Zia kongregation agonda Jéhovah

“Fade Mbi fa iri ti Mo na aita ti Mbi, na Mbi sepela Mo na popo ti bungbi ti azo.”​—AHÉBREU 2:12.

1, 2. Ngbanga ti nyen kongregation ayeke mbeni nzoni ye so a leke ni? Kozo ye so a leke kongregation ndali ni ayeke nyen?

NGBENE ye so azo ayeke na sese, ala yeke wara akamarade nga na nzoni duti na yâ ti sewa. Ye oko, Bible afa mbeni ndo so azo mingi mingi na ndo sese kue laso awara aye so dä, na mbeni lege so ayeke nde mingi. A yeke kongregation ti aChrétien.a Atâa mo yeke na yâ ti mbeni sewa so azo ti yâ ni aye tere mingi na amû maboko na mba wala mo yeke na yâ ti mbeni sewa so azo ti yâ ni ayeke sara aye so pëpe, mo lingbi ti bâ na nene ni ye so Nzapa aleke na lege ti kongregation ni. Nga, a yeke nzoni mo bâ aye so na nene ni. Ti tâ tënë ni, tongana mo yeke sara bungbi na mbeni kongregation ti aTémoin ti Jéhovah, kite ayeke dä pëpe so mo wara anzoni kamarade nga na nzoni duti na popo ti ala.

² Kongregation ayeke pëpe senge bungbi ti azo so aye ti sara kamarade na popo ti ala. A yeke pëpe mbeni ndo so azo ti yâ ti vaka so sarango ye ti ala ayeke oko wala so azo so aye tënë ti mbeni ngia ti wanguru wala ti mbeni ye ayeke bungbi dä. Nde na so, kozo ye so a leke kongregation ndali ni ayeke ti gonda Jéhovah Nzapa. Na a yeke ye so awakua ti Jéhovah ayeke sara ni a ninga awe, tongana ti so Psaume 35:18 atene: “Fade mbi mû merci na Mo na yâ kota bungbi ti azo, fade mbi sepela Mo na popo ti azo mingi.” Legeoko nga, a wa e na Psaume 107:31, 32 atene: “O, a lingbi azo asepela L’Eternel teti nzobe ti Lo, na teti kusala ti kpene ti Lo so Lo sara teti amolenge ti azo! Zia ala yä iri ti Lo na yâ bungbi ti azo.”

3. Ti Paul, kongregation ayeke sara nyen?

³ Bazengele Paul agboto lê na ndo mbeni kpengba ye so kongregation ayeke sara tongana lo sara tënë ni tongana azo ti “da ti Nzapa, so ayeke [kongregation, MN ] ti Nzapa so ayeke na fini, pilier na gere ti tene-biani.” (1 Timothée 3:15). Paul ayeke sara lani tënë ti kongregation wa? Na alege wa Bible asara kusala na tënë “kongregation”? Na a yeke nzoni kongregation asara nyen na ndo fini ti e nga na ndo beku ti e ti kekereke? Ti hinga ni, zia e bâ kozoni tongana nyen Mbeti ti Nzapa asara kusala na tënë “kongregation”.

4. Fani mingi, mbage ti Bible so a sû na yanga ti Hébreu asara kusala na tënë “kongregation” tongana nyen?

⁴ Tënë ti yanga ti Hébreu so a kiri pekoni fani mingi na “kongregation” alondo na mbeni tënë so aye ti tene “ti bungbi azo” wala “ti bungbi ndo oko”. (Deutéronome 4:10; 9:10). Mbeni zo so asû psaume asara kusala na tënë “kongregation” ti sara tënë ti a-ange na yayu, na a lingbi ti sara kusala na oko tënë so ti sara tënë ti bungbi ti azo ti sioni (Psaume 26:5; 89:6-8). Ye oko, fani mingi mbage ti Bible so a sû na yanga ti Hébreu asara kusala na tënë so ti sara tënë ti azo ti Israël. Nzapa afa so Jacob ayeke ga “azo mingi”, wala kongregation ti azo, na a yeke ye so asi biani (Genèse 28:3; 35:11; 48:4). A zia azo ti Israël nde, wala a soro ala ti duti “bungbi ti azo ti L’Eternel”, wala “bungbi ti azo ti Nzapa”.​—Nombre 20:4; Néhémie 13:1; Josué 8:35; 1 Samuel 17:47; Michée 2:5.

