Nningyein Bɔ Wɔnye La So Ne, Ɔkɔwa Nu

1. Bɔ né Abraham nye la so ne, nzuati yeɛ né ɔkɔwa nu ɔ?

ABRAHAM bɔ né ɔte Yehowa damvo ne, Yehowa hyɛle ye bɔ kyɛ, ɔnate ye bosofoɛ so yeɛ maenmaen mukoraati konya nhyiraa ɔ. (Gye. 15:5; 22:18) Né Abraham le Nyameɛ nu gyidie paa. Ɛhẽne ati, né odé di paa kyɛ ɛbɔ bɔ Nyameɛ ahyɛ ye ne kɔwa nu. Né Abraham ali afoɛ 100, na né ɔye koso ali afoɛ 90, koso né benya bɛwolle baa biala. (Gye. 21:​1-7) Nakoso Bible ne kã kyɛ: ‘Abraham gyinane anyelasoɛ so ole lili, amaa ɔnate so wayɛ amaenmaen pee bɛ nana, kyɛbɔ Nyameɛ hã hyirele ye ne.’ (Rom. 4:18) Kyɛbɔ ɛse ne, né Abraham afa afoɛ pẽe anwondɛ kyɛ bɔ yenye la so ne kɔwa nu, na sɔ pɛpɛɛpɛ yeɛ osili ɔ. Yeɛ ole kyɛ ɔwole ɔwa Yisake. Yede nzu yeɛ ɔmaa Abraham nyane gyidie kyɛ bɔ yenye la so ne kɔwa nu ɔ?

2. Nningyein bɔ né Yehowa afa ahyɛ Abraham bɔ ne, nzuati yeɛ né odé di kyɛ ɔkɔwa nu ɔ?

² Ɔnate kyɛ né Abraham damvo paa yeɛ ole Yehowa nati, ‘ole lili paa kyɛ anohoba bɔ Nyameɛ abɔ ye,’ anaa ɛbɔ bɔ wahyɛ ye ne kɔwa nu. (Rom. 4:21) Sɔ gyidie bɔ Abraham nyane nati, Yehowa buli ye kyɛ ɔte teneneeniɛ. (Yak. 2:23) Kyɛbɔ Romanfoɛ 4:18 maa yenwu ye ne, gyidie bɔ né Abraham le ye ne yeɛ ɔmaa ole lili kyɛ bɔ yenye la so ne kɔwa nu ɔ. Somafoɛ Pɔɔlo hãne edwirɛ bie wɔ Romanfoɛ yeti 5 nanu, na né ɔfa anyelasoɛ nwo. Ɛmɔma yesusu yenwo kãa.

3. Nzu yeɛ Pɔɔlo hãfale anyelasoɛ nwo ɔ?

³ Pɔɔlo maa yenwuni bɔ yeti yeɛ yɛkɔhora yekonya gyidie kyɛ yɛ “anyelasoɛ nni ngasi” ɔ. (Rom. 5:5) Osa maa yenwuni kyɛ, gyidie bɔ yele ye kyɛ bɔ yɛnye la so ne kɔwa nu ne, enu kora yɛ se. Yɛbaanea kyɛbɔ Pɔɔlo hyirehyirele sɔ dwirɛ he anu wɔ Romanfoɛ 5:​1-5 nanu. Mmerɛ bɔ yesusu yenwo ne, nea kyɛbɔ sɔ dwirɛ ne fa wɔnwo ɔ. Sɛ ɛyɛ sɔ a, ɔkɔboka wɔ maa ekonwu kyɛ gyidie bɔ kesaalae ele ye kyɛ bɔ wɔnye la so ne kɔwa nu ne, enu ayɛ se atra ahyɛaseɛ bɔ ɛɛyɛle Kristoniɛ ne koraa. Yekosa yekonwu bɔ ɔkɔboka wɔ maa w’anyelasoɛ nanu kɔyɛ se paa ɔ. Yede, anyelasoɛ bɔ Pɔɔlo hãne yenwo dwirɛ kyɛ ongoli ngasi, anaa ɔkɔwa nu atẽe biala so ne, ɛmɔma yelimoa yesusu yenwo.

