Batême: Mbeni pendere ye ti zia na gbele mo ti si dä

Jésus afa lani so aChrétien adoit ti wara batême. (Diko Matthieu 28:19, 20.) Me batême ayeke nyen? Ngbanga ti nyen la a lingbi zo agi ti wara batême?

1. Batême ayeke nyen?

Tënë “batême” alondo na mbeni tënë ti Grec so ndani aye ti tene “ti yôro” na gbe ti ngu. Na ngoi so a batize Jésus lani, a yôro lo na yâ ti Ngu ti Jourdain, na pekoni lo “londo na yâ ti ngu ni lo sigi”. (Marc 1:9, 10). Legeoko nga, atâ Chrétien ayeke wara batême na lege so a yôro ala kue na yâ ti ngu.

2. Tongana mbeni zo awara batême, lo fa nyen?

Tongana mbeni zo awara batême, lo fa so lo mû terê ti lo na Jéhovah Nzapa. Tongana nyen la mbeni zo ayeke mû terê ti lo na Nzapa? Kozo ti tene zo awara batême, na yâ ti mbeni sambela so lo tene na Jéhovah gï lo na lo use, lo yeke fa na Lo so lo ye ti sara na Lo lakue lakue. Lo yeke mû zendo so lo yeke voro gï Jéhovah oko nga kota ye na yâ ti fini ti lo ayeke ti sara ye so Nzapa aye. Lo soro ti “ke terê ti lo wani . . . na [ti] ngbâ ti mû peko” ti afango ye ti Jésus nga na tapande ti lo (Matthieu 16:24). So lo mû terê ti lo na Jéhovah nga lo wara batême azi lege na lo ti duti na kpengba songo na Jéhovah nga na amba ti lo awakua ti Jéhovah.

3. Nyen la mbeni zo adoit ti sara kozo si lo lingbi ti wara batême?

Kozo ti tene mo wara batême, a yeke kota ye ti tene mo manda ye na ndö ti Jéhovah nga mo gi ti duti na kpengba mabe na lo. (Diko aHébreu 11:6.) Tongana mo hinga ye mingi na ndö ti Jéhovah nga mabe ti mo akpengba, mo yeke ye lo mingi. Kite ayeke dä ape so mo yeke duti na nzara ti fa tënë ti lo na azo nga ti sara ye alingbi na aye so lo hunda. (2 Timothée 4:2; 1 Jean 5:3). Tongana mbeni zo avivre “na lege so alingbi na lê ti Jéhovah, ti mû ngia mingi na lo”, peut-être lo yeke mû desizion ti mû terê ti lo na Nzapa na ti wara batême.—aColossien 1:9, 10.a

GI TI HINGA AYE MINGI

4. E lingbi ti manda ye na lege ti batême ti Jésus

Diko Matthieu 3:13-17 ti hinga ambeni nzene nzene ye na ndö ti batême ti Jésus. Na pekoni kiri tënë na ahunda so:

• Eskê Jésus ayeke lani bébé na ngoi so a batize lo?

• A batize lo lani tongana nyen? Eskê a tuku gï ngu tukungo na li ti lo?

Jésus akomanse lani ti sara kua so ayeke nde so Nzapa amû na lo na sese na peko ti so lo wara batême. Diko Luc 3:21-23 nga na Jean 6:38, na pekoni kiri tënë na hunda so:

• Na peko ti so Jésus awara batême, kua wa la lo zia kozo na yâ ti fini ti lo?

5. Batême ayeke mbeni ye so mo peut ti wara ni

Na tongo nda ni, tënë ti mungo terê na Nzapa nga na batême apeut ti sara mo mbeto. Ye oko, mo peut ti gue na li ni juska ti bâ so mo peut ti mû kota desizion so. Ti bâ ambeni zo so asara ni, zia VIDÉO ni.

VIDÉO: Gingo ti duti na nzoni songo na Jéhovah (1:11)

Diko Jean 17:3 nga na Jacques 1:5, na pekoni kiri tënë na hunda so:

• Nyen la apeut ti aidé mbeni zo ti duti nduru ti wara batême?

1. E yeke mû terê ti e na Jéhovah na lege so e tene na lo so e ye ti sara na lo lakue lakue

2. Na ngoi ti batême ti e, e fa na azo so e mû terê ti e na Nzapa awe

6. Tongana e wara batême, e ga na yâ ti sewa ti Jéhovah

Tongana e wara batême, e ga na yâ ti sewa ti Jéhovah so ayeke beoko so ayeke na yâ ti dunia kue. Atâa so e londo na ando nde nde nga ngobo ti e ayeke nde nde, e mä na bê na a-oko ye nga e yeke sara ye alingbi na a-oko ndia ti Jéhovah na ndö ti nzoni sarango ye. Diko Psaume 25:14 nga na 1 Pierre 2:17, na pekoni kiri tënë na hunda so:

• Nyen la batême ayeke sara na ndö ti songo ti mbeni zo na Jéhovah nga na azo so lo na ala ayeke voro Jéhovah?

NA NDURU TËNË

Jésus afa lani so aChrétien adoit ti wara batême. Ti wara batême, zo adoit ti duti na kpengba mabe na Jéhovah, lo sara ye alingbi na aye so lo hunda nga lo mû terê ti lo na lo.

Dango bê

• Batême ayeke nyen? Ngbanga ti nyen la a yeke kota ye ti tene zo awara batême?

• Tongana zo awara batême, lo fa nyen?

• Aye wa la zo adoit ti sara kozo ti tene lo mû terê ti lo na Nzapa nga lo wara batême?

GI NDA TI YE

Gi ti hinga ye so batême aye ti tene na ye so batême aye ti tene ape.

“Batême ayeke nyen?” (Article na ndö ti site)

Bâ aye so mbeni zo apeut ti sara ti gue na li ni juska na batême.

“Ndoye nga na singila ti mo na Jéhovah ayeke pusu mo ti wara batême” (Tour ti Ba Ndo ti mars 2020)

Gi ti hinga ye so apusu mbeni koli ti wara batême.

“Ala ye si mbi wani mbi hinga ye so Bible afa” (Tour ti Ba Ndo ti lango 1 ti février 2013)

Bâ ndani so batême ayeke mbeni nzoni ye so mo peut ti zia na gbele mo ti si dä nga tongana nyen la mo peut ti leke terê ti mo ndali ni.

« Eskê a yeke nzoni mbi wara batême ? » (Hunda ti amaseka: Anzoni kiringo tënë, volume 2, chapitre 37)