5. Tënë wa na yanga ti Grec a kiri pekoni na “kongregation”? Tënë so alingbi ti ndu nyen?

⁵ Tënë ti yanga ti Grec, ek·kle·siʹa, ague oko na tënë ti yanga ti Hébreu so a kiri pekoni na kongregation. Na tënë ek·kle·siʹa alondo na atënë ti yanga ti Grec use so aye ti tene “na gigi” nga “ti iri”. Tënë so alingbi ti ndu asenge bungbi ti azo, na tapande, “bungbi ti azo” so Démétrius apusu ala ti ke Paul na kodoro ti Ephèse (Kusala 19:32, 39, 41). Me, mingi ni Bible ayeke sara kusala na tënë so ti sara tënë ti kongregation ti aChrétien. Ambeni Bible akiri peko ti tënë so na “eglize”, me mbeni bakari na yanga ti Anglais so asara tënë na ndo ti Bible atene so tënë so “aye lâ oko pëpe . . . ti sara tënë ti da so aChrétien ayeke bungbi dä ti voro Nzapa.” Ye oko, bâ so na yâ mbage ti Bible so aChrétien asû na yanga ti Grec, a sara kusala na tënë “kongregation” na alege nde nde osio.

Kongregation ti Nzapa so a sa yingo na ndo ni

6. Nyen la David na Jésus asara lani na yâ ti kongregation?

⁶ Bazengele Paul afa so atënë so David atene na Psaume 22:22 aga tâ tënë na ndo ti Jésus, lo tene: “Fade Mbi fa iri ti Mo na aita ti Mbi, na Mbi sepela Mo na popo ti bungbi ti azo. Tongaso, a yeke ngbanga ti [Jésus] ti ga legeoko tongana aita ti Lo na yâ ye kue, si Lo lingbi ga Kota Sacrificateur ti be-nzoni na ti be-biani na yâ ye so ayeke ti Nzapa.” (aHébreu 2:12, 17). David agonda Nzapa na yâ ti kongregation na Israël ti giriri (Psaume 40:10). Ye oko, Paul aye lani ti tene nyen tongana lo tene so Jésus agonda Nzapa “na popo ti bungbi ti azo”, wala kongregation? Lo ye ti sara tënë ti kongregation wa?

7. Kozo nda ti tënë “kongregation” na yâ ti mbage ti Bible so a sû na yanga ti Grec aye ti sara tënë ti nyen?

⁷ Ye so e diko na aHébreu 2:12, 17 ayeke kota ye mingi. Ye so afa so Christ nga ayeke na yâ ti kongregation so lo fa iri ti Nzapa na aita ti lo dä. Aita ti lo ni ayeke azo wa? Ala so ayeke mbage ti “ahale ti Abraham”, aita ti Christ so a sa yingo na ndo ti ala, ‘ala so awara ye ti ala na iringo ti yayu’. (aHébreu 2:16–3:1; Matthieu 25:40). Biani, kozo nda ti tënë “kongregation” na yâ mbage ti Bible so a sû na yanga ti Grec aye ti sara tënë ti groupe ti adisciple ti Christ so a sa yingo na ndo ti ala. Azo 144 000 so a sa yingo na ndo ti ala ayeke “[kongregation, MN ] ti akozo molenge so iri ti ala ayeke na mbeti na yayu”.​—aHébreu 12:23.

