Suesũa Yehowa Bɔ Ɔte Edwirɛ Bo Ne

1. Nzuati yeɛ odikyɛ Kristofoɛ yɛ tekyɛ bakaa ɔ? (Nea foto ne koso.)

BƐTAA bɛkã edwirɛ bie kyɛ: “Bakaa bɔ ɔte fõnvaaen ne, mvrama ngora mmu ye.” Sɔ anyandera he maa yenwu kyɛ, sɛ bakaa bie kɔhora kogyina berɛ kɔhyɛ a, odikyɛ ɔyɛ fõnvaaen. Bɔ ɛhe kyire yeɛ ole kyɛ sɛ mvrama bie tu a, odikyɛ ɔkora bere kɔ yesĩ anaa ye nyunu. Yɛbɔ yɛte Kristofoɛ ne koso, odikyɛ yɛyɛ kyɛ sɔ bakaa ne. Sɛ yɛyɛ sɔ a, okyire kyɛ yɛte mmenia bɔ yɛte edwirɛ bo ɔ. Yeti sɛ nningyein sesã wɔ y’asetena nu a, yɛkɔhora yekogyina yenoa. Afei koso, sɛ mmenia si nikyee bie nwo gyinayɛɛ na yɛne bɛ nnyɛ adwene pó a, yekolé yɛkɔto nu.

2. Sɛ nningyein sesã wɔ y’asetena nu a, nzu yeɛ ɔkɔboka yɛ maa yekogyina yenoa ɔ, na nzu yeɛ yekosusu yenwo wɔ adesũa he anu ɔ?

² Yɛbɔ yɛsõ Yehowa ne, odikyɛ yɛyɛ mmenia bɔ yɛte edwirɛ bo, yɛbrɛ yɛnwo ase, na yɛdwene mmenia nwo ɔ. Sɔ subaen he bokale aliemaa biemɔ mmerɛ bɔ nningyein sesãne wɔ b’asetena nu ne. Yɛ koso sɛɛ yeɛ ɔkɔhora kɔboka yɛ ɔ? Adesũa he kɔboka yɛ maa yekonwu ye. Yede, ɛmɔma yelimoa yɛnea bɔ yeti yeɛ Yehowa ne Yesu te edwirɛ bo bɛtra ebiala ne, ɔne kyɛbɔ yɛkɔhora yekosuesũa bɛ ɔ.

YEHOWA NE YESU TE EDWIRƐ BO

3. Nzu yeɛ ɔmaa yenwu kyɛ Yehowa te edwirɛ bo ɔ?

³ Bible ne kã Yehowa nwo dwirɛ kyɛ ɔte “Nyɔbotaen.” Yeti ɔwɔ berɛ daa, na ɔnzesã. (Deut. 32:4) Nakoso ɔte edwirɛ bo. Ɛhẽne ati yeɛ Yehowa kɔso sesã atẽe bɔ ɔfa so yɛ ye nningyein, kyɛbɔ ɔkɔyɛ a, bɔ wabɔ yetianu kyɛ ɔkɔyɛ ne kɔwa nu ɔ. Ɔnate kyɛ Yehowa bɔle yɛ wɔ ye subaen so nati, sɛ nningyein sesã wɔ y’asetena nu pó a, yɛkora yegyina yenoa. Afei wasa wama yɛ Bible, na enu afutuo boka yɛ maa yesi gyinayɛɛ pá mmerɛ bɔ nningyein asesã wɔ y’asetena nu ne. Ɔwɔ nu kyɛ Yehowa te “Nyɔbotaen,” nakoso kyɛbɔ ɔyɛ ye nikye, ɔne afutuo bɔ wafa wama yɛ wɔ Bible nanu ne, ɔmaa yenwu kyɛ ɔte edwirɛ bo.

