Duti na nzara ti sala ye ti nzoni!

¹ Tongana e ga ndulu na ngoi ti Mémorial ti ngu 2003, e yeke na anda ti tënë mingi ti duti na “nzara ti sala ye ti nzoni.” (1 Pi. 3:13). Kota nda ti tënë na popo ni kue ayeke sandaga ti kota ngele ti Jésus Christ (Mat. 20:28; Jean 3:16). Na ndo tënë so, bazengele Pierre asû lani na mbeti: ‘Ye so azi i na yâ salango ye ti i so i wara nzoni dä oko pëpe, i hinga ni awe. Ye ni alingbi ti buba tongana lor wala nginza pëpe; me ye so azi i ayeke mênë ti Christ so ayeke ye ti kota ngele; Christ ayeke tongana molenge ti taba so mbeni sioni ye oko ayeke na tele ti lo pëpe.’ (1 Pi. 1:18, 19, FM 01). Bê ti kiri singila ndali ti fä ti ndoye so adö bê ayeke pusu e ti mû ngoi mingi ti sala ye ti nzoni, na hingango so Jésus “amû Lo mveni teti e, si Lo ton e na yâ siokpari kue, na Lo sukula azo teti Lo mveni si ala ga azo ti Lo, azo so ayeke na nzara ti sala nzo kusala.”​—Tite 2:14; 2 aCor. 5:14, 15.

² Tongana e yeke sala ye so anzere na lê ti Nzapa, e yeke duti na nzoni songo na lo na e yeke duti na gbe ti batango ndo ti lo ti ndoye. Pierre akiri atene: “Lo so aye ti ndoye fini, na lo ye ti bâ lâ ti nzoni, . . . a lingbi lo zia sioye, na lo sala nzoni; a lingbi lo gi lege ti siriri, na lo tambela dä. Teti lê ti Seigneur ayeke na ndo azo ti mbilimbili, na mê ti Lo ayeke mä sambela ti ala”. (1 Pi. 3:10-12). Na yâ ti angoi ti kpale so, a yeke mbeni ye ti deba nzoni ti hinga so lê ti Jéhovah ayeke na ndo e, na lo yeke ndulu ti sala ye ndali ti e, ti “bata [e] tongana lê ti Lo mveni.”​—Deut. 32:10; 2 Chron. 16:9.

³ Atâa so ala yeke na yâ atara, akozo Chrétien so Pierre asû lani mbeti so na ala asi singo na wâ so alingbi ti mingo ni pëpe, na ala fa nzo tënë na ndo kue (1 Pi. 1:6; 4:12). A yeke nga legeoko tongaso na popo ti awakua ti Nzapa laso. Atâa so e yeke na “lâ ti ye ti ngangu”, bê ti kiri singila teti nzoye ti Jéhovah apusu e ti sala na wâ ye so Nzapa aye (2 Tim. 3:1; Ps. 145:7). Zia e bâ ambeni nzo kusala so e yeke bi tele ti e dä ande na ngoi ti Mémorial.

⁴ Tisa ambeni zo na Mémorial: Mbeni lege so e lingbi ti fa na gigi bê ti kiri singila teti matabisi ti sandaga ti kota ngele ti Christ so adö bê ayeke ti duti dä na ngoi ti matanga ti dango bê na kui ti Jésus so ayeke sala ni ngu oko oko. Fade a yeke sala matanga ti ngu so na mercredi lango 16 ti avril na peko ti lindango ti lâ (Luc 22:19, 20). Na ngu so ahon, teti akongregation 94 600 na ndo sese kue, e wara kota wungo ti azo 15 597 746! So ti tene azo ahon 220 000 na ndo ti ala so aga na ti ngu so ahon.

⁵ Fade azo oke ayeke ga na ti ngu so? Ye ni kue andu gi ngangu so e yeke sala ande na bê kue ti wa ambeni zo ti bungbi na e. To nda ti sû iri ti ala kue so mo ye ande ti tisa ala. A yeke nzoni mo to nda ni na sewa ti mo mveni. Tongana mo yeke na mbeni koli wala wali so ayeke Témoin pëpe, fa na lo na bê kue so mo ye ti tene mo na lo ague. Mbeni koli so ayeke Témoin ti Jéhovah pëpe atene so lo gue na Mémorial na ngu so ahon ngbanga ti so lo bâ so guengo na matanga ni ayeke kota ye mingi na lê ti wali ti lo. Na pekoni, mo lingbi ti sû na ndo mbeti ni iri ti asongo ti mo, avoizin, azo ti place ti kua wala akamarade ti ekole. Girisa pëpe ti tisa azo so mo manda Bible na ala.