8. Na lege wa Jésus afa lani kozoni so fade kongregation ti aChrétien ayeke bâ gigi?

⁸ Jésus afa lani kozoni so fade “kongregation” ti aChrétien ayeke bâ gigi. Ngu oko tongaso kozoni ti tene lo kui, lo tene na mbeni oko ti abazengele ti lo, lo tene: “Mo yeke Pierre, na fade Mbi sara [kongregation, MN ] ti Mbi na ndo kota tênë so; fade yanga ti ndo-ti-awakinda alingbi hon ndo ti [kongregation, MN ] ni pëpe.” (Matthieu 16:18). Pierre na Paul ahinga nzoni mingi so Jésus ayeke kota tênë so lo sara lani tënë ni. Pierre atene so a bungbi ambeni zo na ndo oko tongana ‘atênë so ayeke na fini’ si ala ga da na lege ti yingo na ndo ti kota tênë, Christ. Azo so a bungbi ala ayeke lani “azo ti [Nzapa] mveni, si [ala] lingbi fa nzoye ti Lo” so airi ala na gigi.​—1 Pierre 2:4-9; Psaume 118:22; Esaïe 8:14; 1 aCorinthien 10:1-4.

9. A to nda ti bungbi azo ti ga kongregation ti Nzapa lawa?

⁹ Lawa si a to nda ti bungbi “azo ti [Nzapa] mveni” ti ga kongregation ti aChrétien? A yeke na Pentecôte ti ngu 33, na ngoi so Nzapa asa yingo na ndo ti adisciple ti Jésus so abungbi na Jérusalem. Na peko ti ye so, na oko lango ni, Pierre amû mbeni kpengba diskur na gbele mbeni bungbi ti aJuif na azo so agbian ti ga aJuif. Tënë ti kuâ ti Jésus andu bê ti mingi ti ala; tongaso, ala gbian bê ti ala na ala wara batême. Tondo ti Bible afa so azo 3 000 agbian bê ti ala na ala wara batême, na ye so asara si ala ga mbage ti fini kongregation ti Nzapa, so ayeke gue na li ni (Kusala 2:1-4, 14, 37-47). Kongregation ni ayeke gue na li ni lani ngbanga ti so aJuif mingi nga na ala so agbian ti ga aJuif ayeda so azo ti Israël na lege ti mitele ayeke kongregation ti Nzapa mbeni pëpe. Nde na so, aChrétien so a sa yingo na ndo ti ala ayeke “Israël ti Nzapa” na lege ti yingo so aga tâ kongregation ti Nzapa.​—aGalate 6:16; Kusala 20:28.

10. Songo wa ayeke na popo ti Jésus na kongregation ti Nzapa?

¹⁰ Fani mingi, Bible afa kangbi so ayeke na popo ti Jésus na aChrétien so a sa yingo na ndo ti ala na lege ti atënë tongana ‘tënë ti Christ na tënë ti [kongregation, MN ].’ Jésus ayeke Li ti kongregation ti aChrétien so a sa yingo na ndo ti ala. Paul atene so Nzapa asara si “[Jésus aga] Beli ti ye kue ti [kongregation, MN ], so ayeke Tere ti Lo”. (aEphésien 1:22, 23; 5:23, 32; aColossien 1:18, 24). Laso, gi mbeni kete wungo ti aChrétien ti kongregation so a sa yingo na ndo ti ala si angbâ na ndo sese. Ye oko, e hinga biani so Li ti ala, Jésus Christ, aye ala mingi. A-Ephésien 5:25 afa bibe so Jésus ayeke na ni na mbage ti ala, atene: “Christ andoye [kongregation, MN ], na Lo mû Lo mveni teti [kongregation, MN ].” Jésus andoye ala ndali ti so ala mû ngoi ti ala kue ti mû na Nzapa lakue “sacrifice ti merci . . . , so ayeke lengo ti yanga so asepela iri ti Lo”, tongana ti so Jésus asara lani na ngoi so lo yeke na sese.​—aHébreu 13:15.

