E leke tere ti e nzoni ti fa ye na azo
1. Tongana e yeke manda Bible na mbeni zo, ngbanga ti nyen ti sara kue ti tene zo ni abâ na nene ni tënë so lo yeke manda?
1 Tongana e yeke manda Bible na mbeni zo, a lingbi e leke tere ti e nzoni tongana e ye ti pusu lo ti sara na Jéhovah. A lingbi e sara kue ti tene wamandango ye ni abâ na nene ni tâ tënë so lo yeke manda na yâ ti Mbeti ti Nzapa. Sarango tongaso ayeke mû ngangu na lo (Deut. 6:5; aProv. 4:23; 1 aCor. 9:26). Na lege wa e lingbi ti sara ni?
2. Sambela amû maboko na e ti leke tere ti e nzoni tongana nyen?
2 Sambela kozoni si mo leke tere ti mo: Teti so ayeke Jéhovah si ayeke sara si lê ti tâ tënë amaï na yâ ti bê ti wamandango ye ni, a yeke na lege ni ti to nda ti leke mandango ye ni na sambelango ndali ti wamandango ye ni nga ndali ti aye so atia lo (1 aCor. 3:6; Jacq. 1:5). Mara ti sambela tongaso alingbi nga ti mû maboko na e ti bâ tongana nyen e lingbi ti mû maboko mingi na zo ni si bê ti lo asi na “tâ hingango ye” ti ye so Jéhovah aye.—aCol. 1:9, 10.
3. Tongana nyen e lingbi ti leke tere ti e na bingo bê na wamandango ye ni?
3 Bi bê na wamandango ye ni: Jésus ahinga so ti tene lo fa ye nzoni na awamango lo, a lingbi lo bi bê na ala. Lege use tongaso, azo ahunda Jésus na oko tënë: “Wafango ye, nyen la mbi yeke sara ande ti wara fini ti lakue lakue?” Lakue so lo kiri tënë, lo sara ni na akode nde nde (Luc 10:25-28; 18:18-20). A yeke nzoni e bi bê na wamandango ye ni na ngoi so e yeke leke tere ti e. Aversê wa so a fa tënë ti yâ ni pëpe e ye ti diko ni ande na lo? Paragraphe oke e lingbi ti manda ni ande na lo? Atënë wa na yâ ti mbeti ni alingbi ti duti ngangu na wamandango ye ni ti gbu nda ni na ti yeda na ni? Tongana e pensé kozoni na ambeni tënë so wamandango ye ni alingbi ande ti hunda na e, fade e yeke duti nduru ti kiri tënë na tâ lege ni.
4. Nzoni lekengo tere andu nyen?
4 Kiri mo bâ mbeti ni: Atâa lege oke so e manda mbeti ni kozo na azo, ti lo so e yeke gue ti manda na lo a yeke ti kozoni la. Tongana e ye ti ndu bê ti lo, a yeke kota ye ti leke tere nzoni. So ti tene e nga e sara ye so e wa zo ni ti sara. Kiri mo bâ mbeti ni, aversê so a fa atënë ti yâ ni pëpe, na bingo bê na wamandango ye ni, wala peut-être mo sû kamba na gbe ti angbongboro tënë ni.—aRom. 2:21, 22.
5. Tongana nyen e lingbi ti sara tongana Jéhovah?
5 Jéhovah abi bê mingi na maïngo ti zo oko oko so ayeke manda Bible (2 Pi. 3:9). Na mungo ngoi ti leke tere nzoni teti mandango Bible oko oko, e yeke fa na gigi mara bingo bê ti ndoye so Jéhovah ayeke na ni.