Nhwehwɛmuɛ Ma Abrabɔ Ne Asɛnga Adesũa Nwomaa
SEPTEMBER 2-8
NYAMEƐ DWIRƐ NANU ASUADEƐ EDWEIN 79-81
Dɔ Yehowa Dumaa Bɔ Ole Animnyam Ne
w17.02 9 ¶5
Agyedeɛ Ne—“Akyɛdeɛ Bɔ Odi Mu” Bɔ Ofi Baba Ne Berɛ
Nzu yeɛ yɛyɛ a okyire kyɛ yɛdɔ Yehowa dumaa ɔ? Yeɛ ole kyɛ yɛkɔbɔ bra pa. Yehowa pena kyɛ yɛyɛ krongron. (Kenga 1 Petro 1:15, 16.) Bɔ ɛhe kyire yeɛ ole kyɛ, yɛkɔso Yehowa ngome, ná yafi y’ahone nu yayɛ sotie yama ye. Sɛ bɛtane yɛnye po a, yengopia Yehowa mmraa yɛngɔto ahameɛ, na mmom, yekoli nikyee biala bɔ ɔka kyire yɛ naso. Yɛyɛ nningyein bɔ ɔte pa a, ɔmaa yɛ kanea ta maa ebiala nwu ye, na ɔhyɛ Yehowa dumaa ne animnyam. (Mat. 5:14-16) Sɛ yɛmaa y’abrabɔ nwo te a, ɔmaa ebiala nwu kyɛ Yehowa mmraa yeɛ ɔte pa ɔ, na Satan dwirɛ bɔ ɔkeka ne, ɔtte nahorɛ. Bɔne mba yɛnwo. Yeti sɛ ɔkɔba kyɛ yɛyɛ bɔne a, yenu yɛnwo, na nikyee biala bɔ okogua Yehowa dumaa nanwo fiɛ ne, yɛngɔ yenwo.—Edw. 79:9.
ijwbv 3 ¶4-5
Romanfoɛ 10:13—“Bɔ Awurade Dumaa”
Sɛ Bible ne ka kyɛ “bɔ Awurade dumaa” a, okyire sɛɛ? Okyire kyɛ, ekonwu Nyameɛ dumaa na afa afrɛ ye mmerɛ bɔ ɛso ye ne. (Edwein 116:12-14) Nakoso ɔkɔ siɛ tra sɔ koraa. Bɔ okyire paa yeɛ ole kyɛ, ɛkɔfa Yehowa kɔyɛ wɔ nikyee biala.—Edwein 20:7; 99:6.
Né Yesu nni Yehowa dumaa nanwo angorɛ koraa. Mmerɛ bɔ okyire yɛ kyɛbɔ yɛkɔbɔ mbaeɛ ne, edwirɛ bɔ ɔfa lili moa po maa yenwu ye sɔ. Ɔnwa: “Yɛ Baba bɔ ɛwɔ nyameɛso ɔ, Wɔ dumaa nwo te,” anaa ɔyɛ krongron. (Mateo 6:9) Osa maa yenwu kyɛ, sɛ yekonya daa ngoa a, sana yenwu Yehowa yé, yetie ye dwirɛ, ná yɛdɔ ye.—Yohane 17:3, 6, 26.
Bible Nu Dwirɛ Titire
it-2 111
Yosef
Yosef Dumaa Ne Ale Nekaa Biala. Ɔtɔ mmerɛ bie a, Bible ne kora bɔ Yosef dumaa, nakoso ɛkɔnea ne, né ɔka Yisrael mmusuakure ne amukoraati, anaa bɛbɔ bɛwɔ sorɔdɔ nanwo dwirɛ. Ɛhe nyɛ nwanwa, ofikyɛ sɛ ɛnea Yakob mmaa nemɔ nu a, Yosef yeɛ né wale dumaa paa ɔ. (Edw 80:1, Edw 78:67; Amo 5:6, 15; 6:6) Bible ngɔmhyɛ bie wɔ berɛ a, ɛkɔnea ne, né ye dumaa afite nu. Nyekyire bɔ Hesekiel nyane ne sɔa, ɔhane kyɛ Yosef agyapadeɛ kɔyɛ bue nyɔ. (Hes 47:13) Kuro bɔ ye dumaa yeɛ ole “AWURADE wɔ berɛ” ne, ye anoa ne ko sɔa, né Yosef dumaa yeɛ ɔla so ɔ. (Hes 48:32, 35) Afei koso, mmerɛ bɔ Yehowa ka kyɛ, ɔkɔha ye mmenia kɔbonu maa bɛkɔyɛ ko ne, ɔfale Yosef gyinane berɛ mane bue ko, yeɛ Yuda koso gyi berɛ ma bue ko. (Hes 37:15-26) Obadia ngɔmhyɛ ne koso maa yenwu kyɛ, né Yehowa nate “Yosef boso ama” so kɔsɛkye “Yisɔ boso ama.” (Oba 18) Yeɛ Sakaria koso hyɛle ngɔm kyɛ, Yehowa kɔpepɛ kole “Yosef awuro ama.” (Sak 10:6) Mmerɛ bɔ bɛbobɔ mmusuakure bɔ bɛka bɛbonu bɛyɛ honhom nu Yisrael ne dumaa ne, Yosef dumaa fitele nu. Nakoso, sɛ ɛnea nu paa a, Efraim dumaa mmom yeɛ odikyɛ ahaa ɔba ɔ.—Nye 7:8.
Yede, Yosef dumaa bɔ ofite wɔ Nyekyire 7:8 ne, nzu yeɛ ɔmaa yenwu ye ɔ? Yeɛ ole kyɛ, ngɔm bɔ Yakob hyɛ fale Yosef nwo mmerɛ bɔ né ɔla ewue mba so ne, nu bie fa honhom nu Yisrael nanwo. Nikyee ko bɔ odikyɛ yɛhyɛ ye nzorɛ wɔ sɔ ngɔmhyɛ nanu yeɛ ole kyɛ, Yakob Tumi ne ye anwoserɛ ne, yeɛ ole Yehowa. Na ɔfale Yesu mane kyɛ boaenneafoɛ pa bɔ ɔfale ye ngoa tole berɛ mane “mmoaen” ne ɔ. (Yoh 10:11-16) Yesu koso yeɛ ole ndweasoɛ nyɔboɛ titire ne. Ye yeɛ Nyameɛ asɔneyɛɛ sua ne gyi ye so ɔ, na honhom nu Yisraelfoɛ yeɛ bɛwɔ nu ɔ. (Ɛfe 2:20-22; 1Pe 2:4-6) Kesaalae, Boaenneafoɛ ne Nyɔbotaen ne, ɔne Ɛdangama Nyameɛ yeɛ bɛwɔ berɛ ɔ.—Yoh 1:1-3; Aso 7:56; Heb 10:12; Fa toto Gye 49:24, 25 nanwo.
SEPTEMBER 9-15
NYAMEƐ DWIRƐ NANU ASUADEƐ EDWEIN 82-84
Yenwo Atee Biala Bɔ Ele Ye Ne, Ma Wɔnye Sɔ
wp16.6 8 ¶2-3
Bɔ Yesua Yefi Ewienu Nnomaa Berɛ Ɔ
Mmenia bɔ ne bɛte Yerusalem ne, né bɛse anomaa bɔ bɛfrɛ ye akatipire ne paa. Né bɛnwõ bɛ bue wɔ sua noa, nekaa bɔ nzue tɔ a, osongyi fa nabo. Solomon asɔre awuro nanwo sɔa, ne bɛ bue nyɛ nna wɔ berɛ. Afoɛ biala, sɛ benya asɔre awuro berɛ bɛyɛ bɛ bue a, né bayie koraa. Ofikyɛ ɛberɛ de, né bɛkora bɛnea bɛ mmaamɔ bɔ ebiala nha bɛ ɔ.
Bɔ ɔhworɔle Edwein 84 ne, né ye baba yeɛ ole Korah. Bosome nzia biala, né ɔyɛ adwuma wɔ asɔre awuro berɛ dapɛen ko. Ɔkɔ bɔ ɔba amukoraa, né onwu sɔ nnomaa nemɔ, ofikyɛ né bayɛ bɛ bue wɔ berɛ. Yeti sɛ yɛkɔha a, ɛberɛ yeɛ ne bɛte ɔ. Ne yenye boro bɛ, yeti onwu bɛ sɔ a, né nikyee bie yɛ ye! Ɛhe maa ɔhane kyɛ: “Ao Asafo AWURADE, w’atenaleɛ ne, kyɛbɔ osi yɛ nyemene ɔ! Amba, me kra tena a ɔndena, na ye wora dɔ AWURADE awuro aluo berɛ ne; . . . Ao Asafo AWURADE, me Hene ne me Nyameɛ, akatipire po wanya atenaleɛ, yeɛ nandwinoma anya ye saen wɔ w’afɔleɛ bokyea ne anwo bɔ ɔkɔfa ye mma kogua nu ɔ!” (Edwein 84:1-3) Ebiala kɔhora kobisa yenwo kyɛ, ɔyɛ me fɛ kyɛ me ne Yehowa mmenia koyia nu daabiala anaa?—Edwein 26:8, 12.
w08 7/15 30 ¶3-4
Yɛ Bɔ W’anwoserɛ Kɔhora, Ná Maa Wɔnye Gye
Sɛ yɛnde apɔ anaa yɛyɛ panyi a, nna nikyee biala yeɛ yɛkɔhora kɔyɛ ye wɔ Yehowa soen nu ɔ. Ɛte brataen anaa? Ebia ekonya adwene kyɛ ngwalaa nemɔ tetelɛ ale wɔ abɔ so. Yeti ɛngora nzua nikyee pee, na ɛkɔ adesua koso a, ɛnde fuu. Nakoso, enne nni kyɛ sɛ ɛdwene ɛhe anwo soma a, wɔnye kɔwa wɔnwo so ne, né kaa bɔ ɛkɔhora kɔyɛ po, abu wɔnye agua so?
