Nhwehwɛmuɛ Ma Abrabɔ Ne Asɛnga Adesũa Nwomaa
© 2024 Watch Tower Bible and Tract Society of Pennsylvania
JULY 1-7
NYAMEƐ DWIRƐ NANU ASUADEƐ EDWEIN 57-59
Bɛbɔ Bekyi Yehowa Mmenia Ne, Okogua Benyunu Ase
‘Yahã Nzɛmba Ne ‘Yadwu Aseɛ So Nekaa Biala’
Kora bɔ beku Setefano ne, ɔfale akokoduro hane nzɛmba ne. (Aso. 6:5; 7:54-60) Mmerɛ bɔ “bɛtane” Kristofoɛ nemɔ nye ne, bɛ mukoraa wati hɔle Yudea ne Samaria. Ɔhale asomafoɛ nemɔ ngome wɔ Yerusalem. Nakoso ɛhe amma banyakyi nzɛmba ne hanɛ. Filipo hɔle Samaria, na “ɔhane Kristo nwo dwirɛ” hyirɛle bɛbɔ bɛwɔ berɛ ne. Benu biemɔ bɛɛyɛle gyidifoɛ. (Aso. 8:1-8, 14, 15, 25) Afei koso, Bible ka kyɛ: “Setefano hunɛ ne asi ne, ayaayaadeɛ bɔ bɛfa bɛyɔle agyidifoɛ ne maa bɛbɔle aya. Ebiemɔ nwatili alaa beefitele Fonikia, Kipro ne Antiokia, na Yudafoɛ ngome yeɛ bɛhane nzɛmba ne behyirele bɛ ɔ. Na agyidifoɛ nemɔ bie koso bɔ né bɛwɔ Kipro ne Kirene hɔle Antiokia bɛɛbɔle Awurade Yesu nzɛmba ne dawure behyirele Helafoɛ koso.” (Aso. 11:19, 20) Ayayadeɛ bɔ bɛfa bɛyɛle Kristofoɛ nemɔ maa bɛnwatili ne, ɛhene yeɛ ɔmaa mmeni pee tele Ahennie nanwo nzɛmba ne ɔ.
Yɛ mmerɛ he aso koso, ayayadeɛ bɔ yɛka yenwo dwirɛ ne, ebie hɔle so wɔ Soviet Union. Wɔ 1950 afia berɛ nekaa bie ne, bɛpɛle Yehowa Adanzefoɛ pee asue maa bɛhɔle Siberia. Ɔwale sɔ ne, maen bɔ ne wapɛ bɛnwo bayia ne, benu pee tele nzɛmba ne. Aliemaamɔ pee wɔ berɛ a, ne bɛpena kyɛ bɛkɔ maen foforɛ so bɛkɔka nzɛmba ne, nakoso né odikyɛ bɛpɛ kwanzii 6,000 anaa kilomita 10,000. Bɛ koso yeɛ wahia bɛ ye, yeti ɔkɔyɛ sɛɛ na bahora bahɔ? Yeti mmerɛ bɔ awaen ne bɔbɔ pɛle bɛ asue hɔle berɛ ne, ne waayɛ kyɛbɔ bapɛ aleɛ maa watɔ turoo nu ne. Aliemaa bie hane bɔ ofili nu wale ɔ. Ɔnwa nyoo: “Bɔ awaen ne yɛle ne, ɔmaa mmeni pee bɔ bɛnye gye nahorɛ nanwo wɔ Siberia ne, bɛɛsone Yehowa.”
Bible Nu Dwirɛ Titire
“Ɛmɔgyina Pindinn, Nnɛmaa Ɛmɔhinhim”
Si w’adwene pi. Ɔhene Dawide tole dwein bie, na ɔmaa yenwu kyɛ, okonya ɔdɔ kɔma Yehowa daa. Ɔhãne kyɛ: “Ao Nyameɛ, masiesie m’ahõne.” (Edw. 57:7) Yɛ koso, sɛ yɛkɔhora yɛkɔfa yɛnwo yɛkɔto Yehowa so a, odikyɛ yesiesie y’ahõne. (Kenga Edwein 112:7.) Ɛmɔma yesa yɛnea Bob bɔ yalimoa yahã yenwo dwirɛ ne. Mmerɛ bɔ dɔktaniɛ ne hãhyirele ye kyɛ bɛkɔfa mogya bekosie yenwo berɛ, na sɛ oprehyen nanu yɛ se a bafa bama ye ne, ɔmaa benwuni kyɛ sɛ bɛyɛ b’adwene kyɛ bɛkɔma ye mogya a, okofi hɔspitel berɛ kɔhɔ bɔ ɔngɔmaa bɛngɔyɛ ye oprehyen ne ɔ. Nziɛen Bob hãne kyɛ, “Né masi m’adwene pi kyɛ ɔmva yenwo ne bɔ okosi biala ne, mengole mogya ne llé.”
Né Bob alimoa asi ye adwene pi kora yeɛ ɔkɔ hɔspitel berɛ ɔ. Bɔ ɔbokale Bob maa ɔyɛle sɔ yeɛ ole kyɛ, bɔ olimoa, né ɔpena kyɛ ɔyɛ bɔ Yehowa kuro ɔ. Bɔ ɔtɔ so nyɔ, edwirɛ bɔ Bible ne, ɔne asafo nwomaa ahoroɛ ka fa mogya nwo ne, ɔtole yeboase suane ye yé. Bɔ ɔtɔ so nza, né ole gyidie paa kyɛ sɛ ɔfa Yehowa mmraa yɛ adwuma a, Yehowa koyira ye. Yɛ koso, odikyɛ yesi y’adwene pi kyɛ ɔmva yenwo ne ɔhaw biala bɔ ɔkɔto yɛ ne, yɛkɔfa Yehowa mmraa yɛkɔyɛ adwuma.
JULY 8-14
NYAMEƐ DWIRƐ NANU ASUADEƐ EDWEIN 60-62
Yehowa Te Yɛ Abandenden, Anwoserɛ Afealeɛ Ne Nyɔbotaen
it-2 1118 ¶7
Abandenden
Bɔ Ogyi Berɛ Ma Ɔ. Bɛbɔ bɛfa Yehowa bɛyɛ bɛ nikyee biala, ná betie ye dwirɛ ne, ɔbɔ bɛnwo waen. Sɔ pɛpɛɛpɛ yeɛ Dawide yɛle ɔ. Ɔhane kyɛ: “Wɔ yeɛ ɛte m’afealeɛ ɔ, abandenden serɛserɛ bɔ ɔko tia me pɔfoɛ ɔ.” (Edw 61:3) Bɛbɔ Yehowa dumaa la bɛ so ne, bɛte Yehowa dumaa nabo, yeti bɛse bɔ ɔkora yɛ ɔ. Na ɔnate kyɛ bedi nahorɛ bɛma ye nati, bele gyidie paa kyɛ ɔkɔbɔ bɛnwo waen. Ɛhe ati, benzuro hwee. Ofikyɛ: “AWURADE dumaa ne te abandenden pindinn, nu yeɛ teneneeniɛ nwati kɔbɔ ye nwo waen maa onya ye ti didi nu ɔ.”—Any 18:10; Fa toto 1Sa 17:45-47 nanwo.
it-2 1084 ¶8
Tena Sua
Wɔ Bible nu ne, sɛ bɛka “tena sua” a, ogyi berɛ ma nningyein pee. Né ebiemɔ tena ye bo bɛdwodwo bɛnwo. (Gye 18:1) Tete ne, né benni ɛwɔfoɛ nwo angorɛ. Na sɛ ebie fa ɛwɔfoɛ kɔ ye tena sua nu po de a, né wahu ye koraa. Ɔmaa sona ne nya gyidie kyɛ, ɛberɛ bɔ waawura ne de, olle haw. Mmerɛ bɔ Nyekyire 7:15 ka ɛlɔen kandinga nanwo dwirɛ ne, ɔhane kyɛ, Nyameɛ ‘kɔfa ye tena sua ne kɔkata bɛ so.’ Ɛhe kyire kyɛ né ɔkɔbɔ bɛnwo waen. (Edw 61:3, 4) Yesaya nwomaa nanu koso, Nyameɛ hahyirele Sion bɔ nzɛngyerɛnneɛ atee so ne, ɔte ɔye ne kyɛ, “wɔ tena sua ne, trɛ nu.” (Yes 54:2) Bɔ ɛhe kyire yeɛ ole kyɛ, ye mmaamɔ bɔ ɔkɔwo bɛ kyeabie ne, ɔyɛ nikyee bie fa bɔ bɛnwo waen.
