“Ɛmɔgyina Pindinn, Nnɛmaa Ɛmɔhinhim”

1-2. Nzuati yeɛ bɛfa Kristoniɛ bɛtoto aborɔsaen nwo ɔ? (1 Korintofoɛ 15:58)

WƆ AFOƐ 1978 nu ne, besili aborɔsaen bie bɔ ɔtoa so 60 wɔ Tokyo, bɔ ɔwɔ Japan ne. Né sɔ sua ne wale paa, yeti sɛ ebie gyi dédé pó a, ne ɔkora nwu ye. Ɔnate kyɛ aseɛ taa woso wɔ berɛ nati, né mmeni pẽe susu kyɛ sɛ aseɛ woso a, sɔ sua ne kobu. Nakoso, ɔnate atẽe bɔ bɛfale so besili sua nati, sɛ aseɛwosolɛ bie si a, sua ne kora woso, nakoso ommu. Kristofoɛ te kyɛ sɔ aborɔsaen ne. Nzuati yeɛ yɛkã sɔ ɔ?

² Ebie te Kristoniɛ a, odikyɛ ɔyere yenwo kyɛ ɔkɔfa Yehowa mmraa kɔbɔ ye bra, ɔmva yenwo ne bɔ okosi biala. Nakoso, ɛhẽne ngyire kyɛ ɔkɔmaa ye dwirɛ kɔyɛ se. (Kenga 1 Korintofoɛ 15:58.) Kristoniɛ bɔ ɔte sɔ ne, “yeso yɛ mmerɛ,” yeti ɔmva Yehowa mmraa nni angorɛ. Nakoso sɛ edwirɛ bie si na odikyɛ ɔda ndeaseɛ ali a, ɔyɛ sɔ. (Yak. 3:17) Yeti, odikyɛ Kristoniɛ biala yere yenwo kyɛ ɔkɔfa ye gya kosie ase, na wafa Yehowa mmraa wabɔ ye bra. Nakoso, sɛ mmenia kyire b’adwene wɔ edwirɛ bie nwo a, odikyɛ otie. Wɔ adesũa he anu ne, yɛkɔnea nningyein biemɔ bɔ yɛyɛ a, okyire kyɛ yɛfa Yehowa mmraa yɛbɔ yɛ bra ɔ. Afei koso, Satan mbena kyɛ yekotie Yehowa, yeti yekonwu atẽe 5 bɔ ɔfa so yɛ sɔ ɔ. Afei, yekonwu bɔ yɛkɔyɛ na Satan annya yɛ ɔ.

YƐKƆYƐ SƐƐ NÉ YAFA YEHOWA MMRAA YABƆ YƐ BRA?

3. Mmraa bɔ Yehowa ahyɛ ne, enu beni yeɛ ɔwɔ Asomafoɛ 15:28, 29 ne ɔ?

³ Yehowa yeɛ ɔfata kyɛ ɔhyɛ mmraa ma yɛ ɔ. Ɛhẽne ati, daa ɔhyɛ mmraa bɔ enu la berɛ ma ye mmenia. (Yes. 33:22) Sɛ yɛnea asomafoɛ nemɔ aberɛ so a, Yehowa nate Akwangyerɛ Kue naso mane Kristofoɛ nemɔ akwangyerɛ. Wɔ sɔ akwangyerɛ nanu ne, Akwangyerɛ Kue ne maa benwuni kyɛ, sɛ bɛkɔhora bɛkɔsõ Yehowa yé a, odikyɛ bɛyɛ nningyein nzã bie. Yeɛ ole kyɛ: (1) nnɛmaa bɛsõ bosoen, na mmom odikyɛ bɛsõ Yehowa ngome (2) odikyɛ bɛtwẽ bɛnwo befi mogya nwo, ɔne afei (3) odikyɛ bɛtwẽ bɛnwo befi adwamamɔ nwo. (Kenga Asomafoɛ 15:28, 29.) Kristofoɛ bɔ bɛwɔ berɛ ɛnnɛ ne, bɛkɔyɛ sɛɛ né bafa sɔ dwirɛ he babɔ bɛ bra?