Tënë “kongregation” aye ti sara nga tënë ti nyen?

11. Use lege so mbage ti Bible so aChrétien asû na yanga ti Grec asara kusala na tënë “kongregation” ayeke so wa?

¹¹ Na ambeni ngoi, Bible asara kusala na tënë “kongregation” ti sara tënë ti ambeni Chrétien so ayeke na yâ ti bungbi ti aChrétien 144 000 so a sa yingo na ndo ti ala, so ayeke ‘kongregation ti Nzapa’. Na tapande, Paul atene na mbeni groupe ti aChrétien, lo tene: “I sara ye oko pëpe so asara si aJuif, wala aGrec, wala [kongregation, MN ] ti Nzapa atï.” (1 aCorinthien 10:32). A yeke polele so tongana mbeni Chrétien so ayeke lani na kodoro ti Corinthe asara mbeni ye na lege ni pëpe, a lingbi ti sara si ambeni zo apika gere ti ala. Ye oko, ye so lo sara so alingbi ti sara si aGrec kue, aJuif kue wala aChrétien kue so a sa yingo na ndo ti ala, ti londo na ngoi ti Paul juska laso, atï? Oko pëpe! Tongaso, versê so aye peut-être ti fa so tënë ‘kongregation ti Nzapa’ andu gi aChrétien so aduti na fini na mbeni ngoi. Ni la, a lingbi ti tene so Nzapa ayeke fa lege na azo ti kongregation, lo yeke mû maboko na ala wala lo yeke iri deba nzoni na ndo ti ala ti fa so kongregation andu nga aChrétien kue so aduti na fini na mbeni ngoi, atâa ndo so ala yeke dä. Wala, a lingbi ti sara tënë ti ngia nga na siriri so amû ndo na yâ ti kongregation ti Nzapa laso, so ti tene na popo ti sewa ti aita na ndo sese kue.

12. Ota lege so Bible asara kusala na tënë “kongregation” ayeke so wa?

¹² Ota lege so Bible asara kusala na tënë “kongregation” andu aChrétien kue ti mbeni kodoro. Bible atene: “[Kongregation, MN ] ayeke na siriri na Judée, na Galilée, na Samarie kue.” (Kusala 9:31). Agroupe ti aChrétien ayeke lani mingi na yâ ti kota ndo so gbâ ti akodoro ayeke dä, me a sara tënë ti agroupe ti aChrétien kue so ayeke na Judée, Galilée nga na Samarie tongana mbeni “kongregation”. Na bango wungo ti azo so awara batême na Pentecôte ti ngu 33 nga kete na pekoni, a lingbi ti tene so peut-être a yeke pëpe gi groupe ti aChrétien oko la ayeke bungbi lani na kodoro ti Jérusalem (Kusala 2:41, 46, 47; 4:4; 6:1, 7). Hérode Agrippa I alë gbia lani na ndo kodoro ti Judée juska na kuâ ti lo na ngu 44. Na 1 aThessalonicien 2:14 afa na e polele so, ti si na ngu 50, a yeke wara akongregation mingi na Judée. Tongaso, tongana e diko a tene so Hérode “aye tïtî lo ti sara ngangu na ambeni zo ti [kongregation, MN ]”, ye so aye ti fa so peut-être groupe ti aChrétien so abungbi na Jérusalem ayeke pëpe gi oko.​—Kusala 12:1.

