Sɛ Yɛfa Aliemaamɔ Adamvoa Na Yɛboka Bɛ A, Yenya Nhyiraa

Né me baba kɔ asɔre bie bɔ bɛfrɛ ye United Church of Canada, na né ɔte asɔre panyi. Yeti Kwasida ngyerɛmɔ biala, né ɔfa me ne nniema brasua ne kɔ Sunday school. Sɛ yɛpɔno a, né yɛkɔboka ye so maa yɛyɛ asɔre mmerɛ bɔ wabɔ ngyerɛmɔ 11 ne. Sɛ yefi asɔre yɛbadwu awuro a, né yɛne yɛ maame kɔ Ahennie Asa so eyia ne. Bɔ yɛtele ye wɔ berɛ ne, ɔmaa yenwuni kyɛ Yehowa Adanzefoɛ ngyerɛkyerɛ te pá tra asɔre bɔ né yɛkɔ ne deɛ ne.

Nahorɛ ne bɔ né me maame anwu ye ne, ɔhãne yenwo dwirɛ hyirele ye damvo Bob ɔne ɔye Marion Hutcheson. Bɛkoso bele bɛtole nu kyɛ bekosũa Bible ne, na nziɛen bɛɛyɛle Yehowa Adanzefoɛ. Wɔ afoɛ 1958 nu ne, bɛyɛle ɛlɛmɔtwɛ nhyiamu bie wɔ New York City, na né ye dwirɛti yeɛ ole, Divine Will. Aliemaa Hutcheson ne ɔye fale me bokale bɛ mmaamɔ nzã so maa yɛhɔle nhyiamu ne bie. Ɛnnɛ, sɛ mekae sɔ nhyiamu bɔ yɛhɔle ne a, menwu ye kyɛ sãa né ɔlla ase kyɛ bɛkɔfa me bɛkɔhɔ ɔ. Nakoso sɔ nhyiamu ne maa menye gyele paa, na me wora ngofi ye llé.

ALIEMAAMƆ BOKALE ME MAA NZÕNE YEHOWA YÉ

Nde abrandeɛ ne, né yesie nandwie, mbrako, mmoaen, ɔne ngokɔ. Ɛhẽne maa menye ɔɔgyele ngaka nwo. Yeti nyɛle m’adwene kyɛ ngɔhɔ sukuu na maayɛ ebie bɔ ɔnea ngaka, na ɔbɔ bɛ paneɛ ɔ. Me maame hãne ɛhe anwo dwirɛ hyirele asafo nu panyi bie. Sɔ asafo nu panyi ne, ɔne me susuli edwirɛ nanwo. Ɔhyɛle me ngunaen kyɛ yɛwɔ “ayieleɛ mmerɛ” nanu, na sɛ mefa afoɛ pẽe mekɔ vaas (university) a, ebia né mangora manni nahorɛ mamma Yehowa. (2 Tim. 3:1) Yeti, nzili gyinayɛɛ kyɛ mengɔhɔ vaas (university) ne kõ.

Nyiele Secondary School (Senior High School) ne, né mennwu bɔ nyɛ ye wɔ m’asetena nu ɔ. Sɛ odwu dapɛen ayieleɛ biala a, né mekɔ asɛnga nakoso né mekɔ a menye ngye. Yeti né m’adwene yɛ me kyɛ, mengɔhora mengɔyɛ atẽepakyelɛniɛ llé. Afei koso, me baba ne oliema brienzua bɔ bɛtte Yehowa Adanzefoɛ ne, bɛhyɛle me ngunaen kyɛ ngɔnyɛ adwuma wɔ insurance company bie nu wɔ Toronto. Ɔnate kyɛ né me baba aliema ne te panyi wɔ sɔ adwuma nanu nati, ngɔnyɛle adwuma wɔ berɛ.