w02 4/15 16 ¶14
Sɛ Yedi Nyameɛ Mmraa So A, Ɔboka Yɛ Bɔbɔ
Nyameɛ mmraa de, ɔnzesa. Ɛnnɛ, nningyein sesa alaa yeɛ ɔsesa ɔ. Nakoso Yehowa de, ɔte nyɔbotaen. Bɔ ɛhene kyire yeɛ ole kyɛ, ɔwɔ berɛ afebɔɔ. (Edwein 90:2) Yehowa bɔbɔ deinn ka yenwo dwirɛ kyɛ: “Me, AWURADE, menzesã.” (Malaki 3:6) Nyameɛ mmraa bɔ ɔwɔ Bible nanu ne, yɛkɔhora yɛkɔfa yɛnwo yɛkɔto so, ofikyɛ ɔnzesa. Ɔtte kyɛ sona mmraa bɔ daa bɛsesa nu ne. (Yakobo 1:17) Animdefoɛ bie fa tole dwaa kyɛ, odikyɛ bɛyakyi ngwalaa maa bɛyɛ bɔ bɛbɔbɔ bekuro ɔ, na ɔnzɛkyɛ awofoɛ hyehyɛ mmraa ma bɛ. Bɛnwa sɛ ɛtete akwalaa wɔ sɔ atee naso a, ɔte kama paa. Nakoso, nziɛen, bɛnwa bɛbɔbɔ yeɛ bɛhane ɔ, koso bɛlaka. Wiase ne adwene bɔ ɔfa mmaa tetelɛ nwo ne, ɔsono bɔ ebiala ka fa yenwo ɔ, na ɔngyɛ né wapɛ nu. Nakoso Yehowa mmraa de ɔmbɛ nu. Ofi tete yeɛ Bible ne ahyire yɛ atee pa bɔ yɛfa so yɛtete yɛ mmaamɔ ɔ. Somafoɛ Pɔɔlo hane kyɛ: “Seɛ mɔ, nnɛma ɛmɔhu ɛmɔ mma mɔ b’ahone, na mmom ɛ́mɔtete bɛ wɔ Awurade ndeteyɛɛ ne foɛtulɛ nu.” (Ɛfesofoɛ 6:4) Ɛhe maa yenya gyidie kyɛ, yɛkɔhora yɛkɔfa yɛnwo yɛkɔto Yehowa mmraa so, ofikyɛ ɔnzesa.
Bible Nu Dwirɛ Titire
w06 6/1 11 ¶6
Edwein Nwomaa Ne Bue Bɔ Ɔtɔ So Nyɔ Nanu Dwirɛ Titire
Edwein 62:11. Nyameɛ le tumi paa. Yeti sɛ ɔpena kyɛ ɔyɛ nikyee bie a, onhia ebiala mmokalɛ. Ye yeɛ tumi mukoraa fi ye berɛ ɔ. Bible ne po ka kyɛ, “Tumi te Nyameɛ deɛ.”
JULY 15-21
NYAMEƐ DWIRƐ NANU ASUADEƐ EDWEIN 63-65
‘Wɔ Dɔ Bɔ Onni Ngasi Ne, Ɔte Pa Tra Ngoa’
w01 10/15 15-16 ¶17-18
Nwa Yeɛ Ɔkɔhora Kɔte Yɛ Kofi Nyameɛ Dɔ Nwo Ɔ?
Ɔdɔ bɔ Nyameɛ le ma wɔ ne, ɔsombo ma wɔ anaa? Né ɔsombo paa ma Dawide, yeti ɔhworɔle kyɛ: “Wɔ ɔdɔ bɔ onni ngasi ne, ɔte paa tra ngoa; ye sɔ ati, me noa kɔye wɔ ayɛ. Yiti mmerɛ bɔ nde ngoa nu ye, ngɔye wɔ ayɛ, na ngɔma me sa so ngɔbɔ mbaeɛ wɔ wɔ dumaa nu.” (Edwein 63:3, 4) Sɛ yɛnea ewiase he anu a, nzu paa yeɛ yenwo hia tra ɔdɔ bɔ Nyameɛ le ma yɛ ne ɔ? Yɛ fa ye kyɛ, ebie afa sie yenye so kyɛ ɔpena kyɛ onya sikaa pee. Ɛnea a, anigye bɔ okonya ye ne, okodwu kyɛbɔ yɛfa Yehowa adamvoa a, ɔmaa yɛ soanu dwo yɛ, na yɛnye gye ne anaa? (Luka 12:15) Kristofoɛ biemɔ wɔ berɛ a, beyia bɛgyidie nwo nzɔhwɛ. Ɔtɔ mmerɛ bie a, bɛkora bɛka kyɛ sɛ banyakyi Yehowa soen a, bekohu bɛ. Ewiase Koɛ II nanu, ɛhe bie tole aliemaamɔ bɔ né bɛwɔ Nazi prisa berɛ ne. Benu pee lili nahorɛ mane Yehowa, na né bayɛ krado kyɛ sɛ odikyɛ bewu po a, bekowu. Ebiala bɔ ɔkɔso di nahorɛ ma Nyameɛ ne, ɔkɔhora konya gyidie kyɛ kyeabie ɔkɔma ye daa ngoa. Sɛ ewiase ne twe ye nu taenn po a, ɔngɔhora ngɔma yɛ daa ngoa lle. (Marko 8:34-36) Nakoso, nna daa ngoa ngome yeɛ yekonya ɔ, na mmom, pee boka so.
Yehowa ngome twé yeɛ ɔkɔhora kɔma yɛ daa ngoa ɔ. Nakoso, fa ye kyɛ ɛte ewiase bie bɔ ewue nne nu, koso nikyee biala bɔ ɛkɔyɛ ne, Nyameɛ sa nne nu. Ɛnea a, sɛɛ yeɛ ahaa w’abrabɔ kɔyɛ ɔ? Sɛ ewuli po a, ahaa ɔte pa. Wɔ ayieleɛ mmerɛ he anu po, Yehowa ama ye mmenia adwuma bie bɔ ɔmaa b’ahone tɔ bɛ kunu ɔ. Ɛhe maa yenya gyidie kyɛ, daa ngoa bɔ Yehowa kɔfa kɔma yɛ wɔ ewiase foforɛ nanu ne, asetena ngɔfono yɛ. Daabiala yekonya yenwo atee yekosua nningyein pee bɔ ɔyɛ nyemene ɔ. (Nworɛ Dwirɛhanɛniɛ 3:11) “Nyameɛ anwonya ne ye nworɛ ne ye nimdeɛ nu pi.” Ɛhe ati, sɛ yɛkɔ afoɛ apee ahennie nanu a, wɔ yeɛ ele nwa, ɛngɔhora ngosua yenwo nikyee ngoyie lle.—Romanfoɛ 11:33.
w19.12 28 ¶4
“Ɛ́mɔfa Asennaa Bɛ́ma Nyameɛ Wɔ Nikyee Biala Nu”
Nyameɛ de, sɛ yanna ye ase a, né yɛte boniayɛ. Yehowa ayɛ bie ama wɔ wɔ ye soen nu, ɔne w’abrabɔ nu paa. (Deut. 8:17, 18; Aso. 14:17) Yede, nzuati yeɛ enné mmerɛ ndwenedwene bɔ Yehowa ayɛ ama wɔ nanwo ɔ? Yehowa de, obukye ye sa nu ma ebiala. Yeti sɛ ɛdwene sɔ nningyein nanwo a, ekonwu kyɛ ɔdɔ wɔ, na ɔdwene wɔnwo koso.—1 Yoh. 4:9.
w15 10/15 24 ¶7
Kɔso Dwenedwene Yehowa Nwo
Akengalɛ de, ɔnyɛ se biala sɔ. Nakoso sɛ ɛnwa ɛdwenedwene yenwo de a, sana ɛfa w’adwene amukoraa sie so. Y’adwene ne mia onguro fɛɛ. Yeti sɛ ɛpena kyɛ ɛdwenedwene nikyee bie nwo a, nnɛyɛ ye mmerɛ bɔ afɛ ɔ. Pena nekaa bɔ ɛberɛ te dinn bɔ nikyefee ngɔtwetwe w’adwene ɔ. Dweintolɛniɛ ne de, kɔngɔen yeɛ né ɔdwenedwene Yehowa nwo ɔ. Sɔ mmerɛ ne yeɛ né onwu kyɛ ɔte pa ma ye ɔ. (Edw. 63:6) Yesu bɔ bɔne biala nne yenwo po ne, ɔtɔ mmerɛ bie a, né ɔkɔpena nekaa bɔ ɛberɛ te dinn dwenedwene nningyein nwo, na né ɔbɔ mbaeɛ.—Luka 6:12.
w09 7/15 16 ¶6
Nningyein bɔ yɛnye gye yenwo ne, ɛyɛ a, yekuro kyɛ yɛka yenwo dwirɛ yekyire mmenia. Na ɔnate kyɛ ɔte nikyee bɔ ɔla y’ahone so nati, sɛ yɛka yenwo dwirɛ a, yɛfa anigye yeɛ yɛyɛ ɔ. Sɔ dwirɛ bɔ yɛka ye, ɔte nahorɛ paa o. Wɔde, fa ye kyɛ ele ebie bɔ ekuro ye dwirɛ paa ɔ. Nekaa bɔ ɛkɔhɔ biala ɛbɔ ye dumaa. Ebukye wɔnoa biala a, ná ɛkamvo ye. Sɛ mmenia ka yenwo dwirɛ tɛɛ po a, né esa ye ti. Bɔ ɔmaa ɛyɛ sɔ alaa yeɛ ole kyɛ, ye subaen bɔ ɔyɛ nyemene ne, ɛpena kyɛ mmenia nwu ye, na bɛ koso bekuro ye dwirɛ.
