So ala “hinga Nzapa awe,” a lingbi ala sara nyen fadeso?
“Ala hinga Nzapa awe.”—AGAL. 4:9.
1. Ngbanga ti nyen zo ti kpengo na avion ayeke bâ aye so a sû na lê ti mbeti kozo si lo kpe na ni?
LAKUE tongana mbeni zo ti kpengo na avion aye ti kpe na avion, lo yeke sara kua na mbeni mbeti so a sû na lê ni ambeni ye so a lingbi lo bâ na tere ti avion ni kozo awe si lo kpe na ni. Lo yeke sara kua na mbeti so tongaso si lo girisa mbeni ye pëpe. Tongana lo sara ni ape, lo lingbi ti hinga pëpe wala mbeni kpale ayeke na tere ti avion ni so alingbi ti sara si a sara ndao. Même azo so akpe na avion angu mingi ayeke na bezoin ti bâ aye kue so a sû na lê ti mbeti ni kozo si ala kpe na ni.
2. Nyen la a lingbi e gi ti bâ?
2 Legeoko tongana mbeti so zo ti kpengo na avion ayeke sara na kua, mo yeke nga na mbeni molongo ti aye so a lingbi mo bâ ti bâ wala mabe ti mo ayeke ngbâ ngangu même na ngoi so mo tingbi na akpale. Atâa e wara batême a ninga pëpe wala e wara batême asara angu mingi awe, e yeke na bezoin ti gi ti bâ wala mabe ti e angbâ ti kpengba. Me tongana e pensé so mabe ti e akpengba awe, mbeni ngangu tara alingbi ti sara si songo ti e na Jéhovah abuba. Bible awa e atene: “Zia zo so abâ ti lo atene ni luti awe asara hange si lo tï pëpe.”—1 aCor. 10:12.
3. Nyen la a lingbi aChrétien ti Galatie asara lani?
3 A lingbi lani aChrétien ti Galatie agi ti bâ wala mabe ti ala akpengba nga ti bâ na nene ni liberté ti ala na lege ti yingo. Na lege ti sandaga ti Jésus, lo mû lege na azo so amä na bê na lo ti hinga Nzapa na mbeni lege so ayeke kota mingi. So ti tene ala lingbi ti ga amolenge ti Nzapa (aGal. 4:9). Ti ngbâ na yâ ti songo so ayeke nzoni ahon atanga ni kue so, a lingbi aChrétien ti Galatie ake afango ye ti azo so aye angobo ti aJuif, so aye gi ti tene ala sara ye alingbi na Ndia ti Moïse. A-Gentil so afâ ganza pëpe, so ayeke na yâ ti acongrégation, Ndia ti Moïse abâ même ala lâ oko ape. A-Juif na aGentil nga kue ayeke na bezoin ti gue na li ni na lege ti yingo. A lingbi ala hinga so Nzapa ahunda na azo mbeni pëpe ti sara ye alingbi na Ndia ti Moïse.
AKOZO YE SO A LINGBI ZO ASARA TI HINGA NZAPA
4, 5. Wango wa Paul amû na aChrétien ti Galatie? Na lege wa wango so abâ nga e?
4 Bazengele Paul amû wango na aChrétien ti Galatie ti ngbâ ti sara ye alingbi na tâ tënë so ayeke na yâ ti Bible na ti kiri pëpe na tere ti aye so ala zia ni awe. Wango so abâ nga atâ Chrétien kue. Yingo ti Jéhovah apusu bazengele Paul ti kpengba acongrégation so ayeke lani na Galatie nga na azo kue so ayeke voro Jéhovah ti ngbâ be-ta-zo.
5 A yeke nzoni e kue e dabe ti e na ngoi so a zi e na gbe ti ngbâa na lege ti yingo na e ga Témoin ti Jéhovah. Ti sara ni, zia e bâ ahundango tënë use so: Mo dabe ti mo na aye so mo sara lani ti mû lege na mo ti wara batême? Mo dabe ti mo na ngoi so mo na Nzapa ahinga tere nga na ngia so mo wara na ngoi so mo wara tâ liberté na lege ti yingo?