4. Nzu yeɛ yɛyɛ a, okyire kyɛ yɛsõ Yehowa ngome ɔ? (Nyekyire 4:11)

⁴ Yɛnnzõ bosoen, na mmom yɛsõ Yehowa ngome. Yehowa hãhyirele Yisraelfoɛ nemɔ kyɛ, nnɛmaa bɛsõ nyameɛ foforɛ biala bɛboka ye so. (Deut. 5:6-10) Afei koso, mmerɛ bɔ Abɔnzam hãhyirele Yesu kyɛ ɔsõ ye ne, Yesu hãhyirele ye kyɛ, Yehowa ngome yeɛ odikyɛ yɛsõ ye ɔ. (Mat. 4:8-10) Yeti yɛnzõ bosoen, na yɛmva abaduaba biala yenzie berɛ kyɛ yɛfa so yɛsõ Yehowa. Afei koso mmenia bɔ bale dumaa tekyɛ amanyɔfoɛ, asɔfo, bɛbɔ bɛbɔ bɔɔl, bɛbɔ bɛye sini, anaa bɛbɔ bɛto dwein ne, yɛnhoɔhoa bɛ anaa yɛnnzõ bɛ tekyɛ nyameɛ bie. Yasi y’adwene pi kyɛ Yehowa bɔ ɔbɔle “nningyein amukoraati” ne, ye ngome twé yeɛ yɛkɔsõ ye ɔ.—Kenga Nyekyire 4:11.

5. Nzuati yeɛ yetie Yehowa, na yɛtwẽ yɛnwo yefi mogya nwo ɔ?

⁵ Yetie Yehowa, yeti yɛtwẽ yɛnwo yefi mogya nwo. Bɔ yeti yeɛ yɛyɛ sɔ yeɛ ole kyɛ, ngõa te akyɛdeɛ bɔ ofi Yehowa berɛ, na wahã kyɛ anwoɔnaen biala ye mogya yeɛ ɔte ye ngõa ɔ. (Lew. 17:14) Mmerɛ bɔ Yehowa limoa hãne kyɛ, sona kɔhora kohũ ngaka ne bie koli ne, ɔhãne kyɛ nnɛmaa bedi ye mogya bɛbokaso. (Gye. 9:4) Yehowa sa hãne sɔ dwirɛ nala hyirele Yisraelfoɛ nemɔ wɔ Mose Mmraa nanu. (Lew. 17:10) Afei koso wɔ asomafoɛ nemɔ aberɛ so ne, Yehowa nate Akwangyerɛ Kue naso hãhyirele Kristofoɛ nemɔ kyɛ bɛhwẽ bɛnwo befi mogya nwo. (Aso. 15:28, 29) Yeti, atẽe bɔ yɛpena kyɛ bɛfa so bɛsa y’anwonyerɛ ne, sɛ yesi yenwo gyinayɛɛ a, odikyɛ yɛfa sɔ dwirɛ he yɛyɛ adwuma.b

6. Yehowa mmraa bɔ ɔfa adwamamɔ nwo ne, sɛ yɛkɔhora yɛkɔfa yɛkɔyɛ adwuma a, nzu yeɛ odikyɛ yɛyɛ ɔ?

⁶ Yehowa mmraa bɔ ɔkã kyɛ yɛhwẽ yɛnwo yefi adwamamɔ nwo ne, yɛfa yɛyɛ adwuma. (Heb. 13:4) Somafoɛ Pɔɔlo hyirehyirele sɔ dwirɛ nanu kyɛ, yehũ yɛ nipadua akwaa ne. Sɔ dwirɛ ne kyire kyɛ, nikyee biala bɔ ɔkɔtwẽtwẽ yɛ maa yɛkɔɔbɔ adwaman ne, odikyɛ yɛyere yɛnwo paa kyɛ yɛkɔhwẽ yɛnwo yekofi yenwo. (Kol. 3:5; Yob 31:1) Yeti sɛ nikyeebie sɔ yɛ nea kyɛ yɛyɛ bɔ Yehowa nguro a, odikyɛ yɛtwẽ yɛnwo yefi yenwo ndɛ.