Afoɛ pee bɔ wapɛ nu ne, né Lewiniɛ bie pena kyɛ onya yenwo atee bie. Nakoso, ɔtwe ye nu taenn po a, né ye sa ngɔha ye lle. Wɔ mia afoɛ biala, né ele yenwo atee kyɛ ɛyɛ adwuma wɔ asɔre awuro berɛ dapɛen nyɔ. Nakoso onyane a, ahaa daa ne ɔtaha afɔleɛ bokyea nanwo. (Edw. 84:1-3) Yede, sɔ biaa bɔ ne odi nahorɛ ne, nzu yeɛ ɔbokale ye maa yenye sɔle yenwo atee bɔ ne ole ye ne? Oonwuni ye kyɛ, sɛ odi ɛlɛhomapɛ po wɔ asɔre awuro ne aluo berɛ a, ɔte yenwo atee pirikua paa. (Edw. 84:4, 5, 10) Sɔ ala yeɛ wɔ koso, bɔ ɛngɔhora ye yɛ ne, nnɛfa ha wɔnwo. Na mmom, fa wɔnye to ase nea bɔ ɛkɔhora kɔyɛ ɔ, ná maa wɔnye sɔ.
w20.01 17 ¶12
Ɛsombo Ma Yehowa Wɔ Nyameɛ!
Anwonyerɛ bie teetee wɔ anaa? Nya gyidie kyɛ Yehowa nwu bɔ ɛfa nu ne. Bɔ wato wɔ ne, srɛ ye kyɛ ɔboka wɔ ma enya yenwo adwene pa. Sua Bible ne, ná pena edwirɛ pa bɔ Yehowa amaa bahworɔ ye wɔ nu ne. Ekonwu ye kyɛ bɛbɔ bɛso Yehowa ne, onni bɛnwo angorɛ. Yeti fa w’adwene sie ɛhene aso. Sɛ ɛyɛ sɔ a, ekonwu ye kyɛ bɛbɔ bedi nahorɛ bɛma Yehowa ne, ɔmva nikyee pa biala mmɔ bɛ atianuserɛ.—Edw. 84:11.
Bible Nu Dwirɛ Titire
it-1 816
Nyisiaafoɛ
Ebie bɔ olle baba anaa bokafoɛ de, ɔnyɛ se koraa kyɛ mmenia kobu bɛnye kogua ye so ɔ. Sɛ Yisraelfoɛ nemɔ yɛ Yehowa so asoserɛ a, sɔ ala yeɛ né onwu bɛ hɔ ɛne. Né obu bɛ kyɛ “nyisiaafoɛ.” Mmerɛ biala bɔ bɛne Yehowa afia kɔyɛ kama ne, né bɛnea ayisiaafoɛ nemɔ. Nakoso, ɔkɔba kyɛ bɛtwe bɛnwo befi Yehowa nwo a, né bɛmva ayisiaafoɛ bɛnyɛ huu. Ye mia ɔba sɔ a, né atɛntenenee amini wɔ aseɛ naso. (Edw 82:3; 94:6; Yes 1:17, 23; Yer 7:5-7; 22:3; Hes 22:7; Sak 7:9-11; Mal 3:5) Ebiala bɔ ɔkɔteetee ayisiaa ne, né Yehowa kɔmaa mmusue kɔwa ye so. (Deu 27:19; Yes 10:1, 2) Yehowa nwa ɔte ayisiaafoɛ nemɔ défoɛ, bɛ bokafoɛ, ɔne bɛ baba. (Any 23:10, 11, Edw 10:14, Edw 68:5) Odi bɛ dwirɛ ma bɛ. (Deu 10:17, 18) Onwu bɛ anwumvoin. (Hos 14:3) Ɔnea bɛ. (Edw 146:9) Ɔmaa bɛtena ngoa nu.—Yer 49:11.
Bɛka kyɛ ebie te Kristoniɛ pa paa a, nikyee ko bɔ ɔmaa benwu ye yeɛ ole kyɛ, ɔkɔnea akunafoɛ ne ayisiaa. Sɔ pɛpɛɛpɛ yeɛ suaniɛ Yakobo hworɔ ɔɔmane tete Kristofoɛ nemɔ ɔ. Ɔnwa: “Nyameɛsom bɔ ye nwo te bɔ efiɛ nne ye nwo wɔ Baba Nyameɛ nyunu ɛhe: kyɛ ɛkɔɔnea nyisiaa ne akunafoɛ wɔ b’amaneɛnwunɛ nu, ɔne kyɛ ɛkɔhwe wɔ nwo kofi wiase bra basabasa nu ɔ.”—Yak 1:27.
SEPTEMBER 16-22
NYAMEƐ DWIRƐ NANU ASUADEƐ
EDWEIN 85-87
Mbaeɛ Boka Yɛ Maa Yegyina Yɛ Gya So
w12 5/15 25 ¶10
Sɛ yɛpena kyɛ yenwu Nyameɛ animnyam a, odikyɛ “yɛbɔ mbaeɛ daa.” (Rom. 12:12) Odikyɛ yɛsrɛ ye kyɛ ɔboka yɛ ma yɛso ye wɔ atee bɔ okuro so. Sɛ yɛkɔhora yɛkɔyɛ sɔ a, sana yɛsrɛ ye kyɛ ɔma yɛ honhom krongron, ɔma yɛ gyidie yɛ piri, ɔma yɛ anwoserɛ bɔ yɛkɔfa yekogyina nzɔhwɛ noa, ná ɔma ‘yetira nahorɛ nanu ye.’ (2 Tim. 2:15; Mat. 6:13; Luka 11:13; 17:5) Kyɛbɔ akwalaa fa ye wora amukoraa wura ye baba nu ne, sɔ ala yeɛ yɛ koso, odikyɛ yɛfa Yehowa yɛyɛ yɛ nikyee biala ɔ. Sɛ yɛsrɛ ye kyɛ ɔma yɛfa y’anwoserɛ amukoraa yɛso ye a, ɔkɔyɛ kɔma yɛ soma. Nnɛmaa yenya adwene lle kyɛ yɛha Yehowa. Sɛ yɛbɔ mbaeɛ a, ɛmɔma yɛla ye ase, yɛye ye ayɛ, yɛpena ye akwankyerɛ, titire mmerɛ bɔ yɛfa ɔhaw nu ne, ná ɔboka yɛ ma yɛso ye wɔ atee bɔ ɔkɔhyɛ ye dumaa krongron ne animnyam so.—Edw. 86:12; Yak. 1:5-7.
Atẽe Beni Yeɛ Yehowa Fa So Maa Yenya Yɛ Mbaeɛ Nwo Mmuayɛɛ Ɔ?
Kenga Edwein 86:6, 7. Né David le gyidie kyɛ sɛ ɔbɔ mbaeɛ a, Yehowa kotie, na ɔkɔma ye mbaeɛ nanwo mmuayɛɛ. Wɔ koso, ɛkɔhora konya sɔ gyidie ne bie. Mmenia bɔ yahã bɛnwo dwirɛ wɔ adesũa he anu ne amaa yanwu kyɛ, Yehowa kɔhora kɔma yɛ nworɛ bɔ yɛkɔfa yekosisi gyinayɛɛ pá, ɔne anwoserɛ bɔ yɛkɔfa yekogyina yɛ haw noa ɔ. Yehowa kɔhora kɔfa yeliemamɔ Kristofoɛ so kɔboka yɛ mmerɛ bɔ edwirɛ bie ato yɛ ne. Afei bɛbɔ bɛnzõ Yehowa ne pó, ɔkora kã bɛ ahõne maa bɛboka yɛ mmerɛ bɔ yɛnwo ahyere yɛ ne.
Ɔwɔ nu kyɛ nná mmerɛ biala yeɛ Yehowa ma yɛ mbaeɛ nwo mmuayɛɛ kyɛbɔ yɛkuro ɔ, nakoso yɛkɔhora yekonya gyidie kyɛ, sɛ yɛbɔ mbaeɛ a otie yɛ, na ɔkɔyɛ yɛ abisadeɛ ne kɔma yɛ wɔ ye mmerɛ nu. Yeti, kɔso bɔ mbaeɛ ná nya gyidie kyɛ Yehowa kɔyɛ w’abisadeɛ ne kɔma wɔ. Afei kae kyɛ Yehowa ahyɛ bɔ kyɛ ɔkɔmaa ‘ateasefoɛ amukoraa konya bɔ bɛpena ɔ.’ Ɛhe kɔwa nu wɔ ewiase foforɛ nanu.—Edw. 145:16.
