Bata ni

Salango a-étude so ayeke gue na li ni

A yeke wara na yâ ti supplément so bungbi ti angbongboro tënë kue ti molongo ti a-article so asigigi na yâ ti aKusala ti Royaume ti e na ndo salango a-étude so ayeke gue na li ni. A hunda na e kue ti bata supplément so na ti sala kusala na ni na ngoi so e yeke sala étude na mbeni zo. Na ndo ni, a lingbi ti gboto lê na ndo akota li ti tënë ti yâ ni na ngoi ti bungbi ti fango tënë. Asurveillant ti kusala alingbi nga ti mû ni tongana mbeni gunda ti tënë ti ala na ngoi so ala yeke sala vizite na agroupe ti mandango buku.

Kozo mbage ni: Étude ti Bible ayeke nyen?

Tongana lakue mo yeke sala ka alisoro na ndo Bible na yâ oko ti ambeti so a hunda ti manda na ni, atâa lisoro ni ayeke gi ndulu, a yeke mbeni étude ti Bible la mo yeke sala. A lingbi ti sû étude ni na ndo rapport tongana a sala ni fani use na peko ti so a fa na zo ni kapa ti mandango ye ni, nga tongana mo bâ so mbeni ye ayeke dä so amû lege na mo ti bâ so fade étude ni ayeke gue na li ni.​—km 7/04 l. 1

Ambeti so a sigigi na ni ti sala na a-étude

◼ Ye Wa Nzapa Ahunda na E?

◼ Hingango Ye So Ague na Fini ti Lakue Lakue

◼ Voro oko tâ Nzapa

◼ A lingbi ti mû brochure Mo Lingbi ti Duti Ndeko ti Nzapa! ti manda na azo so ahinga mbeti mingi pëpe wala so ahinga ti diko mbeti nzoni pëpe.

Use mbage ni: Lekengo tele ti sala a-étude

A lingbi e fa ye ni na mbeni lege so andu bê ti wamandango ye ni. Ye so ahunda ti bi bê na zo ni na ngoi so e yeke leke tele ti e.​—km 8/04 l. 1.

Tongana nyen ti leke tele

◼ Mû kete ngoi ti bâ li ti tënë ti chapitre wala ye ti manda ni, akete li ti tënë nga aye tongana afoto.

◼ Hinga mbilimbili akiringo tënë na ahundango tënë ti aparagraphe ni, na mo sû kamba na gbe ti angbongboro tënë ni.

◼ Mo soro aversê so a lingbi ti diko ni na ngoi ti mandango ye ni. Sû angbongboro tënë ti yâ ti aversê ni na tele ti aparagraphe ni.

◼ Leke ti sala mbeni ndulu tënë ti dango bê na hunzingo ti étude ni na ndo angbongboro tënë ti étude ni.

Fa ye si alingbi na zo ni

◼ Sambela Jéhovah na ndo ti wamandango ye ni nga na abezoin ti lo.

◼ Tara ti bâ kozoni ahundango tënë nga na atënë so peut-être lo lingbi ti wara kpale ti gbu nda ni wala ti yeda na ni.

◼ Hunda tele ti mo: Ye nyen lo yeke na bezoin ti hinga wala ti sala si lo gue na li ni na lege ti yingo? Mbi lingbi ti ndu bê ti lo tongana nyen?

◼ Ngoi na ngoi, mo lingbi ti bâ nene ti leke mbeni tapande, mbeni tënë ti fa na ndo ni wala ambeni hundango tënë ti mû maboko na zo ni ti gbu nda ti mbeni tënë wala versê.

Ota mbage ni: Sala kusala nzoni na aversê ti Bible

Ye so e yeke gi na yâ salango a-étude ayeke ti ‘sala adisciple’ na lege so e yeke mû maboko na azo ti hinga na ti yeda na afango ye ti Tënë ti Nzapa nga ti sala ye alingbi na ni (Mat. 28:19, 20; 1 aThes. 2:13). Tongaso, a lingbi mandango ye ni aluti na ndo aversê ti Bible.​—km 11/04 l. 4.

Fa ye alingbi na Tënë ti Nzapa

◼ Fa na wamandango ye ni tongana nyen ti wara ambilimbili versê tongaso na yâ Bible ti lo mveni.

◼ Gi ti bâ na ti sala lisoro na ndo aversê so afa gunda ti aye so e mä na bê dä.

◼ Hunda atënë. Ahon ti fa gi nda ti aversê ti Bible na wamandango ye ni, hunda na lo ti fa nda ni na mo.

◼ Sala ni na mbeni lege so akpengba pëpe. Gi ti fa pëpe atënë kue na ndo aversê na ngoi ti étude ni. Yôro na yâ étude ni gi ye so a hunda ti sigigi na nda ti tënë ni.