⁶ Na peko ti so mo sû iri ti azo ni awe, leke mbeni ngoi ti mû mbeti ti tisango ndo ni na zo oko oko kue. Sala kusala na ambeti ti tisango ndo na Mémorial. Sû na gbe ti mbeti ni ngoi nga na ndo so a yeke sala ande Mémorial ni dä, ti mû maboko na azo ni ti dabe na ni. Tongana lango 16 ti avril aga ndulu, dabe ti ala so mo sû iri ti ala na mbeti. Mo mveni mo lingbi ti gue ti bâ ala wala ti hiri ala na téléphone. Zia e mû maboko na azo mingi ti gue na kota ngoi so ayeke nzoni-kue.

⁷ Mû maboko na azo so aga na Mémorial: Bï ti Mémorial ayeke ka lakue mbeni ngoi ti kota ngia. E yeke wara lege ti yamba azo so, mingi ni, ayeke gue na abungbi ti e pëpe. Leke tele ti ga hio na ti ngbâ kete na peko ti bungbi, tongana ndo so mo lango dä amû lege na mo ti sala tongaso. Mû li ni ti hinga nzoni afini zo so aga. Yamba ala na wâ.​—aRom. 12:13.

⁸ Lege ayeke dä ti mû maboko na ambeni zo so aga na Mémorial ti gue na li ni mingi na lege ti yingo na mandango Bible? Sala ngangu ti wara a-iri na a-adresse ti azo so a tisa ala, so ade a sala vizite na ala pëpe, ti kiri ti bâ ala. Na mungo maboko na lege ti ndoye, ambeni alingbi ti gue na li ni ti ga awafango tënë so ade ti mû batême pëpe kozoni na Mémorial ti ngu ti peko. Na ngoi so mo yeke sala vizite na azo so aga na Mémorial, hunda na ala ti ga ti mä diskur so ayeke nde, so a yeke sala ni na lango 27 ti avril.

⁹ Mo lingbi ti mû kusala ti pionnier na ngoi ni so? Ngu oko oko wâ so e yeke na ni teti Jéhovah ayeke pusu e ti sala ngangu ti bi tele ti e kue na yâ fango tënë na ngoi ti anze so azia ni nde teti kusala ti aChrétien. Na ngu so ahon, na yâ ti akodoro ti Bê na Do ti Afrika so a sigigi na arapport ti ala na yâ Kusala ti Royaume so, a wara apionnier auxiliaire 8 970 na nze ti mars nga 3 332 na nze ti avril. Ngangu so akongregation kue abungbi legeoko ti fa nzo tënë na wâ na ngoi ti Mémorial alingbi ti ga na aye ti nzoni.

¹⁰ Mbeni kongregation so ayeke na awafango tënë 107 na apionnier permanent 9, atene so nze ti avril so ahon ayeke tâ mbeni “nze so ayeke nzoni mingi ahon atanga ni kue”. Ala wara aita 53 so amû kua ti pionnier auxiliaire, so na popo ni a-ancien nga na aserviteur ti mungo maboko ni kue. Tongana nyen a-ancien amaï lani nzara ti mungo kusala ti pionnier auxiliaire na nze ni so? Ala to nda ni lani ti kono nzara ni kozoni na nze ti mars na avril. Ala wa aita mingi ti mû mbage ti ala dä. A leke lani abungbi ti fango tënë na angoi nde nde na yâ lango so alingbi na azo kue na yâ kongregation. A gboto lani lê na ndo fango tënë na téléphone, mbilimbili teti azo so mbakoro awoko ala.

¹¹ Mbeni ita-wali so ayeke na ngu 86, so alingbi pëpe ti tambela teti akpale ti kobela, asû iri ti lo lani na ndo mbeti ti mungo kusala ti pionnier auxiliaire. Lo komanse na ndapelele, lo sala angbonga use na fango tënë na téléphone na dutingo na tele ti table ti cuisine. Lo hu tele ti lo teti ambeni ngbonga. Na pekoni, lo kiri lo fa tënë na téléphone ni teti ambeni ngbonga nga. Lo wara mbeni wali so koli ti lo na akete molenge ti lo use kue akui na yâ ti angu use so ahon. Wali so ahinga pëpe ngbanga ti nyen Nzapa azia lege na amara ti sioni ye tongaso ti si. A fa na lo nzo tënë na a to nda ti sala étude na lo. Fango tënë na téléphone na lakui nga na ambeni ngoi ayeke mbeni lege so ayeke nzoni mingi ti wara azo so alango na yâ ti ada wala ando so zo alingbi ti li dä kirikiri pëpe. A yeke mû lege na awafango tënë ti wara azo so ayeke na yanga-da pëpe na ndapelele.