Né mefa me mmerɛ mukoraati meyɛ adwuma. Afei koso, mmenia bɔ bɛnzõ Yehowa yeɛ né daa me ne bɛ nate ɔ. Ɛhẽne ati, né mengora mengɔ asafo nhyiamu ne asɛnga daa. Né nde me nana brienzua bɔ ɔtte Yehowa Danzeniɛ ne awuro. Nakoso nziɛen bɔ owuli ne, nyɛle m’adwene kyɛ ngotu ngofi awuro berɛ ngɔɔtena nekaa foforɛ.

Aliemaa Hutcheson ne ɔye, bɔ bɛfale me bɛhɔle afoɛ 1958 nhyiamu ne bie ne, bɛmaa me ne bɛ yɛɛtenane. Bɛfale me kyɛ bɛ bɔbɔ bɛwa, na bɛbokale me maa ngora nzõne Yehowa yé. Ɛhẽne ati, me ne bɛwa John bɔle asu wɔ afoɛ 1960 nu. John ɔɔyɛle atẽepakyelɛniɛ, na ɛhẽne hyɛle me ngunaen paa maa nyerele menwo wɔ asɛnga adwuma nanu. Aliemaamɔ bɔ bɛwɔ asafo nanu ne, benwuni kyɛ mebɔ menwo mmɔden. Yeti bɛmaa nyɛle bɔ ɛnnɛ bɛfrɛ ye Kristofoɛ Abrabɔ Ne Asɛnga Adesũa Soneafoɛ ne.

NGYALE BRASUA BƆ ƆBƆ YENWO MMƆDEN, NA NYƐLE ATẼEPAKYELƐNIƐ

Wɔ afoɛ 1966 nu ne, ngyale taluwa bie bɔ bɛfrɛ ye Randi Berge. Né ɔte atẽepakyelɛniɛ bɔ ɔbɔ yenwo mmɔden paa. Afei koso, né okuro kyɛ otu kɔ nekaa foforɛ kɔyɛ asɛnga adwuma ne. Yɛ manzin soneafoɛ nwuni mmɔden bɔ né yɛbɔ ne, yeti ɔhyɛle yɛ ngunaen kyɛ yetu yɛhɔ Orillia bɔ ɔwɔ Ontario ne, na yɛɛboka asafo bɔ ɔwɔ berɛ ne. Yeti yetu yɛhɔle berɛ.

Né Randi nye gye paa wɔ atẽepakyelɛ adwuma nanu, na ɛhẽne hyɛle me ngunaen paa. Yeti yedwuli Orillia ne, wangyɛ yeɛ nhyɛle atẽepakyelɛ adwuma nabo ɔ. Nyerele menwo wɔ atẽepakyelɛ adwuma nanu, na nzuane kyɛbɔ ngɔfa Bible ne ngɔboka mmenia maa bekonwu nahorɛ ne. Bɔ nyɛle ne, ɔmaa menye gyele paa. Mmerɛ bɔ yɛbokale bĩaa bie ne ɔye maa bɛsesãne bɛ subaen, na bɛɛyɛle Yehowa Adanzefoɛ ne, yɛnye gyele paa.

YESŨANE DWUDWOLƐ NE AMAMMERƐ FOFORƐ

Mmerɛ bie bɔ yɛhɔle Toronto ne, nyiale aliemaa bie bɔ bɛfrɛ ye Arnold MacNamara. Né ɔboka bɛbɔ beli nningyein nyunu wɔ Bɛtɛl naso. Obisale me kyɛ yɛnye kɔgye yenwo kyɛ yɛkɔɔyɛ atẽepakyelɛfoɛ titire anaa. Ɛberɛ ala yeɛ ngãne kyɛ: “Yóo yɛnye kɔgye yenwo, nakoso Quebec de, yɛmbena kyɛ yɛkɔ berɛ!” Bɔ yeti yeɛ né membena kyɛ mekɔ Quebec yeɛ ole kyɛ, ne ɛberɛ ndwo. Ofikyɛ sɔ mmerɛ ne, bɛbɔ bɛwɔ Quebec ne, né bɛpena kyɛ bɛte bɛnwo befi Canada maen nanwo. Yeti né wamaa ngondii kɔso wɔ berɛ paa. Ɛhẽne ati, né wamaa mmeni pẽe anya adwene bie kyɛ, bɛbɔ bɛwɔ Quebec, nekaa bɔ bɛkã French dwudwolɛ ne, bekuro ngondii, na bɛ dwirɛ te basabasa.

