ADESŨA BƆ ƆTƆ SO 20
Fi W’ahõne Nu Bɔ Mbaeɛ
“Ɛmɔfa ɛmɔ ahiasɛm bɛto ye nyunu.”—EDW. 62:8.
DWEIN 45 Me Koma Mu Nsusuwii
BƆ YƐBAASŨA Ɔa
Yɛkɔhora yɛkɔbɔ Yehowa mbaeɛ kyɛ ɔboka yɛ ma yɛfa ye dwirɛ ne yɛbɔ yɛ bra (Nea ngyekyɛmuɛ 1)
1. Nzu yeɛ Yehowa penakyɛ yɛyɛ ɔ? (Nea foto ne koso.)
SƐ EDWIRƐ bie to yɛ, ná yɛpena afutuo anaa awerɛkyekyerɛ a, nwa berɛ yeɛ odikyɛ yɛkɔ ɔ? Yehowa berɛ yeɛ odikyɛ yɛkɔ ɔ. Ɛhe kyire kyɛ odikyɛ yɛbɔ ye mbaeɛ, ofikyɛ wahã wahyire yɛ kyɛ, ‘nnɛmaa yɛyakyi mbaeɛ llé.’ (1 Tɛs. 5:17) Yɛkɔhora yɛkɔbɔ Yehowa mbaeɛ mmerɛ biala kyɛ ɔboka yɛ ma yɛfa ye dwirɛ ne yɛbɔ yɛ bra. (Any. 3:5, 6) Ɔnate kyɛ Nyameɛ dwene yɛnwo nati, ɔpena kyɛ yɛbɔ ye mbaeɛ mmerɛ biala bɔ yekuro ɔ.
2. Nzu yeɛ adesũa he kɔboka yɛ maa yekonwu ye ɔ?
2 Yɛda Yehowa ase paa kyɛ wama yɛ atẽe kyɛ yɛbɔ ye mbaeɛ mmerɛ biala ɔ. Nakoso, ɔnate ɔhaw bɔ ɔwɔ ewiase he anu nati, ɔkɔhora kɔyɛ se kyɛ yekonya mmerɛ yɛkɔbɔ mbaeɛ ɔ. Afei koso, ebia yɛnngora yemvi yɛ ahõne nu yɛmmɔ mbaeɛ kyɛbɔ yekuro ɔ, yeti ekonwu ye ne, daa edwirɛ kõ nala yeɛ yɛkã ɔ. Nakoso sɛ yɛnea Bible nanu a, yenwu mbaebɔ nwo dwirɛ pẽe bɔ ɔkɔhora kɔboka yɛ ɔ. Yenwo nneasoɛ yeɛ ole kyɛ, né Yesu le mmerɛ bɔ ɔfa bɔ mbaeɛ kyẽa biala ɔ. Adesũa he kɔboka yɛ maa yekonwu kyɛbɔ yekosuesũa ye ɔ. Afei koso, yekonwu nningyein 5 bie bɔ ɔkɔboka yɛ maa yekofi yɛ ahõne nu yɛkɔbɔ mbaeɛ ɔ.
YESU NYANE MMERƐ FABƆLE MBAEƐ
3. Ɔyɛle sɛɛ yeɛ Yesu nwuni kyɛ Yehowa tie mbaeɛ ɔ?
3 Né Yesu se kyɛ Yehowa nye gye yenwo paa kyɛ yɛkɔbɔ mbaeɛ. Mmerɛ bɔ né Yesu wɔ anwuro ne, onwuni kyɛbɔ Yehowa tiele bɛbɔ bɛsõ ye nahorɛ nu ne mbaeɛ ɔ. Yenwo nneasoɛ yeɛ ole kyɛ, mmerɛ bɔ Yehowa maa ebiemɔ tekyɛ Hannah, David, ɔne Elia nyane bɛ mbaeɛ nwo mmuayɛɛ ne, Yesu nwuni ye mukoraati. (1 Sam. 1:10, 11, 20; 1 Ahe. 19:4-6; Edw. 32:5) Ɛhe ati yeɛ Yesu hãhyirele ye asũafoɛ nemɔ kyɛ bɛhɔso bɛbɔ mbaeɛ ná benya gyidie kyɛ Nyameɛ kotie bɛ ne.—Mat. 7:7-11.