◼ Sala kusala nzoni na aye ni. Mû maboko na wamandango ye ni ti bâ tongana nyen aversê ni andu lo mveni.

Osio mbage ni: Fa na awamandango ye ti leke étude ni

Mbeni wamandango ye so adiko ye ti manda ni kozoni, asû kamba na gbe ti akiringo tënë ni na lo gbu li ti lo ti fa pekoni na lege ti atënë so alondo na bê ti lo ayeke gue na li ni hio mingi na lege ti yingo. Ni la, tongana mbeni étude aluti nzoni awe, leke legeoko na wamandango ye ni mbeni ye ti manda oko ti fa na lo tongana nyen lo lingbi ti sala ni. A lingbi ti duti nzoni ti leke legeoko na mingi ti ala so ayeke manda Bible mbeni chapitre kue wala mbeni ye ti manda oko kue.​—km 12/04 l. 1.

Sungo kamba nga na akete tënë

◼ Fa tongana nyen ti wara tâ kiringo tënë na ahundango tënë ni so a sû.

◼ Fa na wamandango ye ni buku ti mo so na yâ ni mo sû akamba gi na gbe ti akota tënë ni.

◼ Mû maboko na lo ti hinga so aversê so a fa tënë ti yâ ni pëpe ayeke gunda ti mbeni tënë na yâ ti paragraphe ni. Fa na lo ti sû akete tënë na tele ti aparagraphe ni na yâ ti mbeti ti lo.

◼ Kozoni si wamandango ye ni ato nda ti leke étude ti lo mbilimbili, a yeke nzoni ti tene lo bâ akota mbage ti ye ti manda ni. Aye tongana li ti tënë ti chapitre ni, akete li ti tënë ni na afoto so ayeke dä.

◼ Tene na lo so kozoni ti hunzi lekengo étude ni, a yeke nzoni ti mû ngoi ti kiri ti bâ akota tënë ti yâ ti ye ti manda ni.

Mbage oku ni: Bâ wungo ti aparagraphe so a lingbi ti manda ni

Wungo ti aparagraphe so a lingbi ti manda ni aluti na ndo ngangu ti gbungo nda ti ye nga na dutingo ti wamandango Bible ni me nga ti zo so ayeke fa ye na lo.​—km 1/05 l. 1.

Sala si mabe ti ala akpengba

◼ E ye pëpe ti sala gi gbâ ti aparagraphe na ti zia ye oko pëpe na yâ li ti wamandango ye ni.

◼ Mû ngoi kue ti tene mo mû maboko na wamandango Bible ni ti gbu nda ti ye ni na ti yeda na ye so lo yeke manda na yâ Tënë ti Nzapa.

◼ Mû ngoi mingi ti bi lê na ndo ti akota tënë ni na bâ akpengba versê so ayeke na gunda ti afango ye ni.

Gue kirikiri na ndo ambeni tënë pëpe

◼ Tongana mbeni wamandango Bible adiko tënë mingi na ndo aye so agbu bê ti lo mveni, zia e leke ti sala lisoro na ndo aye ni so na mbeni ngoi nde na peko ti étude ni.

◼ Sala tënë mingi mingi pëpe na ngoi ti étude ni. Mû ngoi mingi pëpe ti sala tënë ti aye so asi na mo wala na ndo ti anzene nzene tënë kue ti paragraphe ni. Ye so alingbi ti kanga lege na zo ni ti hinga akozo tënë ti Bible.

Mbage omene ni: Tongana mbeni wamandango Bible ahunda mbeni tënë

Tongana gere ti mbeni étude ti Bible aluti nzoni awe, a yeke lakue nzoni ti manda achapitre ni na peko ti tele ahon ti hulu na ndo ti ambeni. Salango tongaso ayeke mû maboko na wamandango ye ni ti wara mbeni nzoni hingango ye na ti gue na li ni na lege ti yingo.​—km 2/05 l. 6

Gi ti bâ nda ti ye nzoni

◼ A yeke nzoni ti kiri tënë na hundango tënë so ague oko na étude ni na lê ni lê ni.

◼ Tongana wamandango ye ni ahunda mbeni tënë so ague oko pëpe na étude ni wala so a hunda ti gi nda ti ye nzoni si a kiri tënë na ni, a lingbi ti duti nzoni ti bâ kiringo tënë ni na mbeni ngoi nde. A yeke nzoni ti sû ahundango tënë ti lo ni na mbeti.

◼ Tongana mbeni wamandango ye ayeke na kpale ti yeda na mbeni fango ye ti Bible, a lingbi ti duti nzoni ti bâ mbeni mbeti nde so afa nda ti tënë mingi na ndo ye so Bible atene na ndo ni.

