ basabasa, yeɛ nnɛmaa yɛyɛ ahonhomsɛm. Sɛ yedi sɔ mmraa naso a, nea kyɛbɔ ɔboka yɛ bɔbɔ ɔ! (Kenga Anyandera 6:16-19; Nye. 21:8) Sɛ yedi Yehowa mmraa so na yenya nhyiraa a, ɔmaa yɛnye gye ye mmraa nanwo, na yenya ɔdɔ yɛma ye.
w93 4/15 17 ¶12
Sua kyɛ ekohyi bɔne na amaa wayɛ wɔ tɛ. (Edwein 97:10) Nikyee bɔ ahyɛaseɛ ne, annea a ɛkɔha kyɛ ɔyɛ fɛ de, ɛkɔyɛ sɛɛ na ahwe wɔnwo afi yenwo? Yeɛ ole kyɛ, ɛkɔdwene bɔ okofi nu kɔwa nanwo. Bible ka kyɛ: “Nnɛma ɛmɔlakalaka bɛ nwo, na bɛgoro Nyameɛ nwo. Ofikyɛ bɔ sona dua ne ala yeɛ okobu ɔ; Na bɔ sona biala dua ye wɔ anwoɔnaen akɔnnɔ nu ne, okonya ewue kofi anwoɔnaen nu.” (Galatiafoɛ 6:7, 8) Sɛ nikyee bie twetwe wɔ kyɛ ɛyɛ bɔne a, dwene bɔ okofi nu kɔwa nanwo. Yeɛ ole kyɛ, ɔkɔyɛ Yehowa yea. (Fa toto Edwein 78:41 nanwo.) Ebie koso yeɛ ole kyɛ, ɛkɔhora kɔnwonzɛ mmerɛ bɔ ɛyɛlle w’adwene kyɛ ɛwo ɔ, yeɛ ɛkɔhora konya anwonyerɛ bie tekyɛ AIDS. Wɔ nyunu kogua ase pɔtɔɔ, na ɛyealɛ bɔ ɛkɔfa nu ne, nna ebie ɛhe. Ɔhaw bɔ ɔkɔwa wɔ so ne, ebie wɔ berɛ a, ɔkɔhyɛ kora ne anwu ye. Aliemaa brasua bie hane kyɛ: “Kora bɔ me ne mehu yegya ne, yenu biala hwene somaa dée. Kesaalae yɛte Kristofoɛ, nakoso bɔ yɛyɛle nati ɔmaa yenne yɛnwo yenni, yeti kaa né yɛkõ.” Bɔ ɔboka so bieku yeɛ ole kyɛ, yenwo atee bɔ ele ye wɔ asafo nanu ne, ɔkɔhora kofi wɔ sa, anaa bekotu wɔ po. (1 Korintofoɛ 5:9-13) Anigye kaa bɔ ekonya ye ti, nea ɔhaw bɔ ɔkɔhora kɔto wɔ!
Bible Nu Dwirɛ Titire
w23. 01 2 ¶2
Dedi Kyɛ Nyameɛ “Dwirɛ Te Nahorɛ”
Yɛ Yehowa asomvoɛ de, yede yedi paa kyɛ Yehowa yeɛ ɔte, “nahorɛ Nyameɛ ne ɔ,” na okuro kyɛ osi yɛ yé mmerɛ biala. (Edw. 31:5; Yes. 48:17) Bɔ yɛkenga yefi Bible nanu ne, yɛkɔhora yekole yekoli, ofikyɛ, Nyameɛ “Dwirɛ te nahorɛ fi tetetete.” (Kenga Edwein 119:160.) Ebie bɔ wabe wɔ Bible nu hane edwirɛ bie, na yɛne ye yɛ adwene. Ɔnwa: “Edwirɛ biala bɔ Nyameɛ aha ne, ɔte turoloo, na nikyefee biala nne berɛ bɔ okyire kyɛ okoli hwammɔ. Nyameɛ mmenia kɔhora kole edwirɛ biala bɔ ɔka ne koli, ofikyɛ, Nyameɛ bɔ ɔhane sɔ dwirɛ ne bede ye bedi.”
DECEMBER 30–JANUARY 5
NYAMEƐ DWIRƐ NANU ASUADEƐ
EDWEIN 120-126
Bɛfa Moen Bɛluale, Nakoso Bɛfale Anigye Bɛpɛle
w04 6/1 16 ¶10
Bɛbɔ Bɛhyɛ Nyameɛ Animnyam Ne Oyira Bɛ
Sɛ yɛbayɛ Yesu suaniɛ a, na yɛko yetia Satan. Yakobo 4:7 ka kyɛ: “Ɛmɔyere ɛmɔ nwo bési abɔnzam ate, na ɔkɔnwati kofi ɛmɔ nwo.” Bɔ yɛka ye, ɔtte bɛtɛɛ sɔ. Odikyɛ yemia yɛnye kora, né yahora yaso Yehowa. (Luka 13:24) Nakoso Edwein 126:5 hyɛ yɛ bɔ kyɛ: “Bɛ bɔ bele ɛmoen bedua nningyein ne, bele anigye yeɛ bɛkɔte ɔ.” Nyameɛ bɔ yɛso ye ne de, ɔtte bonniayɛ. “Oyira bɛ bɔ bɛ nye aboro bɛpena ye boso,” ɔne bɛbɔ bɛhyɛ ye animnyam ne.—Hebrifoɛ 11:6.
w21. 11 24 ¶17
Ɛkɔyɛ Sɛɛ Ná Wɔ Gyidie Ayɛ Se?
