Bungbi ti Nzapa ti mo abâ nginza tongana nyen?

Estellea ayeke na gbâ ti amolenge nga lo yeke gue na eglize lakue. Lo tene: “Mbi tene na kota zo ti eglize ti mbi so mbi ye ti hinga Bible.” Me lâ oko lo gi ti fa Bible ni na Estelle ape. Tongaso Estelle ake ti gue na eglize. Lo kiri lo tene: “Akota zo ti eglize ni atokua mbeti na mbi, ala tene so tongana mbi ga na bungbi ape, mbi tokua gi nginza awe. Ye so mbi bâ ayeke so, ti ala, même tongana mbi gue na eglize ape, a sara ye ape; gi nginza ti mbi la ala ye.”

Angelina ayeke wali so aye tënë ti Nzapa mingi. Lo tene: “Na eglize ti mbi, na ngoi ti bungbi, a yeke hon na sakpa fani ota so e doit ti bi ye dä fani ota ni kue. Lakue a yeke hunda na e ti bi nginza. Ti mbi, mbi bâ so yingo ti Nzapa ayeke na eglize ni so ape.”

Na ndo so mo yeke dä, abungbi ti Nzapa ayeke sara kua na akode nde nde ti forcé azo ti bi nginza? Bible aye mara ti sarango ye ni so?

BIBLE ATENE TI LO NYEN?

Jésus, so lo la lo zia na sese bungbi ti aChrétien, atene: “Ala wara senge senge, ala mû na azo senge senge.” (Matthieu 10:8). A yeke kä tënë ti Nzapa kango ape; zo kue ayeke na droit ti wara ni.

A-Chrétien ti ândö asara tongana nyen ti wara nginza ti sara na kua ti Nzapa?

Lani, azo ni “amû ye tongana bê ti ala aye, na vundu pëpe, wala na forcé pëpe; teti Nzapa andoye zo so amû matabisi na ngia.” (2 aCorinthien 9:7, La Sainte Bible en sango). Bazengele Paul atene: “Tongana e yeke fa lani nzoni tënë ti Nzapa na ala, e sara kua bï na lâ si e ga mbeni nengo kungba na ndo ti mbeni zo na popo ti ala pëpe.” (1 aThessalonicien 2:9). Lani Paul aleke atente ti wara na nginza si lo sara na kua ti Nzapa.—Kusala 18:2, 3.

ATÉMOIN TI JÉHOVAH AYEKE SARA TI ALA TONGANA NYEN?

A-Témoin ti Jéhovah ayeke sara ka bungbi ti ala na yâ ti ada ti Nzapa ti ala so a iri ni Da ti Royaume. Ala yeke sara tongana nyen ti wara nginza ti sara na kua ti Nzapa? Ala yeke hon na sakpa ti tene a bi nginza dä ape, wala ala yeke tokua enveloppe na azo ape. Me zo kue so tënë ti Nzapa anzere na lo ayeke gue yeke ti bi nginza na yâ ti boîte so a zia ndali ti a-offrande na yâ ti Da ti Royaume ni.

Mbeti so na tïtî ti mo so, a hunda nginza ti tene a sigigi na ni nga a tokua ni na ando nde nde. Me lâ oko a yeke tene na mo pëpe so a kä ni kango. Kota ye ni ayeke ti tene azo ahinga tâ tënë so ayeke na yâ ti Bible.

Ti mo, ye so aTémoin ti Jéhovah ayeke sara so alingbi na tënë so Jésus atene fade so? A lingbi nga na ti so aChrétien ti ândö asara so?