7. Nzu yeɛ odikyɛ yɛyere yɛnwo kyɛ yɛkɔyɛ ɔ, na nzuati ɔ?

⁷ Yehowa pena kyɛ yefi y’ahõne mukoraati nu yɛyɛ sotie yɛma ye. (Rom. 6:17) Yehowa mmraa de, enu la berɛ, na ɔnyɛ se kyɛ yekoli so ɔ. Yeti sɛ yɛfa yɛbɔ yɛ bra a, yɛbɔbɔ yeɛ ɔkɔboka yɛ ɔ. (Yes. 48:17, 18; 1 Kor. 6:9, 10) Ɛhẽne ati, odikyɛ yesuesũa bɔ dweintolɛniɛ ne yɛle ne, na yɛbɔ yɛnwo mmɔden kyɛ yɛkɔyɛ bɔ Yehowa kuro ɔ. Dweintolɛniɛ ne hãne kyɛ: “Masiesie m’ahõne kyɛ ngoli w’ahyɛdeɛ so daa ngoodwu ayieleɛ.” (Edw. 119:112) Nakoso, Satan yɛ bɔ ɔkɔhora biala kyɛ ɔkɔmaa yɛkɔyɛ bɔ Yehowa nguro ɔ. Atẽe beni yeɛ ɔfa so yɛ sɔ ɔ?

ATẼE AHOROƐ BƆ SATAN FA SO MAA YƐYƐ BƆ YEHOWA NGURO Ɔ

8. Sɛɛ yeɛ Satan nate ɛpɔen so maa ɔyɛ se ma yɛ kyɛ yekoli nahorɛ yɛkɔma Yehowa ɔ?

⁸ Ɛpɔen. Mmenia bɔ benguro yɛ dwirɛ ne, Satan kora maa bɛyɛ yɛ ayayadeɛ anaa bɛnwunanwuna yɛ, kyɛbɔ ɔkɔyɛ a ɔkɔyɛ se kɔma yɛ kyɛ yekoli nahorɛ yɛkɔma Yehowa ɔ. Bɔ yeti yeɛ Satan yɛ sɔ yeɛ ole kyɛ, ɔpena kyɛ yɛtwẽ yɛnwo yefi Yehowa nwo koraa. (1 Pet. 5:8) Ɔnate kyɛ né tete Kristofoɛ nemɔ pena kyɛ bedi nahorɛ bɛma Yehowa nati, befini bɛ, na behũni ebiemɔ pó. (Aso. 5:27, 28, 40; 7:54-60) Ɛnnɛ koso, sɔ ala yeɛ Satan yɛ ɔ. Sɛ yɛnea aliemaamɔ bɔ bɛwɔ Russia ɔne maen foforɛ so ne a, Satan amaa bɛtãne bɛnye paa. Ebie yeɛ ole kyɛ befi benu biemɔ, na bɛyɛ bɛ ayayadeɛ pó.