Bible Nu Dwirɛ Titire
w07 11/15 15 ¶6
Aso Wɔnoa Dwudwolɛ Yɛ Fɛ?
Sua de, ye silɛ yɛ se paa. Nakoso ɛnwa ebubu ye a, ɛhene de ɔte falaa. Ɛhe fa yɛ noa dwudwolɛ nwo sɛ? Bɔne wɔ yɛnwo, yeti yenu biala nne berɛ bɔ ɔkora yɛ nikyee biala pɛpɛɛpɛ ɔ. Ɔhene Solomon po hane kyɛ: “Sona biala nne aseɛ ye aso bɔ ye de ɔtengyɛ, ɔyɔ paa ngome, bɔ ɔnyɔ bɔne ɔ.” (Nworɛ Dwirɛhanɛniɛ 7:20) Ɛhe ati, ɔnyɛ se koraa kyɛ yekonwu mvomsoɛ bɔ ɔwɔ ebie nwo ɔ. Ɛkɔnea po ne, ná yɛkeka yenwo dwirɛ bie bɔ ɔte a, ɔkɔmaa ye abanu kobu ɔ. (Edwein 64:2-4) Nakoso kyɛ yɛkɔfa yɛnoa dwudwolɛ yɛkɔhyɛ ebie ngunaen ne de, ɔtte falaa sɔ; odikyɛ yesua.
JULY 22-28
NYAMEƐ DWIRƐ NANU ASUADEƐ EDWEIN 66-68
Yehowa Boka Yɛ Maa Yɛ Kɔme Anu Dwo Yɛ
Sɛɛ Yeɛ Yehowa Ma Yɛ Mbaeɛ Nwo Mmuayɛɛ Ɔ?
Sɛ yɛbɔ mbaeɛ a, ɔnzɛkyɛ yenya adwene kyɛ, Yehowa kɔyɛ anwanwadeɛ bie kora, né yanwu kyɛ watie yɛ mbaeɛ ne. Sɛ yɛbɔ Yehowa mbaeɛ a, kyɛbɔ ɔmaa yenya yenwo mmuayɛɛ ne, ɔboka yɛ maa yɛkɔso yɛsõ ye. Yeti sɛ ɛbɔ mbaeɛ a, fa wɔnye to ase, na ekonwu kyɛbɔ Yehowa kɔmaa ekonya yenwo mmuayɛɛ ɔ. Ɛmɔma yɛnea aliemaa brasua bie bɔ bɛfrɛ ye Yoko. Né ye adwene yɛ ye kyɛ sɛ ɔbɔ mbaeɛ a, Yehowa ndie. Yeti ɔhyɛle yebo kyɛ nningyein bɔ wabɔ yenwo mbaeɛ ne, ɔkɔhwerɛ yemukoraati kɔto berɛ. Ɛhẽne sĩ ne, osa neane bɔ wahwerɛ wato berɛ nanu, na onwuni kyɛ nningyein bɔ ɔbɔle yenwo mbaeɛ ne, Yehowa ama pẽe nala nwo mmuayɛɛ dada. Nningyein bɔ ɔbɔle yenwo mbaeɛ ne, enu biemɔ wɔ berɛ pó a, né ye bɔbɔ ye wora afi. Yeti sɛ yɛbɔ nikyeebie nwo mbaeɛ a, yɛkɔhora yɛkɔhwerɛ yenwo dwirɛ yɛkɔto berɛ. Ɛhẽne sĩ ne, yɛkɔhora yɛkɔnea bɔ yahwerɛ yato berɛ nanu, na yekonwu kyɛbɔ Yehowa ama yenwo mmuayɛɛ ɔ.—Edw. 66:19, 20.
w10 12/1 23 ¶6
Bɛbɔ Bɛ Ngome Bɛtete Bɛ Mmaamɔ Ne, Yɛ Nikyee Bie Fakyire Kyɛ Ɛdwene Bɛnwo
Yehowa fale ye honhom hane ebiemɔ maa bɛhworɔle dwein wɔ Yisrael. Yeti beyia nu kyɛ bɛso Yehowa a, né bɛto bie. Sɛ bɛ bɔ né bɛte ayisiaa ne akunafoɛ nemɔ to sɔ dwein ne a, nea kyɛbɔ ne ɔkɔkyekye bɛ wora ɔ! Né ɛhene kɔkae bɛ kyɛ Yehowa te bɛ “baba,” yeti okoli bɛ dwirɛ kɔma bɛ, ná wamaa bɛnwo adwo bɛ fɔnwoo. (Edwein 68:5; 146:9) Sɔ ala yeɛ yɛ koso, bɛ bɔ bɛ ngome bɛtete bɛ mmaamɔ ne, yɛkɔhora yɛkɔha edwirɛ bie kɔhyɛ bɛ ngunaen ɔ. Sɛ yɛyɛ sɔ a, bɛ wora ngoffi ye lle. Ruth te ebie bɔ ye ngome twe yeɛ ɔtete ye mmaamɔ ɔ. Mmerɛ bie, baba bie bɔ wahora watete ye mmaamɔ yé wɔ asafo nanu hahyirele ye kyɛ: “Ao, ayɛ nikyee paa kyɛ wɔ mma mmrienzua nyɔ ne, ɛyere wɔnwo tete bɛ wɔ asafo nanu ɔ. Yere wɔnwo ale.” Baba ne hane sɔ dwirɛ ne, afoɛ 20 apɛ nu. Nakoso mmerɛ biala bɔ Ruth kɔkae sɔ dwirɛ ne, yenye kora gye alaa maa onnwu bɔ ɔyɛ yenwo po ɔ. Ruth hane kyɛ: “Sɔ dwirɛ bɔ baba ne hane ne, waboka me paa.” Bible ka kyɛ, “ɛyɛ wɔ noa bɛtɛɛ a, ɔte ngoa bakaa.” Ɛhe maa yenwu kyɛ, sɛ yɛka edwirɛ kaa bie yɛhyɛ bɛ ngunaen a, ɔkora boka bɛ wɔ atee pee so. (Anyandera 15:4) Ɛse benu bie anaa? Sɛ sɔ a, edwirɛ beni yeɛ ɛpena kyɛ ɛka fahyɛ ye ngunaen ɔ?
w09 4/1 31 ¶1
Ayisiaafoɛ Baba
“Ayisiaafoɛ baba . . . ye ole Nyameɛ bɔ ɔwɔ ye atenaleɛ krongron nu ne.” (Edwein 68:5) Sɔ dwirɛ bɔ Bible ne hane ne, ɔmaa yenwu nikyee bie bɔ ɔyɛ nyeme paa wɔ Yehowa nwo. Yeɛ ole kyɛ, bɛbɔ bɛ dwirɛ yɛ anwumvoin ne, onni bɛnwo angorɛ koraa. Mmraa bɔ Yehowa famane Yisraelfoɛ ne, ɔmaa yenwu kyɛ ngwalaa bɔ belle maame ne baba ne, ɔdwene bɛnwo. Yekonwu sɔ mmraa ne wɔ Ɛksadɔso 22:22-24. Ɛberɛ yeɛ Bible ne limoa hane “ayisiaafoɛ” nwo dwirɛ ɔ.
w23.01 19 ¶17
Yehowa Boka Wɔ Maa Osi Wɔ Yé
Kenga Edwein 40:5. Sɛ ebie fo bokaa a, bɔ ogyi yenye so paa yeɛ ole kyɛ, okodwu ye ti afia. Nakoso, sɛ odwu nekaa bɔ ɛberɛ yɛ nyemene a, ɔkɔhora kogyina kaa, ná waneanea berɛ. Sɔ ala yeɛ wɔ koso, sɛ ɛfa ɔhaw nu wɔ w’abrabɔ nu a, kyɛbɔ Yehowa boka wɔ maa osi wɔ yé ne, ɛyɛ a de mmerɛ dwenedwene yenwo. Sɛ kyea ne kɔ ayieleɛ biala a, bisa wɔnwo kyɛ: ‘Sɛɛ yeɛ Yehowa ayira me ɛnnɛ ɔ? Ɔwɔ nu kyɛ ɔhaw ne tɛ wɔ berɛ de, nakoso sɛɛ yeɛ Yehowa boka me maa megyina yenoa ɔ?’ Bɔ okyire kyɛ Yehowa boka wɔ maa osi wɔ yé ne, fa wɔnye to ase nea kyɛ ekonwu nu ko a.
