“Nzapa Alingbi Sala Ye Kue”
1 Kozo kusala ti kongrégation ti aChrétien ayeke ti fa nzo tene ti Royaume na ndo sese kue. (Mat. 24:14) Ye so ayeke mbeni kota kusala. Ti azo mingi so ayeke ba e, a ba atene a hunda mosoro mingi ahon ye so e yeke na ni. Ti ambeni zo nde, ti sala kusala so kue ayeke mbeni ye ti ndima ngbanga ti so azo ayeke he e, ayeke kanga lege na e, na ayeke sala ngangu na e. (Mat. 24:9; 2 Tim. 3:12) Awadengo kite atene na bê ti ala kue so kusala ni ayeke mbeni ye so a lingbi ti sala pepe. Ye oko, Jésus atene: “Nzapa alingbi sala ye kue.”—Mat. 19:26.
2 Anzoni tapande ti mu pekoni: Jésus ato nda ti kusala ti lo tongana zo oko na gbele bungbi ti aye kue. Ti tara ti kanga lege na lo si kusala ti lo atambela nzoni pepe, awato azia lo na gbe ti atene ti zonga kue so a lingbi ti tene, nga na nda ni ala sala si lo wara mbeni kuâ ti pasi. Ye oko, na nda ti fini ti lo, Jésus atene na bê kue: “Mbi hon sese so na ngangu awe.” (Jean 16:33) Biani, a yeke mbeni hongo na ngangu so ayeke ngangu ti mä na bê na ni!
3 Adisciple ti Jésus afa oko bibe so ayeke na mbito pepe nga so ayeke na wâ na yâ kusala ti aChrétien. A se mingi ti ala na zaza, a pika ala, a bi ala na da ti kanga, na même a fâ ambeni. Ye oko, ala yeke la ni “na ngia teti A ba ala alingbi na hungo pono ti ye ti kamela ti Iri so.” (Kus. 5:41) Atä so a yeke ngangu na ala ti sala ni, ala sala kusala ti fango nzo tene, so a ba atene a lingbi pepe ti hunzi ni, “na nda ti sese kue.”—Kus. 1:8; aCol. 1:23.
4 Tongana nyen ti sala kusala nzoni na ngoi ti e: E kue e yeke sala kusala ti fango nzo tene ti Royaume na wâ atä a kpa mbeni ye so a lingbi ti sala pepe. Atä akangango lege, salango ngangu, kanga, na ambeni ngangu tara nde ti kaï kusala ti e, kua ni ayeke tambela nzoni. A lingbi ti duti tongaso tongana nyen? “Na lege ti ye ti bira pepe, wala na lege ti ngangu pepe, me na lege ti Yingo ti Mbi, L’Eternel Ti Sabaoth atene.” (Zach. 4:6) Teti Jéhovah ayeke na peko ti e, ye oko alingbi pepe ti kaï kusala ti e!—aRom. 8:31.
5 Tongana e fa tene, e yeke na nda ti tene oko pepe ti sala kamela wala ti duti na mbito wala ti ba so e lingbi pepe. (2 aCor. 2:16, 17) E yeke na anda ti tene ahon ye kue ti gue na li ni na yâ kangbingo nzo tene ti Royaume. Na ngangu ti Jéhovah, e yeke sala “ye so azo alingbi sala pepe”!—Luc 18:27.