9. Sɛɛ yeɛ Satan bɔ mmɔden kyɛ ɔkɔfa mmenia so kɔlakalaka yɛ ɔ?

⁹ Ɔbɔ mmɔden kyɛ ɔkɔfa mmenia so kɔlakalaka yɛ. Nikyee foforɛ bɔ Satan bɔ mmɔden kyɛ ɔkɔfa so kɔmaa yɛkɔhwẽ yɛnwo yekofi Yehowa nwo yeɛ ole kyɛ ɔkɔlakalaka yɛ. (Ɛfe. 6:11) Sɔ dwirɛ he bie tole aliemaa bie bɔ bɛfrɛ ye Bob, mmerɛ bɔ né bɛkwaayɛ ye oprehyen ne. Ɔhãhyirele dɔktafoɛ bɔ né bɛkwaayɛ ye oprehyen ne kyɛ ongole mogya llé. Sɔ dwirɛ bɔ Bob hãne ne, dɔktafoɛ nanu kõ le tole nu. Nakoso, aleɛ baahẽ maa bɛyɛ Bob oprehyen ne, dɔktaniɛ kõ bɔ ɔboka so ne wale ye berɛ kɔngɔen mmerɛ bɔ né waha ye ngome ne. Ɔhãhyirele Bob kyɛ, mogya bɔ yenwa ongole ne de, bate yebo. Nakoso, odikyɛ bɛfa mogya ne bie besie yenwo berɛ mmerɛ bɔ bɛyɛ oprehyen ne, kyɛbɔ ɔkɔyɛ a, sɛ oprehyen nanu yɛ se a, bɛkɔfa bɛkɔma ye na wannwu. Né sɔ dɔktaniɛ ne adwene yɛ ye kyɛ, ɔnate kyɛ Bob abusũaniɛ biala nne sua nu berɛ nati, ebia ɔkɔsesã ye adwene. Nakoso Bob gyinane pindinn kyɛ ɔmva yenwo ne bɔ okosi biala ne, ongole mogya llé, yeti wanzesã ye adwene.

10. Sɛ yetie mmenia bɔ bɛmva Yehowa mmraa bɛnnyɛ hwee ne a, nzu yeɛ ɔkɔto yɛ ɔ? (1 Korintofoɛ 3:19, 20)

¹⁰ Mmenia bɔ bɛmva Yehowa mmraa bɛnnyɛ hwee. Sɛ yetie mmenia bɔ bɛmva Yehowa mmraa bɛnnyɛ hwee ne a, ɔkɔyɛ se kɔma yɛ kyɛ yɛkɔyɛ bɔ Yehowa kuro ɔ. (Kenga 1 Korintofoɛ 3:19, 20.) Ofikyɛ mmenia bɔ bɛte sɔ ne, “ewiase nworɛ” yeɛ bɛfa bɛbɔ bɛ bra ɔ, na bɛpena kyɛ ebiala yɛ sɔ. Kristofoɛ bɔ né bɛwɔ Pɛgamɔm, ɔne Tiatira asafo nanu ne, abrabɔ tɛ́ɛ bɔ né ɔkɔso wɔ kuro bɔ bɛte nu nanu ne, benu biemɔ fale bɛnwo wurale nu. Ɛhe ati, Yesu hwili sɔ asafo nemɔ nyunu kyɛ bama atẽe maa ebiemɔ bɔ adwaman ɔ. (Nye. 2:14, 20) Sɔ ala yeɛ ɛnnɛ, ebia y’abusũafoɛ, mmenia bɔ yɛne bɛ yɛ adwuma, bɛbɔ yɛne bɛ kɔ sukuu, anaa bɛbɔ bɛte yɛ mandanu ne kɔmaa yekonya adwene kyɛ Yehowa mmraa bɔ yɛfa yɛbɔ yɛ bra ne, ɔyɛ se sõma. Sɔ mmenia ne, ɛyɛ a bɛtaa bɛkã kyɛ Bible ne apɛ nu, na bɛbɔ bɛfa nu dwirɛ bɛbɔ bɛ bra ne, bɛnye bukyélle. Yeti, odikyɛ yɛnea yé, na yamma bɔ bɛkã ne anlakalaka yɛ.