6. Aye wa e yeke sara tënë na ndo ni?
6 E kue e sara lani aye gumbaya ti hinga tâ tënë. Aye ni so ayeke na yâ ti encadré “Aye so e sara ti wara batême nga ti ngbâ ti gue na li ni.” Tongana ngoi na ngoi e dabe ti e na aye gumbaya so, a yeke sara si e wara ngangu si e kiri pëpe na tere ti aye ti dunia so. Legeoko tongana ti so zo ti kpengo na avion so lê ti lo akpengba ayeke bâ lakue mbeti ti lo kozo si lo kpe na ni, ti kiri lakue ti bâ aye so asara si mo hinga Nzapa ayeke mû maboko na mo ti ngbâ be-ta-zo.
ALA SO NZAPA AHINGA ALA ANGBÂ TI GUE NA LI NI NA LEGE TI YINGO
7. Nyen la a lingbi e mû pekoni? Ngbanga ti nyen?
7 Mbeti ti zo ti kpengo na avion ayeke dabe ti lo so a lingbi lakue lo bâ ambeni ye nzoni kozo na tere ti avion ni awe si lo kpe na ni. E nga kue a lingbi lakue e kiri e bâ tere ti e wani nga na aye so e yeke sara ka ngbene ye so e wara batême. Paul atene na Timothée, lo tene: “Mo ngbâ ti bata anzoni tënë so a zia ni tongana tapande, anzoni tënë so mo mä ni na mbage ti mbi; mo ngbâ ti bata ni na mabe nga na ndoye so ague oko na Christ Jésus.” (2 Tim. 1:13). “Anzoni tënë” ni ayeke na yâ ti Bible (1 Tim. 6:3). Dessin ti mbeni ye ayeke mû lege na e ti hinga wala ye ni ayeke tongana nyen. Legeoko nga, ‘tâ tënë so a zia ni tongana tapande’ ayeke mû lege na e ti hinga akota ye so Jéhovah ahunda na e na ti sara ye alingbi na ni. Tongaso zia e bâ fadeso aye so e sara ti si na batême ti bâ tongana nyen la e yeke sara ye alingbi na tâ tënë so a zia ni tongana tapande.
8, 9. (a) Na ndo ti tënë ti hingango ye nga na mabe, nyen la a lingbi e sara? (b) Fa na lege ti tapande nene ti guengo na li ni na lege ti yingo nga ndani so a yeke mbeni ye so ayeke hunzi ka ape.
8 Kozo ye ni ayeke hingango ye so e hinga na ndo ti Nzapa, ni la asara si e mä na bê na lo. Me a lingbi e ngbâ ti sara si hingango ye so e hinga na ndo ti Nzapa nga na mabe ti e amaï (2 aThes. 1:3). Na peko ti batême ti e, a lingbi e ngbâ ti sara si songo ti e na Nzapa angbâ ti maï nga ti kpengba.
9 E lingbi ti haka maïngo ti e na lege ti yingo na maïngo ti mbeni keke. Mbeni keke alingbi ti kono ngangu na mbeni lege so adö bê tongana agunda ni alï sese ngangu nga akpe ayo. Na tapande, keke ti cèdre ti Liban alingbi ti yo mètre 37, agunda ni alï sese ngangu na tongana a mû kamba angoro na tere ti kate ni kamba ni ayo mètre 12 (Bia ti Sal. 5:15). Na tongo nda ni keke ni ayeke kono hio hio, me a si na mbeni ngoi a yeke kono me zo ayeke bâ konongo ni ape. Ngu oko oko kate ti keke ni ayeke kono nga agunda ni ayeke lï sese ngangu na akpe ayo. E lingbi ti tene so maïngo ti mbeni Chrétien na lege ti yingo ayeke nga tongaso. Na ngoi so e to nda ti manda Bible, e lingbi ti gue na li ni hio na lege ti yingo na pekoni e mû batême. Azo na yâ ti congrégation ayeke na ngia ti bâ maïngo ti e. E lingbi ti ga pionnier wala e wara ambeni kusala na yâ ti bungbi. Me tongana a sara ambeni ngu na pekoni, e yeke ngbâ ti gue na li ni na lege ti yingo me azo alingbi ti bâ ni ape. Me a lingbi e ngbâ ti maï hingango ye ti e na ndo ti Nzapa nga na mabe ti e juska e “ga tongana mbeni koli so akpengba kue awe, ti yo ti lingbi na yongo so Christ ayo na ni kue”. (aÉph. 4:13). Tongaso, na ngoi so e yeke gue na li ni ti ga mbeni kpengba Chrétien, e yeke tongana mbeni kete keke so ayeke kono ngbii aga mbeni kota keke.
