Ti ma ti gue na li-kodoro ti Saba

SABA, mbeni zoa ti kodoro ti Pays-Bas, ayeke ândö mbeni gbada so awanzi ayeke sala dengo buze dä, na so ala yeke fono na lê ti ngu-ingo ti azoa ti a-Antille ti gi aye ti gbu na ngangu. Laso, kete zoa so ayo kilomètre 240 na mbage ti tö ti Porto Rico ayeke na awakodoro 1 600, so na popo ni aTémoin ti Jéhovah 5. Me, angangu wafango tënë so afono ti gi mbeni ye so ngele ni ahon mingi aye ti gbungo ni. Ala yeke mû ngangu ti ala ti gi na azo so “ayeke na yâ mbilimbili dutingo so a hunda teti fini ti lakue lakue”.​—Kusala 13:48, NW.

Nzo tënë ti Royaume asi kozoni na zoa ni na lango 22 ti juin, ngu 1952, na ngoi so lani mbeni bateau ti aTémoin ti Jéhovah so iri ni ayeke Sibia, so ayo mètre 18, asi na Saba (Matthieu 24:14). Gust Maki na Stanley Carter, so ayeke amissionnaire, amû mbeni kete lege so a leke na atênë 500 na tele ti hoto ti ma juska na Le Fond, li-kodoro ni.a Teti angu ngbangbo mingi, gi oko kete lege so si zo alingbi ti mû ti si na yâ ti kodoro ni.

Kozo tondo so a sala na ndo fango tënë na Saba asigigi na yâ ti Annuaire des Témoins de Jéhovah 1966, ti yanga ti Anglais. Tondo ni atene lani so gi Témoin oko si ayeke fa tënë na ndo zoa ni. Na pekoni, mbeni sewa ti Canada asala ngu mingi kâ ti fa nzo tënë. Ade ti ninga mingi pëpe, Russel na wali ti lo Kathy (ti Amerika), so ngu ti ala ague na li ni mingi, ague na Saba na ala to nda ti fa tënë kâ. Bâ mbaï ti ala.

Singo ti e na Saba

Mbi na wali ti mbi e si na avion tongana agene ti Ronald, so ayeke lani gi oko Témoin ti zoa ni ti londo na ngu 1990 ti si na 1999. Ronald aku e na aéroport. Bê ti lo anzere mingi na kete gbâ ti kugbe ti kasa so e ga na ni na lo, teti dengo buze ti akugbe ti kasa ayeke na ndo zoa ni pëpe. E ko na yâ mbeni kete kutukutu na e mû lege ti tele ti hoto ti Scenery (mbeni hoto ti wâ so adë awe) ti ma na li ni.

E luti na kete kodoro ti Porte De l’Enfer; Ronald aye ti bâ na ndo tableau ti ndo ni wala mbeti ti tisango azo teti diskur ti dimanche angbâ. E yeke na ngia ti bâ so mbeti ni angbâ. Lo kiri na yâ ti kutukutu ni na e ngbâ ti gue ti si na kete kodoro so akono ahon atanga ni ti zoa ni, kodoro ti Windwardside. Tongana ti so iri ni afa, pendere kodoro so ayeke na mbage ti hoto ni so pupu ayeke ya dä, na lo yo mètre 400 na li ti ngu-ingo. Na tongana e yeke mû lege ti da ti Ronald, e bâ mbeni pancarte so couleur ni aza mingi na devant ti véranda so afa da ni tongana Da ti Royaume ti aTémoin ti Jéhovah.

Na ngoi so e yeke te kobe, mbi hunda na lo ye so apusu e ti ga na ndo ti lo: “Tongana nyen si mo ga mbeni wafango tënë ge na Saba?”

Ronald atene: “Na ngoi ti lekengo filiale ti aTémoin ti Jéhovah ti Porto Rico so ahunzi lani na ngu 1993, mbi na wali ti mbi e ye ti ngbâ ti sala kua na yâ ti mbeni territoire na kodoro wande. Me kozoni, e ga ândö ge na Saba, e na mbeni ita pionnier na wali ti lo, na e mä so azo ti kodoro ni ayeke 1 400, me mbeni Témoin ayeke dä pëpe. Tongaso e hunda na Komité ti filiale ti Porto Rico ti ga ge.

“Aye ni atambela nzoni si na nda ni a yeda na e ti ga. Mawa ni ayeke so, ngu use na pekoni, tele ti wali ti mbi aso mingi, na e kiri na Californie. Na peko ti kuâ ti lo, mbi kiri na Saba. Tongana ti so mo lingbi ti bâ, mbi ye pëpe ti komanse ti sala mbeni ye sân ti hunzi ni.”

Fango tënë da na da

A sala kusala na salon ti da ti Ronald (mbeni da so asala ngu ngbangbo oko awe) tongana Da ti Royaume.b Na ngoi so e yeke te kobe ti ndapelele na e leke tele ti e ti gue na fango tënë, ngu-nzapa apika kete tongaso na ndo ti cuisine ni so li ni ayeke dä pëpe. Na peko ti tengo ye ni, e sigigi na gbe ti mbinda ni ti fa tënë da na da na yâ ti kete kodoro ti Le Fond. Ronald ayeke bala mveni ti da oko oko na iri ti lo. Lisoro ti e aluti mingi ni na ndo mbeni ye so asi na yâ ti kodoro ni so ade ti ninga pëpe. Mingi ti azo ni ahinga Ronald na fango tënë ti lo, na ala yeke ndulu ti mû ambeti na ndo Bible.

Ti bata anote na ndo azo so tënë ni anzere na ala ayeke ngangu kete tongana mo hinga tele na azo ti kodoro ni kozoni pëpe. Nda ni ayeke nyen? Ronald atene nda ni ayeke so “ndia ti ndo ni ahunda ti tene a zia na tele ti ada kue gi mara ti peinture oko.” Na mbi bâ a yeke tâ tënë. Mbi yä lê ti mbi ti bâ ndo na mbi bâ so ada ni kue ayeke vulu na ali ni ayeke bengba.

Na peko ti lisoro ti e na mveni ti da ni, e tisa lo ti ga na diskur na dimanche na Da ti Royaume. Tongana Ronald ayeke dä, lo yeke mû diskur yenga na yenga. Ti ngoi so, awamandango Bible ayeke 17 na Saba. Azo 20 aga lani na Mémorial ti kui ti Christ na ngu 2004. Nga, atâa so wungo ti azo so akpa mbeni ye pëpe, a yeke wungo ti zo 1 na ndo ti azo 100 ti kodoro ni kue!

Biani, aTémoin ti Jéhovah asala ngangu mingi ti ndu azo mingi tongana ti so ala lingbi ti sala na tokua ti salut ti Nzapa. Wala a yeke mbeni kete zoa tongana Saba wala mbeni kota sese tongana Afrika, aTémoin ti Jéhovah, na be-ta-zo, ayô kungba ti “fa tënë na amara kue si ala ga adisciple.”—Matthieu 28:19.

Ye oko, vizite ti e ahunzi awe. Na mungo avion, e tene balao ti tanga ni. E yeke girisa pëpe vizite ti e na Saba nga na ngoi so e mû ti ma ti gue na li-kodoro ni!

[Akete tënë na gbe ni]

[Acarte na lembeti 10]

(Ti bâ ni mbilimbili, bâ buku ni.)

PORTO RICO

[Lingu ti foto na lembeti 10]

Background: www.sabatourism.com