4. Nzu yeɛ ɔmaa yenwu ye kyɛ né Yesu bɔ mbaeɛ daa ɔ?
4 Yesu wɔ aseɛ so ne, wamva mbaeɛ wanni angorɛ koraa, mmom né ɔbɔ mbaeɛ kyẽa biala. Né Yesu llé alagyé koraa, nakoso onyane mmerɛ fabɔle mbaeɛ. (Mak. 6:31, 45, 46) Yenwo nneasoɛ yeɛ ole kyɛ, né odwɔso ndɛ kɔbɔ mbaeɛ. (Mak. 1:35) Mmerɛ bie koso bɔ né ɔbaasi gyinaeɛ bie bɔ ne yenwo hia paa ne, ɔbɔle mbaeɛ kɔngɔen ne mukoraati. (Luka 6:12, 13) Afei koso, kɔngɔen bɔ aleɛ baahẽ maa Yesu wu ne, ɔbɔle mbaeɛ mmerɛ pẽe kyɛbɔ ɔkɔyɛ a, ɔkɔhora kogyina bɔ né ɔbaato ye ne noa ɔ.—Mat. 26:39, 42, 44.
5. Yesu nyane mmerɛ fabɔle mbaeɛ daa. Nzu yeɛ yesũa yefi bɔ ɔyɛle nanu ɔ?
5 Bɔ Yesu yɛle ne, ɔmaa yenwu kyɛ ɔmva yenwo kyɛ ebia yellé alagyé ne, odikyɛ yenya mmerɛ yɛfa yɛbɔ mbaeɛ. Yɛkɔhora yekodwɔso ndɛ yɛkɔbɔ mbaeɛ, anaa yekuro koso a, yɛkɔhora yɛkɔbɔ mbaeɛ kɔngɔen. Yɛyɛ sɔ a, okyire kyɛ yenwo atẽe bɔ Yehowa afa ama yɛ kyɛ yɛkɔhora yɛkɔbɔ mbaeɛ mmerɛ biala ne, yɛnye gye yenwo. Ɛmɔma yɛnea aliemaa brasua bie bɔ bɛfrɛ ye Lynne. Mmerɛ bɔ onwuni kyɛ ɔkɔhora kɔbɔ mbaeɛ mmerɛ biala ne, yenye gyele paa. Ɔhãne kyɛ: “Yehowa bɔ mekora mebɔ ye mbaeɛ mmerɛ biala ne, wamaa mapingyé ye paa, na wamaa manwu kyɛ Yehowa te me damvo bɔ ngɔhora ngofi m’ahõne nu, me ne ye kodwudwo ɔ.” Edwirɛ bɔ aliemaa brasua ne kã ne, ɔte nahorɛ paa. Yede, ɛmɔma yɛnea nningyein 5 bie bɔ ɔkɔboka yɛ maa yekofi y’ahõne nu yɛkɔbɔ mbaeɛ ɔ.
NNINGYEIN 5 BƆ ƆKƆBOKA YƐ MAA YEKOFI Y’AHÕNE NU YƐKƆBƆ MBAEƐ Ɔ
6. Kyɛbɔ Nyekyire 4:10, 11 kã ne, nzu yeɛ odikyɛ bɛfa bɛma Yehowa ɔ?
6 Ye Yehowa ayɛ. Somafoɛ Yohane nyane nyekyire bie. Né ɔfa bɔ ɔkɔso wɔ anwuro dɔ nanwo. Onwuni mbanyi 24 biemɔ bɔ né bɛye Yehowa ayɛ ɔ. Né bɛkã kyɛ Nyameɛ fata kyɛ odé “animnyam, anidie ne tumi.” (Kenga Nyekyire 4:10, 11.) Abɔfo nemɔ koso, ɔnate kyɛ bɛne Yehowa yeɛ bɛte anwuro dɔ nati, bɛse ye paa. Yehowa subaen ne nningyein pá bɔ wayɛ nati, bɛye ye ayɛ.—Yob 38:4-7.
