Chapitre 129

Lo fa tele ti lo mbeni

VUNDU angba ti sala adisciple. Ala hinga li ti ala oko pepee na tene ti du-kua so ya ni angba senge, na ala ma na be nga pepee na tene ti awali ni. Tongaso, na pekoni na dimanche, Cléopas na mbeni disciple alondo na Jérusalem ti gue na Emmaüs, kodoro so ayeke yongoro alingbi na kilomètre bale oko na ndoni oko.

Na lege, tongana ala yeke sala tene na popo ti ala ti ye kue so asi na lango ni so, mbeni wande aga atambela na ala. Lo hunda ala: “I sala tene ti nyen na popo ti i tongana i yeke tambela?”

Adisciple aluti, le ti ala ayeke na vundu, na Cléopas akiri tene na lo: “Mo yeke wande so alango yamba na Jérusalem si mo hinga pepee ye so asi ka na ya ti alango so?” Zo ni ahunda: “Aye wa?”

Ala kiri tene: “Atene so abaa Jésus, zo ti Nazareth. Akota prêtre na amokonzi ti e azia lo na ti ti azo so afa ngbanga ti kui na li ti lo na ala fa lo na keke ti pasi. Me kozoni e yeke na beku so lo yeke zo so ayeke ton Israël.”

Cléopas na mba ti lo afa na zo ni aye ti dongo be so asi na la ni so​—tene ti a-ange so asigigi, du-kua so awara kua ni da pepee​—na pekoni ala fa so ala hinga nda ti aye so kue pepee. Wande so asuku na ala: “O i awabuba so ahinga ye fade pepee, na i so i ma na be fade pepee na ye kue so aprophète atene giriri! A yeke ngbanga ti Christ ti hu pono ti ye so na ti li na ya gloire ti lo pepee?” Na pekoni lo fa na ala nda ti atene na ya Mbeti ti Nzapa so asala tene ti Christ.

Na ndani ala ga ndulu na Emmaüs, na wande so asala tongana lo yeke hon. Adisciple aye si lo sala tene na ala mbeni, tongaso ala tene na lo: “Mo duti na e, teti la aga ndulu ti kui.” Tongaso lo ngba na ala ti te kobe. Gi na ngoi so lo sambela, lo kungbi mapa na lo mu ni na ala, ala tonda ti hinga so wande so ayeke biani Jésus so ayu tele ti zo. Ye oko, na ngoi ni so lo miro na le ti ala.

Fadeso ala hinga ngbanga ti nyen wande so ahinga ye mingi ahon! Ala hunda: “Tongana lo yeke sala tene na e na lege, na tongana lo yeke fa na e mbilimbili tene ti Mbeti ti Nzapa, be ti e ayeke tongana wa pepee?” Hio, ala londo na ala kiri na Jérusalem. Ka, ala wara abazengele na ambeni zo so abungbi oko na ala. Kozoni si Cléopas na mba ti lo alingbi ti zi yanga ti ala, ambeni zo so ayeke na kota ngia na be ti ala atene: “Biani ayaa Seigneur awe na lo fa tele ti lo na Simon!” Na pekoni, azo use so afa tongana nyen Jésus afa tele ti lo na ala nga. A yeke fani osio ni laa na lango oko si lo fa tele ti lo na adisciple nde nde.

Fade fade Jésus afa tele ti lo ti fani oku ni. Ataa adisciple akanga yanga da so ala duti na ya ni teti mbito ti aJuif asala ala, Jésus ali, lo luti na popo ti ala na lo tene: “Siriri aduti na i.” Mbito asala ala mingi, ala tene ala baa mbeni yingo. Ti fa na ala so lo yeke mbeni yingo pepee, Jésus atene: “Teti nyen be ti i ado, na teti nyen kite ayeke na be ti i? I baa maboko ti mbi na gere ti mbi, a yeke mbi mveni; i ndu mbi na i baa, teti yingo ayeke na mitele na bio pepee, tongana so i baa mbi yeke na ni.” Ataa so lo sala ye so kue, a yeke ngangu na ala ti ma na be na ni.

Ti mu maboko na ala ti hinga so lo yeke biani Jésus, lo hunda ala: “I yeke na mbeni ye ti te na ndo so?” Tongana lo kamata susu so ala zo ni, na lo te ni, lo tene: “So ayeke tene so mbi tene na i giriri tongana mbi de na i [kozoni na kui ti mbi], a lingbi tene kue so asu na ndo ti mbi na ya Ndia ti Moïse na aProphète na aPsaume aga taa tene.”

Ti gue na li ni na ya ye so ayeke biani mandango Mbeti ti Nzapa na ala, Jésus afa ye so: “Mbeti ti Nzapa atene tongaso, fade Christ ahu pono, na lo londo na popo ti awakinda na la ota ni, na fade afa na amara kue na iri ti lo, alondo na Jérusalem, tene ti sanzengo be ti wara pardon ti siokpari, i yeke atémoin ti ye so.”

E hinga pepee ngbanga ti nyen Thomas aduti da pepee na kota bungbi so asala na lakui na dimanche. Ni laa, na ya ti alango so aga na peko, ambeni atene na lo na kota ngia na be ti ala: “E baa Seigneur awe!”

Thomas ade kite: “Tongana mbi baa ka ti pointe na maboko ti lo pepee, na mbi yoro liti ti mbi na ya ti ka ni pepee, na mbi yoro maboko ti mbi na kate ti lo pepee, fade mbi ma na be oko pepee.”

Ni laa, na peko ti lango miombe adisciple abungbi tele ti ala mbeni na ya ti da. Fadeso Thomas ayeke na ala. Ataa so akanga yanga ti da, Jésus aga lo luti mbeni na popo ti ala na lo tene: “Siriri aduti na i.” Na pekoni, lo baa ndo na mbage ti Thomas, lo tene na lo: “Ga na liti ti mo ge, na baa maboko ti mbi, na mu maboko ti mo na yoro ni na ya kate ti mbi, na mo zia ti de kite me mo ma na be.”

Thomas atene: “Seigneur ti mbi na Nzapa ti mbi!”

Jésus ahunda lo: “Teti mo baa mbi, mo ma na be? Ngia ayeke na ala so abaa mbi pepee, me ala ma na be.” Luc 24:11, 13-48; Jean 20:19-29.

▪ Ahundango tene wa mbeni wande ahunda na adisciple use na lege ti gue na Emmaüs?

▪ Tene ti nyen wande atene so asala si be ti adisciple ayeke tongana wa?

▪ Adisciple ahinga tongana nyen wande ni ayeke Jésus?

▪ Tongana Cléopas na mba ti lo akiri na Jérusalem, ala ma tene wa so amu ngia mingi?

▪ Ti lege oku ni, Jésus afa tele ti lo na adisciple ti lo tongana nyen, na ye nyen asi na ngoi ni so?

▪ Ye nyen asi lango miombe na peko ti singo ti Jésus ti fani oku ni, na nyen amu maboko na Thomas ti ma na be biani so Jésus ayeke na fini?