ANYELASOƐ BƆ YELE YE Ɔ

4. Nzu yeɛ Romanfoɛ 5:​1, 2 kã yenwo dwirɛ ɔ?

⁴ Kenga Romanfoɛ 5:​1, 2. Pɔɔlo hworɔle sɔ dwirɛ he mane asafo bɔ né ɔwɔ Rome ne. Aliemaamɔ bɔ né bɛwɔ sɔ asafo nanu ne, ɔnate kyɛ né basũa Yehowa ne Yesu nwo nikyee nati, ɔmaa benyane gyidie, na ɛhẽne yeɛ ɔmaa bɛɛyɛle Kristofoɛ ɔ. Ɔnate gyidie bɔ benyane nati, ‘bɛne Nyameɛ afia yɛle ko.’ Bɔ ɛhẽne kyire yeɛ ole kyɛ Nyameɛ buli bɛ kyɛ bɛte teneneefoɛ, na ɔfale honhom krongron popale bɛ. Ɛhẽne ati benyane anyelasoɛ kyɛ, akatuaa bɔ Yehowa afa ahyɛ bɛ bɔ ne, kyɛbɔ ɔte biala bɛsa kɔhã ye.

5. Kristofoɛ bɔ bafa honhom bapopa bɛ ne, anyelasoɛ beni yeɛ bele ye ɔ?

⁵ Kristofoɛ bɔ bafa honhom bapopa bɛ bɔ né bɛwɔ Ɛfeso ne, Pɔɔlo hworɔle krataa bie ɔɔmane bɛ. Ɔhãne anyelasoɛ bɔ né bele ye nanwo dwirɛ wɔ sɔ krataa nanu. Ɔhãne yenwo dwirɛ kyɛ ɔte “agyapadeɛ animnyam anwonya wɔ anwoteefoɛ nu.” (Ɛfe. 1:18) Afei koso, Pɔɔlo hworɔle krataa bie ɔɔmane Kolosefoɛ nemɔ, na ɔmaa benwuni nekaa bɔ né bekonya bɔ bɛnye la so ne ɔ. Ɔhãhyirele bɛ kyɛ: ‘Sɔ anyelasoɛ ne wɔ berɛ ma ɛmɔ wɔ nyameɛso.’ (Kol. 1:​4, 5) Ɛhe kyire kyɛ Kristofoɛ bɔ bafa honhom krongron bapopa bɛ ne, sɛ bewu a, bekotingye bɛ bɛkɔhɔ anwuro maa bɛne Kristo kooli hene.—1 Tɛs. 4:​13-17; Nye. 20:6.

6. Aliemaa bie bɔ ɔboka bɛbɔ bɛkɔhɔ anwuro naso ne, nzu yeɛ ɔhãfale bɔ yenye la so nanwo ɔ?

⁶ Kristofoɛ bɔ bɛkɔhɔ anwuro ne, bɛnye gye anyelasoɛ bɔ bele ye nanwo paa. Benu kõ yeɛ ole Aliemaa Frederick Franz. Ɔhãne anyelasoɛ bɔ ole ye nanwo dwirɛ kyɛ: “Kyɛbɔ ɔte biala, bɔ yɛnye la so ne kɔwa nu, na ebiala bɔ ɔboka mmenia 144,000 naso ne, yesa kɔhã ye akatuaa. Yɛngɔhora yɛngɔfa nikyefee yɛngɔtoto sɔ akatuaa bɔ yekonya ye nanwo.” Aliemaa Franz sõne Yehowa nahorɛ nu afoɛ pẽe. Wɔ 1991 nu ne, osa hãne anyelasoɛ bɔ ole ye nanwo dwirɛ kyɛ: “Anyelasoɛ bɔ yele ye ne, oté sombo ma yɛ paa. . . . Afoɛ pẽe bɔ yafa yanwondɛ ne, ɔmma y’abanu mmu, na mmom ɔmaa daabiala yɛnye gye anyelasoɛ bɔ yele ye nanwo. Sɛ odikyɛ yɛnwondɛ mmerɛ tendenn po a, ɔnate kyɛ yɛnye gye sɔ anyelasoɛ nanwo nati, yɛkɔhɔ so yɛkɔnwondɛ. Kesaalae menye gye anyelasoɛ bɔ nné ye nanwo tra dáa ne koraa.”