◼ Tongana kiringo tënë ni agbu bê ti lo pëpe, bata tënë ni teti mbeni ngoi nde, ngbâ lakue ti sala étude ni.

Fa tâ be-ti-molenge

◼ Tongana mo hinga pëpe kiringo tënë na mbeni hundango tënë, fa pëpe atënë ti bê ti mo mveni na lo.

◼ Yeke yeke, fa na lo tongana nyen ti sala kusala na agbakuru nde nde so bungbi ti Jéhovah amû na e ti gi na nda ti atënë.

Mbage mbasambala ni: Sambela na ngoi ti étude ni

Ti tene mbeni zo ague na li ni na lege ti yingo, a lingbi lo wara deba nzoni ti Jéhovah. Tongaso, a yeke biani na lege ni ti to nda ni nga ti hunzi mbeni étude so gere ni aluti nzoni na sambela.​—km 3/05 l. 4.

Na ngoi wa e lingbi ti to nda ti sambela?

◼ E lingbi lakue ti sala tongaso gi na kozo salango étude na mbeni zo so aye tënë ti Nzapa mingi.

◼ Na ambeni wamandango Bible nde, e lingbi ti bâ mbilimbili ngoi wa alingbi ti tene e to nda ti étude ni na sambela.

◼ Mo lingbi ti sala kusala na Psaume 25:4, 5 nga na 1 Jean 5:14 ti mû maboko na wamandango ye ni ti bâ ngbanga ti nyen a yeke na lege ni ti sambela.

◼ Nga, sala kusala na Jean 15:16 ti fa nene ti sambela Jéhovah na lege ti Jésus Christ.

Aye wa e lingbi ti tene na yâ sambela ni?

◼ A yeke na lege ni ti gonda Jéhovah tongana Lingu ti fango ye.

◼ E lingbi ti sala atënë so afa na gigi tâ bingo bê ti e na wamandango Bible ni.

◼ Nga, e lingbi ti fa bê ti kiri singila ti e na bungbi so Jéhovah asala kusala na ni.

◼ Na yâ sambela ni, hunda deba nzoni ti Jéhovah na ndo angangu so wamandango ye ni ayeke sala ti sala ye alingbi na aye so lo yeke manda.

Mbage miombe ni: Gango na awamandango Bible na yâ bungbi ti Jéhovah

Ye so e zia na gbele e na ngoi so e yeke sala étude na ambeni zo ayeke gi pëpe ti fa na ala atënë ti mabe me nga ti mû maboko na ala ti ga na yâ kongregation ti aChrétien. Ni la, yenga oko oko na ngoi ti salango étude, e mû apenze-ngbonga kete ti sala tënë na ala na ndo bungbi ti Jéhovah.​—km 4/05 l. 8.

Abungbi ti kongregation

◼ Fa na ala abungbi ti kongregation oko na oko kue. Gi na kozo salango étude ti Bible na ala, tisa ala ti ga na abungbi.

◼ Fa na ala akota tënë so a fa ni na abungbi so ahon.

◼ Tongana Mémorial, akota bungbi nga na vizite ti surveillant aga ndulu, mû apenze-ngbonga kete ti fa ni na ala na ti maï nzara ti ala tënë ti aye so a leke ni.

◼ Sala kusala na afoto so ayeke na yâ ti abuku ti e ti mû maboko na ala ti bâ aye so e yeke sala na abungbi.

◼ Hunda na ala ti diko brochure A-Témoin ti Jéhovah: Ala Yeke Azo Wa? Ala Mä na Bê na Nyen?

Akasete vidéo so afa ye na zo

◼ Les Témoins de Jéhovah: un nom, une organisation

◼ Toute la communauté de nos frères

◼ Unis grâce à l’enseignement divin

◼ Jusqu’aux extrémités de la terre

Mbage gumbaya ni: Lekengo ala ti fa tënë na alege kue so azi

Tongana azo so ayeke manda Bible ato nda ti fa na gigi mabe na yâ ye so ala yeke manda, ye so ayeke pusu ala ti sala tënë ni.​—km 5/05 l. 1

Mû maboko na ala ti fa tënë

◼ Peut-être lo yeke na ambeni kamarade nga ambeni sewa so lo lingbi ti tisa ala ti ga ti duti na yâ ti étude ni.

◼ Hunda lo wala ambeni mba ti lo ti kua, akamarade ti lo ti ekole wala ambeni zo so lo hinga ala afa na gigi nzara ti mä nzo tënë.

Fango tënë ti mabe ti ala

◼ Na ambeni ngoi so mo soro ni nzoni, hunda wamandango ye ni: “Tongana nyen mo lingbi ti sala kusala na Bible ti fa tâ tënë so na azo ti sewa ti mo?”