7. Sɛ yɛ́bɔ mbaeɛ a, yɛkɔyɛ sɛɛ né yaye Yehowa ayɛ?
7 Yɛ koso odikyɛ yɛye Yehowa ayɛ. Yeti sɛ yɛbɔ mbaeɛ a, odikyɛ yɛmaa Yehowa nwu nikyeehorɛ tibɔ yekuro ye dwirɛ ɔ. Bɔ ɔkɔboka yɛ maa yɛkɔyɛ sɔ yeɛ ole kyɛ, sɛ yɛkenga Bible ne a, odikyɛ yɛbɔ mmɔden kyɛ yekonwu Yehowa subaen ahoroɛ bɔ ɔyɛ nyemene ne, ɔne atẽe bɔ wafa so wala yali ne. (Yob 37:23; Rom. 11:33) Afei bɔ ɔmaa wɔnye gye sɔ subaen nanwo ne, kã yenwo dwirɛ kyire Yehowa mmerɛ bɔ ɛbɔ mbaeɛ ne. Yehowa boka yɛne yeliemamɔ bɔ bɛwɔ ewiase mukoraati ne, na ɔbɔ yɛnwo waen, ɛhẽne ati mmerɛ biala bɔ yɛbɔ mbaeɛ ne, odikyɛ yɛye ye ayɛ.—1 Sam. 1:27; 2:1, 2.
8. Nningyein bɔ yeti odikyɛ yɛda Yehowa ase ne, ebie yeɛ ole beni? (1 Tɛsalonikafoɛ 5:18)
8 Da Yehowa ase. Yele nningyein pẽe bɔ yeti odikyɛ yɛda Yehowa ase ɔ. (Kenga 1 Tɛsalonikafoɛ 5:18.) Bɔ yeti yeɛ ɔte sɔ yeɛ ole kyɛ, nningyein pá bɔ yele ye wɔ y’asetena nu ne, Yehowa yeɛ wafa wama yɛ ɔ. (Yak. 1:17) Ebie yeɛ ole nningyein bɔ ɔyɛ nyemene bɔ ɔwɔ aseɛ so bɔ ɔmaa yɛnye gye ne. Afei Yehowa aboka yɛ maa yɛte ngõa nu, na wamaa yanya nnamvoa ne abusũafoɛ bɔ bɛdwene yɛnwo ɔ. Bɔ ɔboka so yeɛ ole kyɛ, wahyɛ yɛ bɔ kyɛ, ɔkɔma yɛ daa ngõa kyẽabie. Afei koso, Yehowa ama yɛ atẽe kyɛ yɛkɔhora yɛkɔyɛ ye damvo. Ɔnate sɔ nningyein hemɔ ati, odikyɛ yɛda Yehowa ase.
9. Nzuati yeɛ odikyɛ yɛyere yɛnwo kora né yahora yala Yehowa ase ɔ?
9 Mmenia bɔ bɛwɔ ewiase ɛnnɛ ne, sɛ ɛyɛ nikyee ma bɛ a, bɛnye nzɔ. Kyɛ ahãa bɛkɔmaa bɛnye kɔgye nningyein kãa bɔ bele ye nanwo ne, bɛnnyɛ sɔ, na mmom daa bɛbɔ mmɔden kyɛ bekonya pẽe bɛkɔboka so. Sɛ yannea yé a, yɛkɔhora yekosuesũa sɔ subaen ne bie, na ɔba sɔ a, nningyein bɔ ohia yɛ ne ngome yeɛ yɛkɔbɔ yenwo mbaeɛ ɔ. Ɔnate ɛhe ati, odikyɛ yɛyere yɛnwo paa kora né yahora yala Yehowa ase wɔ bɔ wayɛ wama yɛ nanwo. Yeti, kyẽa biala, odikyɛ yenwu nningyein bɔ Yehowa ayɛ ama yɛ ne, ná yɛda ye ase.—Luka 6:45.