4. Nzu yeɛ ɔmaa yenwu kyɛ Yehowa te edwirɛ bo ɔ? (Lewitikɔso 5:7, 11)

⁴ Yehowa yɛ nikyee biala pɛpɛɛpɛ, nakoso ɔte edwirɛ bo. Ɛhẽne ati, ɔnhyɛ yɛ kyɛ yɛyɛ nikyeebie bɔ ɔbo y’anwoserɛ so ɔ. Sɛ yɛnea mmraa bɔ Yehowa famane Yisraelfoɛ ne a, ɔmaa yenwu kyɛ sɔ dwirɛ ne te nahorɛ. Ebie yeɛ ole kyɛ, né Yehowa se kyɛ Yisraelfoɛ ne mukoraati ngɔhora ngɔbɔ afɔleɛ kõ, ɔnate kyɛ né ebiemɔ le sikaa, na né wahia ebiemɔ koso. Yeti sɛ odwu mmerɛ bie a, né Yehowa maa Yisraelfoɛ nemɔ nu biala bɔ afɔleɛ kyɛbɔ ye anwoserɛ kɔhora ɔ.—Kenga Lewitikɔso 5:7, 11.

5. Nzu yeɛ Yehowa yɛle bɔ okyire kyɛ ɔbrɛ yenwo ase, na onwu mmenia anwumvoin ɔ?

⁵ Yehowa te edwirɛ bo, ɔnate kyɛ ɔbrɛ yenwo ase, na onwu mmenia anwumvoin. Mmerɛ bɔ né Yehowa baasɛkye Sodom kuro ne, bɔ ɔyɛle ne maa yenwu kyɛ ɔbrɛ yenwo ase. Yehowa nate ye abɔfo nemɔ so hãhyirele teneneeniɛ Lɔto kyɛ, ɔnwati hɔ bokaa naso dɔ. Nakoso, né Lɔto suro kyɛ ɔkɔhɔ bokaa naso dɔ. Yeti ɔsrɛle Yehowa kyɛ ɔma ɔnwati hɔ kuro bie bɔ bɛfrɛ ye Soa bɔ opingyé berɛ nanu. Né Yehowa baasɛkye sɔ kuro ne boka Sodom kuro naso, yeti né ahãa ɔkɔhora kɔhyɛ Lɔto kyɛ otie bɔ ɔkã ne, na ɔnwati hɔ bokaa naso. Nakoso wannyɛ sɔ, na mmom otiele Lɔto, yeti wanzɛkye Soa kuro ne. (Gye. 19:18-22) Lɔto dwirɛ ne sili afoɛ pẽe sĩ ne, Yehowa nwuni mmenia bɔ né bɛwɔ Niniwe kuro nanu ne koso anwumvoin. Ɔsomane diyifoɛ Yona kyɛ, ɔɔbɔ mmenia bɔ bɛwɔ kuro nanu ne kɔkɔ kyɛ, ɔbaasɛkye bɛ kuro ne. Nakoso mmerɛ bɔ Yehowa nwuni kyɛ Niniwefoɛ nemɔ anu bɛnwo ne, ɔsesãne ye adwene, na wanzɛkye kuro ne kõ.—Yona 3:1, 10; 4:10, 11.

6. Nzu yeɛ Yesu yɛle fahyirele kyɛ ɔte edwirɛ bo te kyɛ Yehowa ɔ?

⁶ Yesu suesũane kyɛbɔ Yehowa te edwirɛ bo ne. Yehowa somane ye wale aseɛ so kyɛ ɔɔhã nzɛmba ne hyire “mmoaen bɔ bamini bɔ bɛ ole Yisrael awuro ama ne.” Mmerɛ bɔ né Yesu yɛ sɔ adwuma ne, ɔyɛle nikyee bie bɔ okyire kyɛ ɔte dwirɛ bo. Ebie yeɛ ole kyɛ, ɛlɛhõ bie, maame bie bɔ ɔtte Yisraelniɛ srɛle ye kyɛ, ɔsa ɔwa brasua bɔ sunzummɔne bie ha ye ne anwonyerɛ. Yesu nwuni maame ne anwumvoin, na ɔsale ɔwa brasua ne anwonyerɛ. (Mat. 15:21-28) Ɛmɔma yɛnea nikyee foforɛ bɔ ɔmaa yenwu kyɛ Yesu te edwirɛ bo ɔ. Mmerɛ bɔ Yesu hyɛle ye asɛnga adwuma nabo ne, ɔhãne kyɛ: “Ebiala bɔ ɔkɔpo me ne, . . .  mekoso ngɔpo ye.” (Mat. 10:33) Nakoso mmerɛ bɔ Petro hãne ye pɛen nzã kyɛ ɔnze Yesu ne, Yesu ambo ye. Nzuati ɔ? Ofikyɛ né Yesu se kyɛ Petro te ebie bɔ odi nahorɛ, na né wanu yenwo wɔ bɔ ɔyɛle nanwo. Ɛhẽne ati, mmerɛ bɔ betingyéle Yesu befili ewue nu ne, ɔyele yenwo ali hyirele Petro. Ɔkɔyɛ kyɛ, ɔmaa Petro nwuni kyɛ wafa bɔne bɔ ɔyɛle ne wahyɛ ye, na okuro ye dwirɛ paa.—Luka 24:33, 34.

