Mabe ayeke nyen?
TI MO, mabe ayeke nyen? Ambeni zo atene so mabe ayeke yengo dä gi tongaso na mbeni ye so a fa na zo sân ti tene lo hunda atënë na ndo ni. Henry Mencken, mbeni wasungo mbeti nga mbeni wagosinga ti Amerika so azo mingi ane atënë ti lo atene mbeni lâ so mabe “ayeke yengo dä gi tongaso so mbeni ye ayeke si atâa so a yeke ngangu ti tene ye ni so asi.”
Me ti Bible, a yeke nde. Mbeti ti Nzapa atene: “Mabe ayeke hingango biani so aye so mo yeke ku ni kungo ayeke si biani. A yeke nga fango polele na gigi ye so afa atene aye so mo bâ ni pëpe ayeke dä biani.”—aHébreu 11:1.
Teti so bibe ti azo ayeke nde nde na ndo ti mabe, zia e gi ti bâ akiringo tënë ti ahundango tënë so ge:
• Na lege wa lege so Bible afa na nda ti tënë mabe ayeke nde na ye so azo mingi atene ayeke mabe?
• Ngbanga ti nyen a yeke kota ye ti gi ti wara mara ti mabe so Bible asara tënë ni?
• Mo lingbi ti sara nyen ti tene mabe ti mo akpengba?
Mbeni kpengba mbeti nga aye so afa biani so zo ayeke wara ande mbeni ye
Na ngoi so Paul asû lani mbeti na aHébreu, tënë ti Grec so a kiri peko ni na tënë “hingango biani” ayeke mbeni tënë so azo ayeke tene ka mingi. A yeke wara tënë so fani mingi na yâ ti ambeti ti vongo ye nga a fa so zo so avo ye ni ayeke wara ande ye ni biani. Ni la, mbeni buku atene so a lingbi ti kiri na peko ti atënë ti aHébreu 11:1 tongaso: “Mabe ayeke mbeni kpengba mbeti so afa so zo ayeke wara ande biani aye so lo yeke ku.”
Tongana mo vo mbeni ye na yâ ti mbeni magazin nga na pekoni mo yeke ku ti tene a ga na mo ye ni na yanga-da, mo fa so mo yeke na mara ti mabe so. Mbeti ti vongo ye ni so ayeke na maboko ti mo asara si mo yeke na mbeni nda ti tënë ti zia bê ti mo kue na ndo ti azo ti magazin so mo vo ye ni dä. A lingbi ti tene so mbeti ti vongo ye so ayeke mbeni kpengba mbeti, ye so amû lege na mo ti hinga biani so mo yeke wara ande ye so mo vo. Tongana mo girisa mbeti so wala mo bi ni na mbeni ndo, andâ mo girisa awe ye so afa biani so mo yeke wa ti ye ni. Legeoko nga, azo so amä na bê so Nzapa ayeke sara ande aye so lo mû zendo ni ahinga biani so ala yeke wara ande ye so ala yeke ku ni. Na mbage, ti azo so ayeke na mabe pëpe wala so agirisa mabe ti ala, ala lingbi ande pëpe ti wara aye so Nzapa amû zendo ni.—Jacques 1:5-8.
Use tënë ni, so a kiri peko ni na tënë “fango polele na gigi” na aHébreu 11:1, aye ti sara tënë ti fango ambeni ye so ague nde na mbeni ye so zo abâ atene ayeke tâ tënë, andâ a yeke tâ tënë pëpe. Na tapande, gi na bango ni, zo alingbi ti tene so lâ ayeke turnê na tere ti sese, alondo na mbage ti Tö, ahon na lê ti nduzu na alï na mbage ti Do. Ye oko, azo ti gingo nda ti atongoro na lê ti nduzu nga na ambeni zo ti senda-ye ni nde afa so lâ ayeke turnê pëpe na tere ti sese. Na pekoni so mo bâ so aye so azo ti gingo nda ti ye na lê ti nduzu afa ayeke tâ tënë, mo bâ biani so sese ayeke turnê na tere ti lâ, atâa ye so lê ti mo afa na mo. Mabe ayeke pëpe yengo dä gi tongaso na mbeni ye sân ti hunda tënë na ndo ni. Me a mû lege na zo ti hinga ye nzoni na ndo ti mbeni ye.
A yeke kota ye ti duti na mabe so akpengba?
So ayeke mara ti mabe so Bible awa zo ti duti na ni: mbeni kpengba mabe so aluti na ndo ti aye so ayeke tâ tënë biani, atâa so ye so ahunda na zo ti changé bango ndo ti lo na ndo ti aye so lo mä na bê dä. A yeke kota ye mingi ti duti na mara ti mabe so. Bazengele Paul atene: “Tongana mabe ayeke dä pëpe zo alingbi ti nzere na lê ti Nzapa pëpe, teti zo so aga nduru na Nzapa a lingbi lo mä na bê so Nzapa ayeke dä na lo ga zo ti futango azo so ayeke gi lo ngangu.”—aHébreu 11:6.
Aye mingi ayeke dä so asara si a yeke ngangu na zo ti duti na kpengba mabe. Me tongana mo sara aye osio so a fa na yâ ti alembeti so aga na peko, mabe ti mo ayeke kpengba.