A sala sioni na awavorongo: Ngbanga ti nyen?
MO PENSÉ so a lingbi a sala sioni na azo ndali ti lege ti vorongo ti ala? A yeke peut-être tongaso pëpe, na ngoi so salango ye ti ala asala sioni pëpe na droit ti ambeni zo. Ye oko, salango sioni na awavorongo abâ gigi aninga awe, na angbâ lakue ti gue na li ni. Na tapande, a doro mingi liberté ti lege ti vorongo ti agbâ ti aTémoin ti Jéhovah ti Poto nga na ti ambeni mbage ti sese, na a sala ye ti ngangu mingi na ala na yâ ti siècle 20.
Na ngoi ni so, aTémoin ti Jéhovah abâ pasi aninga na gbe ti angorogbia use so akomande na ngangu na kodoro ti Poto. Tongana nyen aye so asi na ala afa na e ye na ndo salango sioni na awavorongo? Ye nyen e lingbi ti manda na ndo salango ye ti ala na gbele bango pasi so?
“Ala yeke ti sese so pëpe”
A-Témoin ti Jéhovah asala kue ti duti azo ti batango ndia, ti duti na siriri, na ti duti azo so ayeke na nzoni tambela. Ala ke angorogbia wala ala gi ti sala ngangu-li na ala pëpe. Ala mveni agi pëpe ti tene a sala ngangu na ala ngbanga ti so ala ye ti duti mara ti azo so akui teti mabe ti ala. Ala yôro yanga ti ala na yâ ti poroso pëpe. Salango ye tongaso ague legeoko na atënë ti Jésus: “[Adisciple ti Mbi a] yeke ti sese so pëpe, legeoko tongana Mbi yeke ti sese so pëpe.” (Jean 17:16). Angorogbia mingi ahinga dutingo nde ti aTémoin ti Jéhovah. Ye oko, agbia so akomande na ngangu abâ na nene ni pëpe ye so Bible ahunda na aChrétien ti duti nde na sese so.
A fa lani nda ti tënë so na ngoi ti mbeni kota bungbi so asala na yâ Kota da-mbeti ti Heidelberg na kodoro ti Zamani, na nze ti novembre ngu 2000. Kota bungbi ni asala tënë na ndo “Salango ngangu nga mabe: A-Témoin ti Jéhovah na gbe ti komandema ti ngangu ti aNazi na aCommuniste.” Dr. Clemens Vollnhals, ti Ndokua ti Hannah-Arendt, so agi nda ti ye na ndo komandema ti ngangu, atene: “Agbia so akomande na ngangu angbâ pëpe gi na ndo atënë ti poroso. Ala hunda ti tene zo amä yanga na yâ aye kue.”
Atâ Chrétien alingbi pëpe ti “mä yanga na yâ aye kue” ti mbeni ngorogbia ti azo, ngbanga ti so a yeke gi na Jéhovah Nzapa lo oko si ala mû tele ti ala kue na lo. A-Témoin so aduti na gbe ti agbia so akomande na ngangu abâ so, ngoi na ngoi, aye so kodoro ahunda ague nde na ye so mabe ti ala ahunda. Ye nyen ala sala tongana ala wara mara ti akpale tongaso? Giriri fani mingi, aTémoin ti Jéhovah asala kusala na mbeni kpengba-ndia so adisciple ti Jésus Christ afa na gigi: “A yeke ngbanga ti e ti mä Nzapa ahon ti mä azo.”—Kusala 5:29.
A-Témoin ti Jéhovah saki mingi abata be-biani ti ala na yâ atënë so ala mä na bê dä, na ala duti nde na aye ti poroso, atâa so a sala sioni na ala, sioni so mara ni ayeke dä pëpe. Ala lingbi lani ti hon ndo ni tongana nyen? Ala wara ngangu ti hon ndo ti aye so na ndo wa? Zia ala mveni akiri tënë na ni. Na zia e bâ nga ye so e oko oko kue e lingbi ti manda, atâa e yeke aTémoin wala pëpe, na ndo aye so asi na ala.
[Kete tënë na lembeti 4]
A-Témoin ti Jéhovah ti kodoro ti Zamani abâ pasi aninga na gbe ti angorogbia use so akomande na ngangu na yâ ti siècle 20
[Kete tënë na lembeti 4]
“Agbia so akomande na ngangu angbâ pëpe gi na ndo atënë ti poroso. Ala hunda ti tene zo amä yanga na yâ aye kue.”—Dr. Clemens Vollnhals
[Foto na lembeti 4]
A kanga lege na liberté ti sewa ti Kusserow ngbanga ti so ala ke ti bele mabe ti ala
[Foto na lembeti 4]
A fâ Johannes Harms na yâ da ti kanga ti aNazi teti atënë ti mabe ti lo