7. Sɛ yɛnea edwirɛ bɔ ɔwɔ Filipifoɛ 4:5 ne a, sɛɛ yeɛ odikyɛ yɛmaa mmenia nwu yɛ ɔ?

⁷ Yaanwu ye kyɛ Yehowa yɛ Nyameɛ ne, ɔne Yesu Kristo te edwirɛ bo. Yɛkɔyɛ sɛɛ né yasuesũa bɛ, kyɛbɔ Yehowa pena kyɛ yɛyɛ ne? (Kenga Filipifoɛ 4:5.) Bible ngyeraseɛ bie kyire sɔ tworɔnzɛm he abo kyɛ: “Ma mmenia mukoraati nwu wɔ kyɛ ɛte edwirɛ bo.” Yɛkɔhora yekobisa yɛnwo kyɛ: ‘Aso mmenia se me kyɛ nde ebie bɔ mete edwirɛ bo anaa benwu me kyɛ me dwirɛ yɛ se? Aso mebu menwo kyɛ bɔ ngɔhã ne ngome yeɛ ɔte pá ɔ, na ɛhẽne yeɛ odikyɛ mmenia dé tonu anaa? Sɛ mmenia kyire b’adwene na menwu ye kyɛ ɔte pá a, medé meto nu hɔ?’ Sɛ yɛyɛ mmenia bɔ yɛte edwirɛ bo a, okyire kyɛ yesuesũa Yehowa ne Yesu. Yede, sɛ nningyein sesã wɔ y’asetena nu, anaa sɛ mmenia si nikyee bie nwo gyinayɛɛ na yɛne bɛ nnyɛ adwene pó a, yɛkɔyɛ sɛɛ na yahyire kyɛ yɛte edwirɛ bo? Ɛmɔma yɛnea.

SƐ NNINGYEIN SESÃ WƆ W’ASETENA NU A, DA NDEASEƐ ALI

8. Nzu yeɛ yɛyɛ a, okyire kyɛ yele ndeaseɛ mmerɛ bɔ nningyein asesã wɔ y’asetena nu ne? (Nea yebo berɛ dwirɛ ne koso.)

⁸ Sɛ nningyein sesã wɔ y’asetena nu a, ɔmaa yɛkɔ anwokyere nu paa. Nakoso sɛ yɛle ndeaseɛ a, yɛngɔmaa y’abanu ngobu. Sɔ haw ne bie yeɛ ole kyɛ, ebia yengonwu bɔ ɔkɔyɛ ɔ, né anwonyerɛ bie abɔ yɛ. Anaa ebia esikaa nwo ayɛ se wɔ maen bɔ yɛte nu nanu, yeti wafa anwokyere wato yɛ so. Afei koso ebia né awaen ahoroɛ pere tumi wɔ maen bɔ yɛwɔ nu nanu. Yeti wamaa ɛberɛ ndwo, na ɛhe ama yennwu bɔ yɛyɛ ɔ. (Nwo. 9:11; 1 Kor. 7:31) Afei koso, sɛ asafo ne sesã dwumadie bie bɔ owura yɛsa ne a, ɛhẽne kɔhora kobu y’abanu. Nakoso ɔmva yenwo ne bɔ ɔkɔto yɛ biala ne, nningyein 4 hemɔ kɔhora kɔboka yɛ maa yekogyina yenoa: (1) dé bɔ wasi ne tonu, (2) fa w’adwene sie bɔ ɛkɔhora kɔyɛ naso, (3) nnɛmaa bɔ wasi ne bu w’abanu, ɔne (4) yɛ nningyein biemɔ fa boka mmenia.b Yeliema biemɔ fale sɔ afutuo he yɛle adwuma. Ɛmɔma yɛnea kyɛbɔ ɔbokale bɛ ɔ.