Sɛ yɛda Yehowa ase wɔ bɔ wayɛ wama yɛ nanwo a, ɔkɔhora kɔboka yɛ maa yekogyina ɔhaw noa (Nea ngyekyɛmuɛ 10)
10. Nzu yeɛ ɔbokale aliemaa brasua bie maa ɔhora gyinane ye haw noa ɔ? (Nea foto ne koso.)
10 Sɛ yɛda Yehowa ase wɔ bɔ wayɛ wama yɛ nanwo a, ɔkora boka yɛ maa yegyina ɔhaw ahoroɛ bɔ yeyia ne noa. Ɛmɔma yesusu aliemaa brasua bie bɔ bɛfrɛ ye Kyung-sook bɔ onyane kansa nanwo kãa. Bɛhãne yenwo dwirɛ wɔ January 15, 2015 Ɛwɛnelɛ Waen nanu. Ɔhãne kyɛ: “Anwonyerɛ bɔ ɔbɔle me ne maa ndele ngã kyɛ mvasoɛ biala nne me so. Ɛhe maa esuroen hãne me na me wora bɔle.” Yede, nzu yeɛ ɔbokale ye maa ogyinane ye haw ne noa ɔ? Kɔngɔen biala, né ɔbɔ mbaeɛ da Yehowa ase wɔ nningyein 5 bɔ wayɛ wama ye wɔ kyẽa nanu nanwo, kora né wala. Ɔyɛ sɔ a, né yenwo atɔ ye fɔnwoo, na ɔmaa onwu ye kyɛ wapingyé Yehowa. Kyung-sook nwuni kyɛ, bɛbɔ bedi Yehowa nahorɛ ne, ɔhaw biala bɔ bɛkɔhɔ nu ne, ɔboka bɛ. Afei ɔhyɛle ye nzorɛ kyɛ, nningyein bɔ Yehowa yɛ ma yɛ wɔ y’asetena nu ne, ɔsõne tra ɔhaw biala bɔ yɛkɔhora yekoyia ɔ. Sɔ dwirɛ he maa yenwu kyɛ, sɛ yeyia ɔhaw pó a, yɛkɔhora yɛkɔla Yehowa ase kyẽa biala wɔ bɔ wayɛ wama yɛ nanwo. Sɛ yɛyɛ sɔ a, ɔkɔboka yɛ maa yekogyina ɔhaw biala noa, na wamaa yɛnye agye.
11. Mmerɛ bɔ Yesu hɔle anwuro ne, nzuati yeɛ né odikyɛ ye asũafoɛ nemɔ nya akokoduro ɔ?
11 Srɛ Yehowa kyɛ ɔma wɔ akokoduro ma ɛfa hã nzɛmba ne. Waha kãa maa Yesu kɔ anwuro ne, ɔhãhyirele ye asũafoɛ nemɔ kyɛ bɛhã nzɛmba ne wɔ ‘Yerusalem, ne Yudea amukoraa ne Samaria maa oodwu aseɛ so nekaa biala.’ (Aso. 1:8; Luka 24:46-48) Asũafoɛ nemɔ hyɛle sɔ adwuma nabo ne, wangyɛ biala yeɛ Yudafoɛ mbanyi nemɔ hyele Somafoɛ Petro ne Yohane ɔ. Bɛfale bɛ bɛwale Sahendrin badwa ne nyunu, na bɛhã behyirele bɛ kyɛ bɛyakyi nzɛmba bɔ bɛkã ne. (Aso. 4:18, 21) Ɔwale sɔ ne, nzu yeɛ Petro ne Yohane yɛle ɔ?
12. Kyɛbɔ Asomafoɛ 4:29, 31 kyire ne, nzu yeɛ asũafoɛ nemɔ yɛle ɔ?
12 Mmerɛ bɔ Yudafoɛ mbanyi nemɔ hãne kyɛ asũafoɛ nemɔ yakyi nzɛmba bɔ bɛkã ne, Petro ne Yohane hãne kyɛ: “Sɛ ɔte pá wɔ Nyameɛ nyunu kyɛ yetie ɛmɔ yɛtra Nyameɛ a, nzaade ɛmɔ bɔbɔ ɛ́mɔbua; ɔnate kyɛ, bɔ yanwu ye ná yate ne de, yɛngɔhora yɛngɔyakyi ye hãnɛ.” (Aso. 4:19, 20) Mmerɛ bɔ bɛyakyili Petro ne Yohane ne, asũafoɛ nemɔ bɔle mbaeɛ srɛle Yehowa kyɛ ɔboka bɛ má bɛyɛ bɔ okuro ɔ. Bɛbɔle mbaeɛ kyɛ: “Ma wɔ ngoaa anwoserɛ bɔ yɛkɔfa yɛkɔhã wɔ dwirɛ ne ɔ.” Yehowa tiele sɔ mbaeɛ bɔ befi b’ahõne nu bɛbɔle ne.—Kenga Asomafoɛ 4:29, 31.
