“Kusala ti I Ayeke Senge Pepe”
1 So tâ tene ti mungo wâ! Kusala ti mo teti Jéhovah ayeke senge pepe. (1 aCor. 15:58) Nde na ni, gbu li na ndo kusala so mingi ti azo ayeke sala: ala bi tele ti ala kue ti maï dutingo ti ala na nzoni ndo na gbele azo wala dutingo ti ala na lege ti mosoro. Ambeni ayeke bi tele na yâ akota mandango mbeti teti angu mingi wala ala yeke sala kusala tongana angba ti wara amosoro. Ye oko, gi “ngoi na ye so zo aku pepe” alingbi awe ti kanga lege na ala ti tene ala wara lâ oko pepe yango iri so ala yeke gi, wala ti tene ala duti gi na ye so ayeke kete mingi ahon so ala ye fade ti wara na lege ti mitele. Angangu so ala sala ayeke senge, tongana “tombango pupu.” (Zo-ti. 1:14; 9:11) A yeke pepe nzoni ahon ti wu na yâ oko kusala so ayeke ye senge pepe, me a yeke na mbeni ngele so aninga?
2 Kusala so ayeke tâ kota ye biani: Kusala ti fango nzo tene ti Royaume ti Nzapa ayeke kusala ti kota ahon so a yeke sala na ndo sese. A yeke kusala so a lingbi a sala, atä azo amä ni wala pepe. E ye ti wara lege ti tene legeoko na Paul: “Ngbanga ti mênë ti zo oko ayeke na li ti mbi pepe, teti mbi ke pepe ti fa na i wango-tene kue ti Nzapa.”—Kus. 20:26, 27.
3 Tongana azo amä tokua ti Royaume na akamata ni na bê ti ala, e yeke na ngia. Na tapande, mbeni pendere wali aglisa omba ti lo. Lo yeke hunda tele ti lo na ndo so omba ti lo ni ayeke dä: na yayu wala na enfer? Lo sambela Nzapa ti mu maboko na lo na hiringo Lo na iri ti Lo, Jéhovah, tongana ti so ita ti lo ti wali afa ni lâ ni na lo. A ninga pepe, lo to nda ti manda Bible nga ti ga na abungbi. Bango ndo ti lo na ndo fini ato nda ti gbian, na lo kaï songo na asioni kamarade so lo yeke tambela na ala. Lo zia lege ti nyongo manga, mbangi na ti nzi. Lo tene: “Gi ndoye teti Jéhovah si amu lege na mbi ti zia sioni tambela tongaso. Tongana Jéhovah na kota be-nzoni ti Lo ayeke dä pepe, ka mbi wara pepe beku ti fini ti lakue lakue.” Fadeso, wali so ayeke mu fini ti lo pepe na tombango peko ti aye senge.
4 Même tongana azo ake ti mä tene ti e, e yeke sala mbeni ye so aga na nzoye. Kozoni, ala hinga so aTémoin ti Jéhovah asala vizite na ala. Nga na mbage, e yeke fa na gigi dutingo be-ta-zo ti e, be-biani ti e na ndoye ti e. Tongaso, kusala ti e na yâ Seigneur ayeke senge? Oko pepe!