9. Nzu yeɛ ɔbokale nzɛmbatrɛlɛniɛ bie ne ɔye maa begyinane bɔ ɔtole bɛ ne noa ɔ?

⁹ Dé bɔ wasi ne tonu. Bɛmaa Emanuele ɔne ɔye Francesca bɛɛyɛle nzɛmbatrɛlɛfoɛ wɔ maen bie so. Beedwuli ne, bɛhyɛle yebo kyɛ besũa ɛberɛ dwudwolɛ ne, na afei bɛbɔle mmɔden kyɛ bɛkɔfa aliemaamɔ adamvoa. Nakoso, wangyɛ yeɛ COVID-19 anwonyerɛ ne yele yeti ɔ. Ɔwale sɔ ne, né ɔyɛ se kyɛ bɛne aliemaamɔ koyia nu wɔ Ahennie Asa so ɔ. Enu berɛ ala yeɛ Francesca maame wuli ɔ, na ye wue ne fũni benu paa. Ɔwale sɔ ne, né Francesca pena kyɛ ɔkɔ ye kuro kãa. Nakoso ɔnate anwonyerɛ nati wangora kɔ, na ɛhẽne maa ye abanu buli. Yede, nzu yeɛ ɔbokale Francesca maa ɔhora gyinane yenoa ɔ? Bɔ olimoa ne, ɔne ohũ Emanuele bɔle mbaeɛ kyɛ Yehowa boka bɛ maa begyina ɔhaw bɔ wato bɛ ne noa. Yehowa nate vidio ne nwomaa ahoroɛ bɔ asafo ne ayɛ naso bokale bɛ maa benyane bɛ mbaeɛ nanwo mmuayɛɛ. Ebie yeɛ ole kyɛ, bɛneane vidio bie, na né aliemaa bie kã ye asetena nu dwirɛ. Sɔ aliemaa ne hãne ye wɔ vidio nanu kyɛ: “Sɛ nningyein sesã wɔ y’asetena nu na yedé yɛto nu ndɛ a, ɔboka yɛ maa yɛkora yegyina bɔ wato yɛ ne noa.”c Nikyee bɔ ɔtɔ so nyɔ bɔ ɔbokale bɛ yeɛ ole kyɛ, bɛyerele bɛnwo kyɛ bɛkɔfa fon so bekoli adanzeɛ. Ɛhe bokale bɛ maa bɛhora bɛyɛle Bible adesũa pó, na ɔmaa bɛnye gyele paa. Bɔ ɔtɔ so nzã ne, bɛmaa aliemaamɔ bɔ bɛwɔ b’asafo nanu ne bokale bɛ. Aliemaa brasua kõ de, né ɔtworɔ Bible nu dwirɛ bie fa fon so fa ma bɛ kyẽa biala, na ɔyɛle sɔ afoɛ kõ. Yɛ koso sɛ nningyein sesã wɔ y’asetena nu, na yedé yɛto nu a, ɔkɔboka yɛ maa yɛkɔfa anigye yɛkɔyɛ adwuma biala bɔ owura yɛsa ne.

10. Mmerɛ bɔ nningyein sesãne wɔ aliemaa brasua bie asetena nu ne, nzu yeɛ ɔbokale ye maa ogyinane yenoa ɔ?

¹⁰ Fa w’adwene sie bɔ ɛkɔhora kɔyɛ naso, na nnɛmaa bɔ wasi ne bu w’abanu. Christina fi Romania, nakoso ɔte Japan. Asafo bɔ né ɔwɔ nu ne, né bɛfa Brɔfo dwudwolɛ yeɛ bɛyɛ adesũa ɔ. Nakoso nziɛen, beguli sɔ asafo ne. Ɔwale sɔ ne, Christina abanu buli, nakoso wamva ye adwene wangɔ bɔ né wasi naso pẽe. Mmom bɔ ɔyɛle yeɛ ole kyɛ, ɔhɔle asafo bɔ bɛfa Japan dwudwolɛ bɛyɛ adesũa nu, na ɔyerele yenwo kyɛ ɔkɔfa sɔ dwudwolɛ ne kɔyɛ asɛnga adwuma ne. Ebiekũ koso, Christina hãhyirele maame bie bɔ né ɔne ye yɛ adwuma ne kyɛ ɔboka ye kyɛbɔ ɔkɔyɛ a, ɔkɔhora kɔte Japan dwudwolɛ ne yé ɔ. Maame ne penene so kyɛ okohyire Chiristina Japan dwudwolɛ ne. Yeti Chiristina fale Bible ne, ɔne Nya Asetena Nu Anigye Daa! brohyeɔ ne mane maame ne kyɛ, ɔfa hyire ye dwudwolɛ ne. Ɛhẽne maa Christina tele Japan dwudwolɛ ne yé. Afei, maame bɔ né okyire ye dwudwolɛ ne koso, yenye ɔɔgyele Bible nanwo. Yeti Christina hyɛle yebo kyɛ ɔne maame ne kosũa nikye. Sɛ nningyein sesã wɔ y’asetena nu, na yɛfa y’adwene yesie bɔ yɛkɔhora yɛkɔyɛ naso a, y’abanu ngobu, na mmom yɛnye kɔgye, na Yehowa koso koyira yɛ.

