Sara a-étude so ayeke gue na li ni
1 Ngoi na ngoi alingbi wafango tënë agbu li ti lo na ndo ti maïngo ti wamandango Bible ni. Hunda tere ti mo: Lo yeke leke ka ye ti manda ni kozoni? lo yeke diko ka aversê so a zia ni me a fa tënë ti yâ ni ape so? (Kus. 17:11; 1 aThes. 2:13). Lo yeke kiri tënë na lege ti atënë ti lo wani? atënë ti lo ni afa so lo ne atâ tënë ti Bible so lo yeke manda so? (Prov. 2:1-6).
2 Lo yeke fa na yâ ti tënë ti lo, bango ndo ti lo, na tambela ti lo so lo yeke bata afango ye ti Bible na ndo tënë ti nzoni sarango ye? (1 aCor. 6:9, 10). Lo yeke changé ambeni ye na yâ ti asarango ye ti lo? (aÉph. 4:22-24). Atâ tënë ti Bible so lo manda agbu bê ti lo? lo yeke sara tënë ni na asewa ti lo? azo ti place ti kua ti lo? wala na avoizin ti lo? (Luc 6:45). Tongana lo yeke na nzoni seni nga mbeni ye akanga lege na lo pëpe, lo yeke ga na abungbi ti congrégation? (aHéb. 10:23-25). Ayeke na lege ti aye nde nde so la e lingbi ti hinga wala wamandango Bible ni ayeke maï biani wala ‘na sarango ye na ngangu pëpe, lo yeda si a lu tënë ti Nzapa na yâ ti lo’.—Jacq. 1:21.
3 Zia a-étude so ague na li ni pëpe: Tongana mbeni wamandango Bible ague na li ni pëpe na peko ti so mo mû maboko na lo teti ngoi mingi, ayeke nzoni mo ngbâ ti buba ngoi ti mo senge senge pëpe gi ambeni zo so alingbi (Mat. 10:11-13). Na yâ ti ambeni ye, ayeke nzoni ti zia étude ni. Gonda lo teti aye so lo maï dä. Ye oko, fa na lo so ayeke nzoni ti tene zo asara ye ague oko na atâ tënë ti Bible so lo manda. Sara kusala na parabole ti Jésus ti zo ti lungo ye. Mo lingbi ti sara lisoro na lo na ndo ti amara ti sese osio so a fa ni, na fa tongana nyen tapande so aluti na ndo ti nene ti sarango ye alingbi na tënë ti Royaume so zo amä. Tongana lege ayeke dä mo lingbi ti tene tënë na lo na ndo ti aye so mo bâ. Sara tënë na lo na nzoni bê, me fa na lo kpale ni polele (1 aCor. 14:8, 9). Fa na lo so ala yeke kiri ande ti manda ye ni gi tongana lo gbian na lo sara aye so a hunda na lo so. Ngoi na ngoi, mo yeke ga ti bâ lo nga ti kpengba lo.
4 Tongana mo wara na yâ ti territoire ambeni zo so amanda Bible kozoni awe, a yeke nzoni mo gi ti hinga ala manda ye ni lani teti ngoi oke nga zo wa la a manda ye ni na ala. Ngbanga ti nyen ala zia lani mandango Bible ni? Tongana mo hinga ita so amanda Bible na zo ni lani, a yeke nzoni mo na lo nga na surveillant ti kusala asara lisoro na ndo ni kozoni ti kiri ti sara étude ni. Ambeni zo ayeke dä so a-ita nde nde a manda Bible na ala teti angu mingi ye oko ala gue na li lâ oko ape. A yeke nzoni e mû ngoi ti e teti azo so aye tâ tënë biani.