Lege ti mandango Bible na da ti azo

¹ Nzoni lege ti mû li ni na yâ mbeni étude ti Bible na da ti azo ayeke so wa? Akpengba tapande wa e yeke na ni? Tongana nyen a lingbi a bâ aversê so ayeke na yâ ye ti manda ni? A lingbi zo wa adiko aparagraphe ni? Nde na kode so e yeke mû ka li ni na mandango Bible na da ti azo, a hunda ti kiri ti sala nyen ti mû maboko na wamandango ye ni ti sala si tâ tënë agbu bê ti lo? A lingbi a kpe akpale wa?

² Lege ti mû li ni na étude: Mingi ni, mandango Bible na da ti azo ayeke tambela legeoko tongana Mandango Tour ti Ba Ndo. Kozoni, a yeke diko paragraphe so a ye ti manda ni. Na pekoni, zo so amû li ni ayeke hunda atënë so a sû na lembeti teti paragraphe ni so, na lo zia lege na wamandango ye ni ti kiri tënë. Tongana wamandango ye ni angbâ ti gi bê ti lo, a lingbi zo so amû li ni aleke tele nzoni ti hunda na lo ambeni tënë ti fa lege, so fade apusu wamandango ye ni ti gbu li nzoni na ndo kota tënë ni, na ti si na mbilimbili nda ti tënë ni.

³ Bâ tongana nyen aversê ni andu tënë ti yâ ti paragraphe ni. Fa na wamandango ye ni tongana nyen ti hinga aversê so a fa tënë ti yâ ni, na fa na lo tongana nyen si andu tënë ni. Tongana a fa ambeni versê sân ti fa atënë ti yâ ni, a yeke nzoni ti diko ni na yâ Bible, tongana ayo mingi pëpe. Na pekoni, mû lege na wamandango ye ni ti diko aversê ni na ti fa tongana nyen a mû maboko na ye so a tene na yâ paragraphe ni, wala na lege wa a sala si aga polele.

⁴ Mû maboko na wamandango ye ni ti sala si tâ tënë agbu bê ti lo: Wa awamandango ye ni ti leke tele kozoni nzoni teti étude ni. Luti mingi ti fa na ala so dikongo mbeti ayeke kota ye na yâ mandango ye. A yeke duti nzoni mingi tongana wamandango ye ni adiko ye ti manda ni, na lo gbu li na ndo ni mingi. Ambeni ita ayeke zia wamandango ye ni adiko aparagraphe kue na ngoi ti mandango Bible ni. Ti ambeni nde, ala na wamango ye ni ayeke diko paragraphe ni na peko ti mba. A lingbi a bâ yâ ti tënë ni nzoni, na girisango pëpe guengo na li ni ti wamandango ye ni na lege ti yingo.

⁵ Ti manda ye ni tongana ti so ayeke sala na ekole alingbi ti mû maboko na wamandango ye ni ti hinga ye, me lo mä na bê na ye so lo yeke manda? Tongana lo ye ti sala si tâ tënë agbu bê ti lo, a lingbi mo bâ tongana nyen ye ti manda ni andu lo mveni. Tënë ti bê ti lo ayeke so wa na ndo ye so lo yeke manda? Na lege wa lo lingbi ti sala kusala na ye so lo yeke manda? Hunda atënë so yâ ni ane ti ndu bê ti wamandango ye ni.

⁶ Kpe ambeni kpale: Ambeni kpale ayeke dä so a lingbi a kpe ni na ngoi ti mandango Bible na zo. Tongana ambeni kota tënë asigigi, so andu pëpe ye so a yeke manda, mingi ni a yeke nzoni ti sala lisoro na ndo ni na nda ti étude ni, wala na mbeni ngoi nde. Nga, a yeke nzoni ti zia wamandango ye ni akiri tënë na lege ti atënë ti lo mveni, ahon ti diko gi na yâ buku ni. Salango tongaso ayeke mû ande maboko na mo so mo yeke mû li ni na étude ni, ti bâ wala wamandango ye ni agbu nda ti tënë ni.

⁷ Ngbanga ti nyen pëpe ti zia na gbele mo ti sala kamême étude ti Bible oko? A yeke ngangu pëpe tongana mo zia bê ti mo kue na ndo Jéhovah, na mo sala ni legeoko na kode ti Mandango Tour ti Ba Ndo. Mbeni lege so ayeke nzoni ahon atanga ni kue ti fa tâ tënë na azo na ti sala adisciple ayeke ti mû li ni na mbeni étude ti Bible na da ti azo. Na salango tongaso, mo lingbi nga ti wara ngia so aga na lege ti mungo mbage kue na yâ batango komandema ti Jésus na Matthieu 28:19, 20.