10. Ngbanga ti nyen a yeke kota ye ti tene même aChrétien biazo angbâ ti gue na li ni?
10 Me a yeke nzoni maïngo ti e ni angbâ gi ge ape. Aye so e hinga na yâ ti Bible nga na mabe ti e, so ayeke tongana agunda ti keke, la ayeke sara si e luti ngangu na e yengi ape. A lingbi agunda ti e ni angbâ ti kpengba ahon ti kozo (aProv. 12:3). Aita mingi na yâ ti congrégation asara tongaso. Na tapande, mbeni ita so ayeke ancien ahon ngu 30 awe atene ni ngbâ ti maï na lege ti yingo. Lo tene: “Mbi kiri mbi bâ Bible na nene ni mingi. Mbi yeke wara lakue ambeni fini lege so azi na mbi ti sara ye alingbi na andia nga na afango ye ti Bible na alege nde nde. Mbi ye fango tënë nga mingi ahon ti kozo.”
KPENGBA SONGO TI MO NA NZAPA
11. Tongana nyen la e lingbi ti hinga Jéhovah nzoni mingi?
11 Guengo na li ni ti e na lege ti yingo ahunda nga ti duti na nzoni songo na Nzapa tongana Kamarade ti e nga Babâ ti e. Lo ye si e hinga so e nzere na lê ti lo. Lo ye si e hinga so lo ye e nga e duti nzoni tongana ti so mbeni molenge ayeke na ngia na tere ti babâ wala mama ti lo so asara ye na lo na ndoye, wala tongana ti so e yeke na ngia na ngoi so e yeke na tere ti tâ kamarade ti e. E yeke wara mara ti songo so na Jéhovah gi na yâ ti lango oko ape. A lingbi e mû ngoi mingi si e hinga lo nga e ye lo. Tongaso, ti mû lege na mo ti hinga Jéhovah nzoni mingi, ayeke nzoni mo sara kue ti diko Bible lâ na lâ. Diko nga anuméro oko oko kue ti a-Tour ti Ba Ndo na a-Réveillez-vous! nga na tanga ti ambeti ti e.
12. Nyen la a lingbi e sara tongana e ye ti ngbâ ti kpengba songo ti e na Nzapa?
12 Sambela nga na anzoni kamarade alingbi nga ti mû maboko na e ti kpengba songo ti e na Nzapa. (Diko Malachie 3:16.) ‘Mê ti Jéhovah ayeke mä sambela ti ala ti voro tere na lo’. (1 Pi. 3:12). Legeoko tongana mbeni babâ so ayeke sara ye na ndoye, Jéhovah ayeke dengi mê ti mä toto so e yeke toto na lo na yâ ti sambela ti mû maboko na e. Tongaso, a lingbi e “ngbâ lakue ti sambela.” (aRom. 12:12). E lingbi pëpe ti ngbâ ti gue na li ni na lege ti yingo sân mungo maboko ti Nzapa. Dunia so ayeke sara ngangu mingi na ndo ti e, na e lingbi ti gbu lê ni wala ti hon ndo ni na ngangu ti e wani ape. Tongana e zia lege ti sambela, e yeke wara pëpe ngangu so Jéhovah aye lakue ti mû na e. Mo yeke sara tënë na Jéhovah na yâ ti sambela tongana ti so mo yeke sara tënë na mbeni kamarade ti mo so mo yeke na confiance na lo? Mo bâ so a lingbi mo sara si sambela ti mo aga nzoni ahon ti kozo?—Jér. 16:19.