11. Odikyɛ yegyina pindinn na yɛyɛ bɔ Yehowa kuro ɔ, nakoso nzu yeɛ ɔnzɛkyɛ yɛyɛ ɔ?

¹¹ Sɛ yannea yé a, yɛkɔfa y’adwene yɛkɔhyehyɛ mmraa yɛkɔboka bɔ Yehowa afa ama yɛ naso. (1 Kor. 4:6) Ahyerɛlɛfoɛ ne Farasiifoɛ bɔ né bɛwɔ Yesu aberɛ so ne, sɔ yeɛ né bɛyɛ ɔ. Bɛfale b’adwene bɛhyehyɛle mmraa bɛbokale Mose Mmraa naso. Ɛhẽne ati, mmenia bɔ né bɛwɔ b’aberɛ so ne, né ɔyɛ se ma bɛ kyɛ bekoli edwirɛ bɔ ɔwɔ Mmraa nanu naso ɔ. (Mat. 23:4) Ɛnnɛ koso, Yehowa nate Bible ne, ɔne y’ahyehyɛdeɛ naso fa akwangyerɛ bɔ enu la berɛ ma yɛ. Yeti, ɔnzɛkyɛ yɛfa yɛ bɔbɔ y’adwene yɛhyehyɛ mmraa yɛboka akwangyerɛ bɔ Yehowa afa ama yɛ naso. (Any. 3:5-7) Afei koso, edwirɛ bie bɔ odikyɛ ebiala si ye bɔbɔ ye gyinayɛɛ wɔ yenwo ne, ɔnzɛkyɛ yɛhyɛ yenwo mmraa yɛma aliemaamɔ.

12. Sɛɛ yeɛ Satan lakalaka mmenia ɔ?

¹² Satan lakalaka mmenia. “Nnakannaka mbaen,” ɔne nningyein bɔ mvasoɛ nne so bɔ ɔwɔ ewiase nanu ne, ɔte atẽe kõ bɔ Satan fa so sɛkye asomdwee bɔ ɔwɔ mmenia afĩa ɔ. (Kol. 2:8) Tete Kristofoɛ nemɔ aberɛ so ne, né sɔ nnakannaka ne wɔ berɛ paa. Ebie yeɛ ole ngyerɛkyerɛ bɔ ogyi sona nworɛ so. Afei koso, né Yudafoɛ biemɔ kyirekyire kyɛ odikyɛ Kristofoɛ di Mose Mmraa naso. Bɔ yeti yeɛ né sɔ dwirɛ nemɔ te nnakannaka yeɛ ole kyɛ, ɔhwẽne mmenia adwene fili Yehowa bɔ nworɛ mukoraati fi ye berɛ naso. Sɔ ala yeɛ ɛnnɛ Satan lakalaka mmenia ɔ. Sɛ edwirɛ bie si a, bɔ bɛkã bɛfa yenwo wɔ radio, TV, ɔne intanɛt so ne, ɔtɔ mmerɛ bie a, belle adanzeɛ biala bɔ okyire kyɛ sɔ dwirɛ ne te nahorɛ. Amanyɔfoɛ nemɔ yeɛ bɛmaa bɛfa sɔ dwirɛ ne bɛto dwaa ɔ, nakoso ye mukoraati fi Satan. Yɛtele sɔ dwirɛ he bie mmerɛ bɔ COVID-19 anwonyerɛ ne wale ne. Mmenia kekãne edwirɛ pẽe bɔ ɔtte nahorɛ bɛfale sɔ anwonyerɛ nanwo.c Nakoso Yehowa Adanzefoɛ bɔ betiele anwonyerɛ nanwo akwangyerɛ bɔ Yehowa famane bɛ ne de, benyane asomdwee, na bɛ kũnu andete bɛ.—Mat. 24:45.

13. Nningyein benimɔ yeɛ odikyɛ yɛnea yé wɔ yenwo ɔ?

¹³ Nningyein bɔ ɔkora ye y’adwene fi Yehowa sõen so ɔ. Odikyɛ yɛfa y’adwene yesie ‘nningyein bɔ ɔte pá, na yenwo hia naso.’ (Flp. 1:9, 10) Sɛ yannyɛ sɔ a, yɛkɔfa y’adwene mukoraati yekosie nningyein bɔ daa yɛyɛ ye wɔ y’asetena nu naso, na ɛhẽne kɔye y’adwene kofi Yehowa sõen so. Sɔ nningyein ne bie yeɛ ole bɔ yekoli, bɔ yɛkɔnõ, adwuma bɔ yɛkɔyɛ, ɔne nningyein bɔ yɛfa yɛgye yɛnye ne. (Luka 21:34, 35) Nikyee foforɛ bɔ ɔkora ye y’adwene fi Yehowa sõen so yeɛ ole amanyɔnzɛm nwo dwirɛ bɔ bɛkã ye wɔ radio so, TV so, ɔne nekaa bɔ yɛte ne. Sɛ yannea yé a, ɛhẽne kɔmaa yekogyina bue bie sĩ wɔ y’ahõne nu. Ɔbaadwu wa ne, yanwu atẽe ahoroɛ bɔ Satan fa so maa ɔyɛ se ma yɛ kyɛ yɛkɔyɛ bɔ Yehowa kuro ɔ. Yede, ɛmɔma yɛnea bɔ ɔkɔboka yɛ na Satan annya yɛ ɔ.