13. Nzu yeɛ yɛkɔhora yekosũa yekofi Jin-hyuk dwirɛ nanu ɔ?
13 Sɛ awaen ne kã kyɛ, yɛyakyi asɛnga adwuma ne wɔ maen bɔ yɛte nu nanu a, odikyɛ yɛkɔso yɛkã nzɛmba ne. Yɛyɛ sɔ a, okyire kyɛ yesuesũa bɔ asũafoɔ nemɔ yɛle ne. Ɛmɔma yɛnea kyɛbɔ yeliema bie bɔ bɛfrɛ ye Jin-hyuk lale akokoduro ali mmerɛ bɔ bɛhyele ye bɛtole prisã ne. Bɛfa bewurale ye sa kyɛ, bɛbɔ bɛla prisã berɛ ne, ɔnea ebiemɔ so. Nakoso bɛhã behyirele ye kyɛ, nnɛmaa ɔkã Bible nanu dwirɛ kyire ebiala wɔ prisã berɛ. Yeti ɔbɔle Yehowa mbaeɛ kyɛ, ɔma ye akokoduro na sɛ yenwo atẽe bie bukyé a, wahora wali adanzeɛ. (Aso. 5:29) Ɔhãne kyɛ: “Yehowa tiele me mbaeɛ ne, na ɔmane me akokoduro ne nworɛ. Ɛhẽne ati, bɛbɔ bɛla prisã berɛ ne, né mekora mefa mmerɛ kãa bie medi benu biemɔ adanzeɛ. Afei koso, sɛ aleɛ sã a, né metwerɛ ngrataa bɔ sɛ aleɛ kyẽ a, ngɔfa ngɔma bɛbɔ me ne bɛ la prisã berɛ ne ɔ.” Jin-hyuk dwirɛ ne maa yenwu kyɛ, yɛ koso yɛkɔhora yɛkɔsrɛ Yehowa kyɛ ɔma yɛ akokoduro ne nworɛ, bɔ yɛkɔfa yɛkɔhã nzɛmba ne ɔ.
14. Sɛ ɔhaw bie to yɛ a, nzu yeɛ odikyɛ yɛyɛ ɔ? (Edwein 37:3, 5)
14 Srɛ Yehowa kyɛ ɔboka wɔ ma egyina ɔhaw biala bɔ wato wɔ ne noa. Yenu biemɔ wɔ berɛ a, ɔnate anwonyerɛ, abusũa nu haw, yɛ damvo anaa yɛ busũaniɛ bie bɔ wawu, ɛpɔen, anaa ɔhaw foforɛ bie bɔ wato yɛ nati, yellé anigye wɔ y’asetena nu. Sɛ ɛhẽne la ahãmeɛ a, COVID-19 anwonyerɛ bɔ ɔwale ɛlɛsaen, ɔne nningyein tɛ́ bɔ osisi wɔ ewiase nanu ne, wamaa nningyein nu ayɛ se paa. Sɛ sɔ haw he bie ato wɔ a, fi w’ahõne mukoraati nu kã yenwo dwirɛ kyire Yehowa mmerɛ bɔ ɛbɔ mbaeɛ ne, kyɛbɔ ɛkã wɔ dwirɛ kyire wɔ damvo bie bɔ okuro wɔ dwirɛ ne. Yehowa ahyɛ wɔ bɔ kyɛ okoli kɔma wɔ, yeti nya gyidie kyɛ okotie wɔ.—Kenga Edwein 37:3, 5.