7-8. Anyelasoɛ beni yeɛ yɛ nu pẽe le ye ɔ? (Romanfoɛ 8:​20, 21)

⁷ Mmenia bɔ bɛsõ Yehowa bɔ bɛwɔ berɛ ɛnnɛ ne de, ɔsono anyelasoɛ bɔ benu pẽe le ye ɔ. Yeɛ ole kyɛ bɛkɔtena ase daa wɔ aseɛ so mmerɛ bɔ Nyameɛ Ahennie ne awa ne. Ɛhẽne ala yeɛ né Abraham koso nye la so kyɛ okonya ye ɔ. (Heb. 11:​8-10, 13) Akatuaa bɔ sɔ mmenia nemɔ sa kɔhã ye ne, Pɔɔlo hãne yenwo dwirɛ. (Kenga Romanfoɛ 8:​20, 21.) Mmerɛ bɔ olimoa bɔ ɛtele nningyein pá bɔ Bible ne ahyɛ yenwo bɔ nanwo dwirɛ ne, enu beni yeɛ wɔnye gyele yenwo paa ɔ? Ɛnea a, ɔte bɔhyɛ bɔ yeɛ ole kyɛ mmerɛ bie kɔwa bɔ ɛkɔyɛ sona bɔ bɔne biala nne wɔnwo ne? Anaa bɔhyɛ bɔ yeɛ ole kyɛ bekotingye w’abusũafoɛ ne wɔ damvomɔ bɔ bawu ne maa bɛkɔtena Paradise ne? Sɔ bɔhyɛ ne bɔ ɛtele yenwo dwirɛ ne, ɔmaa enyane ‘anyelasoɛ.’ Yeti né wɔnwo pere wɔ kyɛ sɔ nningyein ne kɔwa nu.

⁸ Sɛ yɛnye la so kyɛ yekonya daa ngõa wɔ anwuro oo, sɛ aseɛ so oo, yenu biala le anyelasoɛ bɔ ɔmaa yenye gye ɔ. Yɛkɔhora yɛkɔhɔ so yekonya gyidie kyɛ bɔ yɛnye la so ne kɔwa nu. Edwirɛ bɔ Pɔɔlo hworɔle ne, sɛ yesusu yenwo a, ɔkɔboka yɛ maa yɛkɔhora yɛkɔyɛ sɔ. Yede ɛmɔma yɛnea bɔ Pɔɔlo hworɔ fale anyelasoɛ bɔ yele ye nanwo ɔ. Ɛhẽne kɔmaa gyidie bɔ yele ye kyɛ nningyein bɔ yɛnye la so ne kɔwa nu ne, enu kɔhɔ so kɔyɛ se.

BƆ ƆBOKA YƐ MAA YƐ ANYELASOƐ NANU YƐ SE Ɔ

9-10. Sɛ yɛnea bɔ ɔtole Pɔɔlo ne a, nzu yeɛ odikyɛ Kristofoɛ mukoraati nwu ye ɔ? (Romanfoɛ 5:3) (Nea foto ne.)