Nakoso Arnold hãhyirele me kyɛ, “Quebec ngome yeɛ Bɛtɛl fa atẽepakyelɛfoɛ titire kɔ berɛ ɔ.” Ɔhãne sɔ ne, ngãne kyɛ yede yɛkɔhɔ. Né Randi koso nye gye yenwo kyɛ ɔkɔɔyɛ asɛnga adwuma ne wɔ dɔ. Yɛhɔle dɔ ne sĩ ne, nwuni kyɛ ɔte pá paa kyɛ yesili sɔ gyinayɛɛ ne ɔ.

Yɛfale bosome kõ ne dapɛen yesũane French dwudwolɛ ne. Ɛhẽne sĩ ne, bɛmaa yɛne aliemaa bie ne ɔye yɛhɔle Rimouski. Sɛ efi Rimouski ɛkɔ Montreal a, ɔte kɔyɛ kilomita 540 (anaa kwanzii 336). Ɛlɛhõ bie bɔ né mema ngaebɔ wɔ asafo nhyiamu bo ne, nwuni kyɛ sãa né ndele French dwudwolɛ ne bue pó. Wɔ French dwudwolɛ nu ne, maen bɔ bɛfrɛ ye “Austria” ne, ɔne anomaa bie dumaa soma. Sɔ anomaa ne, ɔte piri paa. Ɛhẽne ati, mmerɛ bɔ mema ngaebɔ ne, kyɛ ahãa ngɔhã kyɛ “bɛbɔ befi Austria ne, benu pẽe kɔwa nhyiamu ne bie” ne, sɔ anomaa ne dumaa mmom yeɛ mmɔle ɔ.

Aliemaa mmrasua 4 bɔ bɛbɔ bɛnwo mmɔden, ɔne Aliemaa Huberdeau ne ɔye ne ye mma mmrasua nyɔ bɛɛbokale yɛ so wɔ Rimouski berɛ. Aliemaa Huberdeau ne ɔye belɛle awuro pirikua bie bɔ sua nzoo yeɛ ɔwɔ nu ɔ. Yeti bɛmaa yɛɛtenane berɛ bie, na yetuale sua nanwo kerɛ ne bie yɛmane bɛ. Ɔnate kyɛ né bapenti sua nanwo fufue nati, né yɛfrɛ ye “White House.” Né mmenia kɔyɛ 14 yeɛ né yɛte awuro berɛ ɔ. Ɔnate kyɛ né me ne meye Randi yɛte atẽepakyelɛfoɛ titire nati, né yɛkɔ asɛnga ngyerɛmɔ, eyia ɔne nɔsoa. Mmenia pẽe bɔ né yɛne bɛ wɔ awuro berɛ nati, né yenya ebie bɔ yɛne ye kɔ asɛnga mmerɛ biala ɔ. Ɛhẽne maa yɛnye gyele paa. Sɛ odwu nɔsoa bie bɔ ayire wɔnu pó a, né yenya ebie bɔ yɛne ye kɔhɔ asɛnga ɔ.

Yɛne aliemaamɔ bɔ né yɛne bɛ te awuro berɛ ne, yɛɛyɛle kyɛ abusũa. Sɛ odwu mmerɛ bie a, né yɛsɔ sẽe yɛtena yenwo kɔngɔen yɛbɔ ngɔmmɔ. Ɔtɔ mmerɛ bie koso a, né yɛbɔ nu yɛtõ aleɛ. Aliemaamɔ bɔ né yɛne bɛ wɔ awuro berɛ ne, né bɛnu kõ se dwetae (guitar) bɔ, yeti Fue nɔsoa bie wɔ berɛ a, né yɛbɔ nu yɛto dwein, na né yego.

