“Mu Ngoi Mingi” na yâ Kusala ti Mo
1 Tongana e diko so bazengele Paul ayeke leke atente na ngoi so lo yeke na Corinthe, e lingbi ti tene so kusala so azi lege na lo mingi pepe ti fa tene. Ye oko, Kusala 18:5, (NW) atene: “Paul ato nda ti mu ngoi mingi ti fa tene, na salango tene ti témoin na aJuif so Jésus ayeke Christ.” Ngbanga ti nyen Paul amu ngoi ti lo la ni mingi na yâ kusala ti fango tene? Atä so mingi ti azo so ayeke na Corinthe aga awamabe awe, Seigneur afa biani so ambeni zo nde mingi angbâ so a lingbi a sala si ala ga adisciple. (Kus. 18:8-11) E yeke nga na oko nda ti tene so ti mu ngoi mingi na yâ kusala ti e? Biani. A lingbi ti wara azo mingi na ti fa tâ tene na ala.
2 E mu ngoi mingi na yâ kusala ni na nze ti avril: A lingbi ti tene so a yeke ye so e zia na gbele e ti duti na aye mingi ti sala na yâ fango nzo tene nze oko oko. Ye oko, ambeni nze azi mbilimbili lege na e ti “mu ngoi mingi” na yâ kusala so. Ye so andu nze ti avril, na kota mbage ti ngoi ti Mémorial. Dutingo ti mo amu lege na mo ti sala kusala ti pionnier auxiliaire wala ti kono ngangu ti mo na yâ kusala na ngoi so? Awafango tene mingi so ayeke sala ni awara adeba nzoni mingi. (2 aCor. 9:6) Tongana mo yeke sala ye kue so mo lingbi ti sala, dabe ti mo so bê ti Jéhovah anzere na bango kusala so mo sala na âme ti mo kue. (Luc 21:2-4) Atä dutingo ti mo ayeke tongana nyen, zia na gbele mo ti “mu ngoi mingi” na yâ kusala ti mo na nze ti avril. Na glisa pepe ti mu rapport ti kusala ti mo na hunzingo ti nze ni si a lingbi diko ngangu ti mo na popo ti angangu so tanga ti azo ti Jéhovah asala.
3 Sala vizite na afini zo so aga na Mémorial: Tondo ti kusala ti ngu so ahon so asigigi na yâ Tour ti Ba Ndo ti kozo lango ti nze ti Janvier ngu 2001, alembeti 28-31, teti akodoro ti do na ti bê Afrika, afa so azo saki ngbangbo mingi aga na Mémorial. Ade a hinga pepe wungo ti azo kue so aga na Mémorial na ngu so. Ye oko, atondo ni afa so pendere beku ayeke dä teti kota kusala ti ‘kongo le-kobe.’ (Mat. 9:37, 38) Tongaso, leke hio ti sala vizite na azo so asala nzala ti tene ni, so aga na Mémorial, ti mu maboko na ala na lege ti yingo. Ti zia si alango ahon ti sala avizite tongaso alingbi ti mu lege na ‘wato sioni ti ga na ti gboto ye so a lu na yâ bê ti ala.’ (Mat. 13:19, NW) Fade mbeni vizite so a sala hio ayeke fa biani so mo “mu ngoi mingi” na yâ kusala ti mo.
4 Ngbâ ti mu maboko na azo so azia ti fa tene: Na nze ti février, a to nda ti sala kota ngangu ti mu maboko na ala so azia ti fa tene. Tongana ambeni ayeke dä so ade a sala vizite pastorale na ala pepe, a lingbi a-ancien aleke biani ti sala vizite na ala kozoni si nze ti avril ahunzi. Fade a-ancien ayeke sala ngangu ti hinga kota ye so ayeke na gunda ti kpale ti zo oko oko na tongana nyen ti mu maboko na lo nzoni ahon ti kiri ti sala na Jéhovah na wâ. Maboko so a mu na ndoye afa so a-ancien ayeke ba na nene ni kungba ti ala tongana aberger ti “kundu ti Nzapa.” (1 Pi. 5:2, NW; Kus. 20:28) Numéro ti La Tour de Garde ti lango 15 ti nze ti septembre ngu 1993, alembeti 22-3, amu apendere wango so a-ancien alingbi ti sala kusala na ni na ngoi so ala yeke ba oko ti ambilimbili kpale oku so azo so azia ti fa tene alingbi ti wara. Beku ni ayeke ti tene a kpengba ambeni ti kiri ti mu tele na yâ kusala ti fango tene na nze ti avril.
5 Mu maboko na azo mingi ti ga awafango tene so ade amu batême pepe: A ba so amolenge ti mo alingbi awe ti ga afini wafango nzo tene? Ka ti azo so mo yeke manda Bible na ala ayeke tongana nyen? Tongana a-ancien ayeda na ala, nze ti avril alingbi ti duti mbeni pendere ngoi pepe teti ala ti to nda ti fa tene? Tongana mbeni zo ayeke gue na li ni na amanda awe brochure Ahunda nga na buku Hingango Ye, lo lingbi ti ngbâ ti manda mbeni use buku ni: a lingbi ti duti buku Tene ti Nzapa, wala buku Tâ Siriri, wala buku Beoko na yâ Vorongo. Ye so mo zia na gbele mo ayeke ti mu maboko na wamandango ye ni ti wara kota hingango ye ti tâ tene, ti lingbi ti ga mbeni wafango tene so ade amu batême pepe, na ti ga mbeni Témoin ti Jéhovah so amu tele na Nzapa na so akamata batême.—aEph. 3:17-19; 1 Tim. 1:12; 1 Pi. 3:21.
6 Tâ bingo bê ti mo lakue na ndo ti awamandango ye ti mo alingbi ti mu maboko na ala ti sala ye alingbi na tâ tene na yâ fini ti ala. Mbeni Témoin atingbi na mbeni koli na wali ti lo so ayeke akangba na so ayeda na bê kue ti manda Bible. Ye oko, teti ayenga ota na peko ti tele, koli ni na wali ti lo amanda Bible ni pepe. Na nda ni, ita ni ato nda ti manda Bible na ala. Na pekoni, a lingbi ti tene so na ndo ti ayenga use, ala manda ye pepe na yenga oko. Ye oko, na nda ni, wali ni ague na li ni juska ti wara batême. Ita-koli ni atene: “Na peko ti batême ti lo, lê ti wali ni asi na ngule ti ngia, so asala si mbi nga na wali ti mbi e toto teti so e yeke na ngia.” Biani, ti “mu ngoi mingi” ti fa nzo tene aga na kota ngia!
7 Prophétie ti Bible na aye so asi na ndo ti sese afa so e lï mingi na yâ lâ ti nda ni. Fadeso a yeke ngoi teti azo kue ti Nzapa ti “mu ngoi mingi” na yâ fango nzo tene na azo. Bazengele Paul amu beku so kusala tongaso ayeke biani “senge pepe na yâ Seigneur.”—1 aCor. 15:58.