YƐKƆYƐ SƐƐ NÉ YAHƆSO YAGYINA PINDINN?

14. Nningyein beni yeɛ ɔkɔboka yɛ maa yɛkɔhɔso yɛkɔbata Yehowa nwo ɔ?

¹⁴ Dwenedwene bɔ ɔmaa ɛhyɛle Yehowa bɔ kyɛ ɛkɔsõ ye, ná ɛbɔle asu nanwo. Ɔnate kyɛ ɛdɔ Yehowa nati yeɛ ɔmaa ɛbɔle asu ɔ. Bɔ ɔbokale wɔ maa ɛyɛle w’adwene kyɛ ɛkɔsõ Yehowa ne, ɛyɛ a dwenedwene yenwo. Mmerɛ bɔ ɛhyɛle yebo kyɛ esũa Yehowa nwo nikyee ne, enwuni ye subaen ahoroɛ ne, na ɛhẽne maa enwuni kyɛ Yehowa te wɔ Baba bɔ okuro wɔ dwirɛ ɔ. Ɛhe maa enyane ɔdɔ ne obuo mane ye paa. Yehowa nwo nikyee bɔ esũane ne, ɔbokale wɔ maa enyane gyidie, yeti ɛyerele wɔnwo kyɛ ɛkɔyakyi nningyein bɔ ɔttemayé bɔ né ɛyɛ ne. Afei ɛfale bɔ né esũa ne bɔle wɔ bra, na ɛyɛle bɔ Nyameɛ kuro ɔ. Ɛhẽne sĩ ne, mmerɛ bɔ enwuni kyɛ Nyameɛ afa wɔ bɔne ahyɛ wɔ ne, w’ahõne tɔle wɔ kunu. (Edw. 32:1, 2) Ɛhyɛle yebo hɔle asafo nhyiamu, na nningyein pá bɔ asũa ne koso, ɛhãne yenwo dwirɛ hyirele mmenia. Kesaalae, ɛte Kristoniɛ bɔ abɔ asu. Afei koso, ahyɛ Yehowa bɔ kyɛ ɛkɔhɔ so kɔfa ngõa atẽe naso, na ɛngɔmaa nikyefee ngɔhwẽ wɔ ngosa.—Mat. 7:13, 14.