⁹ Kenga Romanfoɛ 5:​3, 4. Sɛ yenwu amaneɛ a, ɔkora maa gyidie bɔ yele ye kyɛ yɛ anyelasoɛ ne kɔwa nu ne, enu yɛ se. Ebia sɔ dwirɛ he kɔyɛ yɛ nwanwa. Nakoso bɔ ɔte yeɛ ole kyɛ, yɛbɔ yɛte Kristofoɛ ne de, odikyɛ yenwu ye kyɛ, ɔyɛ sɛɛ alaa a, yekonwu amaneɛ. Somafoɛ Pɔɔlo nwuni amaneɛ bɔ ɔte sɔ ne bie, na ɔhãne yenwo dwirɛ hyirele Tɛsalonikafoɛ nemɔ kyɛ: “Mmerɛ bɔ né yɛwɔ ɛmɔ berɛ nen, yɛlili moa yɛhã yɛhyirele ɛmɔ kyɛ yɛkonwu amaneɛ, na kyɛbɔ ɛmɔse nen, sɔ ala koso yeɛ wasi ɔ.” (1 Tɛs. 3:4) Korintofoɛ nemɔ koso, ɔhãhyirele bɛ kyɛ: ‘Aliɛmaa mɔ, kyɛbɔ yɛ nwo si hyerele yɛ nen, yɛmbena kyɛ yɛfa yɛsie ɛmɔ, yɛ ngoa nwo anyelasoɛ mukoraa tu minini.’—2 Kor. 1:8; 11:​23-27.

¹⁰ Kristofoɛ bɔ bɛwɔ berɛ ɛnnɛ ne koso, odikyɛ benwu ye kyɛ, ɔyɛ sɛɛ alaa a, bekonwu amaneɛ. (2 Tim. 3:12) Wɔ koso, enwu amaneɛ anaa? Ebia ɔnate kyɛ anya Yesu nu gyidie na aayɛ Kristoniɛ nati, w’abusũafoɛ ne wɔ damvomɔ goro wɔnwo, anaa bɛtane wɔnye po. Anaa ɔnate kyɛ edi nahorɛ wɔ adwuma nu nati, mmeni pẽe nguro wɔ dwirɛ wɔ adwuma nu berɛ. (Heb. 13:18) Afei koso, ɔnate kyɛ ɛkã anyelasoɛ bɔ ele ye nanwo dwirɛ kyire mmenia nati, ebia wamaa awaen mbanyi bɛtane wɔnye. Ɔmva yenwo ne amaneɛ biala bɔ yenwu ye ne, Pɔɔlo hãne kyɛ odikyɛ yɛmaa yɛnye gye. Nzuati ɔ?

11. Nzuati yeɛ odikyɛ yemia yɛnye yegyina ɔhaw biala bɔ ɔkɔto yɛ ne noa ɔ?

¹¹ Sɛ yenwu amaneɛ a yɛnye kɔhora kɔgye, ofikyɛ nikyee pá bie kora fi nu ba. Romanfoɛ 5:3 maa yenwu kyɛ, “amaneɛnwunɛ ma sona nya animia.” Odikyɛ Kristofoɛ mukoraati nya sɔ subaen he bie, ɔnate kyɛ ɔyɛ sɛɛ alaa a, yenu biala konwu amaneɛ. Ɛhẽne ati ɔhaw biala bɔ ɔkɔto yɛ ne, odikyɛ yemia yɛnye yegyina yenoa. Sɛ yɛyɛ sɔ a, ɛhẽne yeɛ ɔkɔboka yɛ maa yɛsa kɔhã bɔ yɛnye la so ne ɔ. Yɛmbena kyɛ yɛyɛ kyɛ mmenia bɔ Yesu hãne bɛnwo dwirɛ kyɛ, bɛte kyɛ aba bɔ ooguale nyɔboɛ so ne. Mmenia bɔ bɛte sɔ ne, sɛ bɛte edwirɛ ne a, bɛfa anigye bedé bɛto nu. Nakoso sɛ “amaneɛnwunɛ anaa ndaneanyeɛ” ba bɛ so a, né b’aba nu abu. (Mat. 13:​5, 6, 20, 21) Nahorɛ dwirɛ yeɛ ole kyɛ sɛ yenwu amaneɛ a, ɔmma yɛnye ngye. Nakoso sɛ yemia yɛnye yegyina nu a, ɔboka yɛ paa. Nzuati yeɛ yɛkã sɔ ɔ?