Bible Nu Dwirɛ Titire
w20.06 13 ¶17, 18
Ebie ahone nu kyɛ a, ɔttemaye koraa. Yɛfa ye kyɛ team bie kwaabɔ bɔɔl, nakoso nu mmenia ne, bɛnnga. Benu biala pena kyɛ ode dumaa. Bɔɔl nu mmraa ne, benu biemɔ nguro kyɛ bekoli so. Yeɛ bɛ kookyi ne koso, benu biemɔ mva ye nyɛ huu. Team bɔ ɔte sɔa de, ɔkɔyɛ se kyɛ bekoli ngunim. Nakoso team bɔ nu mmenia te ko de, ɔnyɛ se koraa kyɛ bekoli ngunim ɔ. Sɔ ala yeɛ y’ahone ne te hɔ ɛne. Sɛ yɛkɔhora yɛkɔso Yehowa yé a, sana nningyein bɔ yɛdwene yenwo, bɔ yekuro, ɔne bɔ yesusu yenwo ne, ɔne Yehowa apɛdeɛ yia. Kae kyɛ, Satan nyane a, ahaa w’ahone nanu ahyɛ. Ɔhale ye ngome a, ahaa nningyein bɔ Yehowa nguro yeɛ daa ɛyɛ ɔ. Nakoso odikyɛ ɛfa w’ahone amukoraa dɔ Yehowa. (Mat. 22:36-38) Yeti, nnɛma Satan atee maa ɔkyɛ wahone nu!
Dawide bɔle mbaeɛ kyɛ: “Maa nzi m’adwene, anaa m’ahone pi mva nzuro wɔ dumaa.” Ɛkɔhora kɔha sɔ dwirɛ ne bie wɔ wɔ mbaeɛ nu. Afei bɔ mmɔden kyɛ ɛkɔyɛ wɔ mbaeɛ nanwo adwuma. Fasie wɔnye so kyɛ, gyinayɛɛ biala bɔ ekosi ne, kyɛ ɔte kaa oo, ɔte piri oo, ɛkɔfa kohyire kyɛ ebu Yehowa. Ɔnate kyɛ ɛte Yehowa Danzeniɛ nati, sɛ ɛkora yɛ sɔ a, ɔkɔmaa Yehowa dumaa nanwo kɔte. (Any. 27:11) Ɔba sɔ a, edwirɛ bɔ diyifoɛ Mika hane ne, yɛ koso yɛkɔhora yɛkɔha bie. Ɔnwa: “Yɛkɔnate AWURADE yɛ Nyameɛ dumaa nu afebɔɔ.”—Mik. 4:5.
SEPTEMBER 23-29
NYAMEƐ DWIRƐ NANU ASUADEƐ EDWEIN 88-89
Enguro Yehowa Tumidie Na Ekuro Nzu?
w17.06 28 ¶5
Ta Yehowa Tumidie Si!
Yɛnea bɔ yeti yeɛ Yehowa tumidie yeɛ ɔte pa paa ne. Yehowa mva ye tumi nzisi ebiala, na mmom obu atɛntenenee. Yenwa: “Me ole AWURADE bɔ mefa ɔdɔ bɔ onni ngasi, ndɛenbualɛ turoloo ne nahorɛlilɛ yeɛ meyɛ me nningyein wɔ aseɛ ye aso ɔ. Na sɔ nningyein nemɔ yeɛ me nye gye bɛ nwo ɔ.” (Yer. 9:24) Yɛ mia bɔne abia yɛ. Yeti sɛ Yehowa pena kyɛ onwu kyɛ, ɛhe te pa anaa ɔttemaye a, nna mmraa bɔ kuro sona ahyehyɛ so yeɛ ɔnea ɔ. Yehowa de, ye berɛ yeɛ atɛntenenee fi ɔ. Yeti ɛhene yeɛ ogyina so hyehyɛ mmraa ma sona ɔ. Bible ne po ka Yehowa nwo dwirɛ kyɛ, “Tenenee ne ndɛenbualɛ turoloo te w’ahennie bia nyinasoɛ.” Ɛhe ati, yɛkɔhora yekonya gyidie kyɛ, ye mmraa, ɔne ye dwirɛ biala bɔ ɔkɔha ne, efiɛ nne yenwo. (Edw. 89:14; 119:128) Satan ha ma yetie a, ɔnwa Yehowa mmraa ttemaye. Koso, ye po bɔ ɔka sɔ ne, ɔhhora manne atɛntenenee walle wiase bɔ odi so nanu.
w17.06 29 ¶10-11
Ta Yehowa Tumidie Si!
Yehowa de, ɔmva ye tumi nhyɛ mmenia so, yeɛ ye dwirɛ tte twaenn koso. Na mmom, ɔmaa yenya fanwodie, na yɛnye gye. (2 Kor. 3:17) Sɔa yeɛ Dawide hane Yehowa nwo dwirɛ ɔ: “Anidie ne animnyam apɛ ye nwo ayia, tumi ne anigye wɔ ye asɔneyɛɛ sua nu.” (1 Abe. 16:7, 27) Dweintolɛniɛ Etan koso hane kyɛ: “Maen bɔ bɛse ayɛyelɛ nwo esebɔlɛ ne, benya saleɛ; bɛ yeɛ bɛnate wɔ nyunu hyireinn ne anu ɔ. Bedi ahurusi wɔ wɔ dumaa nu daa, na wɔ tenenee ne anu yeɛ oyie bɛ yé ɔ.”—Edw. 89:15, 16.
Bɔ Yehowa ayɛ ama yɛ de, yɛnwa yɛka a, yengoyie. Yeti sɛ yede mmerɛ yɛdwene yenwo a, ɔkɔmaa gyidie bɔ yele ye kyɛ ye tumidie yeɛ ɔte pa paa ne, nu kɔyɛ se. Ɛhe kɔmaa yɛne dweintolɛniɛ ne kɔyɛ adwene. Ɔhane kyɛ: “Ɛlɛhomapɛ bɔ ngoli ye wɔ w’aluo berɛ ne, ɔte paa tra ngyẽa apee bɔ ngoli ye nekaa bie ɔ.” (Edw. 84:10) Yehowa yeɛ ɔbɔle yɛ ɔ, na ɔdɔ yɛ koso. Yeɛ osa se bɔ ɔyɛ ma yɛ a, ɔkɔmaa yɛnye kɔgye ɔ. Na ɛhene koso de, ɔmaa obu yɛ so sɔa tam! Nikyee biala bɔ Yehowa pena fi yɛ berɛ ne, ɔpena kyɛ osi yɛ yé ti ɔ. Na yɛkora yɛyɛ koso a, anigye de, yɛfa ye mbaen. Sɛ odikyɛ yɛfa nikyee bie yɛbɔ afɔleɛ kora ne yahora yayɛ bɔ ɔpena fi yɛ berɛ ne po a, yɛnye kɔgye.—Kenga Yesaya 48:17.
w14 10/15 10 ¶14
Fa Wɔwora Mukoraa Wura Ahennie Nanu
Apam bɔ Yehowa ne Yisrael hene Dawide yɛle ne, bɛfrɛ ye Dawide apam. Yehowa nate apam naso hyɛle ye bɔ bie, wɔde ma yesusu yenwo kaa. (Kenga 2 Samuel 7:12, 16.) Yehowa ne ye yɛle sɔ apam ne, né odi hene wɔ Yerusalem. Ɔhyɛle ye bɔ kyɛ, ye bosoniɛ yeɛ ɔkɔyɛ Mɛsaya ne ɔ. (Luka 1:30-33) Afei de, Yehowa maa yenwuni abusua deinn bɔ né Mɛsaya ne kofi nu kɔwa ɔ. Ɔhane kyɛ Dawide bosoniɛ “bɔ ndɛenbualɛ wura ye sa ne,” yeɛ ɔkɔyɛ Mɛsaya Ahennie naso hene ɔ. (Hes. 21:25-27) Né Yehowa nate Yesu so kɔmaa Dawide ahennie ‘kotimu afebɔɔ.’ “Na kyɛ eyia tɛwɔ berɛ ye de, ye ahennie kɔtena berɛ wɔ me nyunu.” (Edw. 89:34-37) Ongosi lle kyɛ okodwu nekaa bie ne, nningyein ngɔhɔ yé wɔ Mɛsaya ahennie nanu. Na bɔ wabɔ ye tianu kyɛ ɔkɔyɛ kɔma yɛ ne kɔtena berɛ daa.