13. Osio lege so Bible asara kusala na tënë “kongregation” ayeke so wa?

¹³ Osio lege so Bible asara kusala na tënë “kongregation”, na so azo mingi ahinga ni, andu aChrétien so ayeke na yâ ti kongregation ti ndo so ala yeke dä, na tapande, na yâ ti da ti mbeni zo. Paul asara tënë ti “[akongregation, MN ] ti sese ti Galatie.” A yeke pëpe gi oko mara ti kongregation so si ayeke na yâ ti kota kodoro so, so ayeke na gbe ti Rome. Fani use, Paul asara tënë ti ‘akongregation’ ti Galatie, so na popo ni mo yeke wara akongregation ti Antioche, ti Derbe, ti Lystre nga na ti Iconium. A zia akoli so alingbi, wala asurveillant, na ndo ti akongregation ti akodoro so (1 aCorinthien 16:1; aGalate 1:2; Kusala 14:19-23). Mbeti ti Nzapa atene so akongregation so kue ayeke lani “[akongregation, MN ] ti Nzapa”.​—1 aCorinthien 11:16; 2 aThessalonicien 1:4.

14. E lingbi ti tene nyen na ndo lege so a sara kusala na tënë “kongregation” na yâ ti ambeni versê?

¹⁴ Ti ambeni kongregation, wungo ti aChrétien so abungbi ayeke kete, na a mû lege na ala ti sara bungbi na yâ ti da ti mbeni zo. Ye oko, tënë “kongregation” andu lani ambeni mara ti akete groupe tongaso. Ambeni ti agroupe so e hinga tënë na ndo ni ayeke akongregation so ayeke na yâ ti da ti Aquilas na Prisca, ti Nymphas nga na ti Philémon (aRomain 16:3-5; aColossien 4:15; Philémon 2). Ye so alingbi ti mû ngangu laso na akongregation so wungo ti azo ni ayeke mingi pëpe na so alingbi même ti sara bungbi lakue na yâ ti da ti mbeni zo. Jéhovah ayeda na mara ti akongregation so na ngoi ti akozo Chrétien, nga a yeke biani ye so lo yeke sara laso. Nga, lo yeke iri deba nzoni na ndo ti abungbi so na lege ti yingo ti lo.

Akongregation agonda Jéhovah

15. A bâ lege so yingo vulu asara kusala lani na ndo ti ambeni Chrétien ti akozo kongregation na lege wa?

¹⁵ Tongana ti so e bâ fade, Psaume 22:22 aga tâ tënë tongana Jésus agonda Nzapa na popo ti kongregation (aHébreu 2:12). A yeke ngbanga ti adisciple ti Jésus so ayeke lani be-ta-zo ti sara legeoko tongaso. Lani na ngoi ti akozo Chrétien, a sa yingo vulu na ndo ti atâ Chrétien ti ga amolenge ti Nzapa, na tongaso ala ga aita ti Christ. Na yingo ti Nzapa ato nda ti sara kusala na ndo ti ambeni ti ala na mbeni lege so ayeke nde. Ala wara amatabisi ti yingo. A bâ lege so yingo asara kusala na ndo ti ala na lege so ala yeke sara tënë na ndara wala na mbeni hingango ye so ayeke nde, na lege so ala yeke na ngangu ti zi akobela wala ti fa atënë ti prophétie. Wala ala lingbi même ti sara tënë na ayanga ti kodoro so ala hinga kozoni pëpe.​—1 aCorinthien 12:4-11.

16. Mbeni raison so a mû na ambeni Chrétien amatabisi ti yingo ayeke so wa?

¹⁶ Na ndo sarango tënë na ayanga nde nde, Paul atene: “Fade mbi sara bia na yingo ti mbi, me fade mbi sara bia na bibe ti mbi nga.” (1 aCorinthien 14:15). Paul abâ so a yeke kota ye ti tene azo agbu nda ti tënë so lo yeke tënë si ala lingbi ti manda ye dä. Ye so Paul agi ayeke ti gonda Jéhovah na yâ ti kongregation. Lo wa amba ti lo so awara amatabisi ti yingo, lo tene: “I gi lege ti wara matabisi mingi ti sara si [kongregation, MN ] akpengba”, so ti tene kongregation ti ala so awara amatabisi ti yingo ni (1 aCorinthien 14:4, 5, 12, 23). A yeke polele so Paul ayeke bi bê ti lo lani mingi na ndo ti akongregation ti ando so, na lo hinga so aChrétien ayeke wara lege ti gonda Nzapa na yâ ti akongregation so oko oko.