15. Sɛ ɔhaw bie to yɛ, ná yɛbɔ mbaeɛ a, ɔkɔboka yɛ sɛ́? Ma yenwo nneasoɛ.
15 Sɛ ɔhaw bie to yɛ ná yɛkɔ so yɛbɔ mbaeɛ a, ɔkɔboka yɛ maa yekonya aboterɛ yekogyina yenoa. (Rom. 12:12) Ɔhaw biala bɔ yɛfa nu ne, Yehowa se ye mukoraati, yeti sɛ yesũ yɛfrɛ ye a, ɔkɔboka yɛ. (Edw. 145:18, 19) Kristie te atẽepakyelɛniɛ bɔ wali afoɛ 29, na waanwu ye kyɛ sɔ dwirɛ ne te nahorɛ paa. Anwonyerɛ bɔ enu yɛ se bie bɔle ye, na ɔmaa ye wora bɔle paa. Ɛhẽne sĩ ne, bɛhã behyirele ye kyɛ anwonyerɛ bɔ ɔyɛ suro bie abɔ ye maame, na sɔ anwonyerɛ ne kɔmaa okowu. Kristie hãne kyɛ: “Mmɔle Yehowa mbaeɛ kyẽa biala kyɛ ɔboka me, kyɛbɔ ɔkɔyɛ a, ngɔhora ngogyina ɔhaw bɔ wato me ne noa ɔ. Né memia menye mesũa nikye, na né mekɔ asafo nhyiamu daa.” Osa hãne kyɛ: “Mbaeɛ bɔ mmɔle ne, ɔmaa nwuni kyɛ Yehowa te awerɛkyekyerɛ Nyameɛ, yeti sɛ mefa menwo meto ye so a, ɔngɔyakyi me nu llé. Ɛhẽne maa m’ahõne tɔle me kũnu paa.” Ɔtoale ye dwirɛ naso kyɛ: “Ɔwɔ nu, mbaeɛ bɔ mmɔle ne, wamma m’anwonyerɛ ne angɔ, nakoso Yehowa tiele me mbaeɛ ne, ofikyɛ ɔmaa nyane asomdwee.” Ɛmɔma yɛkae kyɛ, Yehowa se “atẽe bɔ ɔfa so pepɛ dé bɛbɔ besuro ye ne fi nzɔhwɛ nu ɔ.”—2 Pet. 2:9.
Sɛ ɛpenakyɛ ɛyɛ bɔ ɔte pá a, (1) bɔ Yehowa mbaeɛ ma ɔboka wɔ, (2) fa nningyein pá gye wɔnye, (3) yere wɔnwo sũa Bible ne, ná fa enu afutuo bɔ wɔ bra (Nea ngyekyemuɛ 16-17)
16. Nzuati yeɛ odikyɛ yɛsrɛ Yehowa kyɛ ɔboka yɛ ma yɛyɛ bɔ ɔte pá ɔ?
16 Srɛ Yehowa kyɛ ɔboka wɔ ma ɛyɛ bɔ ɔte pá ɔ. Ɔnate kyɛ yɛte mmenia bɔ mvomsoɛ wɔ yɛnwo nati, ɔyɛ se kyɛ yɛkɔyɛ bɔ ɔte pá ɔ. Satan se sɔ dwirɛ he, yeti ɔyere yenwo paa kyɛ ɔkɔmaa yɛkɔyɛ bɔne. Atẽe kõ bɔ ɔfa so yɛ sɔ yeɛ ole kyɛ, ɔkɔmaa yɛkɔfa nningyein bɔ ɔttemayé yɛkɔgye yɛnye. Sɛ yɛfa nningyein bɔ ɔte sɔ yɛgye yɛnye a, ɔmaa yenya nningyein bɔ ɔttemayé nwo akɔnnɔ wɔ y’ahõne nu, na ɛhe maa ɔyɛ mmerɛ kyɛ yɛkɔyɛ bɔne bɔ ɔte piri ɔ.—Mak. 7:21-23; Yak. 1:14, 15.