¹² A-ancien ni ahunzi tondo ti ala na tenengo so: “E wara tâ mbeni pendere ngoi na e yekia amatabisi nga na adeba nzoni so Jéhovah azi lege na e ti wara ni.” Na lekengo aye nzoni kozoni, kongregation ti mo nga alingbi ti wara ngia na yâ adeba nzoni tongaso.

¹³ Sala si azo kue amû mbage ti ala na fango tënë: Ndoye ti e na mbage ti Nzapa nga na amba ti e apusu e ti vo ngoi nze oko oko ti fa nzo tënë na ambeni zo (Mat. 22:37-39). A yeke nzoni asurveillant ti Mandango Buku na azo ti mungo maboko na ala asala ngangu ti mû maboko na aita so ayeke na yâ groupe ti ala ti fa tënë nze oko oko. Mbeni pendere lege ti sala ni ayeke ti mä tele kozoni ti fa tënë na ambeni mbilimbili ita na yâ groupe ni. Ahon ti ku juska na hunzingo ti nze ti sala ni, to nda ni hio. Fade ye so ayeke zi alege mingi na mo ti mû maboko na lege ti ndoye.

¹⁴ Na yâ groupe ti mandango buku ti mo, awafango tënë so mbakoro awoko ala, so ayeke na kota kpale ti mû mbage na fango tënë, ayeke dä? Tongana ambeni alango na yâ ada ti batango azo ti ngangu kobela wala ala ngbâ gi ngbango na yâ ti da, biani alege ti tene ala fa tënë ayeke mingi pëpe. Me na salango kusala nzoni na adutingo ti ala so ti sala si lumière ti ala aza, ala lingbi ti pusu azo so abâ nzo kusala ti ala ti sala nzara ti tâ tënë (Mat. 5:16). A yeke nzoni asurveillant ti mandango buku abâ si mara ti aita tongaso ahinga so ala lingbi ti bi rapport teti apenze-ngbonga 15, 30, 45. Warango lege ti sû na ndo rapport ngoi so ala mû ti fa na tënë ayeke mû wâ na awafango tënë be-ta-zo so, nga a yeke ga na ala nzerengo tele. A yeke mû lege nga ti sala si tondo ti akusala na ndo sese mobimba ti awakua ti Nzapa ayeke tâ na lege ni.

¹⁵ Amaseka so amû ngoi ti ala ti sala ye ti nzoni! So tâ ye ti dengo bê ti bâ so amaseka Chrétien amû ngangu ti ala ti sala na Jéhovah! (aProv. 20:29) Tongana mo yeke maseka, tongana nyen mo lingbi ti fa na gigi wâ ti mo na mbage ti Jéhovah na ngoi ti anze ti kusala so azia ni nde?

¹⁶ Tongana mo de ti ga mbeni wafango tënë so ade ti mû batême pëpe na yâ kongregation, mo lingbi ti ga ni? Hunda tele ti mo na ahundango tënë so ge: ‘Mbi hinga angbongboro tâ tënë ti Bible? Mbi ye ti mû mbage ti mbi na yâ kusala ti Royaume? Mbi yeke zia tapande na yâ tambela ti mbi? Mbi lingbi ti sala tënë ti mabe ti mbi mveni na fango na ambeni zo nzo tënë? Bê ti mbi la apusu mbi ti sala ni?’ Tongana mo lingbi ti kiri tënë biani na ahundango tënë so, sala lisoro na babâ na mama ti mo na ndo nzara ti ga mbeni wafango tënë. Ababâ na mama ti mo alingbi ti bâ mbeni oko ti a-ancien so ayeke na yâ ti komite ti kusala.