Né mmeni pẽe nye gye yenwo kyɛ bekosũa Bible ne wɔ Rimouski. Yɛyɛle asɛnga adwuma ne wɔ berɛ afoɛ 5 sĩ ne, bɛbɔ yɛne bɛ sũa Bible ne, benu pẽe nala nyane ngɔsoɛ na bɛbɔle asu. Afei koso, adawurubɔfoɛ bɔ né bɛwɔ asafo nanu ne, bɛ sõmaa hɔle anyunu maa odwuli 35. Ɛhe mukoraati maa yɛnye gyele paa.

Asɛnga adwuma bɔ yɛyɛle wɔ Quebec ne, ɔbokale yɛ paa maa yenwuni kyɛbɔ yekohyirehyire yé wɔ asɛnga nu ɔ. Yehowa bokale yɛ paa wɔ asɛnga adwuma bɔ yɛyɛle nanu. Afei koso, ɔbokale yɛ maa yɛsa hãne nningyein bɔ yehia ye wɔ y’asetena nu ɔ. Biekũ koso, yɛnye ɔɔgyele bɛbɔ bɛkã French dwudwolɛ ne, ɔne b’amammerɛ nwo paa. Ɛhe maa yesũane kyɛ yɛkɔmaa yɛnye kɔgye ebiala amammerɛ nwo.—2 Kor. 6:13.

Enu berɛ ala yeɛ Bɛtɛl hãhyirele yɛ kyɛ yɛhɔ Tracadie bɔ ɔwɔ New Brunswick ne. Ɔte kuro bɔ ɔla mboano ɔ. Né ɔlla ase koraa kyɛ yekotu yekofi berɛ ɔ, ofikyɛ né yanya sua foforɛ bɔ yetu yɛkɔ nu wɔ Rimouski berɛ ɔ. Afei koso, né manya sukuu bie bɔ ngɔfa dɔnhwere kãa ngohyire nikyee wɔ berɛ dapɛen biala ɔ. Sɛ ɛhẽne la ahãmeɛ a, mmenia bɔ yɛne bɛ sũa Bible ne, né benu biemɔ aayɛ adawurubɔfoɛ bɔ né odikyɛ yɛboka bɛ ɔ. Afei koso né yahyɛ yebo yesi yɛ Ahennie Asa.

Yɛbɔle edwirɛ nanwo mbaeɛ, na yɛyɛle kyɛ yɛkɔfa yɛnye yɛkɔɔnea Tracadie berɛ. Mmerɛ bɔ yɛhɔle berɛ ne, yenwuni kyɛ ɛberɛ asetena ne, ɔtte kyɛ Rimouski. Nakoso, yenwuni kyɛ Yehowa yeɛ wasoma yɛ kyɛ yɛhɔ berɛ ɔ, yeti odikyɛ yɛkɔ. Yɛfale yɛnwo yɛtole Yehowa so, yeti yɛhɔle, na yenwuni kyɛ Yehowa koso bokale yɛ maa yegyinane ɔhaw biala bɔ ɔtole yɛ wɔ berɛ ne noa. (Mal. 3:10) Me ye Randi te ebie bɔ ye gyidie yɛ se, ɔfa nningyein bɔ afɔleɛ, na ɔte edwirɛ bo. Sɔ subaen pá bɔ ɔwɔ yenwo nati, yɛhora yetu yɛhɔle nekaa bɔ bɛnwa yɛhɔ ne.

Asafo bɔ né yahɔ nu ne, Aliemaa Robert Ross ngome yeɛ né ɔte asafo nu panyi wɔ berɛ ɔ. Ɔne ɔye Linda hɔle berɛ bɛɛyɛle atẽepakyelɛ adwuma ne, nakoso nziɛen bɛwole. Bɛwole ne sĩ ne, besili gyinayɛɛ kyɛ bɛkɔhɔso bɛkɔtena kuro naso berɛ. Ɔmva yenwo kyɛ né bawo kõ ne, né bɛmva b’asɛnga adwuma ne benni angorɛ koraa. Afei koso, né bebukyé bɛsa nu bɛma mmenia. Sɔ subaen pá bɔ ɔwɔ bɛnwo ne, ɔhyɛle yɛ ngunaen paa.