12. Sɛ yemia yɛnye yegyina ɔhaw noa a, sɛɛ yeɛ ɔboka yɛ ɔ?

¹² Somafoɛ Yakobo maa yenwuni kyɛ sɛ yemia yɛnye yegyina ɔhaw nu a, ɔboka yɛ paa. Ɔhworɔle kyɛ: “Ɛ́mɔma ɛmɔ animia ne ɔyɔ ye adwuma yie pɛpɛɛpɛ, amaa ɛmɔali mu bɔkɔɔ bɔ siitɔlɛ biala nne ɛmɔ nu ɔ.” (Yak. 1:​2-4) Yakobo hãne kyɛ anima le adwuma bie bɔ odikyɛ ɔyɛ ɔ. Yede nzu yeɛ ole sɔ adwuma ne? Yeɛ ole kyɛ, sɛ emia wɔnye gyina ɔhaw bie nu a, ɔboka wɔ maa ɛkɔso nya aboterɛ. Afei ɔmaa wɔ gyidie yɛ se, na ɛfa wɔnwo to Nyameɛ so. Nakoso nna ɛhẽne ngome, na mmom sɛ yemia yɛnye yegyina ɔhaw nu a, ɔboka yɛ wɔ atẽe foforɛ so.

13-14. Sɛ yemia yɛnye yegyina ɔhaw noa a, nzu yeɛ ofi nu ba ɔ, na sɛɛ yeɛ ɛhe kã anyelasoɛ bɔ yele ye ne ɔ? (Romanfoɛ 5:4)

¹³ Kenga Romanfoɛ 5:4. Pɔɔlo hãne kyɛ sɛ yemia yɛnye yegyina ɔhaw nu a “ɔma suahunu.” Sɔ dwirɛ ne kyire kyɛ, sɛ emia wɔnye gyina ɔhaw nu a, ɔmaa Yehowa dé wɔ to nu. Bɔ yɛkã ne ngyire kyɛ sɛ ɔhaw bie to wɔ a, ɔmaa Yehowa nye gye. Na mmom bɔ okyire yeɛ ole kyɛ, ɔhaw ne bɔ emia wɔnye gyina nu ne, ɛhẽne yeɛ ɔmaa Yehowa nye gye ɔ. Ɛhe te nikyee bɔ ɔhyɛ ngunaen paa!—Edw. 5:12.

¹⁴ Kae kyɛ bɔ ɔmaa Nyameɛ lele Abraham tole nu yeɛ ole kyɛ, omiane yenye gyinane ɔhaw bɔ ɔtole ye ne noa. Ɛhẽne ati Yehowa nwuni kyɛ ɔte teneneeniɛ, na ɔɔyɛle ye damvo. (Gye. 15:6; Rom. 4:​13, 22) Yɛ koso, nna adwuma bɔ yɛyɛ ye wɔ Yehowa sõen nu, anaa yenwo atẽe bie bɔ yele ye ne, yeɛ ɔkɔmaa Yehowa kole yɛ kɔto nu ɔ. Na mmom sɛ yemia yɛnye yegyina ɔhaw noa a, ɛhẽne yeɛ ɔmaa Yehowa dé yɛ to nu ɔ. Yeti ɔmva yenwo ne bɔ ɔkɔ so wɔ y’asetena nu ne, yɛkɔhora yekomia yɛnye yekogyina ɔhaw biala bɔ ɔkɔto yɛ ne noa, kyɛ yɛte akwalaa anaa panyi ne. Ɔhaw bie ato wɔ bɔ emia wɔnye gyina yenoa anaa? Yede, ma wɔnye gye, ofikyɛ mmɔden bɔ ɛbɔ nati Nyameɛ ale wɔ ato nu. Sɛ yenwu ye kyɛ Nyameɛ ale yɛ ato nu a, ɔboka yɛ paa, ofikyɛ ɔmaa yenya gyidie kyɛ, kyɛbɔ ɔte biala yɛsa kɔhã nningyein bɔ Nyameɛ afa ahyɛ yɛ bɔ ne.

