Lekengo Ye Kozoni: Teti Nyen?
1 E kue e bi bê ti e na aye so e leke teti kekereke. Ala so ayeke na beku ti sese ayeke ku ti duti na fini lakue lakue na yâ fini sese ti Nzapa so mbilimbili ayeke duti dä. Me angangu ayeke dä so alingbi ti zi beku so na yâ bê ti mbeni zo. A hunda ti sala lakue ngangu ti ngbâ ti kpengba fini ti e na ndo aye so andu Royaume, pepe ti zia lege na anzala ti mitele so ahanda zo ti hon na e yongoro.—1 Jean 2:15-17.
2 Azo ti sese alingbi oko pepe ti gbu nda ti anzala ti azo so abi bê na aye ti yingo. (1 aCor. 2:14) Na ngoi so ambeni zo ayeke tiri ti wara kota iri, ngangu, wala mosoro, e yeke sala ngangu ti wara amosoro ti yingo. (Mat. 6:19-21) Tongana e tara ti leke bibe ti e ti lingbi na bango ndo ti sese so na ndo kekereke, fade e yeke wara mbeni lâ aye ti yingo so e zia na gbele e? Fade na yâ ngoi kete aye ti sese so ayeke gbu bê ti e kue. E lingbi ti kanga lege na ni tongana nyen?
3 “Yü Seigneur Jésus Christ”: Mbeni lege ti hinga wala e leke kekereke ti e na ndo aye so andu Royaume ayeke ti ba yâ ti lisoro ti e. E yeke sala tene lakue ti aye ti mitele na ti aye ti sese so? Tongana a yeke tongaso, a lingbi e ba wala bê ti e azia ti ba ndo na mbage ti aye ti yingo so ayeke ti ngele ngangu. Peut-être a lingbi e sala tene mingi na ndo ‘yungo Seigneur Jésus Christ ahon ti bi bê na ye ti mitele ti sala si nzala ni asi.’—aRom. 13:14.
4 Apendere alingbi ti ‘yü Christ’ na lekengo ye kozoni teti lango so ala yeke lï ande na yâ kusala ti ngoi kue. Mbeni pendere so ayeke la ni na nzala ti mu kusala ti pionnier permanent akono na yâ mbeni kodoro so mingi ni ngobo ti salango ye ti azo ni ahunda na apendere koli ti wara nginza mingi ti bata na tele ti ala. Tongaso, lo bi tele ti lo mingi na yâ dengo buze si lo gue na abungbi nga na fango tene gi tongaso. Na ngoi so lo to nda ti zia bê ti lo na ndo tene ti Jésus so a wara ni na Matthieu 6:33 na lo zia lege ti fini so amu ngoi na bibe ti lo kue, lo mu kusala ti ngoi kue. Fadeso, na mbeni nzoni yingo-ti-hinga, lo yeke sala na Jéhovah, tongana ti so lo tene, ‘na ngangu ti lo kue.’
5 Bible atene so a yeke ye ti ndara ti leke ye teti kekereke. (aProv. 21:5) Zia e kue e sala ni na bingo bê kozoni na ye so bê ti Nzapa aye.—aEph. 5:15-17.