Duti lakue na beku!

Ambeni ye so asi na Angleterre ayeke mû maboko na mo ti hinga ndani so a yeke nzoni mo duti lakue na beku. Mo yeke bâ nga ye so mo lingbi ti sara ti “zia mapa ti mo na ndo lê ti ngu,” tongaso si mo mû maboko na azo so ade ti yeda na tâ tënë pëpe.​—Zo-ti. 11:1.

A YEKE KOTA YE TI GBU NGANGU

A yeke kota ye ti tene mo gbu ngangu. A lingbi mo gbu tâ tënë ngangu na mo ngbâ na tere ti Jéhovah (Deut. 10:20). A yeke ye so Georgina asara. Na ngoi so aTémoin ti Jéhovah akomanse ti manda Bible na lo na ngu 1970, koli ti lo Kyriacos asara lani ngonzo ngangu. Lo gi ti kanga lege na Georgina ti sara étude, lo mû lege pëpe na aTémoin ti si na yanga-da ti lo, nga lo yeke bi ambeti kue ti aTémoin ti Jéhovah so lo wara na yanga-da.

Na ngoi so Georgina ato nda ti gue na abungbi, Kyriacos akiri asara ngonzo ngangu mingi. Na mbeni lango, lo gue na Da ti Royaume na lo komanse ti diko tënë. Mbeni ita-wali abâ so Kyriacos atene Grec nzoni ahon Anglais, lo pika singa na mbeni ita-koli so ayeke Grec so ayeke na yâ ti mbeni congrégation nde ti ga ti mû maboko na ala. Sarango ye ti ita-koli ni na nzoni bê apusu Kyriacos ti sara ye nzoni, nga ita-koli ni amanda même Bible na lo na yâ ti ambeni nze. Me na pekoni Kyriacos azia lege ti étude ni.

Kyriacos akiri akanga lege na Georgina teti ngu ota me lo gbu ngangu dä. Lo tene ni yeke kangbi na Georgina tongana lo wara batême. Na lango ti batême ti Georgina, lo sambela Jéhovah ngangu ti tene Kyriacos akangbi na lo pëpe. Tongana aTémoin aga ti mû Georgina ti gue na lo na assemblée ni, Kyriacos atene na ala, a tene: “Ala gue. E yeke gue na peko ti ala na oto.” Lo gue na kapa ti ndapre ni na lo bâ wali ti lo so awara batême.

A si na mbeni ngoi Kyriacos akanga lege na wali ti lo tongana ti kozo ape, nga yeke na yeke lo changé mingi. A yeke nduru na ngu 40 na peko ti kozo tingbingo tere ti Georgina na aTémoin la koli ti lo awara batême! Nyen la amû maboko na Kyriacos nyen? Lo tene: ‘Mbi yeke na ngia so Georgina amû lege na mbeni ye pëpe ti kanga lege na lo ti voro Jéhovah.’ Georgina atene: “Atâa so koli ti mbi akanga lege na mbi, mbi zia ti voro Nzapa pëpe. Na yâ ti ngoi so kue, mbi ngbâ ti sambela na Jéhovah na mbi yeke lakue na beku.”

A YEKE KOTA YE TI YÜ FINI ZO

Ti gi ti duti na asarango ye ti aChrétien ayeke nga mbeni ye so alingbi ti mû maboko na koli wala wali ti mo. Bazengele Pierre amû wango na awali Chrétien, lo tene: “Ala woko tere na gbe ti akoli ti ala, si tongana ambeni koli ni ayeke dä so ayeda na tënë ti Nzapa pëpe, a lingbi ti ga na ala ti mä na bê, na lege ti tënë pëpe, me na lege ti sarango ye ti tere ti awali ti ala.” (1 Pi. 3:1). Christine asara ye alingbi na wango so, atâa so angu mingi ahon kozo ti tene koli ti lo ayeda na tâ tënë. Na yâ ti ngu 20 na ndo ni so Christine ayeke Témoin, koli ti lo John amä na bê na Nzapa pëpe. John aye pëpe ti gue na yâ ti mbeni bungbi ti nzapa, me lo bâ so bungbi ti Nzapa ti Christine agbu bê ti Christine mingi. Lo tene: ‘Mbi bâ so bungbi ti Nzapa so asara si Christine ayeke na ngia. Lo ga mbeni zo so asara ye na mbeto pëpe, so zo alingbi ti zia bê na ndo ti lo, nga ye so amû maboko na mbi na yâ ti gbâ ti akpale.’