Bible Nu Dwirɛ Titire
w06 6/1 10 ¶5
Edwein Nwomaa Ne Bue Bɔ Ɔtɔ So Nyɔ Nanu Dwirɛ Titire
68:18—Nwamɔ yeɛ né bɛfrɛ bɛ “akyɛdeɛ bɔ ɔte mmenia” ne? Mmenia bɔ Yisraelfoɛ nemɔ fale bɛ yɛle ngoaa wɔ Bɔhyɛ Aseɛ naso ne, benu biemɔ yeɛ bɛfrɛ bɛ sɔ ne. Nziɛen, bɛ maa bɛɛbokale Lewifoɛ nemɔ.—Ɛsra 8:20.
JULY 29–AUGUST 4
NYAMEƐ DWIRƐ NANU ASUADEƐ EDWEIN 69
Edwein 69 Maa Yenwu Bɔ Né Okosisi Wɔ Yesu Abrabɔ Nu Ɔ
w11 8/15 11 ¶17
Bɛnwodɛle Mɛsaya Ne
Né Yesu yɛlle bɔne biala, koso né mmenia kɔpɔ ye, anaa bɛkɔtane yenye. (Edw. 69:4) Yesu hane kyɛ: “Sɛ manyɔ nnwumaa bɔ ebiala ɔyyɔle bie le wɔ bɛ nu a, ahaa benni bɔne nwo foɛ; na afei de, banwu ye, nakoso bapɔ me ne me Baba. Na ɛhe ama edwirɛ bɔ bahyerɛ ye wɔ bɛ mmeraa ne anu ne wawa nu kyɛ, ‘Bɛpɔle me mbaen.’” (Yoh. 15:24, 25) Bɛtaa bɛfa “mmeraa” ne begyina berɛ bɛma tworɔnzɛm namu. (Yoh. 10:34; 12:34) Nzɛmba ne maa yenwu kyɛ bɛtane Yesu nye paa, titire Yuda nyamesom mbanyi ne. Kristo bɔbɔ po hane kyɛ: “Wiase ngora mbɔ ɛmɔ, nakoso me yeɛ ɔpɔ me ɔ, ofikyɛ medi adanzeɛ kyɛ ye yɔleɛ te bɔne.”—Yoh. 7:7.
w10 12/15 8 ¶7-8
Nahorɛ Soen La W’ahone So Hɔ?
Mmerɛ bɔ Yesu wale aseɛ he aso ne, ɔyɛle nikyee bie bɔ okyire kyɛ Yehowa soen la ye ahone so paa. Sɔ dwirɛ ne sili wɔ afoɛ 30 Y.B. Sɔ mmerɛ ne, né waha kaa maa bedi Abɔtra Aluolue ne. Yesu hyɛle ye asɛnga adwuma nabo ne, né ɔhyɛlle biala. Ɔne ye asuafoɛ nemɔ hɔle asɔre awuro berɛ wɔ Yerusalem. Onwuni “bɛ bɔ bɛtɔne nandwie ne mmoaen ne mmorɔnoma, yeɛ afei sikaasesãlɛfoɛ kyɛ bɛtete berɛ ɔ.” Nzu yeɛ Yesu yɛle ɔ, na ɔbokale ye asuafoɛ nemɔ sɛ?—Kenga Yohane 2:13-17.
Bɔ Yesu yɛle ye sɔ mmerɛ ne, ɔmaa asuafoɛ nemɔ kaele ngɔm bie bɔ Dawide hyɛle ɔ. Yeɛ ole kyɛ: “W’awuro nwo ɔdɔ bɔ nne ye ne, ɔte see bɔ ogye wɔ me nu ɔ.” (Edw. 69:9) Adwuma bɔ Yesu yɛle ye sɔ kyea ne, né ɔyɛ suro paa. Nzuati ɔ? Ofikyɛ, dwaa bɔ né bedi ye wɔ asɔre awuro berɛ ne, né ebiala pene so. Sɛ yɛkɔha a, asɔre awuro berɛ mbanyi, asɔfo, ɔne ahworɔlɛfoɛ nemɔ yeɛ ne bɛta bɔ ɔkɔso ne si ɔ. Yeti bɔ Yesu yɛle ne, ɔmaa bɛnwo lale so, kyire kyɛ, ɔmaa ebiala nwuni kyɛ, bɔ né bɛyɛ ne, ɔttemaye. Sɛ né asuafoɛ nemɔ tena ase dinn dwene bɔ ɔyɛle nanwo a, né bekonwu kyɛ ‘Nyameɛ awuro,’ anaa nahorɛ soen la ye ahone so paa.
g95 10/22 31 ¶4
Bible ne hyɛle ngɔm bie fale Yesu nwo kyɛ: “Alapaa ama me wora abɔ, maa ɔnate so wabɔ me anwonyerɛ.” (Edwein 69:20) Ɛhe ati, ɔmaa ebiemɔ ka kyɛ, aworabɔlɛ yeɛ ohuni Yesu ɔ. Aso sɔ yeɛ edwirɛ ne te hɔ ɛne? Ɔkɔhora kɔwa sɔ. Ofikyɛ, waha kaa maa Yesu wu ne, ɛyealɛ bɔ ɔfale nu ne, ɔmaa ye wora bɔle paa. (Mateo 27:46; Luka 22:44; Hebrifoɛ 5:7) Mmerɛ bɔ bɛfale pea bɛwɔle Yesu mvenu ne, “mogya ne nzue” fili nu wale. Sɔ mmerɛ ne, né owuli hyɛlle koraa. Ɔkɔyɛ kyɛ pea ne wɔle ye ahone, anaa ndiin mbiri bɔ ɔkɔ ye ahone nu nanu. Yeti ɔmaa mogya nwi guale ye nu. Anaa ɔkɔhora kɔwa kyɛ nikyee bɔ ɔkata ye ahone nwo ne, ɛhene yeɛ mogya ne ooguale nu ɔ. Ɛhene de nzue wɔ nu dada. Yeti ɔba sɔ a, mogya ne kɔɔfrale nzue ne. Yeti sɛ Bible ne ka kyɛ “nzue ne mogya” fili ye nu wale a, ndeaseɛ wɔ nu.—Yohane 19:34.
it-2 650
Borɔ
Bɛhyɛle Mɛsaya nanwo ngɔm kyɛ, bɛkɔfa “borɔ” bekogua ye aleɛ nu. (Edw 69:21) Mmerɛ beni yeɛ sɔ dwirɛ he wale nu ɔ? Ɛhe sili mmerɛ bɔ né beku Yesu ne. Né bɛpena kyɛ ɛyealɛ bɔ ɔfa nu ne, ɛso te kaa. Yeti, bɛfale nikyee bie bɛfrale nzaa kyɛ ɔno. Nakoso, mmerɛ bɔ ebie hane ye noa ne, wanno. Mateo 27:34 maa yenwu kyɛ, abɔwee yeɛ bɛfa bɛfrale nzaa ne. Sɔ ala yeɛ Hebri tworɔnzɛm bɔ behyire yebo bɛhɔle Greek nu ne koso, abɔwee nala yeɛ bɛfa belili dwumaa wɔ Edwein 69:21 ɔ. Nakoso Marko nwomaa ne nwa, né ɔte ayirefona. (Mak 15:23) Ɛhe ati, ɔmaa ebiemɔ ka kyɛ, “borɔ” anaa “abɔwee” bɔ bɛfa bɛfrale nzaa ne, né “ɔbo fona.” Anaa ɔkɔhora kɔwa kyɛ, né ɔte abɔwee ne ayirefona bɔ bafa bafra ɔ.
Bible Nu Dwirɛ Titire
w99 1/15 18 ¶11
Mmeni pee wɔ berɛ a, sɛ bebukye bɛnoa kyɛ bɛbɔ mbaeɛ biala a, né behia nikyee befi Nyameɛ berɛ. Nakoso Yehowa ayɛ bie ama yɛ pa. Yeti sɛ yɛ ngome yɛbɔ mbaeɛ oo, yegyi mmenia nyunu yɛbɔ mbaeɛ oo, odikyɛ yɛda ye ase. Pɔɔlo po hworɔle kyɛ: “Nnɛmɔma nikye fee ha ɛmɔ; na mmom nikyee biala nu, ɛ́mɔfa mbaeɛbɔlɛ ne ngotosrɛ ne asennaa bɛ́fa bɔ ohia ɛmɔ bɛ́to Nyameɛ nyunu. Na Nyameɛ asomdwee bɔ ɔbo ndeaseɛ amukoraa so ne, ɔkɔnea ɛmɔ ahone ne ɛmɔ adwene so wɔ Kristo Yesu nu.” (Filipifoɛ 4:6, 7) Nna nningyein bɔ yehia ngome yeɛ odikyɛ yɛbɔ yenwo mbaeɛ ɔ. Na mmom, odikyɛ yɛda Yehowa ase, ofikyɛ wayɛ bie wama yɛ pa. Ɔmaa yenya nningyein bɔ yehia wɔ y’abrabɔ nu, yeɛ wamaa yanwu nahorɛ soen koso. (Anyandera 10:22) Dweintolɛniɛ ne hane kyɛ: “Fa asennaa yɛ afɔleɛ bɔ ma AWURADE, ná tua w’aboadeɛ ma Anwuro Anwuroniɛ ne.” (Edwein 50:14) Dawide bɔle mbaeɛ kyɛ: “Ngɔto dwein ngɔye Nyameɛ dumaa ayɛ, ngɔfa asennaa ngɔhyɛ ye animnyam.” (Edwein 69:30) Aso ná sɔ ala yeɛ odikyɛ yɛ koso yɛyɛ ɔ?
