Ota ye ni

Duti zo so ayeke kiri singila lakue

BIBLE ATENE NYEN? “Ala kiri singila ngbanga ti aye kue.”​—1 aThessalonicien 5:18.

NGBANGA TI NYEN A YEKE KETE YE PËPE? E yeke na popo ti azo so ayeke azo ti baba nga so ayeke kiri singila pëpe na tongana e sara hange pëpe e lingbi ti sara ye tongana ala (2 Timothée 3:1, 2). Na ndo ni, e lingbi ti bâ so a lingbi e sara aye mingi na ndo ti ati so e yeke sara ka ni. A lingbi ti si so akpale ahon ndo ti e wala e mû ngoi ti e kue ti gi gi na aye ti e wani. Ye ti pekoni ayeke so e yeke na ngoi pëpe ti wara ngia na yâ ti aye so e yeke na ni awe wala ti kiri singila ndali ti ye so ambeni zo asara teti e.

MO LINGBI TI SARA NYEN? Mû ngoi ti gbu li na ndo ti anzoni ye so mo yeke na ni awe. Tâ tënë, mo lingbi ti bâ so akpale ahon ndo ti mo. Me bâ tapande ti Gbia David. Na ambeni ngoi vundu ahon ndo ti lo ndali ti akpale so lo tingbi na ni. Atâa so kue, lo sambela Nzapa lo tene: “Mbi dabe mbi na lâ ti giriri; mbi bi bê ti mbi na kusala ti Mo kue; mbi bi bê ti mbi na kusala ti tïtî Mo.” (Psaume 143:3-5). Atâa akpale so lo yeke lani na ni, David angbâ lakue ti kiri singila nga lo zia bê ti lo gi na ndo ti ye so lo yeke na ni.

Gbu li na ndo ti ye so ambeni zo asara ndali ti mo, na kiri singila na ala ndali ni. Jésus azia mbeni nzoni tapande na ndo ti tënë so. Na tapande, na ngoi so kamarade ti lo Marie atuku mbeni mafuta ti nginza mingi na li ti Jésus nga na gere ti lo, ambeni zo atene: “Ngbanga ti nyen a buba mafuta so?”a Azo so adiko tënë so apensé so a yeke nzoni a kä mafuta so ti mû nginza ni na awayere. Jésus akiri tënë lo tene: “Ala zia lo kpô. Ngbanga ti nyen ala ye ti ga na kpale na lo?” Lo kiri lo tene: “Wali so asara ye so alingbi na ngangu ti lo.” (Marc 14:3-8; Jean 12:3). Ahon ti luti na ndo ti ye so Marie asara pëpe, Jésus akiri singila ndali ti ye so lo sara.

Ti ambeni zo, ala yeke hinga nzoni ti fami ti ala wala kamarade ti ala gi na peko ti kuâ ti zo ni wala gi na pekoni so songo ti ala na zo ni so abuba. Nga ala yeke hinga nzoni ti ambeni ye so ala yeke na ni gi tongana aye ni so ayeke dä mbeni pëpe. Tongana mo yeke gbu li na ndo ti aye ti nzoni so mo yeke na ni fadeso, mara ti aye tongaso ayeke si na mo pëpe. Ngbanga ti nyen mo gi pëpe ti bata na li ti mo wala ti sû na lê ti mbeti aye so mo kiri singila ndali ni?

Teti so “nzoni matabisi kue” alondo na Nzapa, a yeke nzoni e kiri singila na lo na yâ ti sambela (Jacques 1:17). Tongana e sara ye so lakue, a yeke mû maboko na e ti duti zo so ayeke kiri singila nga e yeke zia bê ti e gi na aye so e yeke na ni.​—aPhilippien 4:6, 7.

[Kete tënë na gbe ni]

[Foto na lembeti 6]

Mo yeke kiri singila ndali ti aye so ambeni zo asara na mo?