BƆ ƆMAA YƐKƆSO YENYA GYIDIE KYƐ BƆ YƐNYE LA SO NE KƆWA NU Ɔ

15. Edwirɛ foforɛ beni yeɛ Pɔɔlo hãne wɔ ye krataa nanu ɔ, na nzuati yeɛ sɔ dwirɛ ne kɔhora kɔyɛ ebiemɔ nwanwa ɔ?

¹⁵ Kyɛbɔ Pɔɔlo hãne ne, sɛ Nyameɛ kole yɛ kɔto nu a, sana yemia yɛnye yegyina ɔhaw ahoroɛ bɔ ɔto yɛ ne noa. Pɔɔlo toale ye dwirɛ naso kyɛ: “Animia ma suahunu, yeɛ suahunu koso ma anyelasoɛ. Na anyelasoɛ nni ngasi.” (Rom. 5:​4, 5) Ebia sɔ dwirɛ he kɔyɛ ebiemɔ nwanwa. Nzuati ɔ? Ofikyɛ né Pɔɔlo alimoa ahã ye wɔ Romanfoɛ 5:2 nanu kyɛ, Kristofoɛ bɔ bɛwɔ Rome ne, né bele anyelasoɛ bie. Ɔhãne sɔ anyelasoɛ nanwo dwirɛ kyɛ ɔte “Nyameɛ animnyam nwo anyelasoɛ.” Ebia ebie kobisa kyɛ, ‘Sɛ né sɔ Kristofoɛ nemɔ le anyelasoɛ a, yede nzuati yeɛ osa hãne kyɛ odikyɛ benya anyelasoɛ wɔ krataa bɔ ɔhworɔ mane bɛ nanu ɔ?’

16. Gyidie bɔ ebie le ye kyɛ bɔ yenye la so ne kɔwa nu ne, enu kora yɛ se. Nzuati ɔ? (Nea foto ne.)

¹⁶ Sɛ yedé yɛto nu kyɛ anyelasoɛ te nikyee bɔ enu kora yɛ se a, ɔkɔboka yɛ maa yɛkɔte edwirɛ bɔ Pɔɔlo hãne nabo. Nningyein bɔ Nyameɛ ahyɛ bɔ kyɛ ɔkɔyɛ kɔma yɛ wɔ Paradise ne, ɛkae mmerɛ bɔ olimoa bɔ ɛtele yenwo dwirɛ ne? Ebia sɔ mmerɛ ne, ebisale wɔnwo kyɛ, ‘Ɛhe de, ɔkɔyɛ sɛɛ né wahora wawa nu?’ Nakoso mmerɛ bɔ ɛhɔle so sũane Yehowa ne nningyein bɔ wafa wahyɛ yɛ bɔ nanwo dwirɛ wɔ Bible nanu ne, enyane gyidie kyɛ sɔ bɔhyɛ ne kɔwa nu.

