MO HINGA?
Ândö, a yeke sara kua na atênë ti nekango na ye tongana nyen?
A yeke sara kua ândö na atênë ti nekango na ye ti sara na farine ti sarango na mapa. A yeke lani mbeni kua so awali ti da wala azo ti kua la ayeke sara ni lango oko oko. Kua ti nekango ye ayeke nga na popo ti akua so a yeke sara lani lango oko oko.—Exode 11:5; Jérémie 25:10.
Adessin nga na astatue so a sara na Égypte ti ândö afa tongana nyen la a yeke sara kua ni so. A yeke zia lê ti kobe ni so na ndo ti mbeni tênë, so yâ ni ayeke dû kete, so a yeke iri ka ni tênë ti nekango na ye. Zo ti nekango ye ni ayeke kpo genou ti lo na sese, na lo yeke gbu mbeni kete tênë ti nekango na ye ni na maboko ti lo use kue. Na pekoni, lo yeke zia kete tênë ni so na ndo ti lê ti kobe ni, na lo yeke gue na ni na devant lo kiri na ni na peko. Lo yeke sara tongaso juska lo neka yâ ti lê ti kobe ni kue. Mbeni mbeti atene, amara ti atênë ni so ane kilo 2 ti si na 4. Tongana a mû mara ti tênë ni so a bo na zo, a peut ti fâ zo.—aJuge 9:50-54.
Kua ti nekango alê ti kobe ayeke sara lani nzoni mingi na mbeni sewa. Ndali ni la si ndia ti Bible ake lani na zo ti gbu tênë ti nekango na ye na place ti bon. Deutéronome 24:6 (FD) atene: “A lingbi zo amû tênë ti nekango na ye wala tênë ti nekango ye na ndo ni ti bata na place ti bon ape, ndali ti so a yeke ye so grâce na ni zo ni ayeke te ye la.”
Tongana a sara tënë ti dutingo “nduru na kate” ti mbeni zo a ye ti tene nyen la?
Bible atene so Jésus ayeke na “libe [wala kate] ti Babâ”. (Jean 1:18, La Sainte Bible en sango). Tënë ni so aye ti fa kpengba songo nga na yengo tere so ayeke na popo ti Jésus na Nzapa. A ye ti fa ye so aJuif ayeke sara ka na ngoi ti tengo kobe.
Na ngoi ti Jésus lani, tongana aJuif aga ti te ye, ala yeke lango langongo na ndo ti acanapé so angoro table ti tengo ye ni. Ala yeke zia li ti ala na mbage ti table ni, ala zia gere ti ala na mbage ti peko, na ala yeke zia maboko ti ala ti wali na ndo ti kete coussin. Kode ti dutingo ni so asara si maboko ti ala ti koli angbâ senge. Mbeni mbeti atene so, so azo ti tengo ye ni kue alango langongo na ndo ti kate ti ala ti mbage ti wali, “zo so ayeke na devant ayeke zia li ti lo nduru na kate ti zo so ayeke na peko ti lo, na a yeke tene so ‘lo lango nduru na kate ti mba ti lo.’ ”
Ti lango nduru na kate ti babâ ti mbeni sewa wala ti zo so ayeke na li ti mbeni matanga ayeke lani ye ti yango iri wala mbeni pasa. Na ngoi ti ndangba Pâque so Jésus asara, bazengele Jean, so ayeke “disciple so Jésus andoye ka lo mingi”, alango nduru na kate ti Jésus. Ni la, na ngoi so Jean aye lani ti hunda mbeni tënë na Jésus, lo “ba na mbage ti peko na kate ti Jésus”.—Jean 13:23-25; 21:20.