Ye ti Manda 15

Andeko ti Nzapa Asala Ye ti Nzoni

Tongana mo yeke na mbeni kamarade so mo ye tene ti lo na mo yekia lo, mo yeke gi lege ti sala ye tongana lo. Bible atene: “L’Eternel ayeke nzoni na mbilimbili.” (Psaume 25:8) Ti duti ndeko ti Nzapa, a lingbi e yeke nzoni na mbilimbili. Bible atene: “I ga azo so amu tapande ti Nzapa, tongana amolenge so andoye ala mingi, na i ngbâ ti tambela na yâ ti ndoye.” (aÉphésien 5:1, 2, NW) Ba ambeni lege ti sala ni:

Mu maboko na ambeni zo. “A lingbi e sala ye ti nzoni na azo kue.”—aGalate 6:10.

Sala kua ngangu. “Zia wanzi asala nzi mbeni pepe, me nde na so zia lo sala kua ngangu, na salango kusala so ayeke nzoni na maboko ti lo.”—aÉphésien 4:28, NW.

Duti na sioni oko pepe na lege ti mitele nga na lege ti bibe. “Zia e sukula e mveni ti lungula sioni kue ti mitele na ti yingo; na lege ti mbito ti Nzapa, zia e ga azo ti be-vulu biani.”—2 aCorinthien 7:1.

Sala ye na azo ti sewa ti mo na lege ti ndoye nga na yekiango zo. “I oko oko kue, i ndoye awali ti i legeoko tongana tele ti i mveni; na a lingbi wali ayekia koli ti lo. Amolenge, i mä yanga ti ababâ na mama ti i.”—aÉphésien 5:33–6:1, NW.

Fa ndoye teti ambeni zo. “A lingbi e ndoye tele ti e na popo ti e; teti ndoye ayeke ti Nzapa.”—1 Jean 4:7.

Kpe andia ti kodoro. “Zia âme oko oko aduti na gbe ti [ngorogbia] . . . I mu na ala kue ye ti ala; i mu lampo na ala so ahiri lampo.”—aRomain 13:1, 7, NW.