11. Mmerɛ bɔ aliemaa bie ne ɔye hɔle anwokyere nu ne, nzu yeɛ bɛyɛle ɔ?

¹¹ Yɛ nningyein biemɔ fa boka mmenia. Wɔ maen bie bɔ babra Yehowa Adanzefoɛ sõen wɔ nu naso ne, aliemaa bie ne ɔye nwo hyerele bɛ paa, ɔnate kyɛ né esikaa nwo ayɛ se wɔ sɔ maen nanu. Nzu yeɛ ɔbokale bɛ maa bɛhora begyinane yenoa ɔ? Bɔ belimoa bɛyɛle yeɛ ole kyɛ bɛmaa b’asetena yɛle korokoro, kyire kyɛ né bɛndotɔ nningyein pẽe bɔ benhia ɔ. Afei koso bɛyɛle b’adwene kyɛ bɛkɔboka mmenia tra kyɛ bɛkɔfa b’adwene bekosie bɛ haw naso ɔ. Yeti bɛyerele bɛnwo bɛyɛle asɛnga adwuma ne. (Aso. 20:35) Brienzua ne hãne kyɛ, “Ɔnate kyɛ né yɛfa mmerɛ pẽe yɛyɛ asɛnga adwuma nati, ɔtele y’adwenedwene so. Mmerɛ bɔ yɛyɛle sɔ ne, ɔbokale yɛ maa yɛfale y’adwene yesiele nningyein bɔ ɔfa Yehowa sõen nwo naso.” Yeti sɛ nningyein sesã wɔ y’asetena nu a, odikyɛ yɛyere yɛnwo yɛyɛ asɛnga adwuma ne. Sɛ yɛyɛ sɔ a, okyire kyɛ yɛfa yɛ mmerɛ yɛboka mmenia.

12. Kyɛbɔ né Pɔɔlo sesã atẽe bɔ né ɔfa so kyirekyire mmenia nanu ne, yɛkɔyɛ sɛɛ né yasuesũa ye?

¹² Sɛ yɛ́yɛ asɛnga adwuma ne a, odikyɛ yɛsesã atẽe bɔ yɛfa so yekyirekyire nanu. Bɔ yeti yeɛ odikyɛ yɛyɛ sɔ yeɛ ole kyɛ, mmeni pẽe bɔ yɛkã edwirɛ ne yekyire bɛ ne, ɔsõno nekaa bɔ befi, dwudwolɛ bɔ bɛkã, b’amammerɛ, ɔne nningyein bɔ bedé bedi ɔ. Yɛnea somafoɛ Pɔɔlo a, né ɔsesã atẽe bɔ ɔfa so kyirekyire nanu, na yɛkɔhora yekosuesũa bɔ ɔyɛle ne. Yesu yele Pɔɔlo kyɛ ɔyɛ “Amaenmaensofoɛ somafoɛ.” (Rom. 11:13) Ɛhẽne ati, Pɔɔlo hãne nzɛmba ne bie hyirele Yudafoɛ, Greekfoɛ, bɛbɔ basũa nwomaa, bɛbɔ befi namue nu, awaen mbanyi, ɔne ahemvomɔ. Bɔ ɔkɔyɛ na Pɔɔlo ahora ahã edwirɛ ne ahyire mmenia sõmaa bɔ bɛte sɔ ne, né odikyɛ ɔyɛ “mmenia mukoraa bɛ sona.” (1 Kor. 9:19-23) Mmenia bɔ Pɔɔlo hãne edwirɛ ne hyirele bɛ ne, né ɔsõno b’amammerɛ, nekaa bɔ befi, ɔne nningyein bɔ bedé bedi ɔ. Ɛhẽne ati, bɔ ɔkɔyɛ né edwirɛ ne ahã b’ahõne ne, né Pɔɔlo dimoa dwene atẽe bɔ ɔkɔfa so kohyirehyire bɛ nanwo. Yɛ koso, sɛ yɛsesã atẽe bɔ yɛfa so yekyirekyire mmenia nanu a, okyire kyɛ yɛdwene bɛnwo, na ɔkɔboka yɛ maa yɛkɔyɛ asɛnga adwuma ne yé.