Bible Nu Dwirɛ Titire
cl 281 ¶4-5
Wɔ Hebri tworɔnzɛm nanu ne, sɛ bɛka kyɛ “ebie di nahorɛ ma ebie” a, okyire kyɛ ɔdɔ sona ne, na ɔmma nikyefee ndete b’afia. Na bɔ yeti yeɛ wamaa wafa yenwo wabɔ sɔ sona ne, sɛ ɔwalle nu paa de a, ɛlaka; ɔngɔhwe yenwo lle. Ebie bɔ odi nahorɛ ne, ɛkora fa wɔnwo to ye so, nakoso ɔkɔsiɛ tra sɔ. Yɛfa mvandoho he yehyirehyire nu. Dravaniɛ bie wɔ berɛ a, sɛ ɛfa amaadeɛ ma ye a, ɛse kyɛ bɔ ɔte biala ɔkɔfa kɔhɔ. Yeti sɛ ɛfa wɔnwo to ye so a, ɔyɛ yé. Nakoso ɛhene ngyire kyɛ odi nahorɛ. Ɛkɔnea ne, né ye sikaa bɔ ode ti yeɛ ɔmaa ɔyɛ sɔ ɔ. Nahorɛlilɛ de, ɔne ɔdɔ yeɛ daa bɛnate ɔ. Ɛsraen ne sɔa, ɔtte sona, nakoso Dweintolɛniɛ ne hane kyɛ “ɔte adanzeniɛ nahorɛniɛ bɔ ɔwɔ ewienu ɔ,” ofikyɛ kɔngɔen biala ofite. (Edwein 89:37) Yeti yɛkɔhora yɛkɔha kyɛ ɛfa wɔnwo to ye so a ɔyɛ yé. Nakoso yɛngɔhora ngɔha kyɛ odi nahorɛ. Nzuati ɔ? Ofikyɛ, ɔdɔ yeɛ ɔmaa ebie di nahorɛ ma ye mango ɔ. Na kyɛbɔ yɛse ne, ɛsraen de, olle dɔ.
Wɔ Bible nu ne, sɛ ebie di nahorɛ ma ebie a, okyire kyɛ ɔngɔ nyakyi ye berɛ, na ɔmma nikyefee ndete b’afia. Sɛ nningyein kɔye oo, ongoye oo, bɔ bɛte ala yeɛ bɛte ɔ. B’adamvoa ne, ɔtte kyɛ ɛpo asorɔkye bɔ mvrama kora fa ye di akɔneaba ne. Sɛ nningyein nu yɛ se sɛɛ po a, bɛkora begyina ye noa.
SEPTEMBER 30–OCTOBER 6
NYAMEƐ DWIRƐ NANU ASUADEƐ EDWEIN 90-91
Ɛpena Kyɛ Enyi Kyɛ A, Fa Wɔnwo To Yehowa So
wp19.3 5 ¶3-5
Ebiala Pena Kyɛ Ɔtena Ase Kyɛ
Kuro sona ayɛ alaa kyɛ ɔkɔyɛ nningyein biemɔ kyɛbɔ ɔkɔyɛ a, okonyi kɔhyɛ ɔ. Nakoso, bɛbɔ besua abɔdeɛ nwo nikyee ne nwa ɔlaka, ɔngɔyɛ yé lle. Ofi afoɛ 1801 bɔ ɔba ne, sɛ ɛnea nu paa a, kuro sona kora nyi kyɛ kaa tra daa ne. Bɔ ɔmaa wawa sɔ yeɛ ole kyɛ, kesaalae mmenia di bɛnwo ni, bɛnea bɛnwo yé kyɛbɔ ɔkɔyɛ a anwonyerɛ ngosa bɛ, yeɛ banya anwonyerɛ biemɔ noa ayire. Nakoso, bɛbɔ besua abɔdeɛ nwo nikyee ne, benu biemɔ nwa, nekaa bɔ odikyɛ yenyi dwu ne, ye ala ɛne.
Mose hworɔle edwirɛ bie wɔ Bible nanu kɔyɛ afoɛ 3,500 ɛhe. Ɔnwa nyoo: “Ngyẽa bɔ yɛdi ye aseɛ ye aso te afoɛ aburasoo, anaa sɛ anwoserɛ wɔ nu po a, ɔte afoɛ aburawɔtwɛ, na ɛhene po, nu fɛɛ ne amaneɛ! Ɔngyɛ né wapɛ nu, ná yatu yamini.” (Edwein 90:10) Ɔwɔ nu, sona ayɛ alaa kyɛ okonyi kɔhyɛ, koso kyɛbɔ Mose hane ne, nekaa bɔ otimu ala yeɛ otimu ɔ.
Nningyein bɔ Yehowa abɔ ne, nu bie kora nyi kyɛ paa. Ngaka bie kora di afoɛ 200, yeɛ bakaa bie koso kora di afoɛ apee ne ye si. Sɛ yɛfa b’afoɛ yɛtoto kuro sona deɛ nwo a, ebia yekobisa kyɛ, ‘yeti susu amba kyɛ, afoɛ 70 anaa 80 pɛ yeɛ yɛkɔhora yekoli ɔ?’
wp19.1 5, alaka
Bɛfrɛ Nyameɛ sɛɛ?
Ɛhe te edwirɛ bɔ mmeni pee taa bisa ɔ. Ebia wɔ koso, abisa bie le. Ma yebisa ye sɔa: Sɛ ebie yeɛ ɔbɔle anwuro ne aseɛ, ɔne nningyein bɔ ɔwɔ nu namu a, yede sɔ mmerɛ ne, né Nyameɛ te nisua?
Bɛbɔ besua abɔdeɛ nwo nikyee ne, bede bɛtonu kyɛ, nningyein bɔ yɛto yɛnye a yenwu ye ne, ye mu le ahyɛaseɛ. Sɔ ala yeɛ Bible nu dwirɛ bɔ olimoa ne koso ka ɔ. Ɔnwa: “Ahyɛaseɛ ne, Nyameɛ bɔle anwuro ne aseɛ.”—Gyenesise 1:1.
Nningyein bɔ ɔwɔ anwuro ne aseɛ he aso ne, bɛ bɔbɔ ngɔhora ngɔbɔ bɛnwo. Nikyee bɔ ɔnne berɛ de, ye bɔbɔ ngɔhora ngɔwa. Sɛ né ebie nne berɛ kora yeɛ bɛbɔ anwuro ne aseɛ a, ahaa bekye nikyee biala nne berɛ. Ɔwɔ nu, ɛnwa ɛdwene ɛhe anwo a, nna nikyee biala yeɛ ɛkɔte yebo ɔ. Nakoso, sana ebie bɔ ole tumi, ná olle ahyɛaseɛ, na wahora wayɛ ɛhe amu. Yede, nwa ɛne? Sɛ nna Yehowa ahɔ a, nwa bieku! Ofikyɛ ye ngome twe yeɛ olle ahyɛaseɛ, ná ole tumi tera ebiala ɔ.—Yohane 4:24.
Bible ne ka Nyameɛ nwo dwirɛ kyɛ: “Anzana ɛbaabɔ mmokaa mɔ ne, anaa ɛbaahyehyɛ aseɛ ne wiase ne, ofi tete bɔ ɔkwaadwu afebɔɔ, ɛte Nyameɛ.” (Edwein 90:2) Ɛhe kyire kyɛ Nyameɛ wɔ berɛ daa. Yeɛ “Ahyɛaseɛ ne,” ɔbɔle anwuro ne aseɛ bɔ yɛnye nwu ye ne.—Nyekyire 4:11.
w22.06 18 ¶16-17
Kyɛbɔ Ɔdɔ Boka Yɛ Maa Yedi Esuroen So Ɔ
Satan se kyɛ yenguro kyɛ yekowu. Ɔnwa nyoo, sɛ odikyɛ yɛhwere nikyee biala bɔ yele ye po, kyɛbɔ ɔkɔyɛ a yekonya ngoa a, yekuro; na sɛ yɛne Yehowa afia kɔsɛkye po a, ɔmva yɛ nu. (Yob 2:4, 5) Nakoso Satan laka. Nea bɔ osa yɛ ɔ. Ɔnate kyɛ ole ‘ewue so tumi, anaa ɔkora fa ewue ba’ nati, ɔpena kyɛ ewue nwo suroen kyekye yɛ alaa maa yɛyakyi Yehowa soen. (Heb. 2:14, 15) Ɔtɔ mmerɛ bie a, bɛbɔ bɛta Satan si ne, bɛkora benwunanwuna bɛbɔ bɛso Yehowa ne kyɛ, sɛ banyakyi Yehowa soen a, bekohu bɛ. Sɛ anwonyerɛ bie bɔ nu yɛ se bɔ yɛ koso a, ɛyɛ a ne ɔpena kyɛ yɛyɛ nikyee bie bɔ ɔkɔmaa yɛkɔyakyi Yehowa soen ɔ. Sɛ ɔba sɔ a, dɔktafoɛ, ɔne y’abusuafoɛ bɔ bɛnzo Yehowa ne, ɛyɛ a né bɛpena kyɛ bɛhyɛ yɛ maa yɛdé mogya, kyɛbɔ ɔkɔyɛ a, yɛkɔto Yehowa mmraa ɔ. Ebie koso kɔhora kotu yɛ foɛ kyɛ, yɛfa atee bie bɔ Bible ne dwudwo tia so yɛsa yɛnwo anwonyerɛ.