AUGUST 5-11
NYAMEƐ DWIRƐ NANU ASUADEƐ EDWEIN 70-72
Ka Nyameɛ Tumi Nwo Dwirɛ Kyire “Aworɛ Ndoatoasoɛ”
w99 9/1 18 ¶17
Mmabunu—Ɛmɔma Bɛnye La Berɛ!
Sɛ ɛkɔhora kogyina nzɔhwɛ bɔ Satan fa ba wɔ so ne noa a, odikyɛ daa ɛma wɔnye da berɛ, ná enya akokoduro. Sɛ ɛfa wɔnwo toto wɔ mango bɔ bɛnzo Yehowa nanwo a, ebia ekonya adwene kyɛ atɔ nu, anaa wɔnye bukyelle. Nakoso, fa wɔnwo to Yehowa so. Sɔ ala yeɛ Dawide yɛle ɔ. Ɔbɔle mbaeɛ kyɛ: “Wɔ yeɛ ɛte m’anyelasoɛ ɔ, ao AWURADE, ofi me ngwadaa nu, wɔ yeɛ me wora wura wɔ nu ɔ. Ao Nyameɛ, ofi me mmerandeɛ nu yeɛ ahyirehyire me ɔ, na mekɔ so mebɔ w’anwanwadeɛ nwo dawure.” (Edwein 71:5, 17) Yɛse Dawide kyɛ, ebie bɔ né ole akokoduro paa. Nakoso yebisa kyɛ, mmerɛ beni yeɛ onyane sɔ akokoduro ne ɔ? Ɔte mmerɛ bɔ né ɔte akwalaa ne. Kora bɔ oku Goliate po ne, né ole akokoduro dada. Bɔ ɔmaa yenwu sɔ yeɛ ole kyɛ, ɔhora huni gyata ne kwabrafo fa bɔle ye baba mmoaen nanwo waen. (1 Samuel 17:34-37) Nakoso, né Dawide se paa kyɛ Yehowa yeɛ ɔmaa onyane sɔ akokoduro ne ɔ. Ɔhahyirele Yehowa po kyɛ, “ofi me ngwadaa nu, wɔ yeɛ me wora wura wɔ nu ɔ.” Ɔnate kyɛ ɔfale yenwo tole Yehowa so nati, ɔhora gyina ɔhaw bɔ ɔtole ye ne noa. Wɔ koso, sɛ ɛfa wɔnwo to Yehowa so a, ɔkɔmaa ekonya akokoduro ne anwoserɛ bɔ ɛkɔfa ‘koli wiase so ngonim’ ɔ.—1 Yohane 5:4.
g04 10/8 23 ¶3
Yɛkɔyɛ Sɛɛ Ná Yaboka Bɛbɔ Bayɛ Mbanyi Ne?
Dweintolɛniɛ ne bɔle mbaeɛ kyɛ: “Me nworowaa nu, nnɛyakyi me nu; sɛ menyi meyɛ mmerɛ a, nnɛpo me.” (Edwein 71:9) Sɛ Yehowa somvoɛ bie nya adwene kyɛ ɔnate afoɛ bɔ wali nati, bɛfa ye bɛyɛ hwee a ɔnyɛ yé po a, Yehowa de, onnwu ye sɔ. Mmerɛ bɔ dweintolɛniɛ ne bɔle aworowaa ne, né ɔse paa kyɛ Yehowa de, ɔyɛlle ye adwene kyɛ ɔkɔyakyi ye nu. Yeti ye mmom yeɛ odikyɛ ɔfa yenwo to ye so ɔ. Sɛ ebie di nahorɛ ma Yehowa, na sɛ ɔbɔ aworowaa po a, Yehowa ngɔyakyi ye nu. (Edwein 18:25) Ɔtɔ mmerɛ bie a, ɔnate aliemaamɔ so maa ye sa ka bɔ ohia ɔ.
w14 1/15 23 ¶4-5
Fa W’anwoserɛ So Yehowa Kora Né Amaneɛnwunɛ Mmerɛ Ne Awa
Yedwudwo ye, ebia afa afoɛ pee aso Yehowa, yeti anya suahu pee. Sɛ sɔ a, ɛkɔhora kobisa wɔnwo kyɛ, ‘Anwoserɛ kaa bɔ nne ye kesaalae ne, nzu yeɛ ngɔhora ngɔfa ngɔyɛ ɔ? Ɔnate kyɛ ele suahu pee nati, ele yenwo atee biemɔ bɔ nna ebiala yeɛ ole bie ɔ. Yehowa nwo nikyee bɔ asua ne, ɛkɔhora kɔha bie kohyire ngwalaa bɔ bɛba ne. Suahu ahoroɛ bɔ anya ye wɔ Yehowa soen nu ne, ɛkɔhora kɔha bie kɔhyɛ aliemaamɔ ngunaen. Sɔ ala yeɛ né Dawide pena kyɛ ɔyɛ ɔ. Yeti ɔbɔle mbaeɛ kyɛ: “Ao Nyameɛ, ofi me mmrandeɛ nu yeɛ ahyirehyire me ɔ, . . . Yiti menyi meyɛ aworowaa ma me ti anu yɛ gyein a, ao Nyameɛ, nnɛpo me, kɔpem kyɛ ngɔbɔ w’anwoserɛ nwo dawure ngohyire aworɛ ndoatoasoɛ he, ɔne wɔ tumi nwo dawure ngohyire ebiala bɔ ɔbaawa ɔ.”—Edw. 71:17, 18.
Yede, suahu bɔ afa afoɛ pee anya ye ne, ɛkɔyɛ sɛɛ na aha yenwo dwirɛ ahyire afoforɛ? Mmrandeɛ ne ndaluwa bɔ bɛwɔ asafo nanu ne, aso ɛkɔhora kɔto asaa kɔfrɛ bɛ, ná ahyɛ bɛ ngunaen? Aso ɛkɔhora ne bɛ kɔhɔ asɛnga, ná anigye bɔ anya ye wɔ Yehowa soen nu ne, aha bie ahyire bɛ? Elihu bɔ ɔtenane ase tete ne hane kyɛ: “Ma mbanyi mɔ bedwudwo, ná ma bɛ bɔ bɛ nye afi ne behyire bɛ nworɛ.” (Yob 32:7) Somafoɛ Pɔɔlo tuli Kristofoɛ mmrasua bɔ bɛnwo akokwa ne foɛ kyɛ, bɛhyɛ afoforɛ ngunaen, na bɛbɔ bra pa má besuesua. Ɔhworɔle kyɛ: “Kyirekyire nworowaa nemɔ ma . . . bekyirekyire bɔ ɔte paa ɔ.”—Tito 2:3.