NEKAA BIALA BƆ YƐHƆ YƐƐSÕNE NE, YƐNYE GYELE

Yɛyɛle asɛnga adwuma ne wɔ Tracadie afoɛ nyɔ. Ɛhẽne sĩ ne, bɛhãne kyɛ ngɔnyɛ manzin soneafoɛ. Sɔ dwumadie ne bɔ yɛsa hãne ne, ɔyɛle yɛ nwanwa paa. Yɛsõne asafo ahoroɛ bɔ bɛkã Brɔfo afoɛ nzoo, na yesĩ ne bɛhane kyɛ yɛɛsõ asafo bɔ bɛkã French dwudwolɛ wɔ Quebec. Mmerɛ bɔ yɛhɔle Quebec ne, sɛ yɛkɔ nhyiamu na mema dwudwolɛ meyie a, né yɛ mandam soneafoɛ, Aliemaa Léonce Crépeault, kamvo me paa. Nakoso ɔkamvo me yie a, né ɔhyɛ me ngunaen kyɛ odikyɛ meboka bɛbɔ betie me ne maa benwu kyɛbɔ bɛkɔfa edwirɛ ne bɛkɔyɛ adwuma ɔ.a Sɔ dwirɛ bɔ ɔhãhyirele me ne, ɔbokale me paa. Ɔmaa nwuni kyɛ, sɛ mema dwudwolɛ a, odikyɛ memaa ɔkã bɛbɔ betie me ne ahõne, na benwu kyɛbɔ bɛkɔfa bɛkɔyɛ adwuma ɔ.

Wɔ afoɛ 1978 nu ne, yɛyɛle maenmaen nhyiamu bie wɔ Montreal. Né nhyiamu ne dwirɛti yeɛ ole “Victorious Faith.” Adwuma bɔ bɛfa bɛmane me wɔ nhyiamu nabo ne, me wora ngofi ye llé. Né meboka bɛbɔ bɛtõ aleɛ naso. Mmenia 80,000 yeɛ né yɛnea atẽe kyɛ bɛkɔwa bie ɔ. Afei, kyɛbɔ né yɛkɔma b’aleɛ, aleɛ bɔ né odikyɛ yɛtõ yɛma bɛ, nningyein bɔ yɛkɔfa yɛkɔtõ aleɛ ne, ɔne atẽe bɔ yɛkɔfa so yɛkɔtõ aleɛ ne, né basesã ye mukoraati. Né yele fridge mbirimbiri kɔyɛ 20, nakoso odwu mmerɛ bie a, né ebie nnyɛ adwuma. Né yɛkɔyɛ nhyiamu ne wɔ park bie so. Nakoso, aleɛ baahẽ maa yɛyɛ nhyiamu ne, yangora yanhyehyɛ yɛ nningyein ne wɔ park naso, ɔnate kyɛ né bɛbɔ bɔɔl wɔ so. Yeti, kɔngɔen yeɛ yɛhyehyɛle yɛ nningyein ne ɔ. Afei koso né odikyɛ yedwɔso ndɛ yɛkɔsɔ sẽe bɔ yɛkɔfa yɛkɔtõ aleɛ ne, kyɛbɔ ɔkɔyɛ a bɛbɔ bawa nhyiamu ne konya aleɛ koli ngyerɛmɔ ne ɔ. Adwuma ne maa yɛfɛle paa, nakoso nzuane nikyee mvili aliemaamɔ bɔ me ne bɛ yɛle adwuma ne berɛ. Yeɛ ole kyɛ né bekuro adwuma, bɛte edwirɛ bo, na né betie akwangyerɛ. Ɔnate sɔ subaen pá bɔ né ɔwɔ bɛnwo nati, ɔbaadwu ɛnnɛ mukoraati ne, me ne bɛ te adamvoa. Ofi afoɛ 1940 kodwu 1960 ne, bɛfale ɛpɔen bɔ enu yɛ se paa bɛwale Yehowa Adanzefoɛ bɔ bɛwɔ Quebec naso. Yeti mmerɛ bɔ yɛhora yɛyɛle nhyiamu pirikua bɔ ɔte sɔ wɔ berɛ ne, né ɔyɛ yɛ nwanwa, na ɔmaa yenwuni kyɛ Yehowa boka yɛ so. Ɛhe maa yɛnye gyele paa.