15. Nzuati yeɛ odikyɛ yesũa Bible ne, na yɛdwenedwene yenwo ɔ?

¹⁵ Sũa Bible ne daa, na dwenedwene yenwo. Sɛ bakaa bie bo kɔhora kotimu bɔ mvrama ngɔhora ngotu yebo a, sana ye ndĩi ne didi kɔ aseɛ nanu. Sɔ ala yeɛ odikyɛ yɛyere yɛnwo yesũa Bible ne, ná wamaa yɛ gyidie ayɛ se. Sɛ bakaa bie nyi a, ye ndĩi ne wurawura aseɛ nanu kɔ sĩɛ, na ɛhẽne maa bakaa ne nya anwoserɛ. Sɔ ala yeɛ yɛkoso, sɛ yesũa Bible ne na yɛdwendwene yenwo a, ɔmaa gyidie bɔ yele ye kyɛ Nyameɛ yeɛ ɔse bɔ ɔte pá ma yɛ ne, enu yɛ se. (Kol. 2:6, 7) Bɛbɔ né bɛsõ Yehowa bɔ bɛtenane ase tete ne, bɛfale ye akwangyerɛ ne ye mmraa bɛbɔle bɛ bra, na ɔbokale bɛ paa. Yɛ koso, sɛ yɛdwendwene bɔ bɛyɛle nanwo a, ɔkɔboka yɛ. Bɔ Hesekiel yɛle mmerɛ bɔ onyane asɔre awuro nanwo nyekyire ne, ɔmaa yenwu kyɛ sɔ dwirɛ ne te nahorɛ. Mmerɛ bɔ né abɔfo ne susu asɔre awuro ne kyire Hesekiel ne, ɔyɛle asoɛ tiele ye paa, na ɔfale ye adwene siele bɔ onwuni ye naso. Sɔ nyekyire ne bokale Hesekiel maa ye gyidie yɛle se paa. Yɛ koso, ɔboka yɛ maa yenwu kyɛ, sɛ yɛfa Yehowa mmraa yɛyɛ adwuma a, ɔkɔmaa yɛkɔsõ ye kyɛbɔ okuro ɔ.d (Hes. 40:1-4; 43:10-12) Yeti sɛ yɛkenga Bible ne, yɛdwenedwene yenwo, ná yɛyɛ nhwehwɛmuɛ a, ɔkɔboka yɛ maa yɛ gyidie kɔyɛ se.

16. Mmerɛ bɔ Bob sili ye adwene pi ne, ɔbokale ye sɛ́? (Edwein 112:7)

¹⁶ Si w’adwene pi. Ɔhene Dawide tole dwein bie, na ɔmaa yenwu kyɛ, okonya ɔdɔ kɔma Yehowa daa. Ɔhãne kyɛ: “Ao Nyameɛ, masiesie m’ahõne.” (Edw. 57:7) Yɛ koso, sɛ yɛkɔhora yɛkɔfa yɛnwo yɛkɔto Yehowa so a, odikyɛ yesiesie y’ahõne. (Kenga Edwein 112:7.) Ɛmɔma yesa yɛnea Bob bɔ yalimoa yahã yenwo dwirɛ ne. Mmerɛ bɔ dɔktaniɛ ne hãhyirele ye kyɛ bɛkɔfa mogya bekosie yenwo berɛ, na sɛ oprehyen nanu yɛ se a bafa bama ye ne, ɔmaa benwuni kyɛ sɛ bɛyɛ b’adwene kyɛ bɛkɔma ye mogya a, okofi hɔspitel berɛ kɔhɔ bɔ ɔngɔmaa bɛngɔyɛ ye oprehyen ne ɔ. Nziɛen Bob hãne kyɛ, “Né masi m’adwene pi kyɛ ɔmva yenwo ne bɔ okosi biala ne, mengole mogya ne llé.”

17. Nzu yeɛ yesũa yefi Bob dwirɛ nanu ɔ? (Nea foto ne koso.)

¹⁷ Né Bob alimoa asi ye adwene pi kora yeɛ ɔkɔ hɔspitel berɛ ɔ. Bɔ ɔbokale Bob maa ɔyɛle sɔ yeɛ ole kyɛ, bɔ olimoa, né ɔpena kyɛ ɔyɛ bɔ Yehowa kuro ɔ. Bɔ ɔtɔ so nyɔ, edwirɛ bɔ Bible ne, ɔne asafo nwomaa ahoroɛ kã fa mogya nwo ne, ɔtole yeboase sũane ye yé. Bɔ ɔtɔ so nzã, né ole gyidie paa kyɛ sɛ ɔfa Yehowa mmraa yɛ adwuma a, Yehowa koyira ye. Yɛ koso, odikyɛ yesi y’adwene pi kyɛ ɔmva yenwo ne ɔhaw biala bɔ ɔkɔto yɛ ne, yɛkɔfa Yehowa mmraa yɛkɔyɛ adwuma.