17. Ye wa e hinga na bê ti e kue na ndo ti akongregation ti ando nde nde?

¹⁷ Jéhovah angbâ lakue ti sara kusala na kongregation ti lo na ti mû maboko na ni. Lo yeke iri deba nzoni na ndo ti groupe ti aChrétien kue so a sa yingo na ndo ti ala so angbâ na sese. A yeke bâ ni na lege ti gbâ ti kobe ti yingo so awakua ti Jéhovah ayeke wara ni (Luc 12:42). Lo yeke iri deba nzoni na ndo ti sewa ti aita na ndo sese kue. Nga, Wasarango e ayeke iri deba nzoni na ndo ti akongregation oko oko kue, ndo so e yeke gonda lo dä na lege ti akusala ti e nga na lege ti akiringo tënë ti e so ayeke kpengba aita ti e na lege ti yingo. A yeke kâ la a yeke fa na e ye, nga a yeke leke e si e lingbi ti gonda Nzapa na ambeni ngoi so ayeke nde na ngoi ti bungbi, ngoi so e yeke na popo ti kongregation pëpe.

18, 19. Ye wa atâ Chrétien ti akongregation nde nde aye ti sara?

¹⁸ Zia e dabe ti e so bazengele Paul awa aChrétien ti kongregation ti Philippes, na ti Macédoine, lo tene: “Mbi sambela teti tënë so, si . . . i si na lengo ti mbilimbili so aga na lege ti Jésus-Christ, ti mû gloire na Nzapa na ti sepela Lo.” Alengo ti mbilimbili so andu atënë so ala yeke tene na azo so ayeke na gigi ti kongregation na ndo mabe so ala yeke na ni na Jésus nga na pendere beku so ala yeke na ni (aPhilippien 1:9-11; 3:8-11). Tongaso, Paul awa amba ti lo aChrétien, lo tene: “A lingbi e mû sacrifice ti merci na Nzapa lakue na lege ti [Jésus], sacrifice so ayeke lengo ti yanga so asepela iri ti Lo.”​—aHébreu 13:15.

¹⁹ Mo yeke na ngia ti gonda Nzapa “na popo ti bungbi ti azo”, tongana ti so Jésus asara lani? Nga, mo yeke sara kusala na yanga ti mo ti gonda Jéhovah na gbele azo so ade ti hinga lo pëpe na so ade ti gonda lo pëpe? (aHébreu 2:12; aRomain 15:9-11). Akiringo tënë ti e alingbi ti luti na ndo ti bibe ti e na ndo kusala so kongregation ti e ayeke sara na yâ ti ye so Nzapa aleke ti sara. Na yâ ti article ti peko, e yeke bâ ande tongana nyen Jéhovah ayeke fa lege na kongregation ti ndo so e yeke dä. Nga, e yeke bâ ande kusala so ayeke nzoni kongregation asara na yâ fini ti e laso.

[Kete tënë na gbe ni]

Mo dabe mo na ni?

• Na lege wa ‘kongregation ti Nzapa’, so ayeke ti bungbi ti aChrétien so a sa yingo na ndo ti ala, abâ gigi?

• Ambeni lege ota so Bible asara kusala na tënë “kongregation” ayeke so wa?

• Na ndo tënë ti kongregation, ye wa David, Jésus nga na akozo Chrétien aye ti sara? Tongana nyen ye so alingbi ti ndu e?

[Foto na lembeti 9]

Jésus ayeke lani gunda ti kongregation wa?

[Foto na lembeti 10]

Agroupe ti aChrétien na ando nde nde so asara bungbi ayeke ‘akongregation ti Nzapa’

[Foto na lembeti 12]

Legeoko tongana aChrétien ti Bénin, e lingbi ti gonda Jéhovah na popo ti azo mingi