13. Ngbanga ti nyen tongana e ye ti ngbâ ti kpengba songo ti e na Nzapa a lingbi e gue lakue na abungbi?
13 Jéhovah aye azo kue so “aga na Lo ti bata tere ti ala”. Ni la, même na pekoni so e hinga Nzapa awe, e ye ti ngbâ lakue ti bungbi na congrégation legeoko na amba ti e so ahinga lo (Na. 1:7). Na yâ ti dunia so e yeke wara gbâ ti aye so asara si bê ti e anze, tongaso a yeke nzoni e duti na popo ti aita so ayeke kpengba e. Aye ti nzoni wa mo yeke wara na guengo na abungbi? Mo yeke wara na yâ ti congrégation aita so ayeke pusu mo “ti duti na ndoye na ti sara apendere kusala”. (aHéb. 10:24, 25). Ndoye so ayeke na popo ti mba so Paul asara tënë ni na aHébreu aye ti sara tënë ti songo so ayeke na popo ti aita, bungbi ti azo so ayeke voro Jéhovah, wala congrégation. Ti fa mara ti ndoye so, a lingbi aita asara lisoro na popo ti ala. Tongaso, sara kue ti gue na abungbi lakue nga mû mbage dä na lege ti acommentaire ti mo.
14. Na lege wa changengo bê nga ziango lege ti aye ti sioni ayeke aye so zo ayeke ngbâ gi ti sara ni?
14 Kozo si e ga Chrétien e changé lani bê ti e nga na lege ti e, wala e zia lege ti aye ti sioni so e sara. Ye oko, changengo bê ayeke mbeni ye so zo ayeke ngbâ gi ti sara ni. Teti so e yeke na siokpari na yâ ti tere ti e nga e yeke na awokongo, a yeke ngangu pëpe ti tene e sara siokpari. Siokpari ayeke tongana mbeni ngbo so ayeke nduru ti dë e na ngoi kue so lo lingbi ti sara ni (aRom. 3:9, 10; 6:12-14). Tongaso a lingbi e hinga so e yeke na awokongo. Jéhovah ayeke kanga bê na mbage ti e na ngoi so e yeke sara ngangu ti hon ndo ti awokongo ti e nga ti changé aye so a lingbi e changé na yâ ti fini ti e (aPhil. 2:12; 2 Pi. 3:9). Ambeni ye so alingbi ti mû maboko na e mingi ayeke ti sara kusala nzoni na ngoi ti e nga na amosoro ti e, nga ti zia ti gi ti sara aye so ayeke ga na nzoni gi na e. Mbeni ita-wali atene: “Mbi kono na yâ ti sewa ti aChrétien, me bango ndo ti mbi na ndo ti Jéhovah ayeke nde na ti mingi ti aita. Mbi bâ lo tongana mbeni zo so a lingbi a kpe mbeto ti lo ngangu, na mbi bâ so mbi lingbi ti nzere na lê ti lo lâ oko ape.” A si na mbeni ngoi ita-wali so awoko na lege ti yingo ndali ti gbâ ti afaute so lo sara. Lo tene: “A yeke pëpe ndali ti so mbi ndoye Jéhovah ape me ayeke ndali ti so mbi hinga lo nzoni ape. Ye oko na peko ti gbâ ti angangu sambela so mbi sara, mbi komanse ti changé.” Lo tene nga lo tene: “Mbi bâ so Jéhovah ayeke fa lege na mbi tongana mbeni molenge, lo yeke mû maboko na mbi ti hon ndo ti akpale ti mbi oko na oko, nga lakue na ndoye lo yeke fa na mbi aye so a lingbi mbi sara.”