Ɛhẽne sĩ ne, yɛyɛle nhyiamu ahoroɛ wɔ Montreal. Aliemaamɔ bɔ né bɛnea nhyiamu dwumadie ahoroɛ naso ne, nzuane nningyein pẽe mvili bɛ berɛ. Mmerɛ bie bɔ né yɛyɛ sɔ nhyiamu ne bie ne, Aliemaa David Splane bɔ kesaalae ɔte Akwangyerɛ Kue nanuniɛ ne, yeɛ bɛmaa ɔneane nhyiamu naso ɔ. Ɛhẽne sĩ ne, yɛyɛle nhyiamu foforɛ, na bɛhãne kyɛ me yeɛ nnea so ɔ. Nakoso Aliemaa David Splane amvɛ yaa, na mmom ɔbokale me paa.

Me ne Randi yɛle manzin adwuma ne afoɛ 36. Afei wɔ afoɛ 2011 nu ne, bɛhãne kyɛ ngɔnea Sukuu Bɔ Bɛyɛ Bɛma Asafo Nu Mbanyi naso. Sɔ adwuma bɔ bɛfa bewurale mesa nati, me ne Randi lale nekaa ahoroɛ pẽe. Yeti wɔ afoɛ nyɔ nu ne, né yala bɛen 75 so, nakoso yɛnye gyele paa. Sɛ yeyie sukuu ne dapɛen biala a, né asafo nu mbanyi nemɔ nye gye paa. Ofikyɛ né benwu ye kyɛ Akwangyerɛ Kue ne dwene bɛnwo, na bɛpena kyɛ bɛboka bɛ maa bɛyɛ adwuma bɔ owura bɛsa ne yé.

Ɛhẽne sĩ ne, bɛhãne kyɛ bɛbɔ bɛkɔ Ahennie Nanwo Nzɛmbahãnɛfoɛ Skuu ne, ngongyire bɛ nikye. Bɛbɔ bɛkɔ sukuu ne bie ne, né bɛfa dɔnhwere nzoo bekyire bɛ nikyee kyẽa biala. Sɛ bɛpɔno bɛbadwu awuro nɔsoa biala a, né odikyɛ bɛfa dɔnhwere nzã bɛyɛ dwumadie bɔ bɛfa bɛmane bɛ wɔ sukuu nabo ne. Afei koso, né odikyɛ bɛyɛ dwumadie nna anaa nnu dapɛen biala. Né ɛhẽne maa bɛfɛ, na benyane adwene kyɛ sukuu ne yɛ se sõma. Sɛ yenwu ye kyɛ b’abanu abu a, ɛyɛ a yɛhyɛ bɛ ngunaen kyɛ bɛfa bɛnwo bɛto Yehowa so, na ɔkɔboka bɛ. Sɛ bɛbɔ bɛba sukuu ne nwu kyɛbɔ Yehowa aboka bɛ maa bahora bayɛ bɛ dwumadie ne mukoraati wɔ sukuu nabo a, ɛyɛ a ɔyɛ bɛ nwanwa paa.

SƐ YƐFA ALIEMAAMƆ ADAMVOA NA YƐBOKA BƐ A, YENYA NHYIRAA

Né me maame kuro sona paa, na ɛhẽne maa bɛbɔ ɔne bɛ sũa Bible ne, benyane ngɔsoɛ. Afei koso, sɔ subaen pá bɔ né ɔwɔ me maame nwo ne, ɔbokale me baba maa yenye ɔɔgyele nahorɛ nanwo. Me maame wuli ne, ye ɛlɛsã sĩ ne, me baba wale Ahennie Asa so ootiele badwanu dwudwolɛ. Ɛhẽne sĩ ne, ɔhɔleso wale asafo nhyiamu afoɛ 26. Ɔwɔ nu kyɛ me baba ammɔ asu de, nakoso mbanyi ne hãhyirele me kyɛ dapɛen biala, ye yeɛ né odimoa ba Ahennie Asa so berɛ ɔ.