17. Mmerɛ bɔ yabɔ mbaeɛ kyɛ Yehowa boka yɛ ne, nzu yeɛ odikyɛ yɛbɔbɔ yɛyɛ ɔ? (Nea foto ne koso.)
17 Sɛ yɛkɔhora yɛkɔyɛ bɔ ɔte pá a, sana Yehowa boka yɛ. Yesu hãne kyɛ, sɛ yɛ́bɔ mbaeɛ a, yɛhã kyɛ: “Nnɛfa yɛ kɔ nzɔhwɛ nu, na mmom ye yɛ fi bɔne nu.” (Mat. 6:13) Yehowa penakyɛ ɔboka yɛ, nakoso sana yɛbɔ ye mbaeɛ kora. Sɛ yɛbɔ mbaeɛ ne yeyie a, odikyɛ yɛyere yɛnwo kyɛ yɛkɔyɛ bɔ ɔte pá ɔ. Nikyee kõ bɔ ɔkɔboka yɛ maa yɛkɔyɛ sɔ yeɛ ole kyɛ, yɛkɔnea yé kyɛ yɛngɔfa nningyein bɔ ɔttemayé bɔ ɔwɔ Satan wiase he anu ne, yɛngɔgye yɛnye. (Edw. 97:10) Sɛ yɛkɔhora yɛkɔyɛ bɔ ɔte pa á, odikyɛ yɛkenga Bible ne daa, ná yɛdwenedwene yenwo. Afei koso, odikyɛ yɛyere yɛnwo yɛyɛ asɛnga adwuma ne, ná yɛkɔ asafo nhyiamu. Yehowa ahyɛ yɛ bɔ kyɛ, ɔngɔma nzɔhwɛ bɔ ɔbo yɛ anwoserɛ so ngɔto yɛ llé.—1 Kor. 10:12, 13.
18. Nzu yeɛ odikyɛ yɛkã yenwo dwirɛ wɔ yɛ mbaeɛ nu ɔ?
18 Ewiase he kɔ ayieleɛ, yeti odikyɛ yɛyere yɛnwo yɛbɔ mbaeɛ kyɛbɔ ɔkɔyɛ a, yɛkɔhora yekoli nahorɛ yɛkɔma Yehowa ɔ. Yeti bɔ mmɔden kyɛ, ekonya mmerɛ kɔbɔ mbaeɛ kyẽa biala. Bɔ yeti yeɛ odikyɛ yɛyɛ sɔ yeɛ ole kyɛ, Yehowa penakyɛ ‘yɛfa yɛ ahiasɛm yɛto ye nyunu.’ (Edw. 62:8) Ye Yehowa ayɛ, na da ye ase wɔ bɔ wayɛ wama wɔ ne mukoraati nwo. Afei, srɛ Yehowa kyɛ ɔma wɔ akokoduro bɔ ɛkɔfa kɔyɛ asɛnga adwuma ne ɔ. Sɛ ɔhaw bie to wɔ, anaa ɔyɛ se ma wɔ kyɛ ɛkɔyɛ bɔ ɔte pá a, srɛ Yehowa kyɛ ɔboka wɔ. Yeti, kɔ so bɔ Yehowa mbaeɛ daa, na nnɛmaa nikyefee si w’atẽe llé. Yede, atẽe beni yeɛ Yehowa faso maa yenya yɛ mbaeɛ nwo mmuayɛɛ ɔ? Yekosusu sɔ dwirɛ nanwo wɔ adesũa bɔ oliberɛ nanu.
DWEIN 42 Onyankopɔn Somfo Mpaebɔ
a Sɛ yɛne yɛ damvo bie bɔ ngɔmmɔ a, yefi yɛ ahõne nu yedwudwo. Sɛ yɛbɔ mbaeɛ a, sɔ ala yeɛ odikyɛ yɛyɛ ɔ. Nakoso, ɔlla ase kyɛ yekonya mmerɛ yɛkɔbɔ mbaeɛ ɔ. Afei koso, odwu mmerɛ bie a, ɛyɛ a yennwu edwirɛ po bɔ yɛhã ye wɔ yɛ mbaeɛ nanu ɔ. Nzu yeɛ yɛkɔyɛ wɔ ɔhaw hemɔ nwo ɔ? Adesũa he kɔboka yɛ maa yekonwu ye.