Bible Nu Dwirɛ Titire
it-1 768
Yufreti
Aseɛ bɔ bɛfa bɛmane Yisraelfoɛ ne, nekaa bɔ né yenoa kodwu ɔ. Yehowa ne Abraham yɛle apam kyɛ ɔkɔfa aseɛ bie kɔma ye boso ama. Né sɔ aseɛ ne hyɛ yebo ‘fi Misraim asue noa, kodwu asue piri Yufreti noa.’ (Gye 15:18) Yehowa sa sili sɔ dwirɛ naso hyirele Yisraelfoɛ ne. (Ɛks 23:31; Deu 1:7, 8; 11:24; Yos 1:4) 1 Aberɛso Dwirɛ 5:9 ne maa yenwu bɔ Ruben boso ama biemɔ yɛle ɔ. Yeɛ ole kyɛ, né Gileade aseɛ ne te kaa ma bɛ. Yeti, aseɛ bɔ ɔla ‘eyia afiteleɛ alaa kodwu ɛserɛ bɔ ɔla asue Yufreti nwo ne,’ benu biemɔ bɛɛtena berɛ. Ɛserɛ bɔ né ɔla Siria kuro ne noa ne, né ɔboka ye. Ofi “Gileade eyia afiteleɛ” kodwu Yufreti asue ne noa ne, ye tendenn nu kɔyɛ kilomita 800, anaa kwanzii 500. (1Abe 5:10) Ɛbɔ bɔ Yehowa hyɛle Abraham ne, olimoa wale nu mmerɛ bɔ né Dawide di hene ne. Ofikyɛ sɔ mmerɛ ne, Dawide ho fale aseɛ bɔ ɔla Soba alaa kodwu Yufreti asue noa ne. Ɛhe kyire kyɛ, né aseɛ bɔ ɔla Siria sorɔdɔ ne amukoraa boka ye. Yeti Solomon aberɛ so po de, né ɔnyɛ se koraa kyɛ ebie konwu kyɛ sɔ bɔhyɛ ne awa nu ɔ. (2Sa 8:3; 1Ahe 4:21; 1Abe 18:3-8; 2Abe 9:26)
AUGUST 12-18
NYAMEƐ DWIRƐ NANU ASUADEƐ EDWEIN 73-74
Nnɛmaa Wɔnye Boro Bɛbɔ Bɛnzo Nyameɛ Ne
w20.12 19 ¶14
“Yehowa Pepɛ Dé Bɛbɔ B’abanu Abu Ne”
Bɔ ɔhworɔle Edwein 73 ne, né ɔte Lewiniɛ, na né ɔyɛ adwuma wɔ asɔre awuro berɛ. Né ɛhe te yenwo atee pirikua paa. Nakoso odwuli nekaa bie ne, ye abanu buli. Nzuati ɔ? Ofikyɛ, né yenye boro abɔnefoɛ. Nna nningyein tɛɛ bɔ bɛyɛ ne, yeɛ né yenye boro hɔ oo, na mmom, kyɛbɔ né banya bɛnwo ne. (Edw. 73:2-9, 11-14) Né waayɛ kyɛ nikyee biala kɔye ma bɛ. Esikaa a, esikaa; bɛte apɔ, na nikyefee nha bɛ. Mmerɛ bɔ dweintolɛniɛ ne nwuni bɔ ɔkɔso ne, ye abanu buli alaa maa ɔhane kyɛ: “Nahorɛ nu, m’ahone bɔ mate nu sannwuu ne, ɔne me sa bɔ manwunzi mafa mahyire kyɛ medi be ne, mafɛ magua mbaen.” Sɔ adwene bɔ onyane ne, né ɔyɛ suro paa. Ofikyɛ, ne ɔkɔhora kɔmaa ɔkɔyakyi Yehowa soen.
w20.12 19-20 ¶15-16
“Yehowa Pepɛ Dé Bɛbɔ B’abanu Abu Ne”
Kenga Edwein 73:16-19, 22-25. Lewiniɛ ne hɔle “Nyameɛ nekaa krongron berɛ.” Ɔkɔyɛ kyɛ ɔne oliemamɔ beeyiale nu bɛsone Yehowa. Ɛhe maa onyane yenwo atee susuli edwirɛ nanwo yé, na ɔbɔle yenwo mbaeɛ. Oonwuni kyɛ sɔ adwene bɔ wanya ye ne, nworɛ biala nne nu. Na nekaa bɔ ɔkeka kɔ ne, sɛ wannea yé a, ɔkɔhora kɔyakyi Yehowa soen po. Ɔɔtele yebo kyɛ, abɔnefoɛ nemɔ ‘gyi nekaa bɔ ɛberɛ yɛ ndono ɔ,’ na ‘bayieleɛ kɔwa mvum nu.’ Sɛ né onwu abɔnefoɛ kyɛbɔ Yehowa nwu bɛ ne a, né ɔngɔmaa ye abanu ngobu, na yenye ngɔboro bɛ koso. Né ɛhe kɔmaa ye so anu kodwo ye, ná wafa anigye waso Yehowa bieku. Ɔhahyirele Yehowa kyɛ: “Membena hwee wɔ aseɛ ye aso, sana wɔ ala.”
Bɔ yesua yefi nu ɔ. Abɔnefoɛ bɔ wayɛ kyɛ nningyein kɔye ma bɛ ne, nnɛmaa wɔnye boro bɛ lle. Ofikyɛ sona nye so de, ɛkɔha kyɛ bɛnye gye, nakoso ɔngyɛ na watu wamini. Yeɛ belle anyelasoɛ biala koso. (Nwo. 8:12, 13) Sɛ ɛmaa wɔnye boro bɛ a, wabanu kobu, na ɔkɔsɛkye ɛne Yehowa afia. Yeti, mmerɛ biala bɔ ekonwu kyɛ wɔnye pena boro abɔnefoɛ ne, suesua bɔ Lewiniɛ ne yɛle ne; tie Yehowa afutue. Afei mmenia bɔ bɛyɛ bɔ Yehowa kuro ne, fa wɔnwo bɔ bɛ. Sɛ ɛdɔ Yehowa, na ɛfa ye yɛ wɔ nikyee biala a, ɔkɔmaa wɔ so anu kodwo wɔ. Nna ɛhene angome, na mmom, ɛkɔhɔ so kɔfa atee bɔ ɔkɔ “daa ngoa” nu naso.—1 Tim. 6:19.
w14 4/15 4 ¶5
Suesua Gyidie Bɔ Né Mose Le Ye Ne
Ɛkɔyɛ sɛɛ ná ahwe wɔnwo afi bɔne nu anigye bɔ ɔndena berɛ daa nanwo? Kae kyɛ, sɛ ɛfa wɔnwo wura nu a, ɔngyɛ na wate wɔnye so waenn. Sɛ ele gyidie a, ekonwu kyɛ “ewiase ne nu akɔnnɔ gu so ɔpɛ nu kɔ.” (1 Yoh. 2:15-17) Abɔnefoɛ bɔ bennu bɛnwo ne, kae bɔ ɔla benyunu ɔnwondɛ bɛ ɔ. Yeɛ ole kyɛ, ‘bɛ gyi nekaa bɔ ɔyɛ ndono ɔ . . . bɛ boso konua koraa!’ (Edw. 73:18, 19) Sɛ nikyee bie twetwe wɔ kyɛ ɛyɛ bɔne a, bisa wɔnwo kyɛ, ‘Sɛ meyɛ sɔ nikyee ne a, nzu yeɛ ɔkɔto me kyeabie ɔ?’
w13 2/15 25-26 ¶3-5
Yere Wɔnwo Má Nyameɛ Hyɛ Wɔ Animnyam
Dweintolɛniɛ ne hane kyɛ, Yehowa kotira ye sa famaa nu, ná wafa ye wahɔ animnyam nu. Ɛhe kyire kyɛ né ole Yehowa nu gyidie. (Kenga Edwein 73:23, 24.) Sɛɛ yeɛ Yehowa hyɛ ebie animnyam ɔ? Ye asomvoɛ bɔ bɛbrɛ bɛnwo ase ne, ɔhyɛ bɛ animnyam wɔ atee pee so. Ebie yeɛ ole kyɛ, bɔ ogyi yenye so kyɛ ɔkɔyɛ ye kyeabie ne, ɔboka bɛ maa bɛte yebo. (1 Kor. 2:7) Bɛbɔ betie ye dwirɛ, ná bɛfa bɛyɛ adwuma ne, ohwie ye nhyiraa gua bɛ so. Ɔmaa bɛfa ye adamvoa, na ɛhe te yenwo atee pirikua paa.—Yak. 4:8.
Afei koso, Yehowa afa agyapadeɛ bie awura bɛbɔ bɛso ye ne sa. Ɛhene yeɛ ole nzɛmba bɔ bɛka ne. (2 Kor. 4:1, 7) Ebiala bɔ ɔyɛ sɔ adwuma ne bie ne, okyire kyɛ Yehowa ahyɛ ye animnyam. Bɛbɔ bɛyɛ asɛnga adwuma ne bie ne, bɛmaa Yehowa nye gye, na ɔboka mmenia koso. Yehowa ahyɛ bɔ kyɛ: “Bɛ bɔ bedi me ni ne, me koso ngoli bɛ ni.” (1 Sam. 2:30) Atee bɔ Yehowa fa so di bɛ ni yeɛ ole kyɛ, ɔmaa benya dumaa pa wɔ ye nyunu. Na bɛ bɔ bɛne bɛso Yehowa ne koso, bɛbɔ bɛ dumaa pa.—Any. 11:16; 22:1.
Bɛbɔ ‘bɛnye la AWURADE so, ná bɛfa ye atee so’ ne, nzu yeɛ bekonya ye kyeabie ɔ? Bɛnea atee kyɛ bekonya daa ngoa. Wahyɛ bɛ bɔ kyɛ: “Ma wɔ nye la AWURADE so, ná nate ye atee so, na ɔkɔpagya wɔ maa aseɛ ne kɔyɛ w’agyapadeɛ; na wɔ nye konwu kyɛbɔ bɔnefoɛ bɛ boso onua ɔ.” (Edw. 37:34) Ɛhe te animnyam pirikua bɔ ɛfa nikyefee toto yenwo a, ɔnyɛ yé ɔ.—Edw. 37:29.
