Tongana nyen ti leke tele nga ti mû li ni na yâ amandango Bible
1. Jésus amû yanga na adisciple ti lo ti fa nzo tënë na ti ‘sala adisciple’ (Mat. 24:14; 28:19, 20). Ti manda Bible na azo na yanga-da ayeke tâ lege ti sala adisciple so alë lengo. Teti kota kusala so ayeke mbage ti vorongo ti e, a lingbi e sala ye na ngangu ti e kue tongana e yeke leke tele ti e ti mû li ni na yâ amandango Bible.
2. Lekengo tele kozoni: Ti leke tele ti mû li ni na yâ mandango Bible andu ye mingi ahon gi dikongo ye ti manda ni nga bango aversê so afa tënë ti yâ ni pëpe. Ti ndu bê ti wamandango ye ni, a hunda ti tene e fa atënë ni na mbeni lege so ayeke pusu lo ande ti sala ye.
3. Kozoni, a lingbi e mveni e gbu nda ti atënë ni nzoni. A hunda ti tene e hinga na lege wa aversê oko oko kue andu aparagraphe ni nga na wamandango ye ni. Sungo kamba na gbe ti akota tënë ni ayeke mû maboko na e ti dabe na ni. A lingbi e gi ti hinga akota tënë ti ye ti manda ni nga e gbu li na ndo lege so e lingbi ti fa ni na wamandango ye ni. Na ndo ni, e gi ti hinga nga ndo so hingango ye ti wamandango ye ni na ndo Bible asi dä, ando so lo yeke na kpale dä ti yeda na ambeni tënë, mbage so a hunda ti tene lo leke si dutingo ti lo ti Chrétien aga nzoni ahon ti kozo, nga na ambeni ye. E lingbi ti hunda tele ti e: ‘Tongana nyen mbi lingbi ti sala kusala na tënë ni nga na aversê so ayeke na yâ ye ti manda ni ti mû maboko na lo ti gue na li ni?’ Ngoi na ngoi, a yeke kota ye ti gi ambeni ye na ndo ni. Tongana e ye si wamandango ye ni awara biani ye ti nzoni, a hunda ti tene e leke tele ti e nzoni.
4. Mbeni ye so ayeke kota tongana e yeke leke tele ti e teti mbeni mandango Bible ayeke ti sambela Jéhovah. E sala tënë polele na yâ sambela ti e teti zo ni nga na aye so atia lo. E hunda na Jéhovah ti mû maboko na e ti ndu bê ti lo.—1 aCor. 3:6.
5. Mandango Bible ni: Ti mû maboko na mbeni zo ti sala si tâ tënë aga ye ti lo mveni, a hunda ti tënë e sala ngangu. Mandango atënë ni gi senge tongaso alingbi ti mû maboko na zo ni ti wara hingango ye, me lo mä na bê biani na ye so lo yeke manda? E mû maboko na wamandango ye ni ti bâ na lege wa atënë ni andu lo mveni nga ye wa alingbi lo sala na ye so lo manda awe.—aCol. 3:10.
6. E kpe gbanda so ayeke ti sala si lisoro ni angoro na ndo ti atënë so kamba ayeke pëpe na popo ni na tënë so e yeke manda. A lingbi ti sala ni na peko ti mandango ye ni wala na mbeni ngoi nde. A yeke nga kota ye teti wamandango ye ni ti kiri tënë na lege ti atënë ti lo mveni ahon ti diko ni gi na yâ buku ni. So ayeke mû maboko na e ti hinga wala lo gbu nda ti tënë ni wala pëpe.
7. Mbeni nzoni wafango ye ayeke luti mingi na ndo akota tënë ni si wamandango ye ni alingbi girisa ni ande pëpe. Jésus asala lani tongaso na hundango atënë so andu tâ gunda ti tënë ni na so apusu zo ti gbu li (Mat. 16:13-16; 17:24-27). Ahundango tënë ni ayeke mû gi maboko na e pëpe ti hinga biani so wamandango ye ni agbu nda ti ye ni, me ayeke fa nga na e ye so ayeke na yâ bê ti lo. Jésus asala nga lani kusala na atapande so akpengba pëpe ti mû maboko na awamango lo ti gbu li na ndo ye so lo yeke tene.—Mat. 13:31-33; 24:32, 33.
8. A lingbi mo yôro akota versê na yâ atënë ti dango bê na hunzingo ti mandango ye ni. Sala kusala na ahundango tënë so ayeke mû lege na mo ti bâ tongana nyen wamandango ye ni ayeke bâ ye so lo manda, nga gboto lê na ndo tongana nyen lo lingbi ti sala kusala na ye so lo manda. Na tongo nda ti mandango ye ti peko, kiri mo sala kete dango bê na ndo akota tënë ni tongana a hunda ti sala ni.
9. E yeke leke azo ti duti awakua ti Jéhovah. A yeke mbeni matabisi nga mbeni kota kungba. Mo lingbi ti leke kode ti fango ye ti mo so andu amandango Bible na azo ti ga nzoni ahon ti kozo? E lingbi ti sala ye kue so ayeke na ngangu ti e tongana e leke tele ti e nga e mû li ni na yâ amandango Bible.—1 Tim. 4:15, 16.