Christine aforcé koli ti lo lâ oko pëpe ti yeda na aye so lo mä na bê na ni. Koli ti lo atene: “Christine abâ so a yeke nzoni mingi ti tene lo sara tënë pëpe na mbi na ndo ti bungbi ti Nzapa ti lo; lo zia mbi ti manda ye na ngoi so mbi ye nga na lege so mbi ye.” Tongana ambeni article ti Tour ti Ba Ndo wala Réveillez-vous! asara tënë na ndo ti aye tongana senda-ye wala aye so angoro e so Christine apensé atene ayeke nzere na John, lo yeke fa ni na John, lo tene: “Mbi pensé so article so ayeke nzere na mo.”

A si na mbeni ngoi, John amû retraite na lo wara kua ti jardin. Teti so lo yeke na ngoi mingi ti gbu li ti lo na ndo ti akota hundango tënë so andu fini ti zo, lo komanse ti hunda tere ti lo, lo tene: ‘E azo e bâ gigi gi tongaso, wala a créé e ndali ti mbeni ye?’ Mbeni lâ, mbeni ita-koli so lo na John ayeke sara lani lisoro na lege ti Internet ahunda John, a tene: “Mo ye ti manda Bible?” John atene: “Fadeso mbi komanse ti mä na bê na Nzapa awe. Mbi ye ti manda Bible.”

A yeke lani kota ye ti tene Christine aduti lakue na beku. Na peko ti angu 20 so Christine asambela ti tene John ayeda na tâ tënë, John awara batême. Fadeso ala use kue ayapu na yâ ti kua ti Jéhovah. John atene: “Aye use la asara si mbi yeda na tâ tënë, aTémoin ayeke sara ye na nzoni bê nga ala yeke bi bê ti ala na azo. Tongana mo sara mariage na mbeni wali so ayeke Témoin ti Jéhovah, mo wara mbeni wali so ayeke be-ta-zo, so mo lingbi ti zia bê ti mo na ndo ti lo nga so ayeke bi bê ti lo na mo.” Biani, Christine asara ye alingbi na tënë so ayeke na 1 Pierre 3:1, na aga na aye ti nzoni.

ANGU MINGI NA PEKONI, TËNË NI ALINGBI TI LË LENGO

Ka ti azo so amanda Bible, so na tongo nda ni ala yeke na nzara ni me asi na mbeni ngoi ala zia lege ni ndali ti ambeni ye? Gbia Salomon atene: “Na ndapre mo lu le-kobe ti mo, na lakui mo duti senge pëpe, teti mo hinga pëpe fade ye so aga nzoni, tongana a yeke so ge wala so kâ, wala ala use kue aga nzoni.” (Zo-ti. 11:6). Na ambeni ngoi angu mingi alingbi ti hon kozoni si tâ tënë amaï na yâ ti bê ti mbeni zo. Atâa so kue, na nda ni zo ni alingbi ti bâ so a yeke kota ye ti lë songo na Nzapa (Jacq. 4:8). Biani, mbeni lâ mo lingbi ti mä mbeni nzoni tënë.

Bâ ye so asi na Alice, so alondo na Inde ague na Angleterre. Na ngu 1974 lo to nda ti manda Bible. Lo yeke tene Hindi me lo ye ti gi ti tene Anglais nzoni. Teti ambeni ngu Alice amanda Bible nga lo gue lo sara ambeni bungbi na yâ ti mbeni congrégation ti Anglais. Lo hinga lani so ye so lo manda so ayeke tâ tënë, me lo bâ ni na nene ni ape. Na ndo ni, lo ye nginza mingi nga lo ye amatanga mingi. Na nda ni Alice azia ti manda Bible.