ATẼE BƆ MMENIA FA SO YƐ BƐ NIKYEE NE, DÉ TONU

13. Kyɛbɔ 1 Korintofoɛ 8:9 kã ne, nzu yeɛ odikyɛ yɛnea yɛnwo yé wɔ yenwo ɔ?

¹³ Sɛ mmenia yɛ bɛ nikyee wɔ atẽe bie so, ná yɛne bɛ nnyɛ adwene pó a, odikyɛ yedé yɛto nu. Sɛ yɛyɛ sɔ a, okyire kyɛ yɛte edwirɛ bo. Ebie yeɛ ole kyɛ, aliemaa mmrasua biemɔ wɔ berɛ a, bɛnye gye yenwo kyɛ bekohwi bɛ nyunu na bato bɛnoa. Nakoso ebiemɔ de, benguro ye sɔ. Afei, aliemaa biemɔ koso, bɛnye gye yenwo kyɛ bɛkɔnõ nzãa kãa, nakoso ebiemɔ de, bayɛ b’adwene kyɛ bɛngɔfa nzãa bɛngɔhã bɛnoa llé. Kristofoɛ mukoraati pena kyɛ benya anwoserɛ, nakoso ebiala le atẽe bɔ ɔpena kyɛ bɛfa so bɛsa ye anwonyerɛ ɔ. Yeti odikyɛ yɛnea yé kyɛ yɛngɔfa bɔ yekuro ne yɛngɔhyɛ aliemaamɔ so. Sɛ yɛyɛ sɔ a, yɛkɔhora yɛkɔto aliemaa biemɔ sindidua, na ɛhẽne kɔsɛkye asomdwee bɔ ɔwɔ asafo nanu ne. Nakoso, yenu biala nne berɛ bɔ yenye gye yenwo kyɛ ɔkɔto aliemaamɔ sindidua ɔ. (Kenga 1 Korintofoɛ 8:9; 10:23, 24) Yede, yɛbaanea nningyein nyɔ bie bɔ ɔfa sɔ dwirɛ he anwo ɔ, na yekonwu Bible nu dwirɛ bɔ ɔkɔboka yɛ maa yekosi yenwo gyinayɛɛ pá ɔ. Afei koso, sɛ ebie si gyinayɛɛ bie bɔ ɔfa sɔ nningyein nyɔ he anwo, na yɛne ye nyɛ adwene pó a, yekonwu bɔ odikyɛ yɛyɛ ɔ, na wamaa asomdwee atena asafo nanu.

14. Bible nu dwirɛ benimɔ yeɛ ɔkɔboka yɛ maa yekosi gyinayɛɛ bɔ ɔfa kyɛbɔ yesiesie yɛti nwĩaa ɔne ndaadeɛ bɔ yekowura nanwo ɔ?