15. Aye wa Jésus na Babâ ti lo ayeke bâ na mbage ti e?
15 “Ala ngbâ ti fa na azo” nzoni tënë. A yeke tënë so mbeni ange ti Nzapa atene na Pierre na ambeni bazengele na pekoni so a zi ala na kanga na lege ti miracle (Kus. 5:19-21). Fango tënë so e yeke fa yenga na yenga ayeke nga mbeni ye so a lingbi e bâ ni nzoni si mabe ti e akpengba. Jésus na Babâ ti lo ayeke bâ na nene ni mabe so e yeke na ni nga ye so e yeke sara na fango tënë (Apoc. 2:19). Tongana ti so ancien so e sara tënë ti lo fade na yâ ti mbeni paragraphe atene: “Fango tënë ayeke ye so agbu bê ti e mingi.”
16. Ngbanga ti nyen ayeke nzoni ti tene e gbu li ti e na ndo ti mungo tere ti e so e mû na Jéhovah?
16 Gbu li ti mo lakue na ndo ti mungo tere ti mo so mo mû na Nzapa. Songo so e yeke na ni na Jéhovah ayeke ye so ayeke kota mingi ahon tanga ti ye kue. Lo hinga azo so ayeke ti lo. (Diko Ésaïe 44:5.) Gi ti bâ songo ti mo na Jéhovah na sambela lo ti mû maboko na mo ti ngbâ ti kpengba songo ti mo na lo. Gbu nga li na ndo ti lango ti batême ti mo, na girisa kota lango so ape. Batême ti mo afa na azo so mo mû tere ti mo na Jéhovah awe. A yeke kota desizion so ahon atanga ni kue so mo mû na yâ ti fini ti mo.
GBU NGANGU SI MO BATA NZONI SONGO NA JÉHOVAH
17. Ngbanga ti nyen a hunda ti tene e gbu ngangu si e bata nzoni songo na Jéhovah?
17 Na yâ ti mbeti so Paul atokua na aChrétien ti Galatie, lo fa so a lingbi ala gbu ngangu (aGal. 6:9). A yeke nga kota ye ti tene aChrétien agbu ngangu laso. Mo yeke wara atara, me Jéhovah ayeke mû maboko na mo. Ngbâ ti sambela Nzapa ti wara yingo vulu. Bê ti mo ayeke dë na ngoi so lo yeke sara si vundu ti mo aga ngia nga pasi ti mo aga siriri (Mat. 7:7-11). Gbu li kete: Jéhovah ayeke bâ lege ti andeke, si mo so mo ye lo na mo mû tere ti mo na lo so, lo yeke sara na mo ape? (Mat. 10:29-31). Atâa atara wa mo tingbi na ni, kiri na peko pëpe na zia lege ti tâ tënë pëpe. E wara aye ti nzoni mingi ndali ti so Jéhovah ahinga e.
18. So mo “hinga Nzapa awe”, nyen la mo ye ti sara fadeso?
18 Tongaso, tongana mo hinga Nzapa na mo wara batême adë ti ninga ape, a lingbi mo sara nyen fadeso? Ngbâ ti gi ti hinga Nzapa nzoni mingi nga gi ti ga Chrétien so akpengba na lege ti yingo. Me tongana mo wara batême asara angu mingi awe, a lingbi mo sara nyen fadeso? Mo nga kue alingbi mo ngbâ ti gi ti hinga ye mingi na ndo ti Jéhovah. A yeke nzoni mo sara hange si mo pensé pëpe so mo hinga Nzapa nzoni mingi awe na mo yeke pëpe na bezoin ti kiri ti kpengba songo ti mo na lo. Ngoi na ngoi kiri mo bâ aye so e sara tënë na ndo ni na yâ ti article so tongaso si mo bata nzoni songo na Jéhovah, Babâ ti e ti ndoye, Kamarade ti e nga Nzapa ti e.—Diko 2 aCorinthien 13:5, 6.