Akozo tënë ni

Buku Aversê so ayeke aidé e ti sara na Jéhovah ayeke sara si a yeke ngangu na mo ape ti wara aversê ti Bible so ayeke aidé mo na yâ ti akpale so mo yeke wara. A yeke aidé mo ti wara ambilimbili versê ti kpengba na azo nga ti aidé ala ti mû adesizion so ayeke mû gonda na Jéhovah. Soro li ti tënë so agbu bê ti mo. Li ti tënë oko oko ayeke na ahunda nga na ambeni nduru mbaï ti Bible so apeut ti aidé. (Bâ encadré “Lege ti sara kua na mbeti so.”) Mo yeke wara aversê so ayeke mû na mo wango nga na dengo bê so mo bezoin ni. Mo yeke wara nga amama-ndia ti Bible so mo peut ti sara na kua ti aidé amba ti mo nga ti kpengba na ala.

Lege ti sara kua na mbeti so

Ti wara mbeni tënë, mo peut ti pika tënë ni na place so a zia dä Gi wala mo peut ti gi ni na yâ ti molongo ti ali ti tënë ni. A kangbi yâ ti mbeti so na mbage mbasambala: Akpale, Anzoni sarango ye nga na asioni ni, Congrégation, Gigi ti lâ oko oko, Sewa, Songo ti zo na Jéhovah nga na Asarango ye ti e. Peut-être mo yeke wara li ti tënë so mo yeke gi ni na yâ ti oko ti mbeni mbage so. Soro mbage ni, nga soro li ti tënë so mo yeke gi ni. Tongana mo yeke sûr ape na mbage so mo peut ti wara ye so mo yeke gi ni dä, soro Kue nga gi na yâ ti molongo ti ali ti tënë ni juska mo wara ye so mo ye. Na gbe ti li ti tënë oko oko, mo yeke wara gbâ ti akete li ti tënë so a sû ni vuko vuko. Ambeni ayeke atënë, ambeni ayeke ahunda. Na ngoi so mo yeke diko aversê, gbu li ti bâ tongana nyen la aversê ni ague oko na atënë ni wala na hunda ni. Na ambeni ngoi, a kangbi yâ ti ambeni li ti tënë na yâ ti akete li ti tënë ti aidé mo ti wara hio sango so mo yeke gi ni. Na ambeni ngoi, a zia “Bâ nga” na terê ti ambeni versê. Aversê so ague oko na tënë so mo yeke gi ye na ndö ni. Mingi ni, mo yeke wara nga mbage “Atapande ti Bible so apeut ti aidé mo.” Na pekoni, a fa na nduru tënë kota tënë ti yâ ti versê ni. Tënë ni ayeke aidé mo ti hinga ye so mo doit ti gbu li na ndö ni na ngoi so mo yeke diko versê ni.

Mo yeke wara pëpe na yâ ti mbeti so aversê kue so abâ mbeni tënë. A leke ni ti aidé mo ti wara aversê so ayeke aidé zo mingi, na pekoni mo peut ti sara kua na ambeni gbakuru nde ti gi ti hinga ambeni ye, tongana bezoin ni ayeke dä (aPr 2:1-6). Ti hinga ambeni ye mingi, sara kua na aversê so a zia na terê ti akete gere-mbeti ti versê so ayeke na yâ ti chapitre ti Bible so mo yeke diko ni nga na anote ti étude so ayeke na yâ ti Mbeti ti Nzapa ti fini dunia, tongana a yeke na mbeni yanga ti kodro so mo mä yâ ni. Sara kua na Mbeti ti sarango na recherche ndali ti aTémoin ti Jéhovah wala na Index des publications des Témoins de Jéhovah ti hinga ye mingi na ndö ti nda ti mbeni versê wala lege ti sara ye alingbi na ni. Gi ti sara recherche na yâ ti ambeti so asigi ade ti ninga ape ti duti sûr so fason so mo mä yâ ti versê ni ague oko na ndangba tënë so a fa na ndö ti versê ni.

Zia si mbeti so a-aidé mo ti wara ndara, hingango ye nga ti mä yâ ti Bible. Na ngoi so mo yeke sara kua na mbeti so, mo yeke hinga ande na bê ti mo kue so “tënë ti Nzapa ayeke na fini na ayeke na ngangu ti sara ye”.—aHb 4:12.