Ɔwɔ nu, yenguro kyɛ yekowu, nakoso sɛ yewu po a, Yehowa té dɔ yɛ. (Kenga Romanfoɛ 8:37-39.) Yehowa nnamvo de sɛ bewu po a, ɔkae bɛ, na yenye so de, ɔte kyɛbɔ bɛte ase ne. (Luka 20:37, 38) Ye wora adɔ bɛ, yeti okotingye bɛ. (Yob 14:15) Yehowa bɔle yɛnwo kerɛ paa, kyɛbɔ ɔkɔyɛ a, ‘yekonya daa ngoa.’ (Yoh. 3:16) Yɛse paa kyɛ Yehowa dɔ yɛ, na ɔdwene yɛnwo. Yeti sɛ anwonyerɛ bɔ yɛ, anaa bɛka kyɛ bekohu yɛ po a, nnɛmaa yɛyakyi Yehowa soen. Na mmom, odikyɛ yɛsrɛ ye kyɛ ɔma yɛ nworɛ, ɔne anwoserɛ bɔ yɛkɔfa yekogyina ye noa ɔ.—Edw. 41:3.
Bible Nu Dwirɛ Titire
wp17.5 5
Ele Abɔfo Bɔ Ɔbɔ Wɔnwo Waen Ɔ?
Bible ne nga ye nekafee kyɛ sona biala le abɔfo bɔ ɔbɔ yenwo waen ɔ. Ebia ɛkɔha kyɛ, nnaa Yesu hane kyɛ: “Ɛmɔnea yé ná ɛmɔammu ngwadaa [anaa Yesu asuafoɛ] he anu biala animtia; na mekã mekyire ɛmɔ kyɛ, nyameɛso dɔ, b’abɔfo mɔ benwu me Baba bɔ ɔwɔ nyameɛso ne nyunu daa.” (Mateo 18:10) Yesu anga kyɛ, sona biala le abɔfo bɔ daa oli ye si ɔbɔ yenwo waen ɔ. Na mmom, bɔ né ɔpena kyire yeɛ ole kyɛ, abɔfo nemɔ dwene ye asuafoɛ nemɔ nu biala nwo, na bɛ dwirɛ te bɛ dwirɛ. Nakoso, nahorɛ Kristofoɛ nga kyɛ abɔfo kɔbɔ bɛnwo waen ti, nikyee bie bɔ ɔkɔfa bɛ ngoa kɔto asane nu po a, né bɛyɛ.
Bɔ yɛka ye, okyire kyɛ abɔfo mmoka sona koraa? Nna ye sɔ ɔ. (Edwein 91:11) Ebiemɔ wɔ berɛ a, besusu kyɛ Nyameɛ nate abɔfo so bɔ bɛnwo waen, anaa okyire bɛ atee. Abrandeɛ bie bɔ bɛfrɛ ye Kenneth sɔa, sɔ ala yeɛ né ye adwene yɛ ye ɔ. Yɛngɔhora ngɔha kyɛ ɔlaka; ebia ɔte nahorɛ. Yehowa Adanzefoɛ de, yele adanzeɛ pee bɔ okyire kyɛ abɔfo boka yɛ wɔ asɛnga adwuma nanu. Nakoso, yɛmva yɛnye yennwu abɔfo. Yeti atee deinn bɔ Yehowa nate bɛ so boka yɛnu biala ne de, yɛnze. Nakoso, atee biala bɔ Yehowa nate so boka yɛ ne, kyɛ ɔte abɔfo oo, kyɛ ɔte nzu oo, odikyɛ yɛda ye ase.—Kolosefoɛ 3:15; Yakobo 1:17, 18.
OCTOBER 7-13
NYAMEƐ DWIRƐ NANU ASUADEƐ EDWEIN 92-95
Sɛ Okosi Ebie Yé A, Sana Ɔso Yehowa
w18.04 26 ¶5
Bɔ yeti paa yeɛ yɛfa nikyee bie yesie yɛnye so wɔ Yehowa soen nu yeɛ ole kyɛ, yɛpena kyɛ onwu kyɛ bɔ wayɛ wama yɛ ne, yɛnye sɔ. Dweintolɛniɛ ne hane kyɛ: “Ɔte paa kyɛ bɛkɔfa asennaa bɛkɔma AWURADE . . . Ofikyɛ wɔ AWURADE, ɛnate bɔ ayɔ so ɛma me nye agye; medi ahurusi meto wɔ sa noa adwuma ne anwo dwein.” (Edw. 92:1, 4) Sɛ ɛte akwalaa anaa babunu a, nea nningyein worawora bɔ Yehowa ayɛ ama wɔ ɔ. Wama wɔ ngoa, wamaa anya ye nu gyidie, wama wɔ Bible, wamaa anwu asafo ne, yeɛ wasa wafa kyeabie nwo anyelasoɛ wape wɔ so ɔ. Sɛ ɛfa Yehowa soen dimoa a, okyire kyɛ wɔnye sɔ bɔ wayɛ wama wɔ ne, na ɛhene kɔhwe wɔ kopingye ye.
w18.11 20 ¶8
Nwa Yeɛ Okyire Wɔ Bɔ Odikyɛ Ɛyɛ Ɔ?
Awofoɛ pena kyɛ osi bɛ mmaamɔ yé, na sɔ ala yeɛ Yehowa koso te hɔ ɛne. (Yes. 48:17, 18) Ɛhe ati, ɔma yɛ akwangyerɛ, kyɛbɔ ɔkɔyɛ a yɛkɔbɔ bra pa, na yɛne mmenia atena asomdwee nu ɔ. Sɛ yɛkɔhora yɛkɔyɛ sɔ a, sana yesuesua ye subaen, ɔne kyɛbɔ osi susu nningyein nwo ne. Ɛhe ngyire kyɛ Yehowa hyɛ yɛ kyɛ yɛyɛ nikyee biala tekyɛ ye. Na mmom, ɔpena kyɛ yenwu nworɛ. (Edw. 92:5; Any. 2:1-5; Yes. 55:9) Ɛhe maa yɛfa nningyein bɔ ɔkɔmaa yɛnye kɔgye yesie yɛnye so, na yɛ subaen koso yɛ kama. (Edw. 1:2, 3) Nikyee biala nne berɛ bɔ ɔtra kyɛ yekosusu nningyein nwo tekyɛ Yehowa ɔ!
w20.01 19 ¶18
Ɛsombo Ma Yehowa Wɔ Nyameɛ!
Yɛkɔhora yekonya gyidie kyɛ, sɛ yɛbɔ aworowaa po a, Yehowa ngɔha kyɛ yɛpena nekaa bie yɛtena. (Edw. 92:12-15) Ebia y’adwene kɔyɛ yɛ kyɛ, kaa bie yeɛ yɛkora ye yɛ wɔ Yehowa soen nu ɔ. Sɛ sɔ po a, Yesu maa yenwu kyɛ Yehowa de, yenye sɔ. (Luka 21:2-4) Yeti, yɛ bɔ w’anwoserɛ kɔhora ɔ. Ebie yeɛ ole kyɛ, ɛkɔhora kɔha Yehowa nwo dwirɛ kohyire mmenia, ɛkɔhora kɔbɔ mbaeɛ kɔma aliemaamɔ, na ahyɛ bɛ ngunaen maa bali nahorɛ bama Yehowa. Yehowa nwu kyɛ ɛte ye mango dwumayɛniɛ. Nna bɔ ɛkora yɛ ti ɔ, na mmom ɔnate kyɛ efi w’ahone nu tie ye dwirɛ nati ɛne.—1 Kor. 3:5-9.
Bible Nu Dwirɛ Titire
cl 176 ¶18
“O! Nyameɛ Nworɛ . . . Nu Pi!”
Somafoɛ Pɔɔlo maa yenwu kyɛ, Nyameɛ nworɛ la nu komapɛ. Sɔa yeɛ ɔhane yenwo dwirɛ: “O! Nyameɛ anwonya ne ye nworɛ ne ye nimdeɛ nu pi! Nwa yeɛ ɔkɔhora kohyirehyire ye porɛ bɔ wabɔ nu ɔ? Nwa yeɛ ɔse ye atee bɔ ɔfa so yɔ ye nningyein, anaa nwa yeɛ ɔkɔte ye bo koyie ɔ!” (Romanfoɛ 11:33) Pɔɔlo hyɛ ye dwirɛ nabo ne, “O” yeɛ ɔfa hyɛle ye bo ɔ. Kyire kyɛ, edwirɛ ne, ɔbo ye adwene ne ye ndeaseɛ so. Greek dwirɛ bɔ behyirele yebo “nu pi,” ɔne bɔ behyirele yebo kyɛ “kumaa kuronguronn” ne, bɛ ndeaseɛ pena yɛ ko. Pɔɔlo dwirɛ bɔ ɔfa yɛle adwuma ne, ɔmaa yɛkora yɛpɛ edwirɛ nanwo foto wɔ y’adwene nu. Sɛ yɛtena ase konn yɛdwene Yehowa nworɛ nwo a, ɔte kyɛbɔ yɛnea kumaa kuronn bie nu bɔ yennwu ye bo ɔ. Ye nworɛ ne, ɔbo y’adwene ne yɛ ndeaseɛ so, yeti yɛngɔhora yɛngɔfa y’adwene yengobu kyɛ ɔte sɔa anaa sɔa. (Edwein 92:5) Ɛhe kyire kyɛ yɛfa yɛnwo yɛtoto Yehowa nwo a, yɛte ngyee po a, yamini.