¹⁷ Tongana mo yeke mbeni wafango nzo tënë awe, mo lingbi ti gbu ngoi so ekole akanga kete ti kono mungo mbage ti mo na yâ kusala ti fango tënë? Na lege ti mbeni nzoni programme nga na mungo maboko ti ababâ na mama nga na ti ambeni ita, amaseka mingi so amû batême awe alingbi ti mû kusala ti pionnier. Tongana lege ayeke dä pëpe ti sala ni, leke na bê ti mo ti kono mungo mbage ti mo na yâ fango tënë. Zia aye na gbele mo ti si dä. Na ndo ti ziango na gbele mo ti kono angbonga so mo yeke fa na tënë, zia nga na gbele mo ti maï kode ti kusala ti mo. Mo lingbi peut-être ti sala ngangu ti diko mbeni versê na yanga ti da oko oko, ti sala afini vizite nzoni ahon ti kozo, ti to nda ti a-étude, wala ti gue juska ti fa tënë na téléphone wala na yâ ambeni mbage nde ti kusala ni. Ka ti zia na gbele mo ti tisa mbeni voizin, mbeni kamarade ti ekole, wala mbeni songo ti ga na Mémorial ti ngu so ayeke tongana nyen? Mungo mbage mingi na akusala ti aChrétien ayeke ga ande na adeba nzoni na a yeke mû maboko na ambeni na yâ kongregation.​—1 aThes. 5:11.

¹⁸ Mû maboko na afini zo ti gue na li ni: Na ngu ti kusala so ahon, a sala a-étude 92 826 nze oko oko na yâ akodoro ti Bê na Do ti Afrika, so arapport ti ala asigigi na yâ Kusala ti Royaume so. Tongana ngoi ayeke hon, mingi ti awamandango Bible so ayeke gue ande na li ni ti mû tele ti ala na Nzapa na ti wara batême. Ye oko, kozoni si ala si na ye so, a yeke nzoni e mû maboko na ala ti lingbi ti ga awafango nzo tënë. So ayeke mbeni kpengba kapa ti fango ye na afini zo ti ga adisciple ti Jésus Christ (Mat. 9:9; Luc 6:40). Mo yeke na mbeni wamandango Bible so ayeke ndulu ti si na kapa so?

¹⁹ Tongana mo hinga mbilimbili pëpe guengo na li ni ti zo so mo yeke manda Bible na lo, gi mungo maboko ti surveillant ti mandango buku ti mo wala ti surveillant ti kusala. Peut-être mo lingbi ti hunda lo ti gue na mo na étude ni. Aita so ayeke na ahingango ye mingi so alingbi ti mû lege na ala ti tara guengo na li ni ti wamandango Bible ni na lege ti yingo. Ala yeke na awango so ayeke mû ande maboko na wamandango Bible ni ti ngbâ lakue ti gue na li ni na lege ti yingo.

²⁰ Tongana zo so mo manda Bible na lo ayeke na nzara ti ga mbeni wafango tënë so ade ti wara batême pëpe, na tongana mo bâ so lo lingbi awe, sala tënë ni na surveillant-président. Fade lo yeke leke na a-ancien use ti sala lisoro na mo nga na wamandango Bible ni ti bâ wala lo lingbi biani, na salango kusala na atënë ti buku Notre ministère, alembeti 98-99 (Bâ Tour ti Ba Ndo ti 15 novembre 1988, lembeti 17 na Français). Tongana a yeda na lo, a yeke nzoni mo to nda ti fa lege na lo fade fade. Gi na peko ti so lo bi kozo rapport ti lo awe, fade a yeke tene na kongregation so lo ga fadeso mbeni wafango tënë so ade ti mû batême pëpe. Beku ti e ayeke so afini wafango tënë saki mingi, amaseka na kangba, alingbi ti sala kpengba ye so na ngoi ti anze ti kusala so azia ni nde.

²¹ Lekengo aye so nzoni amû maboko ti sala nzoni mingi: Lekengo aye kozoni ayeke mû ande maboko na nzoni maïngo ti akusala ti e ti Chrétien na ngoi ti Mémorial so (aProv. 21:5). Aye mingi ayeke dä so a lingbi a-ancien abi lê na ndo ni.

²² Ti mû maboko na kongregation ti sala kusala mingi na yâ fango tënë, a yeke nzoni a-ancien aleke aye, so alingbi ti mû maboko, ti sala abungbi ti fango tënë na yâ yenga ni kue nga na nda-yenga. A yeke nzoni surveillant ti kusala amû li ni na lekengo aye so. A lingbi ti zia ambeni bungbi ti fango tënë hio na ndapelele, na peko ti midi wala hio na lakui? A yeke nzoni a sala tënë ti lekengo ye so na kongregation. A lingbi ti mû maboko tongana a zia programme ni na tableau ti ambeti.

