Ndoye Apusu E ti Fa Tene
1 So e yeke aTémoin ti Jéhovah, a hinga e nzoni tongana awafango tokua ti Royaume so ayeke na wâ. (Mat. 24:14) Azo ahon kutu omene ayeke fa tene na ndo sese kue; afini zo aga na ndo ni tongana ala bungbi na e na yâ fango tene. A diko awungo so na lege ti mungo mbage ti azo na yâ kusala so.
2 Ye nyen apusu e ti mu tele ti e na bê kue na mara ti kota kusala tongaso? A pusu e na ngangu pepe, nzala ti wara mosoro, wala ti wara kota yekiango ndo agbu bê ti e pepe. Kozoni, mingi ti e ayeke la ni na mbito teti e ba so e lingbi oko pepe, na mingi ni kiringo tene ti azo ayeke la ni nzoni pepe. (Mat. 24:9) Azo mingi so ayeke ba e ahinga nzoni pepe ye so apusu e ti sala kua so. A lingbi e duti na mbeni ngangu nda ti ye ti ngbâ ti sala ni.
3 Ngangu ti ndoye: Jésus afa komandema so ayeke kota ahon tanga ti akomandema kue tongana lo tene ‘a lingbi e ndoye Seigneur Nzapa ti e na bê ti e kue, na âme ti e kue, na bibe ti e kue, na ngangu ti e kue!’ (Marc 12:30) Ndoye ti e teti Jéhovah aluti ngangu na ndo atene ti bê ti kiri singila so e yeke na ni na mbage ti lo teti zo so lo yeke na ye so lo yeke: Kota Gbia Ahon Kue, Wasalango aye kue, so ‘alingbi ti wara gloire na yango-iri na ngangu.’ (Apoc. 4:11, NW) Mbeni ye oko alingbi pepe na apendere lengo ti lo.—Ex. 34:6, 7.
4 Ti hinga Jéhovah na ti ndoye lo apusu e ti zia si lumière ti e aza na gbele azo. (Mat. 5:16) Lumière ti e aza tongana e sepela lo na gbele azo, e sala tene ti apendere kusala ti lo, na e kangbi na azo tokua na ndo Royaume ti lo. Legeoko tongana ange so ayeke na bê ti yayu, e yeke “na nzo tene ti lakue lakue ti fa tongana nzo-sango . . . na amara kue, akete mara kue, ayanga kue, na azo nde nde kue.” (Apoc. 14:6, NW) Ndoye ti e ayeke ngangu so ayeke na gunda ti kusala ti fango tene na ndo sese kue.
5 Sese aba fango tene ti e tongana “ye ti buba” so a lingbi a dengi mê na ni pepe. (1 aCor. 1:18) A sala angangu na ndo kue ti kaï kusala ti e. Ndoye ti e so ayeke be-biani amu ngangu na e ti tene, legeoko tongana abazengele atene: “E lingbi ti zia pepe ti sala tene ti aye so e ba na e mä. . . . A lingbi e mä yanga ti Nzapa tongana mokonzi ahon ti mä azo.” (Kus. 4:20; 5:29, NW) Kusala ti fango tene angbâ ti wu na ambage kue ti sese atä akangango lege.
6 Ndoye ti e teti Jéhovah ayeke tongana wâ so agbi na yâ e so apusu e ti fa na ndo kue anzoye ti lo. (Jér. 20:9; 1 Pi. 2:9) Fade e yeke ngbâ ti “fa kusala ti Lo na popo ti azo, . . . teti Lo sala ye ti nzoni mingi.”—Es. 12:4, 5.