OCTOBER 14-20
NYAMEƐ DWIRƐ NANU ASUADEƐ EDWEIN 96-99
Ɛmɔha Nzɛmba Ne!
w11 3/1 6 ¶1-2
Nzu Yeɛ Ole Nzɛmba Ne?
Odikyɛ Kristofoɛ ka “ahennie ne nwo nzɛmba” kyire mmenia, na bɛmaa benwu kyɛ kyeabie Ahennie ne koli aseɛ he aso wɔ tenenee nu. Nakoso ɔtɔ mmerɛ bie a, Bible ne fa “nzɛmba” ne yɛ adwuma wɔ atee foforɛ so. Ebie ɛhe, “ngoalelɛ nwo dwirɛ” anaa nzɛmba. (Edwein 96:2) “Nyameɛ nzɛmba.” (Romanfoɛ 15:16) Yeɛ “Yesu Kristo nzɛmba.”—Marko 1:1.
Sɛ yɛkɔpɛ ye tikaape a, nahorɛ dwirɛ bɔ Yesu hane mmerɛ bɔ ne ɔwɔ aseɛ he aso, ɔne bɔ ye asuafoɛ nemɔ hworɔle ne, yeɛ ɔka bonu yɛ nzɛmba ne. Anzana Yesu kɔ anwuro ne, ɔha hyirele ye asuafoɛ nemɔ kyɛ: “Yiti ɛmɔhɔ bɛɛyɛ maen maen mukoraa m’asuafoɛ, ná ɛ́mɔbɔ bɛ asu wɔ Baba ne, Baa ne ne Sunzum Krongron ne dumaa nu, ná ɛmɔhyirehyire bɛ maa beli nikyee biala bɔ mahyɛ ɛmɔ ne aso.” (Mateo 28:19, 20) Yeti adwuma bɔ Yesu famane nahorɛ Kristofoɛ ne, nna ye ala yeɛ ole kyɛ bɛkɔbɔ nzɛmba ne dawure ɔ. Na mmom, odikyɛ bɛboka mmenia maa bɛbayɛ asuafoɛ.
w12 9/1 16 ¶1
Atemmu Da Ne, Nzu Yeɛ Ɔkɔhɔ So Ɔ?
Mmeni pee te Atemmu Da a, bɔ ɔba betianu ɛhe: Nyameɛ kɔmaa mmenia mukoraa kosa lae tendenmaa. Ɔbɔ wɔ dumaa pɛ, ná aagyina ye nyunu, ná waha wɔ bɔne wahyire wɔ. Sɛ ɛyɛle pa a, ɛkɔhɔ anwuro, na sɛ ɛyɛle bɔne de a, ɛkɔhɔ Abɔnzam see nu. Nakoso nna sɔ koraa yeɛ Bible ne ka ɔ. Ɔmaa yenwu kyɛ odwu Atemmu Da a, Nyameɛ kole mmenia kofi bɛbɔ besisi bɛ ne sanu. (Edwein 96:13) Nyameɛ aye Yesu kyɛ ye yeɛ ɔkɔyɛ Temuafoɛ ɔ, na ɔkɔmaa atɛntenenee kɔwa aseɛ naso.—Kenga Yesaya 11:1-5; Asomafoɛ 17:31.
w12 9/15 12 ¶18-19
Asomdwee Kɔwa Aseɛ So Afoɛ Apee Ko Ne Ye Si
Mmerɛ bɔ Satan lakalakale mmenia maa bɛyɛle Yehowa so asoserɛ ne, ɔmaa asomdwee bɔ né ɔwɔ Yehowa ne mmenia afia ne sɛkyele. Nakoso, ofi 1914 bɔ ɔba ne, Mɛsaya Ahennie ne hyɛle yebo totole nningyein kyɛbɔ ɔkɔyɛ a, sɔ asomdwee ne kosa kɔwa ɔ. (Ɛfe. 1:9, 10) Afoɛ Apee Ahennie nanu ne, nningyein mbirimbiri bɔ kesaalae yɛmva yɛnye “yennwu” ye ne, ɔkɔwa nu maa yekonwu ye filifili. Ɛhene si ne, “ayieleɛ” ne kɔwa. Kyire kyɛ, Mɛsaya Ahennie ne kɔwa ayieleɛ. Nzu yeɛ ɔkɔhɔ so wɔ ɛhe si ɔ? Ɔwɔ nu kyɛ ‘bafa nyameɛso ne aseɛ so tumi amukoraati bawura ye sa’ de, nakoso, Yesu tte ebie bɔ yenye boro nikyee ɔ. Yeti ongole Ahennie ne ngofi Yehowa sanu lle. Na mmom, ‘ɔkɔfa Ahennie ne kowura ye Baba Nyameɛ sa.’ Anwobrɛaseɛ paa ɛhe! Ɔkɔfa ye tumi ‘kɔhyɛ Nyameɛ animnyam.’—Mat. 28:18; Flp. 2:9-11.
Okodwu sɔ mmerɛ ne, né bɛbɔ bɛwɔ aseɛ naso amukoraa bayɛ pɛ. Bɛkɔbrɛ bɛnwo ase tekyɛ Yesu, ná bale bato nu kyɛ Yehowa tumidie yeɛ ɔte pa ɔ. Yede, nzu yeɛ ɔkɔmaa bekonwu kyɛ bedé Yehowa tumidie bɛtonu amba ɔ? Sɛ bɛkora bɛpɛ nzɔhwɛ bɔ ɔpɛ yebo ne a, ɛhene yeɛ okohyire ɔ. (Nye. 20:7-10) Ɛhene si, ebiala-biala bɔ ɔyɛ asoserɛ ne, kyɛ ɔte sona oo, sunzum oo, bɛkɔye ye bekofi berɛ korakora. Sɔ mmerɛ ne, yekoli ahurusi! Nyameɛ abusua namu kɔha kobonu kɔye ye ayɛ, ofikyɛ ‘okoli nningyein mukoraa so hene.’—Kenga Edwein 99:1-3.
Bible Nu Dwirɛ Titire
it-2 994
Dwein
Edwirɛ bɔ yeɛ ole “dwein foforɛ” ne, ɔnyɛ nna wɔ Edwein nwomaa nanu. Ekonwu bie koso wɔ nwomaa bɔ Yesaya ne Yohane hworɔle nanu. (Edw 33:3; 40:3; 96:1; 98:1; 144:9; 149:1; Yes 42:10; Nye 5:9; 14:3) Yede, nzu yeɛ né ɔmaa bɛto “dwein foforɛ” ne ɔ? Sɛ ɛnea nekaa bɔ sɔ dwirɛ ne fite ne a, edwirɛ ahoroɛ bɔ ɔboka so ne, yeɛ ɔmaa yenwu ye ɔ. Nu pee wɔ berɛ a, ɛkɔnea ne, né Yehowa afa ye tumi ayɛ nikyee foforɛ bie. Sɛ yɛnea Edwein 96:1 sɔa a, ɔka kyɛ yɛto dwein foforɛ. Nakoso ye ngyekyɛmuɛ 10 ne, yeɛ ɔmaa yenwu bɔ yeti yeɛ ɔnwa yɛto dwein foforɛ ne. Ɛberɛ nwa: “AWURADE di hene!” Ɛberɛ ne, nikyee foforɛ bɔ né Yehowa ayɛ yeɛ ole kyɛ, né wahyɛ yebo odi hene wɔ aseɛ he aso. Né ɛhe kɔmaa anigye kɔwa anwuro ne aseɛ so. Ɛhene ati yeɛ ɔnwa yɛto “dwein foforɛ” ne.—Edw 96:11-13; 98:9; Yes 42:10, 13.
OCTOBER 21-27
NYAMEƐ DWIRƐ NANU ASUADEƐ EDWEIN 100-102
Ma Wɔnye Sɔ Yehowa Dɔ Bɔ Onni Hwamɔ Ne
w23.03 12 ¶18-19
Subaen bɔ ele ye amukoraa, ɔdɔ bɔ ele ma Yehowa ne tra ye mu. Sɔ Subaen ne koso de, ɔyɛ nyeme kyɛ! (Kenga Anyandera 3:3-6.) Sɛ ɛne Nyameɛ fa adamvoa pambee a, ɛkɔhora kogyina ɔhaw biala bɔ ekoyia ye wɔ w’abrabɔ nu ne noa. Bible ne taa ka kyɛ, Yehowa le ɔdɔ bɔ onni hwamɔ ma ye asomvoɛ. Ɛhe kyire kyɛ nzue nu oo, eyia nu oo, ɔngɔyakyi benu lle. (Edw. 100:5) Ɔbɔle wɔ wɔ ye subaen so. (Gye. 1:26) Yede, ɛkɔyɛ sɛɛ na ahyire kyɛ wɔnye sɔ Yehowa dɔ bɔ onni hwamɔ ne?
