A Kanga Lege na Fango Tene?
1 Azo mingi ayeke na fini so aye asi singo dä. A-Témoin ti Jéhovah ayeke na popo ti azo so ayeke na gbâ ti aye ti sala: ti manda Tene ti Nzapa, ti gue na abungbi ti kongregation, na ti mu mbage ti ala na kusala ti fango tene. Nga, e yeke na aye mingi ti sala na yâ kua ti nginza ti e, kua ti da wala na ekole, nga na ambeni kungba mingi, so kue amu ngoi. Ye so ayeke biani mbeni kpale teti abeli ti sewa.
2 Ndali ti tene ti konomi so aga ngangu na ando nde nde, a lingbi ti hunda na abeli ti sewa ti sala kua teti angbonga mingi nga ngangu ti wara nginza ti bata na sewa ti ala. Tongana akpengba kua ti nginza amu mingi ti angoi na ti ngangu ti ala, a ngbâ na ala gi kete ngoi teti fango tene. Teti so ala yeke na kungba ti mu aye ti mitele na asewa ti ala, ambeni alingbi ti ba so ala lingbi ti mu mbage ti ala mingi pepe na kusala ni. (1 Tim. 5:8) Biani, laso akpale ayeke mingi ti wara aye so a hunda ti bata tele na fini. Me a lingbi kua ti nginza ti mbeni zo aga pepe mbeni ye so akanga lege na kusala ti fango nzo tene. (Marc 13:10) Tongaso, a lingbi e gi ti ba dutingo ti e ti laso.
3 Teti so ye ti sese ayeke gbian lakue, mbeni mokonzi ti sewa alingbi ti duti ndulu ti mu ngoi mingi na ndo ti kusala ti lo, na bibe ti kono nginza so lo bata na mbage teti akpale so alingbi ti si fade fade. (1 aCor. 7:31) Atä salango kua ti nginza mingi ahon alingbi ti sala si zo aba atene lo wara aye ti mitele mingi ahon wala alege nde nde ti hu tele na ti sala ngia, fade ye so alingbi ti mu ngia nga na nzerengo tele mingi ahon tongana a sala ni na place ti ngoi so a mu teti kusala ti yingo nga teti guengo lakue na bungbi? E ye biani ti kpe ye kue so alingbi ti sala sioni na dutingo ti e na lege ti yingo. Batango wango ti Jésus ti ‘bungbi mosoro na yayu’ na ti duti na “mosoro na gbele Nzapa” ayeke salango ye na ndara.—Mat. 6:19-21, NW; Luc 12:15-21.
4 Gi aye ti Royaume kozoni: Jésus afa na adisciple ti lo ti zia aye ti yingo kozo na tanga ti aye kue. Lo wa ala na ngangu: “I gi bê ti i pepe, na i tene pepe, Fade e te nyen? wala, Fade e nyon nyen? wala, Fade e yü bongo ti nyen?” Ngbanga ti nyen lo sala tene tongaso? Lo fa nda ni: “Teti . . . Babâ ti i na yayu ahinga i ye ye so kue.” Tongana e zia biani bê ti e na ye so, fade mbeni ye oko pepe ayeke kanga lege na e ti sala ye so Jésus atene na pekoni: “Tongaso, i ngbâ lakue ti gi royaume na mbilimbili ti lo kozoni, na fade a mu na i tanga ti ye so kue [aye so a hunda ti bata na fini] nga.” Nzapa ayeke ba lege ni! (Mat. 6:31-33, NW) A yeke biani ngoi pepe ti gi bê ti e ahon ndo ni teti warango nginza ti bata na fini wala nzala ti wara aye mingi na yâ bungbi ti aye so aga ndulu ti hon.—1 Pi. 5:7; 1 Jean 2:15-17.
5 Kozo nda ti kua ti nginza ayeke ti mu aye ti mitele so atia mbeni zo. Me aye ni so ayeke nyen? Bazengele Paul asû na mbeti: “Tongana e yeke na kobe na bongo, fade e duti na ngia na aye so.” E yeke gi ti wara ye mingi ahon so? Tongana a yeke tongaso, e lingbi ti ko aye ti pekoni so Paul agboto mê na ndo ni: “Ala so aleke na bê ti ala ti ga wamosoro atï na yâ handa, na yâ son, nga na yâ ti asioni nzala mingi ti buba, so abi azo na yâ ti futingo nga na yâ ye so afuti.” (1 Tim. 6:8, 9, NW; Mat. 6:24; Luc 14:33) Tongana nyen e lingbi ti hinga so salango nzala ti aye mingi ayeke kanga lege na e?
6 Tongana ndali ti tombango peko ti aye ti mitele e mu mbage ti e gi kete na kusala ti fango tene wala e ba pepe nene ti gbanzi aye na tele ti e teti aye so andu nzo tene, a lingbi e leke fadeso aye so e zia na kozo ndo. (aHéb. 13:15, 16) Mbeni fini so ayeke na ye mingi pepe ayeke mu maboko mingi ahon ti lungula ye so akanga lege na kusala ti e ti fango tene. A lingbi aye so andu Royaume aduti lakue kozo ye tongana a yeke tene ti salango kusala na ngoi nga na ngangu ti e.
7 Kusala so ayeke senge pepe: Atene ti Paul awa e ti “wu na kusala ti Seigneur lakue, teti [e] hinga kusala ti [e] ayeke senge pepe na yâ Seigneur.” (1 aCor. 15:58) Kozo “kusala ti Seigneur” ayeke kusala ti fango tene ti Royaume na ti salango adisciple. (Mat. 24:14; 28:19, 20) Ti mu mbage mingi na ni, a lingbi e leke ngoi teti kusala ti fango tene yenga oko oko na e sala kue ti mu ngoi ni pepe teti ambeni ye nde. (aEph. 5:15-17) Tongaso, kua ti nginza wala mbeni ye nde ayeke kanga ande lege pepe na kusala ti e.
8 Tongana e mu tele ti e na yâ kangbingo tâ tene ti Bible na azo, e yeke wara ngia ti kota ahon so aga na lege ti mungo ye. (Kus. 20:35) Na salango lakue kusala ti fango tene, e lingbi ti ba kekereke na beku, “teti Nzapa ayeke kirikiri pepe si Lo lingbi glisa kusala ti [e], ndoye so [e] fa giriri teti iri ti Lo.”—aHéb. 6:10.