Bible Nu Dwirɛ Titire
it-2 240
Ɛlɛngyɛen
Atee bɔ Yehowa fale so pepɛ lɛle ye mmenia ne, yeɛ Dwein 74 ka yenwo dwirɛ ɔ. Ngyekyɛmuɛ 13 ne 14 ne po de, kyɛbɔ Yehowa lɛle Yisraelfoɛ nemɔ fili Egypt ne, ɔfa toto nningyein biemɔ nwo. Wɔ sɔ tworɔnzɛm nanu ne, ɔhane nzue nu kaka pirikua bie nwo dwirɛ. Sɔ kaka ne tekyɛ “Ɛlɛngyɛen.” Ɔtoale so kyɛ, bɛ gorɔgorɔle ye ti. Ɛhene gyi berɛ ma kyɛbɔ Yehowa sɛkyele Faro ne ye asogyafoɛ nemɔ wɔ ɛpo nanu ne. Hebri tworɔnzɛm bɔ behyirele yebo bɛhɔle Aram dwudwolɛ nu ne, sɔ alaa yeɛ ɔhane ɔ. Ɔnwa bɛ gorɔgorɔle “Faro ne ye asogyafoɛ nemɔ.” Wammɔ “ɛlɛngyɛen” biala dumaa wɔ berɛ. (Fa toto Hes 29:3-5 nanwo. Ɛberɛ ne, bɛfale Faro bɛtotole kaka pirikua bie bɔ ɔla asue Naele nu nanwo. Ɛkɔhora kɔnea Hes 32:2 ne koso.) Yesaya 27:1 po de, ɔfa Ɛlɛngyɛen ne toto ahyehyɛdeɛ bie bɔ ɔwɔ ewiase amukoraa nwo. Bɔ ɔla sɔ ahyehyɛdeɛ ne noa yeɛ ole “ewoo” anaa “sasrabɔnzam.” (Nye 12:9) Edwirɛ bɔ ɔwɔ Yesaya 27:1 ne, ɔte ngɔm bɔ ɔfa kyɛbɔ né Yehowa kole Yisrael maen nanu ko. Yeti, ɛlɛngyɛen bɔ Yehowa kɔfa ngrandɛ kɔwa ye so ne, né ogyi berɛ ma Babilɔn. Ngyekyɛmuɛ 12 ne 13 ne maa yenwu kyɛ, Asiria ne Egypt koso boka so. Ɛhe maa yenwu kyɛ, ɛlɛngyɛen bɔ Bible ne hane yenwo dwirɛ ne, ogyi berɛ ma maen biemɔ bɔ bedwɔso betia Yehowa, ɔne bɛbɔ bɛso ye ne.
AUGUST 19-25
NYAMEƐ DWIRƐ NANU ASUADEƐ EDWEIN 75-77
Nzuati Yeɛ Ɔnzɛkyɛ Ɛhoahoa Wɔnwo Ɔ?
w18.01 28 ¶4-5
Pɔɔlo hane kyɛ mmenia kɔyɛ pɛsɛmangomenya, na bɛnye kɔboro sikaa. Osa hane kyɛ ebiemɔ kɔyɛ anwohoahoa, anwomasoɛ, na bekoli bɛ ti piri. Nzu yeɛ ɔmaa mmenia da sɔ subaen nemɔ ali ɔ? Ebia besusu kyɛ bɛse nikyee bie yɛ, bele sikaa, bɛnwo yɛ nyemene, anaa bele tumi. Ɛhe ati, ɔmaa bebu bɛnwo kyɛ bɛtra ebiala. Bɔ bekuro paa yeɛ ole kyɛ mmenia kɔhoahoa bɛ. Mmenia bɔ bɛhoahoa bɛnwo ne, ebie bɔ ɔse nwomaa hane bɛnwo dwirɛ kyɛ: “Sona ne bu yenwo alaa maa, ye ahone nu ne, osusu kyɛ ɔte nyameɛ po.” Ebiemɔ ka kyɛ, mmenia bɔ bɛhoahoa bɛnwo ne po, sɛ benwu kyɛ ebie hoahoa yenwo a, ná ɔyɛ bɛ ahi.
Ebie bɔ ɔma yenwo so de, Yehowa nguro ye dwirɛ koraa. Okyi “anyeɛ bɔ ɔtra ye ndo nwiaa” kɔkɔɔkɔ. (Any. 6:16, 17) Ebie ma yenwo so a, ɔngɔhora ngopingye Nyameɛ. (Edw. 10:4) Abɔnzam subaen ɛne, yeti sɛ ebie yɛ sɔ a, né osuesua ye. (1 Tim. 3:6) Nakoso bɛbɔ né bedi nahorɛ bɛma Yehowa tete ne, benu biemɔ mane bɛnwo so. Benu ko yeɛ ole Yusia bɔ né ɔte Yuda hene ne. Bible ne maa yenwu kyɛ olili nahorɛ mane Yehowa afoɛ pee. “Nakoso mmerɛ bɔ Yusia nyane tumi ne, ɔyɛle anwomasoɛ, na ɔnate so ye ayieleɛ wanyie ye yé. Ɔyɔle bɔne tiale AWURADE ye Nyameɛ, ofikyɛ ye bɔbɔ ɔhɔle AWURADE asɔneyɛɛ sua ne anu ɔɔyerale ɛyɛɛ wɔ ɛyɛɛ afɔleɛ bokyea ne aso.” Ɔhene Hesekia koso, odwuli nekaa bie ne, ɔmane yenwo so. Nakoso ye de, wangyɛ biala yeɛ yenye wale yenwo so ɔ.—2 Abe. 26:16; 32:25, 26.
w23.04 5 ¶11, 12
Yesu anwanwadeɛ bɔ ɔmaa nzue kakyili nzaa ne, nzu yeɛ yesua yefi nu ɔ? Yeɛ ole anwobrɛaseɛ. Anwanwadeɛ bɔ Yesu yɛle ne, wamva wandwa ye noa nu. Nikyee biala bɔ Yesu yɛle ne, wamva wanhoahoa yenwo lle. Na mmom, né ɔbrɛ yenwo ase, na ɔfale nikyee biala nwo animnyam mane Yehowa. (Yoh. 5:19, 30; 8:28) Sɛ yesuesua Yesu na yɛbrɛ yɛnwo ase a, ɔkɔboka yɛ. Yeti nikyee biala bɔ yɛkɔyɛ ye wɔ y’abrabɔ nu ne, nnɛmaa yɛfa yɛhoahoa yɛnwo lle. Na mmom, odikyɛ yɛhoahoa yɛnwo kyɛ Yehowa amaa yanya yenwo atee yɛso ye ɔ. (Yer. 9:23, 24) Ɛmɔma yɛfa animnyam ne yɛma Yehowa, ofikyɛ, ye ala yeɛ ɔfata ye ɔ. Sɛ Yehowa nne nu a, nzu paa yeɛ yɛkɔhora yɛkɔyɛ ɔ?—1 Kor. 1:26-31.
Má yɛnea atee foforɛ bɔ yɛkɔhora yɛkɔfa so yekosuesua Yesu anwobrɛaseɛ ne. Wɔde, susu edwirɛ he anwo nea: Asafo nu somvoɛ bie kwaama ye dwudwolɛ bɔ olimoa. Yeti, asafo nu panyi bie tole ye boase bokale ye. Ɛhe ati, ye dwudwolɛ ne hɔle yé, na aliemaamɔ koso nye gyele yenwo paa. Bɛpɔnone adesua ne, aliemaa bie hɔle asafo nu panyi ne berɛ, yeɛ obisale ye kyɛ: ‘Enwuni abrandeɛ ne dwudwolɛ ne sɛ? Ennwu ye kyɛ ɔhɔle ye paa ne?’ Ɛnea a, odikyɛ asafo nu panyi ne ka kyɛ: ‘Me yeɛ mmokale ye ɔ?’ Anaa odikyɛ ɔbrɛ yenwo ase na ɔka kyɛ: ‘Yoo, ɔyɛle nikye, wamaa menye agye paa.’ Sɛ yɛbrɛ yɛnwo ase a, ɔkɔmaa sɛ yɛyɛ nikyee bie yɛma ebie a, yɛngɔfa ngɔhoahoa yɛnwo. Ye mia yɛse kyɛ Yehowa nwu bɔ yɛyɛ namu, na yenye sɔ koso. Yeti ɛhene ala po te pa. (Fa toto Mateo 6:2-4; Heb. 13:16 nanwo) Bɔ ɔte yeɛ ole kyɛ, sɛ yesuesua Yesu na yɛbrɛ yɛnwo ase a, ɔmaa Yehowa nye gye.—1 Pet. 5:6.