17. Ofi mmerɛ bɔ ɛbɔle asu ne, sɛɛ yeɛ gyidie bɔ ele ye kyɛ nningyein bɔ wɔnye la so ne kɔwa nu ne, enu ayɛ se ɔ?

¹⁷ Mmerɛ bɔ ɛhyɛle Yehowa bɔ kyɛ ɛkɔsõ ye, na ɛbɔle asu yiele po ne, ɔnate kyɛ ɛdɔ Yehowa paa ne ati, ɛhɔle so sũane yenwo nikyee. Ɛhẽne ati, gyidie bɔ ele ye kyɛ bɔ wɔnye la so ne kɔwa nu ne, enu yɛle se. (Heb. 5:13–6:1) Ɛhẽne amaa ate edwirɛ bɔ ɔwɔ Romanfoɛ 5:​2-4 nabo paa. Ɔhaw pẽe yeɛ wato wɔ ɔ, nakoso amia wɔnye agyina yenoa. Ɛhẽne ati enwu ye kyɛ Yehowa ale wɔ ato nu. Ɔnate kyɛ ɛse kyɛ Yehowa ale wɔ ato nu nati, wamaa anya gyidie paa kyɛ wɔsa kɔhã nningyein bɔ wafa wahyɛ wɔ bɔ ne. Sɛ ɛfa sɔ gyidie ne toto mmerɛ bɔ ɛhyɛle yebo kyɛ esũa nikyee nanwo a, enwu ye kyɛ kesaalae enu ayɛ se paa. Ɛhẽne ati kesaalae, ɛne w’abusũafoɛ afĩa te kama, ɛkora sisi gyinayɛɛ pá, na ɛfa wɔ mmerɛ yɛ adwuma yé.

18. Nzuati yeɛ ɛkɔhora kole koli kyɛ bɔ wɔnye la so ne kɔwa nu ɔ?

¹⁸ Somafoɛ Pɔɔlo hãne kyɛ sɛ enwu kyɛ Nyameɛ ale wɔ ato nu a, ɔboka paa. Ofikyɛ ɔmaa enya gyidie kyɛ, kyɛbɔ ɔte biala, bɔ wɔnye la so ne kɔwa nu. Nzuati yeɛ yɛkã sɔ ɔ? Edwirɛ bɔ Yehowa maa Pɔɔlo hworɔ mane Kristofoɛ ne, ɔmaa yenwu bɔ yeti yeɛ ɔte sɔ ɔ. Ɔhworɔle kyɛ: “Anyelasoɛ nni ngasi, ofikyɛ Nyameɛ nate ye Sunzum Krongron bɔ ɔfa mane yɛ ne aso wafa ye ɔdɔ somaa ne wawura yɛ ahone nu.” (Rom. 5:5) Sɔ dwirɛ ne maa yenwu kyɛ ɔyɛ sɛɛ alaa a, nningyein bɔ Nyameɛ afa ahyɛ yɛbɔ ne kɔwa nu.

19. Nningyein bɔ wɔnye la so ne, nzuati yeɛ ɛkɔhora konya gyidie kyɛ ɔkɔwa nu ɔ?

¹⁹ Kyɛbɔ yanwu ye ne, Yehowa lele Abraham tole nu, na ɔɔyɛle ye damvo. Afei koso, ɔhyɛle Abraham bɔ, na ɔwale nu pɛpɛɛpɛ. Bible ne kã kyɛ: “Abraham nyane aboterɛ nwondɛle, na ye sa hane bɔhyɛ ne.” (Heb. 6:15; 11:​9, 18; Rom. 4:​20-22) Bɔ né Abraham nye la so ne, yesa hãne ye. Wɔ koso sɛ ɛkɔso di nahorɛ ma Yehowa a, ɛkɔhora konya gyidie kyɛ wɔsa kɔhã bɔ wɔnye la so ne. Kesaalae, ele adanzeɛ bɔ okyire kyɛ, kyɛbɔ ɔte biala bɔ wɔnye la so ne kɔwa nu ɔ. Yeti sɛ ɛkɔ so dwenedwene yenwo a, ɔkɔmaa wɔnye kɔgye. (Rom. 12:12) Pɔɔlo hãne ɛhe anwo dwirɛ kyɛ: “Na mesrɛ kyɛ, anyelasoɛ Nyameɛ ne ɔfa gyidie nu anigye ne asomdwee amukoraa owura ɛmɔ nu tɛkyɛ, amaa ɔnate Sunzum Krongron tumi so ɛmɔanya anyelasoɛ mmorosoɛ.”—Rom. 15:13.