¹⁴ Kyɛbɔ yesiesie yɛti nwĩaa ɔne ndaadeɛ bɔ yekowura ɔ. Atẽe bɔ yɛfa so yesiesie yɛnwo ne, Yehowa hyɛlle yenwo mmraa biala, na mmom wamaa yanya edwirɛ bɔ ɔwɔ Bible nanu bɔ ɔkɔboka yɛ maa yekonwu kyɛbɔ odikyɛ yesiesie yɛnwo ɔ. Ebie yeɛ ole kyɛ ɔnzɛkyɛ yewura ndaadeɛ ‘bɔ ogua yɛ nyunu ase ɔ.’ Mmom odikyɛ atẽe bɔ yɛfa so yesiesie yɛnwo ne, ɔmaa mmenia nwu kyɛ yɛsõ Nyameɛ, na yɛbrɛ yɛnwo ase. (1 Tim. 2:9, 10; 1 Pet. 3:3) Ɛhẽne ati, ɔnzɛkyɛ yewura ndaadeɛ bɔ ɔkɔmaa mmenia adwene kɔwa yɛ so kyɛbɔ ɔmvata ɔ. Afei koso, Bible nanu dwirɛ kɔboka asafo nu mbanyi kyɛbɔ ɔkɔyɛ a, bɛngɔhyehyɛ mmraa bɛngɔma aliemaamɔ wɔ ndaadeɛ bɔ odikyɛ bewura, ɔne atẽe bɔ odikyɛ bɛfa so besiesie bɛti nwĩaa nanwo. Wɔ asafo bie nu ne, mbanyi nemɔ hyɛle ye nzorɛ kyɛ, kyɛbɔ né mmrandeɛ nemɔ bie tete bɛti ne, né waayɛ te kyɛ besuesũa atẽe bɔ ɔttemayé bɔ mmenia bɔ bɛnzõ Yehowa ne fa so tete bɛti ne. Yede, sɛɛ yeɛ né mbanyi nemɔ kɔhora kɔboka sɔ mmrandeɛ nemɔ, bɔ bɛngɔhyehyɛ mmraa biala bɛngɔma bɛ ɔ? Bɛ manzin soneafoɛ hãhyirele mbanyi nemɔ kyɛ, bɛne mmrandeɛ nemɔ susu sɔ dwirɛ he anwo. Ye ole kyɛ, “Sɛ begyi platfɔm so bɛyɛ bɛ dwumadie, na aliemaamɔ fa b’adwene kɔ kyɛbɔ bawura bɛ ndaadeɛ, ɔne atẽe bɔ bafa so batete bɛ ti naso tra kyɛ bɛkɔfa b’adwene bekosie dwumadie bɔ bɛyɛ naso a, yede né okyire kyɛ atẽe bɔ bafa so basiesie bɛnwo ne, edwirɛ wɔ yenwo.” Mmerɛ bɔ mbanyi nemɔ hãne sɔ dwirɛ ne hyirele mmrandeɛ nemɔ ne, bɛyakyili atẽe bɔ né bɛfa so bɛtete bɛti ne, bɔ mbanyi nemɔ anhyɛ yenwo mmraa biala amma bɛ ɔ.d

15. Sɛ yesi atẽe bɔ yɛpena kyɛ bɛfa so bɛsa yɛ anwonyerɛ nwo gyinayɛɛ a, Bible nu dwirɛ benimɔ yeɛ ɔkɔhora kɔboka yɛ ɔ? (Romanfoɛ 14:5)

¹⁵ Atẽe bɔ yɛpena kyɛ bɛfa so bɛsa yɛ anwonyerɛ ɔ. Odikyɛ Kristoniɛ biala si atẽe bɔ ɔpena kyɛ bɛfa so bɛsa ye anwonyerɛ nanwo gyinayɛɛ. (Gal. 6:5) Nakoso atẽe bɔ bɛfa so bɛsa anwonyerɛ ne bie wɔ berɛ a, Bible ne maa yenwu kyɛ odikyɛ yɛtwẽ yɛnwo yefi yenwo. Ebie yeɛ ole mogya bɔ bɛfa bɛsa anwonyerɛ, ɔne anwoyerɛsalɛ bɔ ɔmaa ebie fa yenwo wura bosoensõlɛ nu ɔ. Yeti, ɔnzɛkyɛ Kristoniɛ pene so kyɛ ɔkɔfa sɔ atẽe hemɔ aso kɔsa yenwo anwonyerɛ. (Aso. 15:20; Gal. 5:19, 20) Sɛ ɛhẽne la ahãmeɛ a, atẽe bɔ Kristoniɛ biala pena kyɛ ɔfa so sa yenwo anwonyerɛ ne, yebɔbɔ yeɛ odikyɛ osi yenwo gyinayɛɛ ɔ. Ebiemɔ wɔ berɛ a, sɛ bɛnnde apɔ a, bekuro kyɛ bɛkɔhɔ hɔspitel maa bɛkɔma bɛ ayire, na ebiemɔ koso, bekuro kyɛ bɛkɔnõ abibiduro. Yeti sɛ yeliema bie kuro kyɛ ɔsa yenwo anwonyerɛ wɔ sɔ atẽe hemɔ so a, ɔnzɛkyɛ yedwudwo yetia ye, na mmom odikyɛ yedé ye gyinayɛɛ bɔ wasi ne yɛto nu. Sɛ yesi atẽe bɔ yekuro kyɛ yɛfa so yɛsa yɛnwo anwonyerɛ nanwo gyinayɛɛ a, odikyɛ yɛkae nningyein 4 bɔ olili so ye: (1) Nyameɛ Ahennie ne ngome yeɛ ɔkɔye anwonyerɛ mukoraati kofi berɛ ɔ. (Yes. 33:24) (2) Odikyɛ Kristoniɛ biala “si ye adwene pi,” na onwu ye kyɛ atẽe bɔ ɔpena kyɛ ɔfa so sa yenwo anwonyerɛ ne, ɛhẽne yeɛ ɔkɔboka ye ɔ. (Kenga Romanfoɛ 14:5.) (3) Ɔnzɛkyɛ yebua ebie ndɛen, anaa yɛyɛ nikyee bie bɔ ɔkɔto sona ne sindidua ɔ. (Rom. 14:13) (4) Asomdwee bɔ ɔkɔtena asafo nanu ne, odikyɛ yɛmaa yenwo hia yɛ tra bɔ yɛbɔbɔ yekuro ɔ. (Rom. 14:15, 19, 20) Sɛ yɛmaa sɔ nningyein 4 bɔ yahã yenwo dwirɛ ne tena y’adwene nu a, ɔkɔboka yɛ maa yɛne yeliemamɔ kɔtena kama, na asomdwee kɔtena asafo nanu.