18. Kyɛbɔ Barak yɛle ne, nzuati yeɛ odikyɛ yɛfa yɛnwo yɛto Yehowa so ɔ? (Nea foto bɔ ɔwɔ Ɛwɛnelɛ Waen ne nyunu ne.)

¹⁸ Fa wɔnwo to Yehowa so. Ɔnate kyɛ Barak fale yenwo tole Yehowa so nati, Yehowa bokale ye maa olili ngunim. Ɛmɔma yɛnea bɔ osili ɔ. Né Yisraelfoɛ llé akõdeɛ biala, na né bɛboalle bɛnwo kyɛ bɛkɔhɔ kõɛ. Nakoso Yehowa hãhyirele Barak kyɛ, ɔne Kaananfoɛ safohene Sisera bɔ ɔne ye sogyafoɛ le akõdeɛ pẽe ne bɛɛhõ. (Mae. 5:8) Diyifoɛ brasua Debora hãhyirele Barak kyɛ ɔhɔ aseɛ pralaa naso na ooyia Sisera ɔne ye ndeaseɛnam 900 ne. Ɔwɔ nu, né Barak se kyɛ sɛ ɔne Sisera kɔkõ wɔ sɔ aseɛ pralaa naso a, Sisera koli ye so ngunim, nakoso otiele. Mmerɛ bɔ né Barak ne ye sogyafoɛ nemɔ dwu fi Bokaa Tabɔ so ne, Yehowa maa nzue pirikua bie tɔle. Ɛhẽne maa nekaa bɔ né bɛkwaahõ ne, ɛberɛ mukoraati yɛle esaa, yeti Sisera ndeaseɛnam ne hale esaa nanu. Ɛhẽne ati Yehowa maa Barak lili bɛ so ngunim. (Mae. 4:1-7, 10, 13-16) Yɛ koso sɛ yɛfa yɛnwo yɛto Yehowa so, na yetie akwangyerɛ biala bɔ ɔnate ye ahyehyɛdeɛ naso fama yɛ ne a, yɛkɔhora yekoli ɔhaw biala bɔ ɔkɔto yɛ naso.—Deut. 31:6.

YERE WƆNWO KYƐ ƐKƆHƆSO KOGYINA PINDINN

19. Nzuati yeɛ odikyɛ ɛkɔso gyina pindinn ɔ?

¹⁹ Ɔnate kyɛ yɛte Satan wiase he ayieleɛ nanu nati, odikyɛ yɛyere yɛnwo kyɛ yɛkɔhɔso yekogyina pindinn wɔ ɔhaw biala bɔ yekoyia nanu. (1 Tim. 6:11, 12; 2 Pet. 3:17) Ɛmɔma yɛyɛ bɔ yɛkɔhora biala kyɛ yekoli nahorɛ yɛkɔma Yehowa. Yeti ɔnzɛkyɛ yɛmaa ɛpɔen, ɔne nningyein bɔ ɔmaa yɛye y’adwene yefi Yehowa sõen so ne, ɔtwẽ yɛ fi Yehowa nwo llé. Afei koso, ɔnzɛkyɛ yɛmaa mmenia lakalaka yɛ maa yɛyakyi Yehowa mmraa bɔ yɛfa yɛbɔ yɛ bra ne. Mmenia bɔ bɛmva Yehowa mmraa bɛnnyɛ hwee ne koso, ɔnzɛkyɛ yetie bɛ, na edwirɛ bɔ Satan nate so lakalaka mmenia ne, odikyɛ yɛnea yé na yanné yanni. (Ɛfe. 4:14) Ɛmɔma yɛyere yɛnwo yegyina pindinn, na yɛfa yɛnwo yɛto Yehowa so kyɛbɔ ɔkɔyɛ a, yɛkɔyɛ bɔ okuro ɔ. Afei koso, odikyɛ yɛyɛ mmenia bɔ yɛte edwirɛ bo ɔ. Yehowa ne Yesu te edwirɛ bo bɛtra ebiala. Adesũa bɔ oli berɛ ne kɔmaa yekonwu kyɛbɔ yekosũesua bɛ ɔ.