Wɔ dɔfo bie awu maa ede wɔnwo a, onne anaa? Sɛ sɔ a, bɛbɔ bewuli bɔ betingyele bɛ wɔ Bible nu ne, de mmerɛ kenga bɛnwo nikye. Ɛyɛ sɔ a, gyidie bɔ ele kyɛ awufoɛ kodwɔso ne, nu kɔyɛ se. Batu w’abusuaniɛ bie maa wayɛ wɔ yea anaa? Yere wɔnwo sua nikye. Ɛyɛ sɔ a, ekonwu ye kyɛ atee bɔ Yehowa fa so twe yɛ so ne, yeɛ ɔte pa paa. Ɔhaw beni paa yeɛ eyia ɔ? Nzuati yeɛ ɛmva yenwo atee ne nhyɛ wɔ gyidie serɛ ɔ? Ka bɔ ɛfa nu namu kyire Yehowa. Nnɛte wɔnwo, na mmom ka kɔ aliemaamɔ nwo. (Any. 18:1) Nningyein bɔ ɔkɔboka wɔ maa ekogyina wɔ haw ne noa ne, yere wɔnwo yɛ; sɛ ɔyɛ se po, mia wɔnye. (Edw. 126:5, 6) Kɔ adesua ne asɛnga, na kenga Bible daa. Afei fa w’adwene sie nhyiraa bɔ Yehowa kɔfa kɔma wɔ kyeabie naso. Sɛ enwu atee bɔ Yehowa fa so boka wɔ a, ɔkɔmaa gyidie bɔ ele ye wɔ ye nu ne, kɔyɛ piri.
w01 7/15 18-19 ¶13-14
Yere Wɔnwo Yɛ Asɛnga Adwuma!
Edwein 126:5, 6 kɔhora kɔhyɛ bɛbɔ bɛyɛ asɛnga adwuma ne ngunaen. Bɛbɔ bɛtane bɛnye ne po de, ɔkɔ ma bɛ paa. Ɛberɛ nwa: “Bɛ bɔ bele ɛmoen bedua nningyein ne, bele anigye yeɛ bɛkɔte ɔ. Sona bɔ ole esuɛ fite kɔ, bɔ otira mmakaammaa paa kyɛ ɔkwaalua ne, nahorɛ nu, ɔkɔfa ahurusi kosa kɔwa awuro, bɔ otiratira ye fieso aleɛ bɔ bakyekye ye tire tire ɔ.” Dweintolɛniɛ ne fale sɔ dwirɛ he totole kyɛbɔ Yehowa bokale ye mmenia bɔ befili Babilɔn ngoasom nu wale nanwo. Bɛnye gyele paa kyɛ befili ngoasom nu bɛwale ɔ. Nakoso ɔnate kyɛ né bayakyi baseɛ ne bato berɛ afoɛ 70 nati, ɔkɔyɛ kyɛ né ɔtte bɛtɛɛ koraa kyɛ bɛkɔyɛ so adwuma. Nakoso bɛbɔ bemiane bɛnye beluale nningyein, na besili bɛ sua ne, bɛ fɛɛ anyɛ mbaen.
Sɛ tenenee ti, yɛne yeliemamɔ nwu amaneɛ a, ɔmaa yɛwora bɔ paa. (1 Petro 3:14) Asɛnga adwuma bɔ yɛyɛ ne, ɔtɔ mmerɛ bie a, yɛkɔhora yɛkɔte nga kyɛ yahɔ dee, koso hwee mvi nu mma. Nakoso sɛ yɛkɔso yedua, na yeguegua so nzue a, atee bɔ Nyameɛ kɔfa so maa okonyi ne, ɔkɔyɛ yɛ nwanwa. (1 Korintofoɛ 3:6) Sɛ yɛfa Bible ne nwomaa bɔ yɛfa yesua Bible yɛma mmenia a, bɔ ofi nu ba ne maa yenwu kyɛ bɔ yɛka ne te nahorɛ.
Bible Nu Dwirɛ Titire
cl 73 ¶15
Ɔfa Ye Tumi Bɔ Yɛnwo Waen—“Nyameɛ Te Yɛ Nwo Ɛwaenbɔlɛ”
Bɔ olimoa, ma yɛnea atee bɔ Yehowa fa so bɔ yɛ ngoa nwo waen ɔ. Yehowa ngɔmma atee mma bɛngɔsɛkye yemu. Sɛ nna sɔ a, ahaa bekye Satan apesa yemu. Wɔde nea o: Satan “bɔ odi wiase he aso ne,” bɔ okuro alaa yeɛ ole kyɛ okotu nahorɛ soen bo. (Yohane 12:31; Nyekyire 12:17) Awaen ahoroɛ bɔ bele tumi wɔ ewiase he anu ne, benu biemɔ afa bɛ sa ato asɛnga adwuma naso, na babɔ mmɔden kyɛ bɛkɔpra yɛ bo. Nakoso, Yehowa mmenia té gyi bɛ gya so, na bɛyɛ asɛnga adwuma ne serɛserɛ. Yehowa asomvoɛ mia banzo, yeɛ enwu bɛ a, ɛkɔha kyɛ gya belle ahobammɔ biala. Yede, nzuati yeɛ maen mbiri ne, bɛngora mma yɛnyakyi asɛnga adwuma ne ɔ? Ofikyɛ, Yehowa fa ye ndaa bɔ tumi wɔ nu ne bɔ yɛnwo waen.—Edwein 17:7, 8.