Bɔ olimoa, da ye ase. (1 Tɛs. 5:18) Daabiala bisa wɔnwo kyɛ, ‘Nzu yeɛ Yehowa ayɛ ama me bɔ okyire kyɛ ɔdɔ me ɔ?’ Sɛ ɛbɔ mbaeɛ a, nikyee pɔtee bɔ Yehowa ayɛ ama wɔ ne, da ye ase wɔ yenwo. Nwu ye kyɛ Yehowa kuro wɔ dwirɛ paa, kyɛbɔ somafoɛ Pɔɔlo koso nwuni ye ne. (Kenga Galatiafoɛ 2:20.) Bisa wɔnwo kyɛ, ‘Ngɔyɛ sɛɛ ná mamaa Yehowa anwu kyɛ medɔ ye bie?’ Sɛ ele ɔdɔ ma Yehowa a, ɔkɔboka wɔ maa ekogyina nzɔhwɛ ne ɔhaw noa. Ɔkɔmaa ɛkɔso Yehowa yé, na daabiala ɛkɔyɛ nningyein bɔ okyire kyɛ ɛdɔ wɔ Baba ne.
w23.02 17 ¶10
“Ɛ́mɔdwo Ɛmɔ Nwo Ase, Ɛ́mɔma Ɛmɔ Nye La Berɛ!”
Nningyein bɔ ɔnzɛkyɛ yɛkɔ yenwo koraa ne, ebie yeɛ ɔtoɔtoa so ye: Akɔnnɔ bɔne, nzaa pembe, adifuu, ebie bɔ ɔnze dwudwo, anigyedeɛ bɔ basabasayɛlɛ wɔ nu, ponografi, ɔne pee bɔ ɔboka so ɔ. (Edw. 101:3) Yɛ pɔfoɛ Satan de, daa ɔpena kyɛ ɔsɛkye yɛne Yehowa afia. (1Pet. 5:8) Sɛ yamma yɛnye anna berɛ a, Satan kɔmaa yekonya subaen hemɔ bie wɔ y’ahone nu: Anyeborolɛ, atóo, ahoɔyea, ɛpɔen, anwomasoɛ, na yɛkɔfa mmenia nwo dwirɛ yekowura yenu. (Gal. 5:19-21) Sɔ subaen hemɔ, sɛ ɔhyɛ ye bo a annea a, yengonwu ye. Nakoso sɛ yandu ye bo ndɛ a, okole ndii wɔ y’ahone nu, na ɔkɔhora koli yɛ awue.—Yak. 1:14, 15.
w11 7/15 16 ¶7-8
Ekotie Yehowa Kɔkɔbɔ Bɔ Enu La Berɛ Ne?
Yɛkɔyɛ sɛɛ ná yahwe yɛnwo yafi akyerɛkyerɛfoɛ ngondombofoɛ nemɔ nwo? Bɛba y’awuro a, ɔnzɛkyɛ yede bɛ, na nnɛmaa yɛkyea bɛ. Ɔnzɛkyɛ yɛkenga bɛ nwomaa. Bɛyɛ dwumadie bie wɔ TV so a, ɔnzɛkyɛ yɛnea. Nnɛmaa yɛkɔ bɛ wɛbsait so, na bɛfa edwirɛ bie begua berɛ a, nnɛmaa yɛtwerɛ hwee yɛfa yenwo. Nzuati yeɛ yɛtwe yɛnwo yefi bɛnwo ɔ? Yɛdɔ Yehowa ti ɔ. Ɔdɔ bɔ yele yɛma ‘nahorɛ Nyameɛ’ nati, ngyerɛkyerɛ biala bɔ ɔne ye Dwirɛ bɔ ɔte nahorɛ ne nyia ne, yenguro kyɛ yekotie. (Edw. 31:5; Yoh. 17:17) Yɛdɔ Yehowa ne ye ahyehyɛdeɛ ne, ofikyɛ ɛhene yeɛ ɔnate so maa yenwu nahorɛ bɔ ɔwɔ Bible nanu ne. Kesaalae yɛse Nyameɛ dumaa, na yɛte yebo. Yɛse bɔ wabɔ ye ti anu kyɛ ɔkɔyɛ kɔma yɛ wɔ aseɛ he aso ɔ. Afei, yɛse tebea bɔ awufoɛ wɔ nu, na yele anyelasoɛ kyɛ yewu a, okotingye yɛ. Mmerɛ bɔ olimoa bɔ ɛtele sɔ nahorɛ dwirɛ ne, nna ɛkae kyɛbɔ wɔnye gyele ne? Yede, ahyehyɛdeɛ bɔ waboka wɔ maa asua sɔ nahorɛ dwirɛ ne, nzuati yeɛ ɛmaa ebie lakalaka wɔ kyɛ, ɛhwe wɔnwo fi yenwo ɔ?—Yoh. 6:66-69.
Sɛ akyerɛkyerɛfoɛ ngondombofoɛ ka nzu po a, yengoli besi lle! Bɛ mia bɛte kyɛ abura bɔ nzue nne nu ɔ; edi bɛ si a, wɔ nyunu kogua ase pɔtɔɔ. Nnɛmaa yefi Yehowa ne ye ahyehyɛdeɛ ne si lle! Ye mia ofi tete, bɛ alaa yeɛ baboka yɛ maa yanwu nahorɛ bɔ ɔwɔ Nyameɛ Dwirɛ nanu ne. Ɔte kyɛbɔ suhɔeɛn ku yɛ, ná bama yɛ nzue bɔ ɔte fɔnn maa yabɔ yagua y’ahone nwo ɔ.—Yes. 55:1-3; Mat. 24:45-47.
Bible Nu Dwirɛ Titire
it-2 596
Nzue Nu Dabodabo
Sɛ nzue nu dabodabo didi maa yenwo baye ye a, ɔtaa pena nekaa bɔ ɛberɛ te dinn na watu wahɔ berɛ. Odwu berɛ a, okogyina nekaa bie konn, na wafa ye ti wawura ye ndaa nu. Sɛ enwu ye wɔ dede a, ɛkɔha kyɛ gya nyɔboɛ fufue bie yeɛ ɔla berɛ ɔ. Ɔkora yɛ sɔ dɔnhwere pee. Mmerɛ bɔ né dadwene ahyɛ dweintolɛniɛ naso maa onnwu bɔ ɔyɛ yenwo ne, ɔfale yenwo totole kyɛbɔ anomaa ne tu kogyina nekaa bie konn nanwo. Ɔnwa: “Mayɛ kyɛ nzue nu dabodabo bɔ wate yenwo wahɔ dede ɔ.” (Edw 102:6) Bɔ ne ɔpena kyire yeɛ ole nekaa bɔ sona biala nne berɛ ɔ; ebia nekaa bɔ ɛto wɔnye a, nzue ne mmakaa ngome yeɛ enwu ye ɔ. Odwu sizin bie a, nzue nu dabodabo tu kɔ bɔnza bɔ ɔwɔ Jordan sorɔdɔ nanu. Sɛ ɛkɔ Yisrael a, nzue nu dabodabo bɔ bɛwɔ berɛ ne, begua nu nza. Bɔ olimoa yeɛ ole, eastern white pelican, na ɛhene de ɔnyɛ nna wɔ berɛ. Bɔ ɔtɔ so nyɔ ne ole Dalmatian pelican. Yeɛ bɔ ɔpɛ yebo ne koso ole pink-backed pelican. Bɛ de, ɛndaa nwu bɛ wɔ berɛ.
Onguro kyɛ sona biala kɔteetee ye abrabɔ, yeti okuro nekaa bɔ ɛberɛ te konn, ná ebiala ngɔ berɛ ɔ. Ɛberɛ yeɛ ɔto ye kyiremvia bobɔ ɔ. Na ɔkɔpena egyein meme yie a, ɛberɛ ala yeɛ ɔbada ɔ. Ɔnate kyɛ okuro nekaa bɔ wate yenwo nati, sɛ ɛnea Bible nu a, bɛtaa bɛfa ye begyina berɛ bɛma kuro bɔ watete wapazam ɔ. Mmerɛ bɔ Yesaya ka bɔ ɔkɔto Edom maen nanwo dwirɛ ne, ɔhane kyɛ nzue nu dabodabo kole berɛ kɔbɔ so. (Yes 34:11) Sefania koso, ɔhyɛle Ninewe kuro nanwo ngɔm kyɛ, nzue nu dabodabo kɔlela ye pila nemɔ aso. Bɔ né ɔpena kyire alaa yeɛ ole kyɛ, ɛberɛ kɔyɛ kurofoen bɔ ebiala ngɔtena berɛ ɔ.—Sef 2:13, 14.
