Akpale ti tele so abuba ayeke na ndo kue

CHRISTIAN ayeke na yâ mbeni kodoro ti Afrika. Ambeni turugu agbu lo na ahon na lo; ala ye ti pusu lo na ngangu ti lï na popo ti aturugu ti ala, me lo ke ti sala ni ngbanga ti yingo-ti-hinga ti lo so Bible afa lege na ni. Tongaso, aturugu ni ague na lo na yâ mbeni kando ti ala; ala pika lo teti alango osio. Na pekoni, mbeni oko apika ngombe na yâ ti gere ti lo oko. Christian awara lege ti gue na mbeni da-nganga. Mawa ni ayeke so, a lingbi ala fâ mbage ti gere so ayeke na gbe ti likuni ti lo. Na yâ ti mbeni kodoro nde ti Afrika, aturugu so ayeke tiri na yanga-ti-komande ague juska ti fâ ambeni mbage ti tele ti akete molenge. Nga ti londo na Cambodge ti si na aBalkan, ti londo na Afghanistan ti si na Angola, abombe so a lu na gbe ti sese angbâ lakue ti sungba na ti buba mbage ti tele ti azo, atâa amaseka wala ambakoro.

Andao nga na akobela tongana diabète ayeke sala nga si ambage ti tele ti ambeni zo abuba. Même asioni yorö so a tuku ni na yâ ando so angoro zo alingbi ti sala si mbage ti tele ti zo abuba. Na tapande, na yâ ambeni vaka ti mbeni gbata na Poto ti Est, a dü ambeni molenge so maboko ti ala oko asigigi angbâ gi na coude, me ali ti maboko ni ayeke dä pëpe. Aye afa polele so tongana asioni yorö abuba ndagigi, a lingbi ti ga na kpale na amolenge so a de ti dü ala pëpe. Ambeni zo mingi ayeke na amaboko nga na gere; ye oko, ambeni mbage ti tele ti ala azin awe ngbanga ti kobela wala mbeni ye nde. Biani, akpale ti tele so abuba ayeke na ndo kue.

Atâa ye ni asi tongana nyen, ambage ti tele so abuba alingbi ti ga na vundu mingi na zo. Junior aglisa mbeni mbage ti gere ti lo ti gati tongana lo wara ngu 20. Lo tene na pekoni: “Mbi wara vundu mingi. Mbi toto mingi teti gere ti mbi so mbi glisa ni biaku awe. Mbi hinga pëpe ye so mbi lingbi ti sala. Li ti mbi akpe lani kirikiri.” Ye oko, tongana ngoi ayeke hon, bango ndo ti Junior agbian ngangu. Lo to nda ti manda Bible na a fa na lo aye so amû maboko na lo pëpe gi ti hon ndo ti kpale so, me nga so amû lege na lo ti duti na mbeni pendere beku ti wara ande fini so ayeke na ngia ge na sese. Tongana mbeni mbage ti tele ti mo abuba, fade mo yeke yeda ande ti duti na mara ti beku so?

Tongana mo yeda biani, e wa mo ti diko article so ayeke ga na pekoni. A yeke nzoni mo diko na yâ Bible ti mo aversê so a fa ni ti bâ mo mveni ye so Wasalango ye aleke teti ala so amanda ti hinga lo na ti sala ye alingbi na ye so bê ti lo ye.