Nduru na ngu 30 na pekoni, Stella, so asara étude lani na Alice, awara mbeni lettre so Alice atokua na lo. Na yâ ti lettre ni Alice atene: “Mbi hinga so tere ti mo ayeke nzere ande mingi ti hinga so zo so mo manda lani Bible na lo na ngu 1974 awara batême na kota bungbi ti district so ahon ade ti ninga pëpe. Mo sara mbeni kota ye na yâ ti fini ti mbi. Mo lu ngongoa ti tâ tënë na yâ ti bê ti mbi, nga atâa so na pekoni mbi mû tere ti mbi hio na Nzapa pëpe, mbi bata ngongoa ti tâ tënë so na yâ ti bê ti mbi.”

Nyen la asi nyen? Alice atene so lo tï na yâ ti kota vundu na peko ti kuâ ti koli ti lo na ngu 1997. Lo sambela Nzapa. Penze-ngbonga bale-oko na pekoni, ambeni Témoin use so ayeke tene Punjabi asi na yanga-da ti lo na ala mû na lo tract Beku wa ayeke dä teti azo ti e so akui awe? Alice abâ so Nzapa la akiri tënë na sambela ti lo so nga lo bâ so a yeke nzoni lo gi ti wara tere na aTémoin ti Jéhovah. Me lo lingbi ti wara ala na ndo wa? Lo wara mbeni ngbene mbeti so adresse ti congrégation ti Punjabi so Stella amû lani na lo ayeke dä. Alice ague abâ Da ti Royaume ni na aita so ayeke tene Punjabi ayamba lo nzoni mingi. Alice atene: “Mbi ngbâ ti dabe ti mbi na ndoye so ala fa lani na mbi nga ndoye so la amû maboko na mbi ti wara dengo bê na yâ ti kota vundu ti mbi.”

Lo to nda ti gue na abungbi lakue, lo kiri lo komanse ti manda Bible nga lo manda ti sara tënë nga ti sû mbeti nzoni na yanga ti Punjabi. Na ngu 2003 lo wara batême. Na yâ ti ndangba mbage ti lettre so lo tokua na Stella, lo tene: “Merci mingi na mo ndali ti ngongoa ti tâ tënë so mo lu na yâ ti bê ti mbi asara ngu 29 awe nga ndali ti nzoni tapande so mo zia na mbi.”

“Merci mingi na mo ndali ti ngongoa ti tâ tënë so mo lu na yâ ti bê ti mbi asara ngu 29 awe nga ndali ti nzoni tapande so mo zia na mbi.”​—Alice

Nyen la mo manda na lege ti aye so asi so? Ngongoa ti tâ tënë so mo lu na yâ ti bê ti mbeni zo alingbi ti mû ngoi mingi ahon ti so mo ku tere ti mo na ni. Me tongana zo ni aye ti hinga Nzapa, lo sara ye na lege ni nga lo sara tere ti lo kete, Jéhovah ayeke zia si tâ tënë so ayeke na yâ ti bê ti lo amaï. Dabe ti mo na tënë ti yâ ti toli ti Jésus so: “Ngongoa ti kobe ni asigigi na akono, me lo hinga ye oko dä pëpe. Sese ni wani asara si kobe ni asigigi yeke yeke. Kozoni, a sigigi tongana kete pere, na pekoni keke ni asigigi nga na nda ni tâ lê ti kobe ni asigigi na ndo ti keke ni.” (Marc 4:27, 28). Ngongoa ti tâ tënë ayeke kono yeke yeke na amaï na bê ti lo “wani”. Ti tâ tënë ni, awafango tënë ti Royaume oko oko kue ahinga pëpe lege so ngongoa ti tâ tënë ayeke maï na ni. Tongaso ngbâ ti lu ye mingi. Mo lingbi ti ko lengo ni mingi nga.

Girisa nga pëpe so sambela ayeke kota ye. Georgina na Christine angbâ lani ti sambela Jéhovah. Tongana mo “ngbâ lakue ti sambela,” na mo duti lakue na beku, “na peko ti lâ mingi,” mo lingbi biani ti kiri ti wara “mapa” so mo bi na lê ti ngu.​—aRom. 12:12; Zo-ti. 11:1.