OCTOBER 28–NOVEMBER 3
NYAMEƐ DWIRƐ NANU ASUADEƐ EDWEIN 103-104
“Ɔkaye Kyɛ Yɛte Mvuture”
Suesũa Yehowa Bɔ Ɔte Edwirɛ Bo Ne
Yehowa te edwirɛ bo, ɔnate kyɛ ɔbrɛ yenwo ase, na onwu mmenia anwumvoin. Mmerɛ bɔ né Yehowa baasɛkye Sodom kuro ne, bɔ ɔyɛle ne maa yenwu kyɛ ɔbrɛ yenwo ase. Yehowa nate ye abɔfo nemɔ so hãhyirele teneneeniɛ Lɔto kyɛ, ɔnwati hɔ bokaa naso dɔ. Nakoso, né Lɔto suro kyɛ ɔkɔhɔ bokaa naso dɔ. Yeti ɔsrɛle Yehowa kyɛ ɔma ɔnwati hɔ kuro bie bɔ bɛfrɛ ye Soa bɔ opingyé berɛ nanu. Né Yehowa baasɛkye sɔ kuro ne boka Sodom kuro naso, yeti né ahãa ɔkɔhora kɔhyɛ Lɔto kyɛ otie bɔ ɔkã ne, na ɔnwati hɔ bokaa naso. Nakoso wannyɛ sɔ, na mmom otiele Lɔto, yeti wanzɛkye Soa kuro ne. (Gye. 19:18-22) Lɔto dwirɛ ne sili afoɛ pẽe sĩ ne, Yehowa nwuni mmenia bɔ né bɛwɔ Niniwe kuro nanu ne koso anwumvoin. Ɔsomane diyifoɛ Yona kyɛ, ɔɔbɔ mmenia bɔ bɛwɔ kuro nanu ne kɔkɔ kyɛ, ɔbaasɛkye bɛ kuro ne. Nakoso mmerɛ bɔ Yehowa nwuni kyɛ Niniwefoɛ nemɔ anu bɛnwo ne, ɔsesãne ye adwene, na wanzɛkye kuro ne kõ.—Yona 3:1, 10; 4:10, 11.
Fa Wɔnwo To Yehowa So, Kyɛbɔ Samson Yɛle Ne
Ɔwɔ nu kyɛ, gyinayɛɛ ahoroɛ biemɔ bɔ Samson sili ne, ɔmaa onwuni amaneɛ. Nakoso, wamma ɛhẽne ammu ye abanu ma wanyakyi kyɛ ɔkɔyɛ bɔ Yehowa kuro ɔ. Yɛ koso sɛ ebia yedi mvomsoɛ bie maa bɛkã yɛ nyunu, anaa yenwo atẽe bie bɔ yele wɔ asafo nanu ne fi yɛsa a, ɔnzɛkyɛ yɛmaa y’abanu bu na yɛyakyi Yehowa sõen. Kae kyɛ Yehowa mva ye adwene nzie mvomsoɛ bɔ yedi naso. (Edw. 103:8-10) Ɔmva yenwo kyɛ mvomsoɛ wɔ yɛnwo ne, Yehowa kɔhora kɔfa yɛ kɔyɛ adwuma wɔ ye sõen nu, kyɛbɔ ɔfale Samson yɛle adwuma ne
Ɛmɔma yɛnea bɔ ɔtole aliemaa abrandeɛ bie bɔ bɛfrɛ ye Michael ɔ. Né ɔte asafo nu somvoɛ ne atẽepakyelɛniɛ, na né ɔbɔ yenwo mmɔden paa. Nakoso, bɔ ɔyɛ aworabɔ yeɛ ole kyɛ, olili mvomsoɛ bie, na ɛhẽne maa yenwo atẽe bɔ né ole ye wɔ asafo nanu ne fili yesa. Michael hãne kyɛ, “Sɔ mmerɛ ne, né mebɔ menwo mmɔden paa wɔ asafo nanu. Nakoso kõmapɛ, nikyeebiala sesãne. Ɔwale sɔ ne, nyane adwene kyɛ kesaalae de, mapemo, na Yehowa ngɔfa me ngɔyɛ hwee kõ wɔ asafo nanu. Né mese kyɛ Yehowa ngɔyakyi me nu. Nakoso nyane adwene kyɛ, kyɛbɔ né mmerɛ bie me ne Yehowa afĩa te kama ne, mengonya ye sɔ kõ. Afei koso, nyane adwene kyɛ yenwo atẽe bɔ né mele ye wɔ asafo nanu ne, mesa ngɔhã ye kõ.”
Mmerɛ bɔ ɔwale sɔ ne, Michael amma ye abanu ammu. Ɔtoale ye dwirɛ naso kyɛ: “Mmɔle mmɔden kyɛ ngɔyɛ nningyein bie bɔ ɔkɔmaa me ne Yehowa afĩa kɔyɛ kama biekũ ɔ. Yeti, né metaa mebɔ Yehowa mbaeɛ mekã m’ahõne nu dwirɛ mekyire ye, né mesũa nikye, na né medwenedwene bɔ mesũa nanwo.” Nziɛen, Michael sa nyane yenwo atẽe bɔ né ole ye wɔ asafo nanu ne biekũ. Kesaalae ɔte asafo nu panyi ne atẽepakyelɛniɛ. Michael sa hãne kyɛ: “Asafo nu mbanyi nemɔ bokale me paa, na bɛhyɛle me ngunaen. Ɛhẽne maa nwuni kyɛ Yehowa té kuro me dwirɛ. Kesaalae, mefa anigye mesõ Yehowa bɔ nikyefee nha m’adwene kõ ɔ. Edwirɛ bɔ ɔtole me ne amaa manwu kyɛ, sɛ ebie yɛ bɔne na onu yenwo a, Yehowa kɔfa kɔhyɛ ye.” Yɛkɔhora yekonya gyidie kyɛ, sɛ yali mvomsoɛ bie po a, Yehowa kɔhora kɔfa yɛ kɔyɛ adwuma biekũ wɔ asafo nanu, na wayira mmɔden bɔ yɛbɔ naso. Nakoso sɛ Yehowa kɔyɛ sɔ a, sana yɛsesã yefi nikyee bɔ yayɛ nanwo, na yɛfa yɛnwo yɛto ye so.—Edw. 86:5; Any. 28:13.
Ɛkɔhora Kodwu Bɔ Afa Asie Wɔnye So Wɔ Yehowa Sõen Nu Nanwo
Sɛ afa nikyeebie asie wɔnye so wɔ Yehowa sõen nu, nakoso ɔyɛ se ma wɔ kyɛ ekodwu yenwo a, nnɛmaa w’aba nu bu, ofikyɛ nná mmerɛ mukoraati yeɛ sɛ ɛfa nikyeebie sie wɔnye so a, ɛkɔhora kodwu yenwo ndɛ ɔ. Nakoso kae kyɛ, mmɔden bɔ ɛbɔ kyɛ ɛkɔfa nikyeebie kosie wɔnye so wɔ Yehowa sõen nu ne, ɛhẽne ngome pó kyire kyɛ ɛdɔ Yehowa, na ɛpena kyɛ epingyé ye. Yehowa nwu mmɔden bɔ ɛbɔ ne mukoraati, na ɔmbena kyɛ ɛkɔyɛ nikyee bɔ ɔbo w’anwoserɛ so ɔ. (Edw. 103:14; Mik. 6:8) Yeti sɛ ɛpena kyɛ ɛfa nikyeebie sie wɔnye so a, odikyɛ ɛnea bɔ ɛkɔhora kodwu yenwo ɔ. Yede, sɛ ɛfa nikyeebie sie wɔnye so a, ɛkɔyɛ sɛɛ né ahora adwu yenwo? Ɛmɔma yɛnea nningyein biemɔ bɔ ɔkɔhora kɔboka yɛ ɔ.
Bible Nu Dwirɛ Titire
cl 55 ¶18
Tumi Bɔ Ɔfa Bɔ Nikye—“Bɔ Ɔbɔle Anwuro Ne Aseɛ”
Tumi bɔ Yehowa fa bɔ nikyee ne, nzu yeɛ ɔmaa yenwu ye yɛfa yenwo ɔ? Sɛ yenwu kyɛbɔ nningyein bɔ wabɔ ne guegua nu pee ne a, ɔyɛ yɛ nwanwa. Dweintolɛniɛ bie hane kyɛ: “Ao, AWURADE wɔ sa noa nnwumaa sone paa! . . . W’abɔdeɛ mɔ bayi aseɛ so tɛkyɛ.” (Edwein 104:24) Yɛne ye yɛ adwene! Abɔdeɛ bɔ ngoa wɔ nu kɔbo miliɔn ko yeɛ bɛbɔ bɛneanea abɔdeɛ nu ne, banwu ye ɔ. Nakoso, bennwu bɛnye so po. Bɛnwa gya miliɔn pee wɔ berɛ po bɔ ɛhene de, bennya bennwuni ye ɔ. Bɛbɔ bɛdrɔdrɔ nningyein ne sɔa, ɔtɔ mmerɛ bie a, bɛbɔbɔ bɛkora benwu kyɛ bɛtwe a ɔmma, yeti nningyein dáa nala yeɛ daa bɛyɛ ɔ. Nakoso, Yehowa tumi bɔ ɔfa bɔ nningyein ne de, olle noa. Daa ɔkɔhora kɔbɔ nikyee foforɛ.