16. Nzu yeɛ asafo nu panyi bie yɛ a, okyire kyɛ ɔte edwirɛ bo ɔ? (Nea foto ne koso.)

¹⁶ Odikyɛ asafo nu mbanyi nemɔ maa ebiala nwu kyɛ bɛte edwirɛ bo. (1 Tim. 3:2, 3) Sɛ mbanyi nemɔ si edwirɛ bie nwo gyinayɛɛ a, ɔnzɛkyɛ benu bie nya adwene kyɛ ɔnate kyɛ wanyi watra bɛbɔ baha nati, bɔ ɔkɔhã ne ngome yeɛ odikyɛ mbanyi bɔ baha ne tie ɔ. Odikyɛ asafo nu panyi biala kae kyɛ, sɛ beyia nu kyɛ besusu edwirɛ bie nwo a, Yehowa honhom kɔhora kɔmaa benu biala kɔhã edwirɛ bie bɔ ɔkɔboka bɛ maa bekosi gyinayɛɛ pá, bɔ ɔkɔboka asafo ne ɔ. Afei koso, ebia né mbanyi nemɔ asi edwirɛ bie bɔ Bible ne ngã yenwo dwirɛ pɔtẽe nwo gyinayɛɛ. Sɛ benu biemɔ ne mbanyi bɔ baha ne nyɛ adwene pó a, odikyɛ bɛbrɛ bɛnwo ase, na bedé gyinayɛɛ bɔ benu pẽe apene so ne bɛtonu.

SƐ YƐMAA MMENIA NWU KYƐ YƐTE EDWIRƐ BO A, YENYA SO MVASOƐ

17. Sɛ yɛmaa mmenia nwu kyɛ yɛte edwirɛ bo a, mvasoɛ beni yeɛ ɔwɔ so ɔ?

¹⁷ Sɛ Kristofoɛ yɛ nningyein bɔ okyire kyɛ bɛte edwirɛ bo a, mvasoɛ pẽe yeɛ ɔwɔ so ɔ. Ebie yeɛ ole kyɛ, ɔmaa yɛne yeliemamɔ tena kama, na asomdwee koso tena asafo nanu. Mmenia bɔ ɔsõno bɛ maen, b’amammerɛ, ɔne bɛ subaen yeɛ Yehowa ahwẽ bɛ awa asafo nanu ɔ. Yeti sɛ yɛmaa yɛnye gye bɔ Yehowa ayɛ nanwo a, okyire kyɛ yɛte edwirɛ bo. Ɛhe amukoraati sĩ ne, sɛ yɛmaa mmenia nwu kyɛ yɛte edwirɛ bo a, okyire kyɛ yesuesũa Yehowa bɔ ɔte edwirɛ bo ne, na ɛhẽne kɔmaa yɛnye kɔgye paa.