Subaen pá bɔ né ɔwɔ me maame nwo ne, ɔbokale me ne nniema mmrasua nemɔ paa. Nniema mmrasua nzã nemɔ mukoraati ne bɛ hũmɔ wɔ asafo nanu, na bɛfa anigye bɛsõ Yehowa. Nniema mmrasua nemɔ, benu nyɔ ne bɛ hũmɔ wɔ Bɛtɛl. Kõ wɔ Portugal, na kõ koso wɔ Haiti.

Kesaalae, me ne Randi te atẽepakyelɛfoɛ titire wɔ Hamilton bɔ ɔwɔ Ontario ne. Mmerɛ bɔ né nde manzin soneafoɛ ne, né yɛboka aliemaamɔ so maa bɛkɔyɛ bɛ sakɔnea ɔne bɛ Bible adesũa ahoroɛ. Nakoso kesaalae de, yɛbɔbɔ yele mmenia bɔ yɛne bɛ sũa nikye ɔ, na yɛ́boka bɛ maa bɛdɔ Yehowa. Aliemaamɔ koso, yafa bɛ adamvoa, na ɛyɛ a bɛkã kyɛbɔ Yehowa boka bɛ wɔ b’asetena nu nanwo dwirɛ bekyire yɛ. Sɛ yɛte sɔ dwirɛ ne a, ɔmaa yɛnye gye paa.

Sɛ yɛnea bɔ wahɔ so wɔ y’asetena nu a, yenwu kyɛ mmeni pẽe yeɛ baboka yɛ maa yadwu nekaa bɔ kesaalae yɛwɔ ne ɔ. Yeti yafa yasie yɛnye so kyɛ, yɛkɔboka aliemaamɔ maa bɛkɔyere bɛnwo wɔ Yehowa sõen nu. (2 Kor. 7:6, 7) Aliemaa bie bɔ né ɔwɔ y’asafo nanu ne, né ɔye ne ye mmaamɔ te atẽepakyelɛfoɛ. Yeti mmisale ye mmerɛ bɔ ye koso, ɔpena kyɛ ɔbayɛ atẽepakyelɛniɛ ɔ. Nakoso ɔhãhyirele me kyɛ, ye yeɛ ɔyɛ adwuma nea ɔye ne ye mmaa nemɔ ɔ, kyɛbɔ ɔkɔyɛ a bɛkɔhɔso bɛkɔyɛ atẽepakyelɛ adwuma ne ɔ. Yeti mmisale ye kyɛ, “Sɛ ɛbayɛ atẽepakyelɛniɛ a, Yehowa ngɔhora ngɔboka wɔ maa ɛngɔnea ɛye ne wɔ mmaa nemɔ anaa?” Nhyɛle ye ngunaen kyɛ ɔyɛ atẽepakyelɛ adwuma ne bie, ná ɔnea kyɛbɔ Yehowa kɔboka ye ɔ. Ɛhẽne ati, bosome nzia sĩ ne, aliemaa ne ɔɔyɛle atẽepakyelɛniɛ.

Me ne meye Randi kɔhɔso kɔbɔ Yehowa “anwanwadeɛ nwo dawure kohyire aworɛ ndoatoasoɛ.” Yele gyidie paa kyɛ sɛ yɛyɛ sɔ a, ɔkɔhyɛ mmrandeɛ ne ndaluwa nemɔ ngunaen maa bɛkɔyere bɛnwo wɔ Yehowa sõen nu, na ɛhẽne kɔmaa bɛnye kɔgye paa.—Edw. 71:17, 18.