◼ Mû maboko na lo ti hinga nene ti sala ye na yekiango ndo nga na be-nzoni na ngoi so lo yeke sala tënë na amba ti lo na ndo Jéhovah nga na ndo aye so Lo leke ti sala.

◼ Awamandango ye ni alingbi ti sala kusala na brochure A-Témoin ti Jéhovah: Ala Yeke Azo Wa? Ala Mä na Bê na Nyen? ti mû maboko na akamarade nga na azo ti sewa ti ala ti gbu nda ti atënë ti mabe ti e nga na asalango ye ti e so gere ni alondo na yâ ti Bible.

Mbage bale-oko ni: Fa na wamandango ye ni ti fa tënë da na da

Na ngoi so a-ancien abâ so mbeni wamandango Bible alingbi ti ga wafango tënë so ade ti mû batême pëpe, lo lingbi ti to nda ti fa tënë legeoko na kongregation.​—km 6/05 p. 1

Leke ye ni na lo legeoko

◼ Fa na wamandango ye ni ndo so lo lingbi ti wara akode ti fango ye dä.

◼ Mû maboko na lo ti soro mbeni kode so akpengba pëpe, so alingbi biani na territoire ni.

◼ Wa lo ti sala kua na Bible na yâ fango tënë ti lo.

◼ Mo na lo amanda ni. Fa na lo tongana nyen ti kiri tënë na kode na atënë so azo ayeke hunda ni ka.

I fa tënë legeoko

◼ Zia si lo bâ tongana nyen mo yeke fa ye so mo na lo kue aleke fade legeoko.

◼ Girisa pëpe salango ye ti wamandango ye ni nga na akode ti lo. Na yâ ti ambeni ye, peut-être a yeke nzoni fini wafango tënë ni afa gi mbage ti tënë ni.

◼ A yeke nzoni ti mû maboko na fini wafango tënë ni ti zia na sese mbeni kapa ti fango tënë lakue.

Mbage 11 ni: Leke afini wafango tënë ti kiri ti bâ azo

Lekengo tele ndali ti mbeni fini vizite ato nda ni na kozo tingbingo na zo ni. Wa fini wafango tënë ni ti mû bê ti lo kue na azo so lo yeke sala tënë na ala. Fa nga na lo ti dengi mê na tënë ti ala nga ti sû na mbeti atënë so agbu bê ti azo ni.​—km 7/05 l. 1.

Lekengo tele ti kiri

◼ Sala lisoro na ndo kozo vizite ni. Na pekoni, fa na wamandango ye ni ti soro mbeni tënë oko so ayeke nzere na bê ti azo so lo yeke fa tënë na ala.

◼ Mo na wamandango ye ni aleke legeoko mbeni ndulu tënë so na yâ ni a sala kusala na versê oko ti Bible nga na mbeni paragraphe ti mbeti so e fa na azo.

◼ Ala leke nga mbeni tënë so a lingbi ti hunda ni na hunzingo ti lisoro ni.

Kiri lakue ti bâ azo ni

◼ Wa fini wafango tënë ni ti kiri hio ti bâ azo kue so asala nzara ti tënë ni.

◼ Fa na lo so ti wara azo na yanga-da ti ala, a lingbi ti hunda ti tene lo kiri fani mingi.

◼ Fa na wamandango ye ni tongana nyen ti mû rendez-vous na zo. Fa nga na lo so a yeke kota ye ti kiri ti bâ zo ni.

Mbage 12: Leke ala ti to nda ti a-étude na ti ngbâ ti sala ni

A yeke kota ye teti mo ti haka peko ti salango ye ti Jésus na lege so mo zia tapande na fango tënë. Tongana mbeni zo so mo manda Bible na lo abâ pendere tapande ti mo na yâ fango tënë, lo lingbi ti bâ so nda ni so a hunda ti kiri ti sala avizite ayeke ti to nda ti mbeni mandango Bible na azo.​—km 8/05 l. 1.

Lege ti tisa azo ti manda Bible

◼ Fa na wamandango ye ni so a yeke kota ye pëpe ti gbu oko ngoi ni so ti zi yâ ti anzene nzene tënë kue na ndo étude ni.

◼ Mingi ni, nzoni kode ni ayeke ti sala lisoro na ndo ti mbeni paragraphe oko wala use ti mbeti so lo ye ti manda na zo ni.

◼ Kiri mo dabe ti wamandango ye ni na ndo mbeni kode ti to nda ti a-étude. Mo na lo amanda ni.​—km 8/05 l. 8; km 1/02 l. 6.

Fa na awamandango ye ni ti ga awafango ye

◼ Wa awamandango ye ni ti zia iri ti ala na Ekole ti Kusala ti a-Chrétien.

◼ Tisa afini wafango tënë ti sigigi na mo ti sala a-étude. Tongaso, ala lingbi ti sala andulu tënë na ndo mbeni paragraphe.