²³ A yeke nzoni a-ancien abâ si gere ti aye kue so a leke ni teti matanga ti Dango Bê aluti nzoni kozoni na lango 16 ti avril. Ye so andu mango tele na ndo salango kusala na Da ti Royaume na ambeni kongregation so ayeke bungbi dä, sukulango Da ti Royaume, sorongo azo ti yambango zo na azo ti hon na mapa nga na vin ni, nga warango mapa na vin ni. A yeke nzoni a sala tënë na kongregation na ndo ngoi nga na ndo ti salango Mémorial ni, nga na aye so a gbian na yâ programme ti bungbi ti yenga ni. Fade alekengo aye tongaso, so a sala ni na bê kue ayeke mû lege ti tene matanga ni ‘atambela mbilimbili nga na lege ni.’​—1 aCor. 14:40.

²⁴ Amokonzi ti sewa aye peut-être ti mû mbage ti ngoi ti mandango ye ti ala na sewa ti sala lisoro na ndo lege so sewa ni alingbi ti mû mbage mingi ahon ti kozo na yâ kusala na ngoi ti Mémorial ni. Sewa ti mo kue alingbi ti mû kua ti pionnier? Wala sewa ni alingbi ti mû maboko na mbeni oko wala mingi ti ala ti sala ni? Tongana lege ayeke dä pëpe ti sala ni, zia na gbele sewa ni ti mû ngoi mingi na yâ fango tënë. Mbeni kete molenge ayeke dä na yâ sewa ni so, tongana a mû na lo gi kete wango na mungo maboko, alingbi ti ga mbeni wafango tënë so ade ti mû batême pëpe? Azo oke sewa ti mo alingbi ti tisa ala na Mémorial ti ngu so? Nzoni lekengo ye ayeke ga ande na adeba nzoni mingi nga na kota ngia na sewa ti mo.

²⁵ Sala kusala na tanga ti ngoi so angbâ: Na sungo mbeti na aChrétien ti kozo siècle, bazengele Pierre adabe ti ala lani na ndo ngoi so a lingbi zo asala ye hio ngbanga ti so hunzingo ti aye ti aJuif aga ndulu awe (1 Pi. 4:7). Laso ye kue afa na gigi polele so hunzingo ti sese kue aga ndulu. Lâ oko oko, a yeke nzoni ye so e sala na fini ti e afa so e mä na bê na ye so. Teti so e yeke awakua ti Jéhovah so ayeke na wâ, a yeke nzoni e bi lê na ndo kusala ti fango nzo tënë so a lingbi a sala ni hio.​—Tite 2:13, 14.

²⁶ A yeke fadeso ngoi ti fa na gigi wâ na kusala! Gbu li na ndo ye so Jéhovah asala teti mo, teti sewa ti mo na teti kongregation ti mo. Atâa so e lingbi lâ oko pëpe ti futa lo teti aye ti nzoni mingi so e wara na lege ti lo, e lingbi ti voro lo na âme ti e kue (Ps. 116:12-14). Fade Jéhovah ayeke futa angangu so e sala na bê kue (aProv. 10:22). Zia e kue e duti “na nzara ti sala ye ti nzoni” na ngoi ti konongo kusala so azia nde, “tongaso Nzapa alingbi wara gloire na yâ ye kue na lege ti Jésus Christ.”​—1 Pi. 3:13; 4:11.

[Kete tënë na lembeti 3]

Wungo ti azo na Mémorial na ndo sese kue

1999 14 088 751

2000 14 872 086

2001 15 374 986

2002 15 597 746

[Kete tënë na lembeti 4]

Zo wa mo yeke tisa lo ande na Mémorial?

□ Sewa ti mo mveni na asongo ti mo

□ Avoizin na azo so mo hinga lê ti ala

□ Akamarade ti place ti kua na ti ekole

□ Avizite na a-étude

[Kete tënë na lembeti 7]

Mû maboko na ala so aga na Mémorial

□ Yamba zo ni na wâ

□ Sala afini vizite

□ Hunda na ala ti manda Bible

□ Tisa ala ti ga na diskur so azia ni nde

[Kete tënë na lembeti 8]

Aye wa mo zia na gbele mo teti ngoi ti Mémorial?

□ Tisa mbeni zo ti gue na Mémorial

□ Ga mbeni wafango nzo tënë

□ Fa mbeni wungo ti angbonga ti sala na fango tënë

□ Ti sala si mbeni mbage ti fango tënë aga nzoni

□ Mû kusala ti pionnier auxiliaire

[Kete tënë na gbe ti lembeti 4]

(Bâ tanga ni na l.7, col.1)

[Kete tënë na lembeti 7]

Duti na nzara ti sala ye ti nzoni! (Tanga ni)