Bible Nu Dwirɛ Titire
w06 7/15 11 ¶3
Edwein Nwomaa Ne Bue Bɔ Ɔtɔ So Nza Ne Nna Nanu Dwirɛ Titire
Edwein 76:10—Atee beni aso yeɛ “mmenia yaafɛlɛ” kora kakyi ayɛyelɛ ma Yehowa ɔ? Ɔtɔ mmerɛ bie a, yɛ bɔ yɛso Yehowa ne, ɔma atee maa mmenia fɛ yɛ so yaa. Ɔba sɔ a, ɔkora maa yenwu amaneɛ paa. Nakoso, nikyee pa bie kora fi nu ba. Yeɛ ole kyɛ, osiesie yɛ, anaa ɔmaa yɛ gyidie yɛ se. Ɛhene ti yeɛ Yehowa ma atee maa yenwu amaneɛ ne. (1 Petro 5:10) Ɛhe ati yeɛ Bible ne ka kyɛ, bɛ yaafɛlɛ ne, Nyameɛ fa ye ngaa ne hyɛ yenwo animnyam ne. Yede, sɛ beku yɛ koso ɛ? Ɛhe koso hyɛ Yehowa animnyam. Bɔ ɔmaa yɛka sɔ yeɛ ole kyɛ, sɛ mmenia nwu kyɛbɔ yɛfa nahorɛlilɛ yegyina nu ne a, ɔmaa bɛkamvo Yehowa.
AUGUST 26–SEPTEMBER 1
NYAMEƐ DWIRƐ NANU ASUADEƐ EDWEIN 78
Né Yisraelfoɛ Nemɔ So Yɛ Se—Nnesuesua Bɛ
w96 12/1 29-30
“Kae Daa Tete Mmerɛ Ne”—Nzuati Ɔ?
Aworabɔlɛ dwirɛ yeɛ ole kyɛ, Yisraelfoɛ nemɔ wora fili Yehowa mmraa. Yede, nzu yeɛ ofili nu wale ɔ? “Besole Nyameɛ bɛneane mmerɛ pee, na bewurale Yisrael Krongronniɛ ne apue. Bangaye ye tumi ne, anaa kyẽa bɔ olele bɛ fili pɔfoɛ ne sa nu ɔ.” (Edwein 78:41, 42) Yehowa mmraa bɔ banni so nati, odwuli nekaa bie ne, ɔpole bɛ.—Mateo 21:42, 43.
Edweintolɛniɛ ne yɛle nikyee bie bɔ yɛkɔhora kosuesua ɔ. Ɔhane kyɛ nyoo: “Ngɔkaye AWURADE nnwumaa bɔ ɔyɔ ne; amba, ngɔkaye wɔ daa tete anwanwadeɛ nemɔ. Ngɔdwenedwene wɔ nnwumaa amukoraa nwo, ná masusu w’anwanwadeɛ mɔ nwo.” (Edwein 77:11, 12) Sɛ yɛyɛ sɔ a, ɔkɔboka yɛ maa yɛkɔso Yehowa yé, ɔkɔhyɛ yɛ ngunaen, na yahyire anisɔ yama nningyein bɔ wayɛ wama yɛ ne. Afei koso, sɛ ‘yɛkae daa tete mmerɛ ne’ a, ɔkɔboka yɛ maa yekomia yɛnye yekogyina ɔhaw biala bɔ ɔkɔto yɛ ne noa.
w06 7/15 17 ¶16
‘Ɛyɛ A Nnɛbobɔ Wɔ Boin’
Sɛ yenwiinwii, anaa yɛbobɔ yɛ boin a, bɔ okyire yeɛ ole kyɛ yɛte pɛsɛmangomenya, na yenwo atee bɔ yele ye kyɛ Yehowa Adanzefoɛ ne po, yɛnye nzɔ. Yenwo atee bɔ yele ye kyɛ Yehowa Adanzefoɛ ne, ɔte akyɛdeɛ bɔ ɔsom bo paa. Sɛ yɛmaa ɔtena y’adwene nu sɔ a, ɔkɔmaa sɛ yɛfa ɔhaw nu po a, yɛngɔbobɔ yɛ boin. Wɔde, nea kyɛ Yehowa dumaa la wɔ so ɔ, ɛngɔhora ngɔfa nikyefee ngɔtoto yenwo. (Yesaya 43:10) Yɛkora yɛfa Yehowa adamvoa, ná yɛne ye adwudwo mmerɛ biala, ofikyɛ ‘otie mbaeɛ.’ (Edwein 65:2; Yakobo 4:8) Yɛ dwirɛ nyɛ anwumvo, ofikyɛ yele anyelasoɛ. Bɔ ɔmaa ɔte sɔ yeɛ ole kyɛ, edwirɛ bɔ wadwɔso wɔ Yehowa tumidie nwo ne, yɛte yebo. Yeɛ wamaa yanya yenwo atee kyɛ, yɛyɛ nikyee bie yɛfa yehyire kyɛ yɛta ye tumidie si. (Anyandera 27:11) Ahennie nanwo nzɛmba ne koso, Yehowa ama yɛ atee kyɛ yɛha bie. (Mateo 24:14) Yɛse kyɛ Yesu fale ye ngoa tole berɛ mane yɛ, yeti sɛ yenya ye nu gyidie a, ɔmaa yenya tiboa pa. (Yohane 3:16) Ɛhe amukoraa te nningyein bɔ Yehowa afa alo yɛ ɔ. Yeti sɛ yɛfa ɔhaw nu po a, yɛmva y’adwene yɛngɔ so.
w11 7/1 10 ¶3-4
Aso Yehowa Kora Di Yealɛ?
Dweintolɛniɛ ne hane kyɛ: “bɛyɛle ye nwo lɔen wɔ ɛserɛ so mmerɛ pee.” (Edwein 78:40) Ɔtoale ye dwirɛ naso kyɛ: “Besole Nyameɛ bɛneane mmerɛ pee.” (Edwein 78:41) Sɛ ɛnea ye dwirɛ nanu yé paa a, né ɔpena kyire kyɛ, Yisraelfoɛ nemɔ so yɛ se alaa maa ɛyɛ bɛ hwee a, ɔnyɛ yé. Befili Egypt nala yeɛ bɛhyɛle sɔ subaen tɛɛtɛɛ nabo ɔ. Né b’adwene yɛ bɛ kyɛ Yehowa ngɔhora ngɔnea bɛ. Yeti bɛhyɛle yebo kyɛ bɛbobɔ bɛ boin. (Numeri 14:1-4) Nwomaa bie bɔ bɛyɛ bɛmane bɛbɔ bekyire Bible nabo hane kyɛ: Edwirɛ “bɛyɛle ye nwo lɔen” ne, “bɛkɔhora bekohyire yebo kyɛ, ‘bɛmaa b’ahone yɛle se wɔ Nyameɛ nwo,’ anaa ‘bɛhane “Daabi” behyire Nyameɛ.’” Ɔmva yenwo ne bɔ bɛyɛle ne, sɛ benu bɛnwo a, né Yehowa nwu bɛ anwumvoin ná wafa wahyɛ bɛ. Nakoso, né bɛ dwirɛ ne ayɛ kyɛ prako bɔ babia ye ɔ. Ɛyɛ ye sɛ, okosa kɔɔboro asaa.—Edwein 78:10-19, 38.
Sɛ Yisraelfoɛ nemɔ yɛ asoserɛ a, sɛɛ yeɛ né Yehowa te nga ɔ? Edwein 78:40 ka kyɛ nyoo, ‘bɛmaa ye wora bɔle.’ Bible ngyerɛaseɛ foforɛ ka kyɛ, “bɛyɛle nikyee bie maa olili yealɛ.” Nwomaa bie bɔ okyirekyire Bible nanu ka kyɛ: “Sɛ akwalaa bie so yɛse alaa maa ɛtea ye a ɔnde a, kyɛbɔ ɔmaa ye awofoɛ di yealɛ ne, sɔ ala yeɛ Yehowa koso tele nga ɔ.” “Bewurale Yisrael Krongronniɛ ne apue,” kyire kyɛ, bɛ maa ye wora bɔle paa.—Edwein 78:41.
Bible Nu Dwirɛ Titire
w06 7/15 11 ¶4
Edwein Nwomaa Ne Bue Bɔ Ɔtɔ So Nza Ne Nna Nanu Dwirɛ Titire
Edwein 78:24, 25—Nzuati yeɛ né bɛfrɛ manna ne kyɛ “nyameɛso aleɛ,” ɔne “abɔfo aleɛ” ɔ? Edwirɛ nyɔ nanu biala nne berɛ bɔ okyire kyɛ né abɔfo nemɔ di manna ɔ. Bɔ yeti yeɛ né bɛfrɛ ye “nyameɛso aleɛ” yeɛ ole kyɛ, ne ofi anwuro yeɛ ɔba ɔ. (Edwein 105:40) Yede, sɛ bɛka kyɛ ɔte abɔfo aleɛ a, ɛhene koso kyire sɛɛ? Yɛse kyɛ abɔfo de awuro yeɛ bɛwɔ ɔ, na Yehowa bɔ ɔfa mane bɛ ne koso, ɛberɛ alaa yeɛ ɔte ɔ. Yeti sɛ bɛka kyɛ ɔte abɔfo aleɛ a, ndeaseɛ wɔ nu. (Edwein 11:4) Ɔkɔhora koso kɔwa kyɛ manna bɔ Yisraelfoɛ nemɔ lili ne, Yehowa nate abɔfo so yeɛ ɔfa mane bɛ ɔ.