Bible alingbi ti leke mariage ti mo
TI AMBENI zo, tënë ti mariage andu atënë so amû ngia na bê. Ti ambeni, a yeke ga na vundu ti bê. Mbeni wali adema: “Mbi bâ so ndoye ayeke na popo ti mbi na koli ti mbi pëpe. Mbi bâ so lo mû mbi na nene ni pëpe, na so mbi yeke gi mbi oko lakue.”
Ye nyen asala si azo use so amû lani yanga ti ndoye na ti ye tele aga fadeso azo so akpe tele kpengo? Mbeni oko ye ni ayeke so ala hinga tënë na ndo ye so ahiri ni mariage pëpe. Mbeni wagosinga na ndo tënë ti kaïngo kobela atene: “E yeke sala mariage sân ti wara tâ mbeni kete fango ye na ndo ni.”
Mbeni gingo nda ti ye ti National Marriage Project ti Kota Da Mbeti ti Rutgers na New Jersey na Amerika, ayeda na tënë so atene gi azo mingi pëpe si ayeke na hingango ye na ndo mariage. Awayinda ti pialo ni atene: “Mingi ti ala so a hunda tënë na ala na yâ gingo nda ti ye ni akono na yâ ti sewa so babâ na mama ti ala awara ngia pëpe na yâ mariage ti ala wala ala fâ yâ ni. Ala hinga biani ye so ahiri ni sioni mariage, ye oko, ala hinga biani pëpe ye so nzoni mariage aye ti tene. Ambeni alingbi ti sala tënë ti nzoni mariage tongana ‘mariage so ayeke nde na ti babâ na mama ti mbi.’ ”
Akpale so alingbi ti ndu nga aChrétien? Biani. A lingbi lani a mû wango polele na ambeni Chrétien ti kozo siècle ti “kangbi pëpe” na yâ mariage ti ala (1 aCorinthien 7:27). Kite ayeke pëpe so mariage ti azo use so ayeke mbilimbili-kue pëpe ayeke duti ngoi na ngoi na akpale. Ye oko, e lingbi ti wara mungo maboko. Akoli na awali alingbi ti leke yâ ti songo ti ala na salango kusala alingbi na akpengba-ndia ti Bible.
Biani, a leke Bible pëpe gi ti mû wango na ndo mariage. Ye oko, teti so Lo so asala si a sû Bible na gbe ti yingo ayeke ândö na gunda ti mariage, e lingbi ti ku ti tene akpengba-ndia ti lo amû maboko na e. Na lege ti prophète Esaïe, Jéhovah Nzapa atene: “Mbi yeke L’Eternel Nzapa ti mo, Lo so awa mo si mo ga nzoni, Lo so afa na mo lege so a lingbi mo tambela dä. O, tongana mo mä komandema ti Mbi giriri! ka siriri ti mo aga tongana ngu so asua, na mbilimbili ti mo aga tongana mapo ti kota ngu ti ingo.”—Esaïe 48:17, 18.
Ndoye so ayeke ândö na popo ti i use ato nda ti dë awe? Mo bâ so mo tï na yâ gbanda ti mbeni mariage so ndoye ayeke dä pëpe? Mbeni wali so asala mariage teti angu 26 atene: “A yeke ngangu ti fa nda ti vundu so aga na lege ti mara songo tongaso. Vundu ni ayeke lakue dä.” Ahon ti ye gi dä so a yeke mara ti mariage tongaso la mo ye fade pëpe, ngbanga ti nyen ti leke na bê pëpe ti sala mbeni ye ndali ni? Fade article ti peko ayeke fa na akoli na awali lege so akpengba-ndia ti Bible alingbi ti mû maboko na mariage ti ala na ndo mbeni mbilimbili ye: zendo ti mariage.